ការក្បត់សាសនា

ពេលដែលបុគ្គលម្នាក់ៗ ឬ ក្រុមមនុស្សជាច្រើនងាកចេញឆ្ងាយពីគោលការណ៍នៃដំណឹងល្អ ពួកគេស្ថិតនៅក្នុងស្ថានភាពមួយនៃការក្បត់សាសនា ។

រយៈពេលនៃការក្បត់សាសនាទូទៅ បានកើតឡើងពេញអស់ទាំងប្រវត្តិសាស្ត្រនៃពិភពលោក ។ ក្រោយជំនាន់នៃសុចរិតភាព មនុស្សបានវិលត្រឡប់ទៅរកអំពើទុច្ចរិតវិញ ។ គំរូមួយនោះគឺការក្បត់សាសនាដ៏ធំ ដែលបានកើតឡើងក្រោយពីព្រះអង្គសង្គ្រោះបានបង្កើតសាសនាចក្ររបស់ទ្រង់ឡើង ។ បន្ទាប់ពីព្រះអង្គសង្គ្រោះបានសុគត ហើយពួកសាវករបស់ទ្រង់បានស្លាប់អស់ មនុស្សបានធ្វើឲ្យខូចគោលការណ៍នៃដំណឹងល្អ ហើយបានធ្វើការផ្លាស់ប្ដូរដោយគ្មានសិទ្ធិអំណាចនៅក្នុងអង្គការសាសនាចក្រ និង ពិធីបរិសុទ្ធទាំងឡាយនៃបព្វជិតភាព ។ ដោយសារការរីករាលដាលនៃអំពើទុច្ចរិតនេះហើយ ទើបព្រះអម្ចាស់បានដកយកនូវសិទ្ធិអំណាចពីផែនដីវិញ ។

អំឡុងពេលនៃការក្បត់សាសនាដ៏ធំនេះ មនុស្សរស់នៅដោយគ្មានការដឹកនាំពីព្រះតាមរយៈព្យាការីកំពុងរស់នៅនោះទេ ។ សាសនាចក្រជាច្រើនត្រូវបានបង្កើតឡើង ប៉ុន្តែពួកគេពុំមានអំណាចបព្វជិតភាពដើម្បីដឹកនាំមនុស្សទៅរកការចេះដឹងដ៏ពិត អំពីព្រះជាព្រះវរបិតា និង ព្រះយេស៊ូវគ្រីស្ទឡើយ ។ ផ្នែកទាំងឡាយនៃព្រះគម្ពីរដ៏បរិសុទ្ធត្រូវបានបង្ខូច ឬត្រូវបានធ្វើឲ្យបាត់បង់ ហើយគ្មាននរណាម្នាក់មានសិទ្ធិអំណាចដើម្បីផ្ដល់អំណោយទានជាព្រះវិញ្ញាណបរិសុទ្ធ ឬ ធ្វើពិធីបរិសុទ្ធទាំងឡាយនៃបព្វជិតភាពឡើយ ។ ការក្បត់សាសនានេះបានកើតមានរហូតដល់ពេលដែលព្រះវរបិតាសួគ៌ និងព្រះរាជបុត្រាដ៏ជាទីស្រឡាញ់របស់ទ្រង់យាងមកជួប យ៉ូសែប ស៊្មីធ នៅក្នុងឆ្នាំ ១៨២០ ហើយបានចាប់ផ្ដើមការស្ដារឡើងវិញនៃដំណឹងល្អដ៏ពេញលេញ ។

ឥឡូវនេះ យើងរស់នៅក្នុងជំនាន់មួយ ចំពេលដែលដំណឹងល្អនៃព្រះយេស៊ូវគ្រីស្ទត្រូវបានស្ដារឡើងវិញ ។ ប៉ុន្តែ មិនដូចសាសនាចក្រកាលពីអតីតកាលឡើយ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនឹងមិនត្រូវបានយកឈ្នះដោយការក្បត់សាសនាជាសាកលឡើយ ។ ព្រះគម្ពីរបង្រៀនថា សាសនាចក្រនឹងមិនត្រូវបានបំផ្លាញជាថ្មីម្ដងទៀតឡើយ ( សូមមើល គ. និង ស. ១៣៨:៤៤, សូមមើលផងដែរ ដានីយ៉ែល ២:៤៤ ) ។

ទោះបីជានឹងគ្មានការក្បត់សាសនាជាសាកលពីសេចក្ដីពិតទៀតយ៉ាងណាក៏ដោយ ក៏យើងម្នាក់ៗត្រូវតែការពារប្រឆាំងនឹងការក្បត់សាសនាផ្ទាល់ខ្លួនដែរ ។ អ្នកអាចការពារខ្លួនអ្នកប្រឆាំងនឹងការក្បត់សាសនាផ្ទាល់ខ្លួន ដោយការរក្សាសេចក្ដីសញ្ញារបស់អ្នក គោរពតាមព្រះបញ្ញត្តិទាំងឡាយ ធ្វើតាមថ្នាក់ដឹកនាំសាសនាចក្រ ទទួលទានសាក្រាម៉ង់ ហើយពង្រឹងទីបន្ទាល់របស់អ្នកឲ្យបានខ្ជាប់ខ្ជួនតាមរយៈការសិក្សាព្រះគម្ពីរជារៀងរាល់ថ្ងៃ ការអធិស្ឋាន និង ការបម្រើ ។