សិទ្ធិជ្រើសរើស

ព្រះវរបិតាសួគ៌បានប្រទានឲ្យអ្នកនូវសិទ្ធិជ្រើសរើស ជាសមត្ថភាពដើម្បីជ្រើសរើស និង ប្រព្រឹត្តដោយខ្លួនអ្នក ។ សិទ្ធិជ្រើសរើសគឺជាកត្តាចាំបាច់ នៅក្នុងផែនការនៃសេចក្តីសង្គ្រោះ ។ បើគ្មានសិទ្ធិជ្រើសរើសទេ អ្នកនឹងមិនអាចរៀនសូត្រ ឬ រីកចម្រើន ឬ ដើរតាមព្រះអង្គសង្គ្រោះបានឡើយ ។ ជាមួយនឹងសិទ្ធិជ្រើសរើស អ្នក « មានសេរីភាពរើសយកឥស្សរភាព និង ជីវិតដ៏នៅអស់កល្បជានិច្ច តាមរយៈព្រះជាអ្នកសង្រួបសង្រួមដ៏ធំរបស់មនុស្សលោកទាំងអស់ ឬក៏រើសយកការជាប់ឃុំឃាំង និង ការស្លាប់ស្របតាមការជាប់ឃុំឃាំង និង អំណាចរបស់អារក្ស » ( នីហ្វៃទី ២ ២:២៧ ) ។

អ្នកមានអំណាចដើម្បីជ្រើសរើស តាំងពីមុនអ្នកចាប់កំណើតមកម៉្លេះ ។ នៅក្នុងក្រុមប្រឹក្សានៅឯស្ថានសួគ៌ពីមុនជីវិតនេះ ព្រះវរបិតាសួគ៌បានបង្ហាញផែនការទ្រង់ ដែលបូកបញ្ចូលនឹងគោលការណ៍នៃសិទ្ធិជ្រើសរើសផងដែរ ។ លូស៊ីហ្វើរបានបះបោរ ហើយ « បានខំរកបំផ្លាញសិទ្ធិជ្រើសរើសរបស់មនុស្ស » ( ម៉ូសេ ៤:៣ ) ។ ជាលទ្ធផល លូស៊ីហ្វើរ និង ពួកអ្នកដែលដើរតាមវាត្រូវបានបដិសេធមិនឲ្យមានឯកសិទ្ធិទទួលបានរូបកាយរមែងស្លាប់ឡើយ ។ វត្តមានរបស់អ្នកនៅលើផែនដីនេះបញ្ជាក់ថា អ្នកបានប្រើប្រាស់សិទ្ធិជ្រើសរើសរបស់អ្នក ដើម្បីធ្វើតាមផែនការរបស់ព្រះវរបិតាសួគ៌ ។

នៅក្នុងជីវិតរមែងស្លាប់ អ្នកបន្តមានសិទ្ធិជ្រើសរើស ។ ការប្រើប្រាស់របស់អ្នកលើអំណោយទាននេះកំណត់ពីសុភមង្គល ឬការរងទុក្ខក្នុងជីវិតនេះ និងជីវិតបន្ទាប់ ។ អ្នកមានសេរីភាពជ្រើសរើស ហើយប្រព្រឹត្ត ប៉ុន្តែអ្នកគ្មានសេរីភាពរើសយកលទ្ធផលមកពីជម្រើសរបស់អ្នកទេ ។ លទ្ធផលរបស់វាអាចនឹងមិនកើតឡើងភ្លាមៗនោះទេ ប៉ុន្តែវានឹងឲ្យផលមកតាមក្រោយជានិច្ច ។ ការជ្រើសរើសយកអំពើល្អ និង សុចរិតភាពនាំទៅរកសុភមង្គល ភាពសុខសាន្ត និងជីវិតអស់កល្បជានិច្ច ទន្ទឹមនឹងពេលដែលជម្រើសធ្វើឡើងស្របតាមអំពើបាប និងសេចក្ដីអាក្រក់នាំទៅរកទុក្ខព្រួយ និង ភាពសោកសៅ ។

អ្នកទាំងអស់គ្នាទទួលខុសត្រូវចំពោះជម្រើសនានាដែលអ្នកទាំងអស់គ្នារើស ។ អ្នកពុំគួរបន្ទោសកាលៈទេសៈ ក្រុមគ្រួសារ ឬ មិត្តភក្ដិរបស់អ្នកឡើយ ប្រសិនបើអ្នកជ្រើសរើសមិនគោរពប្រតិបត្តិតាមព្រះបញ្ញត្តិទេនោះ ។ អ្នកគឺជាបុត្ររបស់ព្រះដែលមានកម្លាំងដ៏មហិមា ។ អ្នកមានលទ្ធភាពជ្រើសរើសយកសុចរិតភាព និង សុភមង្គល ទោះជាអ្នកស្ថិតក្នុងកាលៈទេសៈណាក៏ដោយ ។

អ្នកក៏ទទួលខុសត្រូវលើការអភិវឌ្ឍទេពកោសល្យ និងសមត្ថភាពទាំងឡាយដែលព្រះវរបិតាសួគ៌បានប្រទានដល់អ្នកផងដែរ ។ អ្នកត្រូវទទួលខុសត្រូវចំពោះទ្រង់សម្រាប់អ្វីដែលអ្នកធ្វើជាមួយនឹងទេពកោសល្យទាំងឡាយរបស់អ្នក និងពីរបៀបដែលអ្នកចំណាយពេលវេលារបស់អ្នក ។ ចូរកុំចំណាយពេលវេលារបស់អ្នកដោយឥតប្រយោជន៍ឡើយ ។ ចូរមានឆន្ទៈធ្វើការយ៉ាងឧស្សាហ៍ ។ ចូរជ្រើសរើសធ្វើកិច្ចការល្អជាច្រើនដោយចិត្តស្ម័គ្រ ។