សមាគមសង្រ្គោះ

សមាគមសង្គ្រោះត្រូវបានបង្កើតឡើងដោយព្យាការី យ៉ូសែប ស៊្មីធ នៅថ្ងៃទី ១៧ ខែ មីនា ឆ្នាំ ១៨៤២ នៅទីក្រុង ណៅវូ រដ្ឋ អិលលីណោយ ។ នៅថ្ងៃបង្កើតសមាគមសង្គ្រោះនេះឡើង សមាគមសង្គ្រោះមានគោលបំណងពីរសំខាន់ ៖ ដើម្បីផ្តល់ការសង្គ្រោះដល់អ្នកក្រីក្រ និងអ្នកខ្វះខាត និងដើម្បីសង្គ្រោះព្រលឹង ។ អង្គការនេះបានបន្តមកទល់សព្វថ្ងៃ ដោយបន្តធ្វើតាមគោលការណ៍ណែនាំលំនាំដើម ។ នៅទូទាំងពិភពលោក បងប្អូនស្រីនៅក្នុងសមាគមសង្គ្រោះធ្វើការជាមួយអ្នកកាន់បព្វជិតភាព ដើម្បីអនុវត្តបេសកកម្មរបស់សាសនាចក្រ ។ ពួកគេគាំទ្រគ្នាទៅវិញទៅមក ពេលដែលពួកគេ ៖

បង្កើនទីបន្ទាល់របស់ខ្លួនអំពីព្រះយេស៊ូវគ្រីស្ទ តាមរយៈការអធិស្ឋាន និងការសិក្សាព្រះគម្ពីរ ។
ស្វែងរកកម្លាំងខាងវិញ្ញាណ តាមរយៈការធ្វើតាមការបំផុសគំនិតនៃព្រះវិញ្ញាណបរិសុទ្ធ ។
លះបង់ខ្លួនគេដើម្បីពង្រឹងអាពាហ៍ពិពាហ៍ ក្រុមគ្រួសារ និងគេហដ្ឋាន ។
ស្វែងរកភាពថ្លៃថ្នូរនៅក្នុងភាពជាម្តាយ និងអំណរនៅក្នុងភាពជាស្ត្រី ។
ត្រេកអរក្នុងការបម្រើ និងទង្វើល្អ ។
ស្រឡាញ់ជីវិត និងការរៀនសូត្រ ។
មានគោលជំហរចំពោះសេចក្ដីពិត និង សេចក្ដីសុចរិត ។
គាំទ្របព្វជិតភាពជាសិទ្ធិអំណាចរបស់ព្រះនៅលើផែនដី ។
ត្រេកអរនឹងពរជ័យទាំងឡាយនៃព្រះវិហារបរិសុទ្ធ ។
យល់ដឹងអំពីជោគវាសនាដ៏ទេវភាពរបស់ខ្លួន និងខិតខំទទួលបានភាពតម្កើងឡើង ។

ប្រសិនបើអ្នកជាសមាជិកក្នុងសមាគមសង្គ្រោះ របៀបមួយដែលអ្នកអាចរួមចំណែកក្នុងបេសកកម្មនៃអង្គការនេះបាន គឺត្រូវទទួលយកការចាត់តាំងមួយ ដើម្បីបម្រើជាគ្រូបង្រៀនសួរសុខទុក្ខ ។ នៅពេលអ្នកចុះសួរសុខទុក្ខ និងបម្រើដល់បងប្អូនស្រីដែលអ្នកត្រូវបានចាត់តាំងឲ្យទៅ ចូរចំណាយពេលវេលាដើម្បីបង្រៀនដំណឹងល្អ និងចិញ្ចឹមបីបាច់មិត្តភាព ។ បន្ថែមពីលើការបម្រើដល់បុគ្គលទាំងឡាយ អ្នកអាចដើរតួយ៉ាងសំខាន់ក្នុងការពង្រឹងដល់ក្រុមគ្រួសារដែរ ។

ថ្នាក់ដឹកនាំនៅក្នុងវួដ និងសាខាត្រូវប្រាកដថា គ្រូបង្រៀនសួរសុខទុក្ខទាំងឡាយ ត្រូវបានចាត់តាំងដល់គ្រួសារបងប្អូនស្រីម្នាក់ៗ ចាប់ពីអាយុ ១៨ ឆ្នាំឡើងទៅ ។ ថ្នាក់ដឹកនាំបព្វជិតភាព និងសមាគមសង្គ្រោះ តាមដានជាមួយគ្រូបង្រៀនសួរសុខទុក្ខ ដើម្បីជួយបំពេញសេចក្តីត្រូវការខាងវិញ្ញាណ និងខាងសាច់ឈាមរបស់បងប្អូនស្រីម្នាក់ៗ ។

ក្នុងនាមជាបងប្អូនស្រីម្នាក់ក្នុងសមាគមសង្គ្រោះ អ្នកគឺជាសមាជិកក្នុងភាពជាបងប្អូនស្រីទូទាំងពិភពលោក ដែលរួបរួមគ្នាក្នុងការលះបង់ចំពោះព្រះយេស៊ូវគ្រីស្ទ ។ អ្នកចូលរួមជាមួយបុត្រីដទៃទៀតរបស់ព្រះ ដែលជាស្ត្រីនៃសេចក្តីជំនឿ គុណធម៌ ទស្សនវិស័យ និងសប្បុរស ដែលមានការចេះដឹងដ៏ពិតថា ជីវិតរបស់អ្នកមានខ្លឹមសារ គោលបំណង និងទិសដៅ ។ តាមរយៈការរួមចំណែករបស់អ្នកនៅក្នុងសមាគមសង្គ្រោះ នោះអ្នកមានឱកាសត្រេកអរក្នុងភាពជាបងប្អូនស្រី និងភាពជាដៃគូ ផ្តល់ការបម្រើដ៏មានខ្លឹមសារ ចែកចាយទីបន្ទាល់ និងទេពកោសល្យរបស់អ្នក ថែមទាំងរីកចម្រើនខាងវិញ្ញាណផង ។