គារវភាព

គារវភាពគឺជាការគោរព និងសេចក្តីស្រឡាញ់ដ៏ជ្រាលជ្រៅ ។ នៅពេលអ្នកមានឥរិយាបទប្រកបដោយគារវភាពចំពោះព្រះ នោះអ្នកគោរពដល់ទ្រង់ សម្ដែងសេចក្តីដឹងគុណរបស់អ្នកចំពោះទ្រង់ និងគោរពតាមព្រះបញ្ញត្តិទាំងឡាយរបស់ទ្រង់ ។

អ្នកគួរតែមានគារវភាពទាំងក្នុងអាកប្បកិរិយា និងឥរិយាបទរបស់អ្នក ។ ឥរិយាបទប្រកបដោយគារវភាពរួមមាន ការអធិស្ឋាន ការសិក្សាព្រះគម្ពីរ ការតមអាហារ និងការថ្វាយដង្វាយមួយភាគក្នុងដប់ និងដង្វាយផ្សេងៗទៀត ។ វារួមមានទាំងការស្លៀកពាក់សមរម្យ និងការប្រើពាក្យសម្ដីស្អាតស្អំ និងថ្លៃថ្នូរ ។ ជម្រៅនៃគារវភាពរបស់អ្នកបង្ហាញនៅក្នុងជម្រើសរបស់អ្នកចំពោះតន្ត្រី និងការកម្សាន្តដទៃទៀត ក្នុងរបៀបដែលអ្នកនិយាយអំពីអ្វីៗដែលពិសិដ្ឋ និងនៅក្នុងរបៀបដែលអ្នកស្លៀកពាក់ និងទង្វើនៅពេលអ្នកចូលរួមព្រះវិហារ និងព្រះវិហារបរិសុទ្ធ ។ អ្នកបង្ហាញគារវភាពរបស់អ្នកចំពោះព្រះអម្ចាស់ នៅពេលអ្នកបម្រើមនុស្សដទៃ ហើយប្រព្រឹត្តចំពោះពួកគេដោយសន្តានចិត្តល្អ និងសេចក្តីគោរព ។

នៅពេលអ្នកកាន់តែមានគារវភាពខ្លាំងឡើង នោះអ្នកនឹងកត់សម្គាល់ឃើញពីការផ្លាស់ប្តូរដ៏ស្ងៀមស្ងាត់មួយនៅក្នុងជីវិតរបស់អ្នក ។ ព្រះអម្ចាស់នឹងចាក់ស្រោចព្រះវិញ្ញាណរបស់ទ្រង់មកលើអ្នកកាន់តែច្រើន ។ អ្នកនឹងលែងសូវមានបញ្ហា និងការភាន់ច្រឡំទៀតហើយ ។ អ្នកនឹងអាចទទួលបានវិវរណៈ ដើម្បីជួយដោះស្រាយបញ្ហាផ្ទាល់ខ្លួន និងបញ្ហាក្នុងគ្រួសារ ។

គឺដូចជាគារវភាពនាំអ្នកឲ្យកាន់តែមកជិតព្រះដែរ នោះការគ្មានគារវភាពគឺត្រូវទៅនឹងគោលបំណងរបស់បច្ចាមិត្ត ។ សាតាំងនឹងល្បួងអ្នកឲ្យធ្វើតាមនិន្នាការរបស់លោកិយ ឆ្ពោះទៅរកភាពអ៊ូអរ សេចក្តីរំភើបចិត្ត និងការឈ្លោះទាស់ទែងកាន់តែច្រើនឡើង និងឆ្ពោះទៅរកការទប់ចិត្ត និងសេចក្តីថ្លៃថ្នូរកាន់តែតិចទៅ ។ ដូចជាមេបញ្ជាការម្នាក់រៀបចំការឈ្លានពានខាងយោធាដែរ នោះវានឹងព្យាយាមបិទច្រកទំនាក់ទំនងរវាងអ្នក និងព្រះអម្ចាស់ ។ ចូរស្គាល់ ពីកលយុទ្ធទាំងនេះ ហើយព្យាយាមមានគារវភាពក្នុងគ្រប់កិច្ចការដែលអ្នកធ្វើ ។