សេចក្ដីស្រឡាញ់

សេចក្តីស្រឡាញ់គឺជាអារម្មណ៍នៃការលះបង់ ការខ្វាយខ្វល់ និងសេចក្តីស្មោះស្ម័គ្រដ៏ជ្រាលជ្រៅ ។ សេចក្តីស្រឡាញ់មានចំពោះព្រះ និងមនុស្សជុំវិញខ្លួន គឺជាលក្ខណៈសម្បត្តិនៃសិស្សរបស់ព្រះយេស៊ូវគ្រីស្ទ ( សូមមើល ម៉ាថាយ ២២:៣៥–៤០, យ៉ូហាន ១៣:៣៤–៣៥, នីហ្វៃទី ២ ៣១:២០ ) ។ យើងបង្ហាញសេចក្ដីស្រឡាញ់របស់យើងចំពោះព្រះវរបិតាសួគ៌ ដោយការគោរពតាមព្រះបញ្ញត្តិ និងការបម្រើកូនចៅរបស់ទ្រង់ ។ ការបង្ហាញសេចក្ដីស្រឡាញ់របស់យើងចំពោះអ្នកដទៃ អាចបូករួមទាំងការមានចិត្តល្អចំពោះពួកគេ ការស្តាប់ពួកគេ ការទួញសោកជាមួយពួកគេ ការលួងលោមពួកគេ ការបម្រើដល់ពួកគេ ការអធិស្ឋានសម្រាប់ពួកគេ ការចែកចាយដំណឹងល្អជាមួយពួកគេ និងការធ្វើជាមិត្តរបស់ពួកគេ ។

សេចក្តីស្រឡាញ់របស់យើងចំពោះមនុស្សជុំវិញខ្លួនយើងនឹងកើនឡើងនៅពេលយើងចងចាំថា យើងទាំងអស់គ្នាគឺជាកូនចៅរបស់ព្រះ—ថាយើងជាបងប្អូនប្រុសស្រីខាងវិញ្ញាណនឹងគ្នា ។ សេចក្ដីស្រឡាញ់ដែលជាលទ្ធផលមកពីការដឹងដូចនេះ មានអំណាចដើម្បីលុបបំបាត់ការបែងចែករវាងជាតិសាសន៍ ជំនឿ និងពណ៌សម្បុរ ។