ព្រះវិញ្ញាណបរិសុទ្ធ

ព្រះវិញ្ញាណបរិសុទ្ធជាសមាជិកទីបីក្នុងក្រុមព្រះ ។ ទ្រង់ជាតួអង្គវិញ្ញាណដែលគ្មានព្រះកាយជាសាច់ និង ឆ្អឹងទេ ( សូមមើល គ. និង ស. ១៣០:២២ ) ។ ជាញឹកញាប់ ទ្រង់ត្រូវបានគេស្គាល់ថាជាវិញ្ញាណ ជាព្រះវិញ្ញាណបរិសុទ្ធ ជាព្រះវិញ្ញាណនៃព្រះអម្ចាស់ ឬជាព្រះដ៏ជំនួយ ។

តួនាទីរបស់ព្រះវិញ្ញាណបរិសុទ្ធ

ព្រះវិញ្ញាណបរិសុទ្ធធ្វើការសាមគ្គីគ្នាយ៉ាងល្អឥតខ្ចោះជាមួយព្រះវរបិតាសួគ៌ និងព្រះយេស៊ូវគ្រីស្ទ ក្នុងការបំពេញតួនាទីជាច្រើនដើម្បីជួយអ្នកឲ្យរស់នៅដោយសុចរិត និងទទួលពរជ័យនៃដំណឹងល្អ ។

ទ្រង់ « ធ្វើទីបន្ទាល់អំពីព្រះវរបិតា និង អំពីព្រះរាជបុត្រា » ( នីហ្វៃទី ២ ៣១:១៨ ) ហើយបើកសម្ដែងគ្រប់ការបង្រៀនទាំងអស់ « នូវសេចក្ដីពិតនៃការណ៍គ្រប់យ៉ាង » ( មរ៉ូណៃ ១០:៥ ) ។ អ្នកអាចទទួលសក្ខីភាពពិតប្រាកដនៃព្រះវរបិតាសួគ៌ និងព្រះយេស៊ូវគ្រីស្ទបាន គឺតាមរយៈព្រះចេស្ដានៃព្រះវិញ្ញាណបរិសុទ្ធតែប៉ុណ្ណោះ ។ ទ្រង់ទាក់ទងវិញ្ញាណរបស់អ្នកច្បាស់លាស់ជាងទំនាក់ទំនងនានា ដែលអ្នកអាចទទួលតាមរយៈអារម្មណ៍ពីធម្មជាតិរបស់អ្នកទៅទៀត ។

ពេលអ្នកព្យាយាមឈរនៅលើផ្លូវដែលដឹកនាំទៅរកភាពអស់កល្បជានិច្ច នោះព្រះវិញ្ញាណបរិសុទ្ធ « នឹងបង្ហាញដល់អ្នកនូវគ្រប់ទាំងអស់ដែល [ អ្នក ] ត្រូវធ្វើ » ( សូមមើល នីហ្វៃទី ២ ៣២:១–៥ ) ។ ទ្រង់អាចដឹកនាំអ្នកក្នុងការសម្រេចចិត្តរបស់អ្នក ហើយការពារអ្នកពីគ្រោះថ្នាក់ខាងសាច់ឈាម និង ខាងវិញ្ញាណ ។

តាមរយៈទ្រង់ អ្នកអាចទទួលអំណោយទាននៃព្រះវិញ្ញាណដើម្បីជាប្រយោជន៍ដល់អ្នក និង ដើម្បីជាប្រយោជន៍ដល់មនុស្សដែលអ្នកស្រឡាញ់ និងបម្រើ ( សូមមើល គ. និង ស. ៤៦:៩–១១ ) ។

ទ្រង់ជាព្រះដ៏ជាជំនួយ ( យ៉ូហាន ១៤:២៦ ) ។ ដូចជាសំឡេងដ៏ទន់ភ្លន់នៃឪពុកម្តាយជាទីស្រឡាញ់ដែលអាចធ្វើឲ្យកូនឈប់យំដែរ នោះការខ្សឹបនៃព្រះវិញ្ញាណអាចធ្វើឲ្យសេចក្ដីភ័យខ្លាចអ្នកស្ងប់ស្ងៀម បណ្ដេញទុកកង្វល់ពីជីវិតរបស់អ្នក និងលួងលោមចិត្តអ្នក នៅពេលដែលអ្នកសោកសង្រេង ។ ព្រះវិញ្ញាណបរិសុទ្ធអាចបំពេញឲ្យអ្នក « នូវសេចក្ដីស្រឡាញ់ដ៏ឥតខ្ចោះ » និង « ការណ៍ទាំងឡាយប្រកបដោយសេចក្ដីសុខសាន្តនៃនគរ » ( មរ៉ូណៃ ៨:២៦, គ. និង ស. ៣៦:២ ) ។

តាមរយៈព្រះចេស្ដារបស់ទ្រង់ អ្នករាល់គ្នានឹងបានជ្រះស្អាត ពេលដែលអ្នកប្រែចិត្ត ទទួលពិធីបរិសុទ្ធនៃពិធីបុណ្យជ្រមុជទឹក និង ពិធីបញ្ជាក់ និង បន្តរក្សាដោយស្មោះត្រង់ចំពោះសេចក្ដីសញ្ញារបស់អ្នក ( សូមមើល ម៉ូសាយ ៥:១–៦, នីហ្វៃទី ៣ ២៧:២០, ម៉ូសេ ៦:៦៤–៦៨ ) ។

ទ្រង់ជាព្រះវិញ្ញាណបរិសុទ្ធនៃសេចក្ដីសន្យា ( សូមមើល អេភេសូ ១:១៣, គ. និង ស. ១៣២:៧, ១៨–១៩, ២៦ ) ។ តាមលទ្ធភាពនេះ ទ្រង់បញ្ជាក់ថា ពិធីបរិសុទ្ធនៃបព្វជិតភាពដែលអ្នកបានទទួល និងសេចក្ដីសញ្ញាដែលអ្នកបានធ្វើ គឺព្រះទទួលយក ។ សេចក្ដីអនុមតិនេះ អាស្រ័យទៅលើការបន្តដោយស្មោះត្រង់របស់អ្នក ។

អំណោយទានជាព្រះវិញ្ញាណបរិសុទ្ធ

អស់អ្នកដែលស្វែងរកសេចក្ដីពិតអាចទទួលបានឥទ្ធិពលពីព្រះវិញ្ញាណបរិសុទ្ធ ដែលដឹកនាំពួកគេទៅរកព្រះយេស៊ូវគ្រីស្ទ និងដំណឹងល្អរបស់ទ្រង់ ។ ទោះជាយ៉ាងណាក៏ដោយ ភាពពោរពេញនៃពរជ័យដែលបានប្រទានតាមរយៈព្រះវិញ្ញាណបរិសុទ្ធ អាចមានទៅបានតែចំពោះអ្នកទាំងឡាយណាដែលបានទទួលអំណោយទានជាព្រះវិញ្ញាណបរិសុទ្ធ ហើយបន្តមានភាពសក្តិសមប៉ុណ្ណោះ ។

បន្ទាប់ពីអ្នកបានទទួលពិធីបុណ្យជ្រមុជទឹកចូលក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយរួចហើយ អ្នកកាន់បព្វជ្វិតភាពម្នាក់ ឬច្រើននាក់ដាក់ដៃរបស់ពួកគេលើក្បាលរបស់អ្នក ហើយនៅក្នុងពិធីបរិសុទ្ធនៃបព្វជិតភាពមួយ ពួកគេនឹងបញ្ជាក់ថា អ្នកជាសមាជិកនៃសាសនាចក្រ ។ ជាផ្នែកនៃពិធីបរិសុទ្ធនេះ ដែលត្រូវបានហៅថា ពិធីបញ្ជាក់ នោះអ្នកទទួលបានអំណោយទានជាព្រះវិញ្ញាណបរិសុទ្ធ ។

អំណោយទាននៃព្រះវិញ្ញាណបរិសុទ្ធគឺខុសពីឥទ្ធិពលនៃព្រះវិញ្ញាណបរិសុទ្ធ ។ មុនពិធីបុណ្យជ្រមុជទឹករបស់អ្នក អ្នកអាចទទួលឥទ្ធិពលពីព្រះវិញ្ញាណបរិសុទ្ធម្តងម្កាល ហើយតាមរយៈឥទ្ធិពលនេះ អ្នកអាចទទួលបានទីបន្ទាល់អំពីសេចក្តីពិត ។ ឥឡូវនេះ ដោយសារតែអ្នកមានអំណោយទានជាព្រះវិញ្ញាណបរិសុទ្ធ នោះអ្នកមានសិទ្ធិទទួលបានភាពជាដៃគូដ៏ជាប់លាប់ពីសមាជិកមួយអង្គក្នុងក្រុមព្រះ ប្រសិនបើអ្នកគោរពតាមព្រះបញ្ញត្តិ ។

សេចក្ដីអររីករាយពេញលេញមកពីអំណោយទានជាព្រះវិញ្ញាណបរិសុទ្ធរួមមាន ការទទួលបានវិវរណៈ និងការលួងលោមចិត្ត ការចម្រើន និងការប្រទានពរដល់មនុស្សដទៃតាមរយៈអំណោយទានខាងវិញ្ញាណ និងការបានញែកចេញជាបរិសុទ្ធពីអំពើបាប និងធ្វើឲ្យសក្ដិសមនឹងភាពតម្កើងឡើងនៅក្នុងនគរសេឡេស្ទាល ។ ពរជ័យទាំងនេះអាស្រ័យទៅលើភាពសក្តិសមរបស់អ្នក ព្រោះវាកើតឡើងបន្តិចម្តងៗ នៅពេលអ្នកត្រៀមខ្លួនរួចជាស្រេចហើយនោះ ។ នៅពេលអ្នកមានភាពសុខដុមជាមួយនឹងព្រះឆន្ទៈរបស់ព្រះ នោះបន្តិចម្ដងៗ អ្នកទទួលបានព្រះវិញ្ញាណបរិសុទ្ធក្នុងបរិមាណមួយដ៏អស្ចារ្យ ។ ព្យាការី យ៉ូសែប ស៊្មីធ បានប្រកាសថា សេចក្ដីអាថ៌កំបាំងទាំងឡាយនៃនគររបស់ព្រះនឹងត្រូវ « បានឃើញ ហើយយល់ ដោយសារព្រះចេស្ដានៃព្រះវិញ្ញាណបរិសុទ្ធប៉ុណ្ណោះ ដែលព្រះទ្រង់ប្រទានមកលើអស់អ្នកណាដែលស្រឡាញ់ទ្រង់ ហើយសម្អាតពួកគេជាបរិសុទ្ធនៅចំពោះទ្រង់ » ( សូមមើល គ. និង ស. ៧៦:១១៤–១១៦ ) ។

ចូរចងចាំថា « ព្រះវិញ្ញាណនៃព្រះអម្ចាស់ពុំគង់នៅក្នុងព្រះវិហារណាដែលឥតបរិសុទ្ធឡើយ » ( ហេលេមិន ៤:២៤ ) ។ ទោះបីជាអ្នកបានទទួលអំណោយទានជាព្រះវិញ្ញាណបរិសុទ្ធហើយក៏ដោយ ក៏ព្រះវិញ្ញាណបរិសុទ្ធនឹងគង់នៅជាមួយអ្នក តែនៅពេលណាដែលអ្នកគោរពតាមព្រះបញ្ញត្តិប៉ុណ្ណោះ ។ ទ្រង់នឹង ចាកចេញពីអ្នក ប្រសិនបើអ្នកប្រឡាក់ប្រឡូស មិនស្អាតស្អំ មិនគោរពតាមព្រះបញ្ញត្តិ បះបោរ ឬប្រព្រឹត្តបាបផ្សេងៗទៀត ។ ចូររក្សាខ្លួនរបស់អ្នកឲ្យបានស្អាតស្អំ ។ ចូរធ្វើឲ្យជីវិតរបស់អ្នកពោរពេញទៅដោយអំពើល្អ ដើម្បីឲ្យអ្នកមានភាពសក្តិសមជាដៃគូជាប់លាប់ជាមួយនឹងព្រះវិញ្ញាណបរិសុទ្ធ ។