ការដឹងគុណ

ព្រះអម្ចាស់បានមានបន្ទូលសន្យាថា « អ្នកណាដែលទទួលគ្រប់ទាំងអស់ដោយអំណរអរគុណ នោះនឹងត្រូវបានធ្វើឲ្យរុងរឿង » ( គ. និង ស. ៧៨:១៩ ) ។ ការដឹងគុណគឺជាអាកប្បកិរិយាលើកតម្កើង និងស្អាងឡើង ។ អ្នកប្រហែលជាអាចនិយាយបានចេញពីបទពិសោធន៍ថា អ្នកមានភាពរីករាយជាងមុន នៅពេលអ្នកមាន ការដឹងគុណនៅក្នុងចិត្ត ។ អ្នកមិនអាចមានភាពល្វីងជូរចត់ អាក់អន់ចិត្ត ឬមានវិញ្ញាណអាក្រក់បានទេ នៅពេលអ្នកមានអំណរគុណនោះ ។

ចូរថ្លែងអំណរគុណចំពោះពរជ័យដ៏អស្ចារ្យទាំងឡាយដែលជារបស់អ្នក ។ ចូរថ្លែងអំណរគុណចំពោះឱកាសដ៏មហិមាដែលអ្នកមាន ។ ចូរថ្លែងអំណរគុណចំពោះឪពុកម្តាយរបស់អ្នក ។ ចូរធ្វើឲ្យពួកលោកដឹងថា អ្នកមានអំណរគុណ ។ ចូរថ្លែងអំណរគុណដល់មិត្តភក្ដិ និងគ្រូបង្រៀនរបស់អ្នក ។ ចូរបង្ហាញអំណរគុណដល់មនុស្សគ្រប់គ្នា ដែលជួយអ្នក ឬសង្គ្រោះអ្នកដោយប្រការណាមួយ ។

ចូរថ្លែងអំណរគុណដល់ព្រះវរបិតាសួគ៌ចំពោះអំពើល្អរបស់ទ្រង់មានសម្រាប់អ្នក ។ អ្នកអាចបង្ហាញការដឹងគុណរបស់អ្នកដល់ព្រះ ដោយទទួលស្គាល់ព្រះហស្តទ្រង់ក្នុងគ្រប់សេចក្ដីទាំងអស់ ដោយថ្លែងអំណរគុណដល់ទ្រង់ចំពោះអ្វីគ្រប់យ៉ាងដែលទ្រង់ប្រទានដល់អ្នក ដោយការរក្សាព្រះបញ្ញត្តិរបស់ទ្រង់ ហើយបម្រើមនុស្សដទៃ ។ ចូរថ្លែងអំណរគុណដល់ទ្រង់ចំពោះព្រះរាជបុត្រាស្ងួនភ្ងារបស់ទ្រង់គឺ ព្រះយេស៊ូវគ្រីស្ទ ។ ចូរបង្ហាញអំណរគុណចំពោះគំរូល្អអស្ចារ្យរបស់ព្រះអង្គសង្គ្រោះ សម្រាប់ការបង្រៀនរបស់ទ្រង់ សម្រាប់ការលូកព្រះហស្តរបស់ទ្រង់មកលើក ហើយជួយអ្នក និងសម្រាប់ដង្វាយធួនដ៏និរន្តរ៍របស់ទ្រង់ ។

ចូរថ្លែងអំណរគុណដល់ព្រះអម្ចាស់ចំពោះការស្តារសាសនាចក្រឡើងវិញ ។ ចូរថ្លែងអំណរគុណដល់ទ្រង់ចំពោះអ្វីគ្រប់យ៉ាងដែលទ្រង់ប្រទានដល់អ្នក ។ ចូរថ្លែងអំណរគុណដល់ទ្រង់ចំពោះមិត្តភក្ដិ និង ក្រុមគ្រួសារ ។ ចូរឲ្យស្មារតីនៃការថ្លែងអំណរគុណដឹកនាំអ្នក ហើយផ្ដល់ពរដល់អ្នកទាំងយប់ទាំងថ្ងៃ ។ ចូរចាប់ផ្តើមមានអំណរគុណ ។ អ្នកនឹងឃើញថា វានាំមកនូវលទ្ធផលយ៉ាងអស្ចារ្យ ។