ផែនការនៃសេចក្តីសង្គ្រោះ

នៅក្នុងជីវិតមុនឆាកជីវិតនេះ ព្រះវរបិតាសួគ៌បានរៀបចំផែនការមួយ ដើម្បីឲ្យយើងអាចប្រែក្លាយដូចជាទ្រង់ និងទទួលបានអំណរដ៏ពេញលេញ ។ ព្រះគម្ពីរសំដៅទៅលើផែនការនេះថា « ផែនការនៃសេចក្ដីសង្គ្រោះ » ( អាលម៉ា ២៤:១៤, ម៉ូសេ ៦:៦២ ) « ផែនការនៃសុភមង្គលដ៏មហិមា » ( អាលម៉ា ៤២:៨ ) « ផែនការដ៏មហិមានៃសេចក្ដីប្រោសលោះ » ( យ៉ាកុប ៦:៨, អាលម៉ា ១២:៣០ ) និង « ផែនការនៃសេចក្ដីមេត្តាករុណា » ( អាលម៉ា ៤២:១៥ ) ។

ផែនការនៃសេចក្តីសង្រ្គោះគឺជាភាពពេញលេញនៃដំណឹងល្អ ។ ផែនការនោះរួមមានការបង្កបង្កើត ការធ្លាក់ ដង្វាយធួនរបស់ព្រះយេស៊ូវគ្រីស្ទ និង ក្រឹត្យវិន័យទាំងអស់ ពិធីបរិសុទ្ធទាំងឡាយ ព្រមទាំងគោលលទ្ធិទាំងឡាយនៃដំណឹងល្អ ។ សិទ្ធិជ្រើសរើសខាងសីលធម៌ លទ្ធភាពក្នុងការជ្រើសរើស ហើយប្រព្រឹត្តដោយខ្លួនយើង ក៏ជាផ្នែកដ៏សំខាន់នៅក្នុងផែនការរបស់ព្រះវរបិតាសួគ៌ដែរ ។ ដោយសារផែនការនេះ នោះយើងអាចត្រូវបានធ្វើឲ្យល្អឥតខ្ចោះតាមរយៈដង្វាយធួន ទទួលបានអំណរដ៏ពេញលេញ ហើយរស់នៅជារៀងរហូតនៅក្នុងវត្តមានរបស់ព្រះ ។ ទំនាក់ទំនងគ្រួសាររបស់យើងអាចមានរហូតដល់អស់កល្បជានិច្ច ។

អ្នកគឺជាអ្នករួមចំណែកនៅក្នុងផែនការរបស់ព្រះវរបិតាសួគ៌ ហើយបទពិសោធន៍ដ៏នៅអស់កល្បជានិច្ចរបស់អ្នកអាចត្រូវបានបំបែកចេញជាបីដំណាក់កាលសំខាន់ៗ ៖ ជីវិតមុនឆាកជីវិតនេះ ជីវិតរមែងស្លាប់ និង ជីវិតក្រោយពីសេចក្ដីស្លាប់ ។ នៅពេលអ្នកយល់អំពីផែនការនេះ នោះអ្នករកឃើញចម្លើយសម្រាប់សំណួរដែលត្រូវបានសួរដោយមនុស្សជាច្រើន ៖ តើយើងមកពីណា ? ហេតុអ្វីយើងមកទីនេះ ? តើយើងនឹងទៅកន្លែងណា បន្ទាប់ពីយើងចាកចេញពីជីវិតនេះ ?

ជីវិតមុនឆាកជីវិតនេះ

ពីមុនអ្នកបានកើតនៅលើផែនដី អ្នកបានរស់នៅក្នុងទីវត្តមានរបស់ព្រះវរបិតាសួគ៌ក្នុងនាមជាបុត្រាបុត្រីខាងវិញ្ញាណរបស់ទ្រង់ ។ ក្នុងជីវិតមុនឆាកជីវិតនេះ អ្នកបានចូលរួមនៅក្នុងមហាក្រុមប្រឹក្សាមួយ ជាមួយនឹងបុត្រាបុត្រីខាងវិញ្ញាណរបស់ព្រះវរបិតាសួគ៌ដទៃទៀត ។ នៅក្នុងមហាក្រុមប្រឹក្សានោះ ព្រះវរបិតាសួគ៌បានបង្ហាញផែនការនៃសុភមង្គលដ៏មហិមារបស់ទ្រង់ ( សូមមើល អ័ប្រាហាំ ៣:២២–២៦ ) ។

ដើម្បីឲ្យត្រូវគ្នាជាមួយនឹងផែនការនៃសុភមង្គល នោះព្រះយេស៊ូវគ្រីស្ទកាលនៅពីមុនឆាកជីវិតនេះ ជាបុត្រាច្បងខាងវិញ្ញាណរបស់ព្រះវរបិតា បានចុះសេចក្ដីសញ្ញាថានឹងធ្វើជាព្រះអង្គសង្គ្រោះ ( សូមមើល ម៉ូសេ ៤:២, អ័ប្រាហាំ ៣:២៧ ) ។ អស់អ្នកណាដែលបានធ្វើតាមព្រះវរបិតាសួគ៌ និង ព្រះយេស៊ូវគ្រីស្ទត្រូវបានអនុញ្ញាតឲ្យមកកើតនៅលើផែនដីនេះ ដើម្បីទទួលបានបទពិសោធន៍នៃជីវិតរមែងស្លាប់ និង ហើយរីកចម្រើនឆ្ពោះទៅរកជីវិតដ៏នៅអស់កល្បជានិច្ច ។ លូស៊ីហ្វើរ ជាបុត្រាខាងវិញ្ញាណម្នាក់ទៀតរបស់ព្រះ បានបះបោរប្រឆាំងនឹងផែនការ ហើយ « បានខំរកបំផ្លាញសិទ្ធិជ្រើសរើសរបស់មនុស្ស » ( ម៉ូសេ ៤:៣ ) ។ វាបានក្លាយជាសាតាំង ហើយវា ព្រមទាំងអ្នកដើរតាមរបស់វាសត្រូវបានបណ្តេញចេញពីស្ថានសួគ៌ ហើយបានបដិសេធឱកាសនៃការទទួលបានរូបកាយខាងសាច់ឈាម និងការទទួលបានបទពិសោធន៍ក្នុងជីវិតរមែងស្លាប់ ( សូមមើល ម៉ូសេ ៤:៤, អ័ប្រាហាំ ៣:២៧–២៨ ) ។

ពេញមួយជីវិតមុនឆាកជីវិតនេះ អ្នកបានអភិវឌ្ឍអត្តសញ្ញាណ និងបង្កើតសមត្ថភាពខាងវិញ្ញាណរបស់អ្នក ។ ដោយមានពរជ័យជាមួយនឹងអំណោយទាននៃសិទ្ធិជ្រើសរើស អ្នកបានធ្វើការសម្រេចចិត្តដ៏សំខាន់ ដូចជាការសម្រេចចិត្តធ្វើតាមផែនការរបស់ព្រះវរបិតាសួគ៌ ។ ការសម្រេចចិត្តទាំងនេះ មានឥទ្ធិពលលើជីវិតរបស់អ្នកពេលនោះ និងពេលបច្ចុប្បន្ននេះ ។ អ្នកបានរីកចម្រើនខាងបញ្ញា ហើយបានរៀនស្រឡាញ់សេចក្ដីពិត រួចអ្នកបានរៀបចំខ្លួនមកកើតលើផែនដី ជាកន្លែងដែលអ្នកបន្តរីកចម្រើន ។

ជីវិតរមែងស្លាប់

ឥឡូវនេះ អ្នកកំពុងទទួលបទពិសោធន៍ក្នុងជីវិតរមែងស្លាប់ ។ វិញ្ញាណរបស់អ្នកត្រូវបានផ្គុំជាមួយនឹងរូបកាយរបស់អ្នក ដើម្បីផ្ដល់ឲ្យអ្នកនូវឱកាសរីកចម្រើន ហើយអភិវឌ្ឍក្នុងរបៀបដែលមិនអាចធ្វើទៅបានក្នុងជីវិតមុនឆាកជីវិតនេះរបស់អ្នក ។ ផ្នែកនេះនៃការរស់នៅរបស់អ្នកគឺជាពេលនៃការរៀនសូត្រដែលអ្នកអាចបំភ្លឺខ្លួនរបស់អ្នក ជ្រើសរើសមកកាន់ព្រះយេស៊ូវគ្រីស្ទ ហើយរៀបចំខ្លួនឲ្យមានជីវិតដ៏នៅអស់កល្បជានិច្ច ។ វាក៏ជាពេលវេលា ដែលអ្នកអាចជួយអ្នកដទៃស្វែងរកសេចក្ដីពិត និង បង្កើនទីបន្ទាល់អំពីផែនការនៃសេចក្ដីសង្គ្រោះដែរ ។

ជីវិតក្រោយសេចក្តីស្លាប់

ពេលដែលអ្នកស្លាប់ វិញ្ញាណរបស់អ្នកនឹងចូលទៅក្នុងពិភពវិញ្ញាណ ហើយរង់ចាំការរស់ឡើងវិញ ។ នៅពេលរស់ឡើងវិញ វិញ្ញាណ និងរូបកាយរបស់អ្នកនឹងផ្គុំឡើងវិញម្ដងទៀត ហើយអ្នកនឹងត្រូវជំនុំជម្រះ និង បានចូលទៅក្នុងនគរនៃសិរីល្អ ។ សិរីល្អដែលអ្នកទទួលនឹងអាស្រ័យទៅលើទំហំនៃការប្រែចិត្តជឿ និង ការគោរពប្រតិបត្តិរបស់អ្នក ចំពោះព្រះបញ្ញត្តិរបស់ព្រះ ( សូមមើល « នគរនៃសិរីល្អ » ទំព័រ ៩២–៩៥ ) ។ វានឹងអាស្រ័យទៅលើ របៀបដែលអ្នកបាន « ទទួលទីបន្ទាល់ពីព្រះយេស៊ូវ » ( គ. និង ស. ៧៦:៥១, សូមមើលផងដែរ ៧៦:៧៤, ៧៩, ១០១ ) ។

ពរជ័យតាមរយៈចំណេះដឹងអំពីផែនការនេះ

ទីបន្ទាល់អំពីផែនការនៃសេចក្តីសង្គ្រោះ អាចផ្តល់ឲ្យអ្នកនូវសេចក្តីសង្ឃឹម និងគោលបំណង នៅពេលដែលអ្នកស្មុគស្មាញជាមួយនឹងឧបសគ្គនានាក្នុងជីវិត ។ អ្នកអាចរកឃើញការអះអាងនៅក្នុងចំណេះដឹងនេះថា អ្នកជាកូនរបស់ព្រះ ហើយថា អ្នកបានរស់នៅក្នុងទីវត្តមានរបស់ទ្រង់ ពីមុនអ្នកមកកើតលើផែនដីនេះ ។ អ្នកអាចរកឃើញអត្ថន័យនៅក្នុងជីវិតបច្ចុប្បន្នរបស់អ្នក ដោយដឹងថា សកម្មភាពរបស់អ្នកអំឡុងពេលជីវិតរមែងស្លាប់មានឥទ្ធិពលលើជោគវាសនាដ៏នៅអស់កល្បជានិច្ចរបស់អ្នក ។ ជាមួយនឹងចំណេះដឹងនេះ អ្នកអាចដាក់ការសម្រេចចិត្តដ៏សំខាន់ទៅលើសេចក្តីពិតដ៏នៅអស់កល្បជានិច្ច ជាជាងផ្លាស់ប្ដូរស្ថានភាពជីវិត ។ អ្នកអាចបន្តអភិវឌ្ឍទំនាក់ទំនងរបស់អ្នកជាមួយសមាជិកគ្រួសារ ដោយរីករាយនឹងការសន្យាដែលថា ក្រុមគ្រួសាររបស់អ្នកអាចរស់នៅដ៏អស់កល្បជានិច្ច ។ អ្នកអាចរកឃើញអំណរនៅក្នុងទីបន្ទាល់អំពីដង្វាយធួន និងព្រះបញ្ញត្តិរបស់ព្រះអម្ចាស់ ពិធីបរិសុទ្ធ សេចក្តីសញ្ញា និងគោលលទ្ធិនានា ដោយដឹងថា « អ្នកណាដែលប្រព្រឹត្តកិច្ចការទាំងឡាយដោយសេចក្ដីសុចរិត នោះនឹងបានទទួលរង្វាន់របស់ខ្លួន គឺសេចក្ដីសុខសាន្តនៅនាលោកិយនេះ និងជីវិតដ៏នៅអស់កល្បជានិច្ចនៅបរលោក » ( គ. និង ស. ៥៩:២៣ ) ។