Mga Tabang alang sa mga Lider

Mga kakulangan

Samtang ikaw mangalagad ngadto sa mga panginahanglan sa uban, ikaw makatabang kanila sa pagsinati og hingpit nga kalipay ug katumanan. Ikaw makatabang kanila sa pagsabut nga ang “matag usa [kanato] usa ka hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios” (“Ang Pamilya: Usa ka Pamahayag ngadto sa Kalibutan,”). Ang matag usa kanato nahatagan og talagsaon nga mga gasa nga mahimong gamiton sa pagpanalangin ug pagserbisyo niadtong nagpalibut kanato. Kitang tanan gikinahanglan sa Simbahan ni Jesukristo.

Aron sa pagkab-ut sa balaang padulngan nga ang atong Langitnong mga Ginikanan nagtinguha alang kanato, tanan kita nagkinahanglan sa oportunidad sa pagkat-on ug pagpuyo sa ebanghelyo ni Jesukristo. Walay pagsapayan sa mga kadautan, tanang mga anak sa Dios takus sa oportunidad sa paghimo og mga pakigsaad ug sa pagtabang og pagtukod sa gingharian sa Dios dinhi sa yuta.

Samtang ikaw makigtrabaho uban sa mga miyembro nga may kakulangan kinsa nagsinati og mga hagit sa kinabuhi, hunahunaa sa mainampuong paagi kini nga mga kamatuoran:

Ang mga hunahuna ug mga espiritu sa tanang mga anak sa Dios makahimo sa pagtubo.
Ang matag anak sa Dios nagdugang og kalidad ug kabililhon ngadto sa tawhanong pamilya ug ngadto sa Simbahan.
Sagradong mga pakigsaad gituyo aron sa pagpanalangin sa mga kinabuhi sa tanan niadtong kinsa nagtinguha ug makahimo sa pag-apil.
Ang tanang miyembro sa Simbahan, lakip niadtong may mga kalainan o mga kakulangan, kinahanglan nga adunay makahuluganong mga oportunidad sa pagpangalagad, pagtudlo, ug pagpangulo.
Ang kakulangan dili usa ka silot––ni ngadto sa tawo o ni sa mga ginikanan (tan-awa sa Juan 9:1–3).

Ang matag usa adunay ikatampo. Kini atong panalangin ug responsibilidad sa pagsunod sa ehemplo ni Jesukristo ug sa pag-amuma sa usa.

Tabangi ang uban nga masakop.

Atong mabasa sa 1 Mga Taga-Corinto 12:25–27 mahitungod sa lawas ni Kristo:

“Aron walay panagkasumpaki sa sulod sa lawas; hinonoa aron ang mga bahin niini masigbaton sa samang pagtagad alang sa usag-usa.

“Kon ang usa ka bahin magaantus, nan, ang tanan magadungan sa pag-antus; kon ang usa ka bahin pasidunggan, nan, ang tanan magadungan sa pagkalipay.

“Kamo mao ang lawas ni Kristo, ug matag usa kaninyo kabahin niini.”

Kita dili kompleto nga wala ang matag miyembro. Ang mata dili makatampo sa samang paagi nga ang kamot makahimo, ni ang tiil makabuhat sa trabaho nga ang dunggan makahimo. Kita mas maayo kon atong makat-unan kon unsaon sa pagdayeg sa mga kalig-on nga kitang tanan nagdala ngadto sa Simbahan. Mahimo kitang mas mahisama ni Kristo kon kita mag-amuma alang sa usag usa.

Unsa ang atong mabuhat sa pagtabang sa uban nga mobati nga gihigugma ug giapil diha sa hingpit nga lawas ni Kristo sa atong mga ward ug mga stake? Sa 3 Nephi 22:13 atong mabasa, ang “Tanan ninyo nga mga anak pagatudloan mahitungod sa Ginoo.” Kana nga kasulatan mahimong sayon nga basahon, “Ang inyong mga anak pagatudloan mahitungod sa Ginoo.” Kini panudlo nga ang Dios mipili sa pag-apil sa pulong nga tanan. Kinahanglan gayud nga atong ilhon nga ang tanan nga mga anak sa Dios takus sa oportunidad sa pagkat-on ug pagpuyo sa ebanghelyo. Ang tanang mga tawo adunay usa ka butang nga matampo ngadto sa Simbahan ni Jesukristo.

Pangutana og tinuod, mahigugmaong mga pangutana.

Nagtabang kita sa uban sa pagpuyo og mas hingpit nga pagpuyo sa ebanghelyo kon atong buhaton ang atong labing maayo sa pagmugna og usa ka luwas nga luna alang kanila sa pisikal, inteliktwal, emosyonal, ug espiritwal nga mga paagi. Kasagaran kini mahimo pinaagi sa pagtabang kanila sa tinagsa ug sa pagpangutana og mga butang sama sa “Unsa ang imong gusto kanako nga mahibaloan?” o “Unsa ang pipila ka mga butang nga atong mabuhat sa pagtabang sa simbahan nga mahimong dapit diin kamo o ang inyong anak mahimong malampuson?” Kasagaran ang lihok sa pagtabang sa tinagsa nga paagi aron sa pagdapit ug sa pagpangutana og sinsero, mahigugmaong mga pangutana mahimong ang unang lakang sa pagtabang sa uban nga mas mobati nga usa ka kabahin sa ilang tinuohan.

Paghatag og maayo nga ehemplo.

Ang uban kasagaran mag-agad sa ilang mga ginikanan ug mga lider sa Simbahan sa pagtino kon unsaon nila sa pagtubag ngadto sa usa ka sitwasyon. Unsaon nimo pagpakita og gugma, pailub, ug putli nga gugma samtang ikaw naghimo og ehemplo aron sundon sa uban?

Hinumdumi nga kita mas managsama pa kaayo kay sa kita lahi sa usag usa. Diha sa Simbahan, kita makabuhat og dili katuohan nga trabaho sa paghatag og pipila sa mga butang nga labing gikinahanglan sa mga tawo nga wala gani kinahanglana ang bisan unsa nga pagtudlo––mga butang sama sa pagkamahimong usa ka higala. Ang labing maayong kapanguhaan sa kanunay mao ang mga indibidwal nga nagdungan og trabaho sa pagpangita og mga kasulbaran samtang ang mga miyembro nga may kakulangan nag-abag alang sa ilang mga panginahanglan ug ang uban mahigugmaong naminaw ug naghatag og tabang.