Unsa ang akong responsibilidad isip usa ka lider?

Ang mga lider sa Simbahan adunay usa ka sagradong responsibilidad sa pag-amuma alang sa matag miyembro sa ilang panon ug sa pagtabang ngadto sa “usa ka tawo.” Kini naglakip sa pagtabang ngadto sa mga miyembro nga may mga kakulangan ug sa ilang mga tig-amuma. Kon ang pagdasig luyo sa pag-ila mahitungod sa uban nagagikan sa usa ka dapit sa gugma ug kalooy, nindot nga mga butang ang mahitabo. Ang mga lider ug mga magtutudlo sa Simbahan kinahanglan nga maghinumdom sa mosunod samtang sila nagtrabaho kauban niadtong kinsa may mga kakulangan ug maningkamot sa pagdugang nga makaamgo ug makasabut sa mga kakulangan:

• Pag-abi-abi. Pangita og mga paagi sa pagtabang kanila nga mobati nga gihigugma, gidawat, ug giapil.

• Paghatag og mga oportunidad. Pagmainampuon sa pag-ila sa makahuluganong mga oportunidad alang sa pagpaserbisyo sa mga miyembro nga may kakulangan. Pakigkita sa mga indibidwal ug sa ilang mga tig-amuma aron sa pagtabang og pag-ila sa mga kahanas ug mga talento. Pakighisgot kanila og mga paagi nga kadtong mga kahanas ug mga talento mahimong magamit sa labing maayo. Ang matag usa adunay usa ka butang nga ikatampo.

• Ilha ang piho nga mga panginahanglan. Pakigsulti sa mga indibidwal ug sa mga pamilya mahitungod sa ilang mga panginahanglan. Mahimong nanginahanglan sila og pisikal, espiritwal, ug emosyonal nga suporta ingon man sa pagpahulay gikan sa ilang inadlaw nga buhat. Hinumdumi nga ang mga miyembro nga may kakulangan ug ang ilang mga pamilya sa kinatibuk-an mao ang labing maayo nga kapanguhaan sa ilang kakulangan. Sila nakahibalo mahitungod sa ilang mga kalig-on ug mga hagit nga moabut uban sa usa ka piho nga kakulangan ug makatabang kanimo sa pag-ila kon diin gikinahanglan ang tabang. Ikaw makaangkon og daghang panabut pinaagi sa pagpangutana sa mga indibidwal, sa ilang mga sakop sa pamilya, ug sa ubang mga tig-amuma og mga maayong pangutana sama sa mosunod:

  • “Unsa ang makatabang alang kanako nga mahibaloan mahitungod kanimo aron akong mabuhat ang labing maayo sa pagtabang kanimo aron paghimo sa imong kasinatian sa simbahan nga mas makahuluganon?”

  • “Unsa ang gusto nimong akong mahibaloan mahitungod sa imong pagkabata?”

  • “Unsa nga mga butang ang imong nahibaloan nga nakatabang kaniadto nga akong masulayan sa paggamit sa simbahan?”

• Awhaga ang pagsinabtanay. Human sa pakigkonsulta sa mga miyembro nga may mga kakulangan mahitungod sa unsay komportable nilang ipakigbahin nimo sa uban, tabangi ang mga miyembro sa ward sa pagsabut sa mga kakulangan ug mga panginahanglan sa mga indibidwal. Kini makatabang sa mga miyembro sa ward sa pag-angkon og mas dako nga kalooy, pagsabut, ug inspirasyon mahitungod kon unsaon sa paghatag og suporta.

• Pag-ila sa mga kapanguhaan. Samtang ikaw makigkita sa mga indibidwal, sa mga pamilya, ug mga lider, moabut ka sa pagsabut asa ang labing dako nga panginahanglan, ingon man ang mga kalig-on ug mga gasa nga ang mga miyembro andam sa pagpakigbahin. Diin angay, ilha ang mga kapanguhaan nga anaa sa komunidad, ward, ug stake aron sa pagtabang niadto nga mga panginahanglan.

• Pagtinambagay. Ingon nga angay, dapita ang mga indibidwal, ilang mga ginikanan, o ubang mga tig-amuma sa paghisgot uban sa mga lider sa ward sa ilang mga kalig-on ingon man sa mga hagit ug mga babag nga magpugong kanila gikan sa hingpit nga pag-apil diha sa ward. Tabangi ang mga ginikanan nga magkaistorya sa ubang mga ginikanan kinsa adunay mga anak nga may susamang mga kakulangan.

Makatabang nga mga Kapanguhaan

“Mga Miyembro nga may mga Kakulangan,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.2.1.8–9.

Jeffrey R. Holland, “Pagtambayayong sa Usag Usa nga mga Alantuson,” Liahona, Hunyo 2018, 24–29.

Paul ug Melissa Pieper, “Espesyal nga mga Panginahanglan, Espesyal nga mga Leksyon,” Liahona, Hunyo 2020, 28–31.

Katie E. Steed, “Andam ba nga Magpabunyag ang Akong Anak nga Adunay Kakulian sa Panglawas” Liahona, Hunyo 2020, 18–20.