Mga Kalihokan alang sa mga Miyembro nga may mga Kakulangan

Dugang nga mga Kalihokan alang sa mga Miyembro nga may mga Kakulangan

Ang mga miyembro nga may mga kakulangan gihangop diha sa mga miting sa Simbahan ug sa mga kalihokan ug makasalmot ug makatampo sa makahuloganon nga mga paagi. Ang mga lider sa ward ug mga miyembro giawhag sa pagpaningkamot nga masulbad ang mga panginahanglan niadtong tanan kinsa nagpuyo sulod sa ilang mga utlanan, lakip niadtong may mga kakulangan sa pangisip, kalamboan [developmental], o pisikal.

Mga espesyalista sa may kakulangan [disability specialists] sa ward ug stake mahimong tawagon aron sa pagtino ug pagsuporta sa mga gikinahanglan sa mga miyembro sa matag ward ug stake (tan-awa sa Kinatibuk-ang Tamdanan nga Basahon: Pagserbisyo diha sa Simbahan ni Jesukristo sa mga Santos sa Ulahing mga Adlaw, 38.8.31.2). Kon gikinahanglan, ang mga lider mahimong mag-organisar og espesyal nga mga kalihokan o mga klase aron dungagan ang regular nga mga kalihokan ug mga klase sa ward.

Pag-organisar og mga Kalihokan Latas sa Daghang Ward ug Stake

Kon gikinahanglan aron matubag ang mga panginahanglan sa hamtong nga mga miyembro nga may kakulangan sa pangisip, ang usa ka ward, grupo sa mga ward, stake, o grupo sa mga stake mahimong mag-organisar og programa sa kalihokan sa may kakulangan (tan-awa sa Kinatibuk-ang Tamdanan nga Basahon, 38.8.31.4).

Ang programa sa kalihokan sa may kakulangan sa kasagaran nagserbisyo sa mga indibidwal nga 18 ang pangedaron o pataas. Ang matag paningkamot gikinahanglan aron mahiusa ang mga indibidwal nga ubos sa 18 ang pangedaron ngadto sa ilang mga ward ug mga stake. Sa dili kasagaran nga mga sitwasyon, ang mga lider mahimong motino sa paghatag og dugang nga mga kalihokan alang sa mga batan-on sugod sa tuig nga sila mag-edad na og 12.

Kon daghang ward and moapil sa usa ka programa sa kalihokan sa may kakulangan, ang presidente sa stake mosangon og tinugyanan nga bishop [agent bishop] sa pagdumala niini. Kon daghang stake ang mosalmot, ang Kapangulohan sa Area mosangon og usa ka tinugyanan nga presidente sa stake [agent stake president] sa pagdumala niini.

Ang tinugyanan nga bishop o ang tinugyanan nga presidente sa stake mokonsulta sa ubang mosalmot nga mga bishop o mga presidente sa stake aron sa pagtino unsaon kini nga mga programa mapondohan.

Mga Kalihokan

Ang mga kalihokan kinahanglan nga motutok sa pagtabang sa mga indibidwal nga may kakulangan ug sa ilang mga pamilya nga mobati nga gihigugma ug gisuportaan sa ilang mga paningkamot sa pagduol ngadto kang Kristo ug magpabilin diha sa dalan sa pakigsaad. Ang mao nga mga kalihokan makahatag usab og palibot alang sa mga sakop sa pamilya nga makalambigit ngadto sa uban nga adunay parehas nga mga kasinatian sa kinabuhi ug mapamaayo ang ilang sistema sa pagsuporta.

Mga espesyal nga mga kalihokan o mga klase mahimo nga maorganisa aron tabangan ang mga mosalmot nga molambo sa espiritwal, sa sosyal, sa pisikal, ug sa intelektwal nga paagi.

Ang mga tumong mahimong maglakip sa pagkat-on sa ebanghelyo, pakigsalamoha sa sosyal nga paagi, pagpalambo og mga paghinigalaay, pagbansay og bag-ong mga kahanas, pagpalambo sa pagbarog sa kinaugalingong paningkamot, paghatag og serbisyo, ug personal nga paglambo diha sa usa ka mahinangopon, matinahoron, ug nga palibot nga haom sa ilang pangedaron. Ang mga lider kinahanglan nga maningkamot sa pagpangita og mga paagi nga ang matag mosalmot makatampo sa kalamposan sa mga kalihokan.

Ang mga lider motino sa kasagad sa mga kalihokan, maghunahuna sa gidaghanon sa mga mosalmot, gilay-on sa mga biyahe, ug uban pa nga mga panginahanglan.

Ang mga lider mosiguro nga kadtong nagtinguha sa pagsalmot mobati nga gihangop ug gilakip isip bililhon nga mga tigtampo. Hinoon, pipila sa mga indibidwal mahimong dili makaapil tungod sa komplikado nga medikal, pisikal, o binuhatan nga nagkinahanglan og hilabihan nga suporta o pagdumala. Ang mga lider mangita og lain nga mga paagi sa pagpangalagad sa ilang mga panginahanglan.

Mga Sumbanan sa Pag-apil ug Kaluwas

Ang mga lider ug mga mosalmot kinahanglan nga momintenar og palibot nga luwas ug positibo diin ang tanan mobati nga gihangop, gitahod, ug gilakip.

Ang mga lider ug mga mosalmot kinahanglang momintenar sa angay nga pisikal nga mga utlanan.

Labing minos duha ka responsable nga mga hamtong kinahanglan nga anaa sa tanan nga mga kalihokan. Ang duha ka hamtong mahimong duha ka lalaki, duha ka babaye, o minyo nga magtiayon. Igong gidaghanon sa mga lider kinahanglan nga anaa aron modumala sa gidaghanon sa mga mosalmot. Mas daghan nga mga lider ang gikinahanglan sa pagdumala sa mga kalihokan alang sa mga miyembro nga may mga kakulangan kay sa niadtong gikinahanglan alang sa kasagaran nga mga kalihokan sa batan-on ug hamtong. Ang mga lider ug mga boluntaryo kinahanglan nga makadawat og pag-uyon gikan sa ilang bishop. (Tan-awa sa “Mga Lider” diha sa ubos.)

Ang mga pamaagi kinahanglan nga nakahan-ay aron sa pagsiguro sa kaluwas sa mga mosalmot. Listahan sa motambong, mga pangalan nga isab-it sa motambong [name tags], mga pulseras, o mga lanyard [pisi] makatabang niini nga proseso.

Ang mga mosalmot kinahanglang mokompleto sa porma sa Permission and Medical Release [Pagtugot ug Medikal nga Release] sa dili pa moapil sa usa ka kalihokan. Ang mga ginikanan ug mga tig-amuma kinahanglan mopahibalo sa mga lider sa mga gikinahanglang mahibaloan kabahin sa kahimsog sa mosalmot, lakip na ang mga allergy ug gidili nga mga pagkaon. Kini kompidensiyal nga impormasiyon ug kinahanglang gamiton lamang alang sa medikal nga mga emerhensiya ug alang sa pagplano og luwas nga mga kalihokan. Ang mga lider wala kinahanglana nga maoy mohatag og tambal. Ang mga mosalmot nga adunay makatakod nga sakit kinahanglan nga temporaryong dili una mosalmot aron sa paghatag og luwas nga palibot alang sa uban.

Ang mga ginikanan o mga tig-amuma maoy responsable sa pakigsabot og masakyan paingon ngadto ug gikan sa mga kalihokan ug mosiguro nga ang mga mosalmot gihatod ngadto sa lawak diin ang klase o kalihokan gibuhat. Ang mga mosalmot kinahanglan dili mag-inusara diha sa gambalay o sa parkinganan. Sa pagtapos sa kalihokan, ang mga mosalmot kinahanglan itugyan ngadto sa ilang ginikanan, tig-atiman, o kinsa nga gisabot sa ginikanan o tig-atiman nga maoy moatiman kanila.

Kon dunay dili maayo nga lihok nga mahitabo, ang dinalian nga responsibilidad sa mga lider mao ang pagpanalipod ug pagtabang sa tawo nga anaa sa kakuyaw. Ang mga lider kinahanglan nga moreport diha dayon sa tanang mga pasangil o mga pagduda sa pang-abuso, dili lang kay ang tinuod nga mga panghitabo, ngadto sa tinugyanan nga bishop o presidente sa stake. Ang tinugyanan nga bishop o ang presidente sa stake motawag sa help line alang sa tabang, lakip ang legal nga tambag mahitungod sa pagreport sa pag-abuso ngadto sa sibil nga mga awtoridad. Alang sa dugang nga impormasyon, bisitaha ang churchofjesuschrist.org/study/life-help/abuse?lang=ceb.

Mga Lider

Kon ang mga espesyalista sa may kakulangan sa ward ug stake dili makatubag sa mga gikinahanglan, ang mga high councilor, minyo nga mga magtiayon, ubang mga hamtong, ug hingkod nga mga batan-on mahimong tawagon isip mga lider sa kalihokan sa may kakulangan. Kadtong mga nagserbisyo gitawag ug gi-set-apart pinaagi o ubos sa direksiyon sa tinugyanan nga bishop, presidente sa stake, o Area Seventy.

Sa dili pa tawagon ang usa ka lider sa kalihokan sa may kakulangan, ang bishop o presidente sa stake mosiguro nga ang tawo wala sa lista sa mga nakahimo og kalapasan nga naglambigit sa sekswal nga buhat. Sa Estados Unidos, ang bishop, presidente sa stake, o clerk mosiksik sa ngalan sa tawo diha sa nsopw.gov. Sa ubang nasod, mahimong magamit ang parehas nga sistema. Ang bishop o presidente sa stake mosiguro usab nga walay pagpasabot [annotation] diha sa rekord sa pagkamiyembro sa pang-abuso (tan-awa sa Kinatibuk-ang Tamdanan nga Basahon, 30.1.1). Kon ang mga lider adunay mga pangutana mahitungod sa mga rekord nga adunay mga pagpasabot o mga ngalan diha sa rehistro sa mga nakahimo og kalapasan nga naglambigit sa sekswal nga buhat, sila kinahanglan motawag sa 1-801-240-7887. Ang mga lider gawas sa Estados Unidos kinahanglan nga mokontak sa legal counsel sa buhatan sa area.

Human matawag ang lider sa kalihokan sa may kakulangan, ang bishop o ang presidente sa stake modapit kaniya sa pagbuhat sa mosunod sa dili pa ang unang kalihokan:

• Basaha sa “Pagpanalipod sa mga Miyembro ug Pagreport sa Pag-abuso” diha sa churchofjesuschrist.org/study/manual/abuse-how-to-help?lang=ceb.

• Kumpletoha ang pagbansay sa pagpanalipod sa kabataan ug kabatan-onan diha sa ProtectingChildren.ChurchofJesusChrist.org.

Ang mga lider sa kalihokan sa may kakulangan mopakigbahin og impormasyon mahitungod sa mga kalihokan ug mga kalamposan sa mga miyembro ngadto sa ilang mga lider sa kaugalingong mga ward, diin ang permanente nga mga rekord gitipigan ug ang pasidungog mahimong mahatag. Sigon sa pagdapit sa tinugyanan nga bishop o presidente sa stake, ang mga lider sa kalihokan sa may kakulangan mahimong motambong sa mga miting sa pagpangulo sa stake o sa ward.