« ថ្ងៃទី ៩–១៥ ខែ ឧសភា ។ ជនគណនា ១១–១៤; ២០–២៤ ៖ ‹ កុំឲ្យចេះតែបះបោរនឹងព្រះយេហូវ៉ា ឬខ្លាច › » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ៩–១៥ ខែ ឧសភា ។ ជនគណនា ១១–១៤; ២០–២៤ » ចូរមកតាមខ្ញុំ—សម្រាប់ថ្នាក់អង្គការបឋមសិក្សា ៖ ឆ្នាំ ២០២២

ថ្ងៃទី ៩–១៥ ខែ ឧសភា

ជនគណនា ១១–១៤; ២០–២៤

« កុំឲ្យចេះតែបះបោរនឹងព្រះយេហូវ៉ា ឬខ្លាច »

គម្រោងនេះមិនមានន័យថា ត្រូវតែធ្វើឲ្យដូចបេះដាក់នោះទេ ។ ផ្ទុយទៅវិញ សូមប្រើវាដើម្បីទទួលបានគំនិត និងការបំផុសគំនិតសម្រាប់សកម្មភាពរៀនដែលនឹងផ្ដល់ពរជ័យដល់កុមារនៅក្នុងថ្នាក់របស់បងប្អូន ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

សូមបង្ហាញកុមារនូវរូបភាពមួយពីគម្រោងនេះ ឬនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ សូមឲ្យពួកគេចែកចាយជាមួយបងប្អូន នូវអ្វីដែលពួកគេដឹងអំពីអ្វីដែលកំពុងកើតឡើងនៅក្នុងរូបភាពនោះ ។

បង្រៀនគោលលទ្ធិ ៖ កុមារតូចៗ

ជនគណនា ១១:៤–១០

ខ្ញុំអាចដឹងគុណចំពោះអ្វីដែលព្រះបានប្រទានដល់ខ្ញុំ ។

ទោះបីព្រះអម្ចាស់បានធ្វើការអស្ចារ្យសម្រាប់កូនចៅរបស់អ៊ីស្រាអែលក៏ដោយ ក៏ពួកគេតែងតែផ្តោតការយកចិត្តទុកដាក់ទៅលើអ្វីដែលពួកគេមិនមានដែរ ។ សូមជួយកុមារឲ្យរៀនថ្លែងអំណរគុណចំពោះអ្វីដែលព្រះបានប្រទានដល់ពួកគេ ។

សកម្មភាពដែលអាចជ្រើសរើស

សូមសួរកុមារ ប្រសិនបើពួកគេចងចាំអព្ភូតហេតុមួយចំនួនដែលព្រះអម្ចាស់បានធ្វើដើម្បីប្រទានពរដល់សាសន៍អ៊ីស្រាអែលនៅទីរហោស្ថានដែរឬទេ ។ ( ប្រសិនបើកុមារត្រូវការជំនួយ សូមបង្ហាញរូបភាពដល់់ពួកគេចេញពី គម្រោងមេរៀនថ្ងៃទី ៤–១០ ខែ មេសា នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ សូមមើលផងដែរ និក្ខមនំ ១៤:២១–២២; ១៥:២៣–២៥; ១៦:៤ ) ។ បន្ទាប់មក សូមសង្ខេបឲ្យពួកគេនូវ ជនគណនា ១១:៤–១០បញ្ជាក់ថា ព្រះអម្ចាស់មិនសព្វព្រះហឫទ័យទេ ពីព្រោះតែសាសន៍អ៊ីស្រាអែលបានត្អូញត្អែរ ។ សូមជួយកុមារឲ្យគិតអំពីរបៀបដែលពួកគេអាចបង្ហាញការដឹងគុណដល់ព្រះអម្ចាស់ ។
សូមច្រៀងចម្រៀងរួមគ្នាមួយបទអំពីការដឹងគុណ ដូចជា « ចូររាប់ព្រះពរ » ( ទំនុកតម្កើង លេខ ១៥០ ) ។ សូមអញ្ជើញកុមារម្នាក់ៗឲ្យគូររូបភាពនៃពរជ័យដែលព្រះអម្ចាស់បានប្រទានដល់ពួកគេ ឬក្រុមគ្រួសាររបស់ពួកគេ ។ សូមលើកទឹកចិត្តពួកគេឲ្យគិត ឬមើលរូបភាពរបស់ពួកគេ នៅពេលណាដែលពួកគេត្រូវបានល្បួងឲ្យត្អូញត្អែរអំពីអ្វីមួយដែលពួកគេមិនមាន ។

ជនគណនា ១៣:១៧–៣៣; ១៤:៦–៩

សេចក្ដីជំនឿអាចជួយខ្ញុំមិនឲ្យភ័យខ្លាច ។

នៅពេលម៉ូសេបានចាត់បុរស ១២ នាក់ ឲ្យទៅរកដែនដីសន្យា នោះបុរស ១០ នាក់បានត្រឡប់មកវិញដោយភ័យខ្លាច ដោយសារតែប្រជាជនដែលរស់នៅទីនោះខ្លាំងពូកែ ។ បុរសពីរនាក់នៅក្នុងចំណោមពួកគេគឺ កាលែប និងយ៉ូស្វេ មិនបានភ័យខ្លាចនោះទេ ពីព្រោះពួកគេមានជំនឿលើព្រះអម្ចាស់ ។

សកម្មភាពដែលអាចជ្រើសរើស

សូមប្រើរូបភាព ឬរូបគំនូរនៃទំពាំងបាយជូរ ទឹកឃ្មុំ យក្ស និងកណ្តូប ដើម្បីប្រាប់កុមារដោយសង្ខេបអំពីបុរសទាំង ១២ នាក់ដែលម៉ូសេបានចាត់ឲ្យទៅរុករកដែនដីសន្យា ( សូមមើល ជនគណនា ១៣:១៧–៣៣សូមមើលផងដែរ « សែសិបឆ្នាំនៅក្នុងទីរហោស្ថាន » នៅក្នុង ដំណើររឿងព្រះគម្ពីរសញ្ញាចាស់ ) ។ សូមពន្យល់ថា ពួកគេបានរកឃើញផ្លែឈើ និងអាហារជាច្រើន ( សូមអញ្ជើញកុមារធ្វើជាញ៉ាំអាហារ ) ប៉ុន្តែពួកគេក៏ភ័យខ្លាចផងដែរ ពីព្រោះប្រជាជននៅទីនោះមានមាឌធំ និងខ្លាំង ( សូមអញ្ជើញកុមារឲ្យធ្វើជាភ័យខ្លាច ) ។ សូមបង្ហាញរូបភាពរបស់ព្រះយេស៊ូវ ហើយចង្អុលបង្ហាញថាសាសន៍អ៊ីស្រាអែលពីរនាក់ឈ្មោះកាលែប និងយ៉ូស្វេមិនមានការភ័យខ្លាចទេ ដោយសារពួកគេមានជំនឿលើព្រះយេស៊ូវគ្រីស្ទ ។
សូមអាន ជនគណនា ១៤:៩ ទៅដល់កុមារ ហើយនិយាយអំពីពេលមួយនៅពេលដែលបងប្អូនបានមានការភ័យខ្លាច ប៉ុន្តែជំនឿរបស់បងប្អូនលើព្រះយេស៊ូវគ្រីស្ទបានជួយបងប្អូនឲ្យមានភាពក្លាហាន ។ សូមជួយកុមារឲ្យគិតអំពីបទពិសោធន៍ស្រដៀងនេះដែលពួកគេធ្លាប់មាន ។

អ្នកស៊ើបការណ៍សាសន៏អ៊ីស្រាអែល ១០ នាក់ភ័យខ្លាច យ៉ូស្វេ និងកាលែបមានជំនឿ ។ © Lifeway Collection/បានទទួលអាជ្ញាប័ណ្ណពី goodsalt.com

ជនគណនា ២១:៦–៩

ខ្ញុំអាចមើលទៅព្រះយេស៊ូវគ្រីស្ទ ។

ដូចគ្នានឹងកូនចៅរបស់អ៊ីស្រាអែល ដែលត្រូវបានជាសះស្បើយដោយមើលទៅពស់លង្ហិននោះ កុមារនៅក្នុងថ្នាក់របស់បងប្អូនទទួលបានសេចក្ដីសង្រ្គោះ ដោយមើលទៅព្រះអង្គសង្រ្គោះផងដែរ ។

សកម្មភាពដែលអាចជ្រើសរើស

សូមប្រើទំព័រសកម្មភាពសប្តាហ៍នេះ ឬរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ប្រាប់កុមារនូវអ្វីដែលបានកើតឡើងនៅពេលដែល « ពស់ភ្លើង » បានចូលមកក្នុងជំរំរបស់សាសន៍អ៊ីស្រាអែល ( សូមមើល ជនគណនា ២១:៦–៩ ) ។ សូមជួយពួកគេឲ្យឃើញថា ពស់លង្ហិនប្រៀបដូចជាព្រះយេស៊ូវគ្រីស្ទ ( សូមមើល យ៉ូហាន ៣:១៤–១៥ ) ។ បនា្ទប់មកឲ្យកុមារផ្លាស់ប្តូរវេនគ្នា ប្រើរូបភាពដើម្បីនិទានរឿងទៅកាន់គ្នាទៅវិញទៅមក ។
សូមឲ្យពួកគេបិទភ្នែក អំឡុងពេលបងប្អូនដាក់រូបភាពព្រះយេស៊ូវនៅកន្លែងណាមួយនៅក្នុងបន្ទប់ ។ បន្ទាប់មកសូមអញ្ជើញកុមារឲ្យបើកភ្នែក ហើយដើររករូបភាព ហើយមើលទៅរូបនោះ ។ សូមឲ្យពួកគេផ្លាស់ប្តូរវេនគ្នាដើម្បីដាក់រូបភាព ។ រាល់ពេលដែលកុមាររកឃើញរូបភាព សូមជួយពួកគេគិតពីអ្វីដែលពួកគេអាចធ្វើ ដើម្បីមើលទៅព្រះអង្គសង្គ្រោះ ។

បង្រៀនគោលលទ្ធិ ៖ កុមារធំៗ

ជនគណនា ១២

ព្រះអម្ចាស់មានព្រះទ័យចង់ឲ្យខ្ញុំធ្វើតាមព្យាការីរបស់ទ្រង់ ។

ជនគណនា ១២ មានមេរៀនដ៏មានតម្លៃមួយចំនួនដែលអាចជួយដល់កុមារ នៅពេលពួកគេឮមនុស្សនិយាយអាក្រក់អំពីព្យាការីរបស់ព្រះអម្ចាស់ ឬអ្នកដឹកនាំសាសនាចក្រផ្សេងៗទៀត ។

សកម្មភាពដែលអាចជ្រើសរើស

សូមប្រាប់កុមារថា មានគ្រាមួយព្រះអម្ចាស់មិនសប្បាយព្រះទ័យនឹងអើរ៉ុន និងម៉ារាម ដែលជាបងប្អូនប្រុសស្រីរបស់ម៉ូសេ ។ សូមអញ្ជើញកុមារឲ្យអាន ជនគណនា ១២:១–២ ដើម្បីស្វែងយល់អំពីមូលហេតុ ។ តាមរយៈ ខទី ៥–៨តើព្រះអម្ចាស់មានព្រះទ័យយ៉ាងណាចំពោះអើរ៉ុន និងម៉ារាម ដែលនិយាយប្រឆាំងនឹងព្យាការីរបស់ទ្រង់ ?
សូមជួយកុមារឲ្យគិតពីគំរូរបស់មនុស្សនៅក្នុងព្រះគម្ពីរ ដែលបានធ្វើតាមព្យាការីហើយបានទទួលពរជ័យ ( ជាឧទាហរណ៏សូមមើល លោកុប្បត្តិ ៧:៧; នីហ្វៃទី១ ៣:៧ ) ។ តើព្យាការីនៅរស់របស់យើងបានបង្រៀនយើងអ្វីខ្លះ ? តើយើងមានពរជ័យយ៉ាងណា នៅពេលយើងធ្វើតាមការបង្រៀនរបស់ទ្រង់ ?

ជនគណនា ២១:៤–៩

ព្រះយេស៊ូវគ្រីស្ទមានព្រះចេស្ដាដើម្បីព្យាបាលខ្ញុំខាងវិញ្ញាណ ។

ពួកសាសន៍អ៊ីស្រាអែលជាច្រើនបានស្លាប់ ដោយសារពួកគេមិនមានជំនឿថាព្រះអម្ចាស់នឹងប្រោសពួកគេឲ្យជា បើពួកគេគ្រាន់តែក្រឡេកមើលពស់លង្ហិននោះទេ ( សូមមើល អាលម៉ា ៣៣:១៨–២០ ) ។ តើបងប្អូនអាចជួយកុមារដែលបងប្អូនបង្រៀនឲ្យមានជំនឿលើព្រះចេស្ដាសង្គ្រោះរបស់ព្រះយេស៊ូវគ្រីស្ទយ៉ាងដូចម្តេច ?

សកម្មភាពដែលអាចជ្រើសរើស

សូមអញ្ជើញកុមារឲ្យគូររូបភាពនៃអ្វីដែលពួកគេបានអាននៅក្នុង ជនគណនា ២១:៤–៩ ។ សូមឲ្យសិស្សប្រើរូបភាពរបស់ពួកគេដើម្បីនិទានរឿងនោះ ។ សុំឲ្យកុមារម្នាក់ៗជ្រើសរើសបទគម្ពីរមួយនៅក្នុងចំណោមបទគម្ពីរខាងក្រោមនេះហើយចែកចាយនូវអ្វីដែលវាបន្ថែមដល់ការយល់ដឹងរបស់យើងអំពីរឿងនោះ ៖យ៉ូហាន ៣:១៤–១៥; នីហ្វៃទី១ ១៧:៤១; អាលម៉ា ៣៣:១៨–២០; ហេលេមិន ៨:១៣–១៥; គោលលទ្ធិ និងសេចក្ដីសញ្ញា ៦:៣៦ ។
សូមសរសេរលើក្តារខៀននូវសំណួរដូចជា តើយើងអាចធ្វើអ្វីខ្លះដើម្បី « មើលទៅព្រះរាជបុត្រានៃព្រះដោយនូវសេចក្ដីជំនឿ » ? ( ហេលេមិន ៨:១៥ ) ។ សូមឲ្យកុមារម្នាក់ៗនូវក្រដាសមួយសន្លឹក ហើយអញ្ជើញពួកគេឲ្យសរសេរចម្លើយឲ្យបានច្រើនតាមដែលពួកគេអាចគិតបាន ទៅនឹងសំណួរនោះ ។ សូមប្រមូលក្រដាស អានចម្លើយពីរបីឲ្យឮៗ ហើយអញ្ជើញកុមារឲ្យនិយាយអំពីរបៀបដែលការធ្វើរឿងទាំងនេះអាចជួយយើង នៅពេលយើងត្រូវការព្រះចេស្ដានៃការព្យាបាលរបស់ព្រះអង្គសង្គ្រោះ ។

ជនគណនា ២២–២៤

ខ្ញុំអាចធ្វើតាមព្រះហឫទ័យរបស់ព្រះ ទោះបីជាអ្នកផ្សេងទៀតព្យាយាមបញ្ចុះបញ្ចូលខ្ញុំមិនឲ្យធ្វើតាមក៏ដោយ ។

បាឡាកបានព្យាយាមបញ្ចុះបញ្ចូលបាឡាម ឲ្យដាក់បណ្ដាសាដល់សាសន៏អ៊ីស្រាអែល ប៉ុន្តែបាឡាមបានដឹងថា ការណ៏នេះប្រឆាំងនឹងព្រះហឫទ័យរបស់ព្រះ ។ គំរូរបស់បាឡាមអាចជួយដល់កុមារ នៅពេលពួកគេប្រឈមមុខនឹងសម្ពាធដែលមិនឲ្យស្តាប់បង្គាប់ព្រះ ។

សកម្មភាពដែលអាចជ្រើសរើស

សូមសង្ខេប ជនគណនា ២២:១–១៨ ឲ្យកុមារ ដោយបញ្ជាក់អំពីរបៀបដែលបាឡាមបានបដិសេធមិនព្រមដាក់បណ្តាសាប្រជាជនរបស់ព្រះឡើយ ទោះបីជាបាឡាក ជាស្តេចម៉ូអាប់បានផ្តល់កិត្តិយស និងទ្រព្យសម្បត្តិដល់គាត់ក៏ដោយ ។ សុំឲ្យកុមារស្វែងរកខគម្ពីរដូចខាងក្រោមសម្រាប់ឃ្លាដែលពួកគេមានអារម្មណ៍ថា បង្ហាញពីការប្តេជ្ញាចិត្តរបស់បាឡាមនៅក្នុងការធ្វើតាមព្រះ ៖ ជនគណនា២២:១៨; ២៣:២៦; ២៤:១៣ ។ សូមអញ្ជើញកុមារឲ្យជ្រើសរើសឃ្លាមួយដែលពួកគេចូលចិត្ត ហើយសរសេរវានៅលើកាតមួយសម្រាប់ជួយពួកគេឲ្យចងចាំដើម្បីគោរពតាមព្រះអម្ចាស់ ។
សូមនិយាយជាមួយកុមារអំពីស្ថានភាពទាំងឡាយ នៅពេលដែលមិត្តភក្តិ ឬអ្នកណាម្នាក់អាចព្យាយាមបញ្ចុះបញ្ចូលពួកគេឲ្យធ្វើអ្វីខុស ដូចជាបាឡាកបានធ្វើចំពោះបាឡាម ។ តើការប្តេជ្ញាចិត្តរបស់បាឡាមចំពោះព្រះអម្ចាស់បានជួយគាត់ឲ្យទប់ទល់នឹងសម្ពាធមកពីបាឡាកយ៉ាងដូចម្តេច ? សូមអញ្ជើញកុមារឲ្យអនុវត្តការឆ្លើយតបចំពោះស្ថានភាពទាំងនេះ ដោយប្រើពាក្យដូចជាបាឡាមដែរ ។

សូមលើកទឹកចិត្តឲ្យមានការរៀនសូត្រនៅឯគេហដ្ឋាន

សូមអញ្ជើញកុមារឲ្យចែកចាយអ្វីមួយជាមួយក្រុមគ្រួសាររបស់ពួកគេ ដូចជារូបភាព ព្រះគម្ពីរ ឬចម្រៀង ដែលបង្ហាញពីអ្វីដែលពួកគេបានរៀននៅក្នុងថ្នាក់អង្គការបឋមសិក្សា ។

ការកែលម្អការបង្រៀនរបស់យើង

សូមទទួលយកការបំផុសគំនិតពីព្រះវិញ្ញាណ ។ « ជាញឹកញាប់ គ្រាដើម្បីបង្រៀនល្អបំផុតពុំត្រូវបានរំពឹងទុកជាមុនទេ—ឧទាហរណ៍ នៅពេលនរណាម្នាក់ចែកចាយបទពិសោធន៍ ឬសួរសំណួរមួយដែលដឹកនាំទៅរកការពិភាក្សាដ៏មានអត្ថន័យ ។ … ហើយមានឆន្ទៈដើម្បីផ្លាស់ប្តូរផែនការរបស់បងប្អូន បើចាំបាច់ ដើម្បីធ្វើតាមការបំផុសគំនិតដែលបងប្អូនទទួលបាន » ( ការបង្រៀនតាមរបៀបរបស់ព្រះអង្គសង្គ្រោះ ១០ ) ។

ទំព័រសកម្មភាព ៖ ខ្ញុំអាចមើលទៅព្រះយេស៊ូវ គ្រីស្ទ