កិច្ចការផ្សព្វផ្សាយសាសនា

នៅពេលយើងទទួលបានបទពិសោធន៍ពរជ័យនៃការរស់នៅតាមដំណឹងល្អ ជាធម្មតា យើងចង់ចែកចាយពរជ័យទាំងនោះជាមួយមនុស្សដទៃ ។ ព្រះអម្ចាស់បានមានព្រះបន្ទូលអំពីអំណរ ដែលមានក្នុងជីវិតរបស់យើង នៅពេលយើងចែកចាយដំណឹងល្អរបស់ទ្រង់ដូចនេះ ៖

« ហើយបើសិនជាអ្នកត្រូវធ្វើការអស់មួយជីវិតអ្នក ដោយស្រែកប្រាប់ពីការប្រែចិត្តដល់ប្រជាជននេះ ហើយគ្រាន់តែនាំព្រលឹងតែមួយគត់ មករកយើង នោះអ្នកនឹងមានសេចក្ដីអំណរដ៏មហិមាជាមួយអ្នកនោះនៅក្នុងនគរនៃព្រះវរបិតារបស់យើង !

ហើយឥឡូវនេះ បើសិនជាអ្នកនឹងមានសេចក្តីអំណរដ៏មហិមាដល់ព្រលឹងតែមួយ ហើយយ៉ាងណាទៅ ដែលអ្នកបាននាំមករកយើងនៅក្នុងនគរនៃព្រះវរបិតារបស់យើង នោះអ្នកនឹងមានសេចក្តីអំណរដ៏មហិមា បើសិនជាអ្នកបាននាំព្រលឹងជាច្រើនមករកយើង ! » ( គ. និង ស. ១៨:១៥–១៦ ) ។

កាតព្វកិច្ចផ្សព្វផ្សាយសាសនារបស់សមាជិកគ្រប់រូប

ព្រះអម្ចាស់បានមានបន្ទូលប្រកាសថា កិច្ចការផ្សព្វផ្សាយសាសនាគឺជាការទទួលខុសត្រូវរបស់ពួកបរិសុទ្ធទាំងអស់ ( សូមមើល គ. និង ស. ៨៨:៨១ ) ។ ក្នុងនាមជាសមាជិកសាសនាចក្ររបស់ព្រះអម្ចាស់ អ្នកអាចធ្វើបានតាមរយៈអំពើល្អនៃជីវិតរបស់អ្នក និងកម្លាំងនៃទីបន្ទាល់របស់អ្នក ក្នុងការរៀបចំសមាជិកក្រុមគ្រួសារ មិត្តភក្តិ និងមនុស្សដែលអ្នកស្គាល់ដទៃទៀត ឲ្យជួបរៀនជាមួយអ្នកផ្សព្វផ្សាយសាសនាពេញម៉ោង ។

សារលិខិតដ៏មានឥទ្ធិពលបំផុតក្នុងកិច្ចការផ្សព្វផ្សាយសាសនា ដែលអ្នកអាចចែកចាយបាន គឺជាគំរូរបស់អ្នកនៃការរស់នៅក្នុងជីវិតពួកបរិសុទ្ធថ្ងៃចុងក្រោយដ៏រីករាយមួយ ។ ចូរចងចាំថា មនុស្សមិនចូលរួមសាសនាចក្រ ដោយសារតែគោលការណ៍ទាំងឡាយនៃដំណឹងល្អដែលពួកគេរៀនតែម្យ៉ាងប៉ុណ្ណោះទេ ។ ពួកគេចូលរួមមកពីពួកគេទទួលបានអារម្មណ៍មួយ ដែលចាប់ផ្តើមបំពេញសេចក្តីត្រូវការខាងវិញ្ញាណរបស់ពួកគេ ។ ប្រសិនបើអ្នកមានចិត្តស្មោះចំពោះមិត្តភាពរបស់អ្នកជាមួយពួកគេ នោះពួកគេនឹងអាចទទួលអារម្មណ៍ពីព្រះវិញ្ញាណ អំពីសក្ខីភាព និងសុភមង្គលរបស់អ្នក ។

បន្ថែមពីលើការធ្វើជាគំរូល្អ អ្នកអាច « ប្រុងប្រៀបជានិច្ច ដោយសុភាព ហើយកោតខ្លាច ដើម្បីនឹងតបឆ្លើយដល់អ្នកណាដែលសួរពីហេតុនៃសេចក្តីសង្ឃឹមរបស់អ្នករាល់គ្នា » ( ពេត្រុស ទី១ ៣:១៥ ) ។ អ្នកអាចអធិស្ឋានទូលសូមឱកាសដើម្បីប្រាប់មនុស្សដទៃអំពីដំណឹងល្អដែលបានស្តារឡើងវិញ ។ បន្ទាប់មក អ្នកអាចប្រុងប្រៀបខ្លួនបាន ព្រោះមានមនុស្សជាច្រើនចង់បានសេចក្តីពិតយ៉ាងខ្លាំង ។

ការបម្រើបេសកកម្មពេញម៉ោង

បន្ទាប់ពីបានមានព្រះជន្មរស់ឡើងវិញ ព្រះអម្ចាស់បានត្រាស់បង្គាប់ពួកសិស្សរបស់ទ្រង់ឲ្យ « ទៅ … បញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធ » ( ម៉ាថាយ ២៨:១៩ ) ។ ដើម្បីបំពេញតាមសេចក្ដីត្រាស់បង្គាប់នេះ យុវជនដែលមានសមត្ថភាពនៅក្នុងសាសនាចក្រ មានកាតព្វកិច្ចរៀបចំខ្លួនខាងវិញ្ញាណ ខាងសាច់ឈាម និងខាងសតិអារម្មណ៍ ដើម្បីបម្រើជាអ្នកផ្សព្វផ្សាយសាសនាពេញម៉ោង ។ ស្ត្រីនៅលីវ និងគូស្វាមីភរិយាដែលមានវ័យចំណាស់ ក៏មានឱកាស បម្រើជាអ្នកផ្សព្វផ្សាយសាសនាពេញម៉ោងដែរ ។ ប្រសិនបើអ្នកមានបំណងប្រាថ្នាបម្រើជាអ្នកផ្សព្វផ្សាយសាសនាពេញម៉ោង ចូរពិភាក្សាជាមួយនឹងប៊ីស្សព ឬប្រធានសាខារបស់អ្នក ។

ការងារបម្រើដល់សមាជិកថ្មីក្នុងសាសនាចក្រ

កិច្ចការអ្នកផ្សព្វផ្សាយសាសនាបូករួមទាំងការជួយ និងការគាំទ្រដល់អ្នកទាំងឡាយណាដែលចូលរួមសាសនាចក្រផងដែរ ។ នៅពេលអ្នកពិចារណាអំពីការទទួលខុសត្រូវនេះ ចូរចងចាំថា សមាជិកថ្មីអាចប្រឈមមុខនឹងឧបសគ្គជាច្រើន នៅពេលពួកគេចូលរួមសាសនាចក្រ ។ ជាញឹកញាប់ ការតាំងចិត្តថ្មីរបស់ពួកគេតម្រូវឲ្យពួកគេបោះបង់ចោលទម្លាប់ចាស់របស់ពួកគេចោល ហើយចាកចេញពីមិត្តភក្តិចាស់ៗ និងសហគមន៍នានា ។ លើសពីនេះទៅទៀត សាសនាចក្រណែនាំមាគ៌ាជីវិតមួយដែលហាក់បីដូចជាខុសប្លែក ហើយមានតម្រូវការជាច្រើន ។

សមាជិកថ្មីគ្រប់រូបនៃសាសនាចក្រមានសេចក្តីត្រូវការបីយ៉ាងគឺ ៖ មិត្តភក្ដិ ការទទួលខុសត្រូវ និងការចិញ្ចឹមបីបាច់ « ដោយព្រះបន្ទូលដ៏ល្អនៃព្រះ » ( មរ៉ូណៃ ៦:៤ ) ។ អ្នកអាចធ្វើជាផ្នែកមួយនៃកិច្ចខិតខំក្នុងការផ្តល់ជំនួយនេះ ។ អ្នកអាចតែងតែធ្វើជាមិត្តភក្តិម្នាក់ ។ ទោះបីជាអ្នកមិនកាន់តំណែងដើម្បីផ្ដល់ការហៅបម្រើជាផ្លូវការ ការទទួលខុសត្រូវណាមួយក្នុងសាសនាចក្រក៏ដោយ ក៏អ្នកអាចធ្វើការនៅជិតសមាជិកថ្មីក្នុងទង្វើនៃការបម្រើដែរ ។ ហើយអ្នកអាចស្វែងរកឱកាសដើម្បីចែកចាយបន្ទូលនៃព្រះជាមួយសមាជិកថ្មីបាន ។