26-р хичээл—Сургаал ба Гэрээ 12–17; Иосеф Смит—Түүх 1:66–75

Сургаал ба Гэрээ 17

Гурван гэрч

Их Эзэн өөр гурван хүн алтан ялтаснуудыг гэрчилнэ гэж Иосеф Смитэд амласан. Оливер Каудери, Давид Витмер, Мартин Харрис нар тэдгээр гэрч байхаар Бурханаар дуудагджээ. Тэд итгэлтэй байсан учраас тэнгэр элч Моронай тэдэн дээр зочлон очсон бөгөөд харсан зүйлс нь үнэн гэж Аврагчийн тунхаглах дуу хоолойг сонссон. Энэ хичээл нь Гурван гэрчийн гэрчлэлийг судлах явцдаа Мормоны Номын талаарх гэрчлэлээ хүчирхэгжүүлэхэд суралцагчдад тусална.

Суралцагчдын бэлтгэл: Суралцагчдыг ChurchofJesusChrist.org-оос Мормоны Номын гурван гэрчийн тухай мэдээлэл хайж, олж мэдсэн зүйлээ хуваалцах бэлтгэлтэй ирэхэд урьж болно.

Боломжит суралцах үйл ажиллагаа

Гэрчүүд

Гэрчүүдийн үүргийг танилцуулахын тулд та гурван суралцагчийг гэрч болоход урь. Үүнийг хийх нэг арга зам бол ямар нэгэн зүйлийг уутан дотор хийн, нэг суралцагчийг доторхыг нь харж, дүрсэлж хэлэхэд урих явдал юм. Уг суралцагчийн үгэнд итгэж байгаа эсэхийг ангийнхнаас асуу. Үлдсэн хоёр суралцагчийг хоёр дахь, гурав дахь гэрч болоход урь. Олон гэрчтэй байх нь яагаад тустай талаар ярилц.

Тэнгэрлэг Эцэгийн авралын төлөвлөгөөнд гэрчүүд чухал үүрэг гүйцэтгэдэг. Сургаал ба Гэрээ 6:28-ыг уншаад, Их Эзэн гэрчүүдийн талаар юу заасныг олж мэд (мөн 2 Коринт 13:1-ийг үзнэ үү).

• Сүм дэх гэрчүүдийн талаар ямар жишээнүүд байдаг вэ?

• Яагаад Аврагч Өөрийн ажлыг олон хүнээр гэрчлүүлдэг гэж та бодож байна вэ?

Гурван гэрч

Иосеф Смит илчлэлээр болон Мормоны Номоор дамжуулан Их Эзэн алтан ялтаснуудыг өөр хүмүүст харуулна гэдгийг мэдэж авчээ. Тэрээр гурван гэрч алтан ялтаснуудыг Бурханы хүчээр харна гэдгийг мэдэж байсан (2 Нифай 27:12–13; Ифер 5:2–4; Сургаал ба Гэрээ 5:11–15-ыг үзнэ үү). Оливер Каудери, Давид Витмер, Мартин Харрис нар гэрчүүдийн нэг нь болохоор тус бүрдээ сүнслэгээр өдөөгдсөн юм. Тэдний хүн нэг бүр Мормоны Номыг урагш гаргаж ирэхэд чухал үүрэг гүйцэтгэсэн.

Та гурван гэрчийн зургийг үзүүлэх юм уу нэрсийг нь самбарт бич. Нэг суралцагч хариултуудыг уншиж, ангийнхан тохирох гэрчийг хэлж болно. Эсвэл та суралцагчдад асуулт тавьж болох юм. Зөв хариултууд нь 1. Б, 2. В, 3. А.

Гурван гэрч бүрийг амьдралынх нь талаарх зөв мэдээлэлтэй нийцүүл.

1. Оливер Каудери

2. Давид Витмер

3. Мартин Харрис

1. Мормоны Номыг хэвлэх санхүүжилтийг өгсөн.

2. Мормоны Номын ихэнх орчуулгын үеэр Иосефын гол бичээчээр үйлчилж байсан.

3. Иосеф Смитийг гэрт нь ирж, Мормоны Номын орчуулгаа хийж дуусгахад урьсан.

Сургаал ба Гэрээ 17:1–2-ыг уншаад, Их Эзэн гурван гэрчид хандан, тэднийг юу харна хэмээн айлдсаныг олж мэд.

• Тэдгээр нь юу болох талаар та юу мэдэх вэ?

• Тэдгээрийг харахын тулд юу хийхийг Их Эзэн тэднээс шаардсан бэ?

Сургаал ба Гэрээ 17:3–9-ийг уншаад, ялтаснуудыг харсны дараа гурван гэрч ямар үүрэг хүлээснийг хайж ол.

Их Эзэнийг бидэнд тэнгэрлэг үнэнүүдийг гэрчлэх гэрчийг өгөх үед бид ямар үүрэг хүлээж авдаг вэ?

(Суралцагчдад “Их Эзэн биднийг үнэний гэрчээр адисалсны дараа бид уг үнэнийг гэрчлэх үүрэг хүлээдэг” гэх зарчмыг тодорхойлоход тусал.

Та суралцагчдыг 6-р шүлэгт Аврагч хэрхэн уг үнэний жишээ юм гэдгийг тэмдэглэж авахад урьж болно.

Аврагч Мормоны Номыг Өөрөө гэрчилсэн явдал яагаад чухал гэж та нар бодож байна вэ?

“Гурван гэрчийн гэрчлэл”

Мормоны Номын удиртгал хэсэг дэх “Гурван гэрчийн гэрчлэл”-ийг уншаад, тэдний юуны тухай гэрчилснийг хайж ол.

• Тэдний гэрчлэлээс юу нь танд чухал санагдаж байна вэ?

Суралцагчдыг “Гурван гэрчийн гэрчлэл”-ийг уншиж байхад Мормоны Номын үнэнийг тунхагласан үг эсвэл хэллэгийг тэднээр самбарт бичүүлж болно. Суралцагчдын самбарт бичсэн зүйлсийг ярилц. Гурван гэрчид хэд хэдэн сүнслэг үйл явдал тохиолдсоныг онцлох нь тус болж болох юм. Тэд Иосеф Смитийн гэрч байхаас гадна тэнгэр элч Моронайг харж, уг ажил үнэн гэдгийг Аврагч Өөрийнхөө дуу хоолойгоор тунхаглахыг сонсжээ.

• Мормоны Ном үнэн гэх өөрийн гэсэн гэрчлэлтэй болох талаар ямар зүйлийг бид гурван гэрчээс сурч болох вэ?

Тэргүүн зөвлөлийн ерөнхийлөгч Хэнри Б.Айринг тэдний гэрчийн хүчний талаар ийн гэрчилсэн. Дараах мэдэгдлийг унш.

Таны хайртай хүмүүс харж, сонссон зүйлээсээ тэдгээр гэрчийн адил бодит нотолгооноос илүү зүйлийг авч болох юм. Гурван гэрчид нотолгооноос илүү, бид бүгдэд хэрэгтэй нэг зүйл байсан. Ариун Сүнс тэдний харж, сонссон зүйл үнэн болохыг оюун санаа, зүрх сэтгэлд нь гэрчилсэн юм. Сүнс тэдэнд уг тэнгэр элч Бурханаас илгээгдсэн ба уг дуу хоолой Эзэн Есүс Христийнх гэдгийг хэлсэн. Сүнсний тэрхүү гэрч тэдэнд болон тэнд байгаагүй олон хүнд өгөгджээ. Хэрэв бид Ариун Сүнстэй нөхөрлөхөд тэнцэхээр байвал энэ гэрч биднийх байж, бидэнтэй үүрд байх болно.

Гурван гэрч Мормоны Номын гэрчлэлээ хэзээ ч үгүйсгээгүй. Учир нь тэд энэ ном үнэн гэдгийг мэдэж байсан. Тэд ихийг золиосолсон бөгөөд бусад хүний хэзээ ч мэдээгүй сорилт бэрхшээлтэй нүүр тулж байсан. Оливер Каудери нас барахаасаа өмнө, бие нь тааруу хэвтэж байхдаа Мормоны Номын тэнгэрлэг гарал үүслийн талаар өмнөхтэйгөө адил гэрчлэлийг үлдээжээ. Гэвч сорилт бэрхшээлийн үед тэд Иосеф Бурханы бошиглогч хэвээр байгаа бөгөөд Аврагч руу очих цор ганц зам нь Түүний сэргээсэн Сүм юм гэсэн итгэлдээ эргэлзэж байв. Тэд Сүмээс болон Иосефоос удаан хугацаагаар холдсон байхдаа ч гайхамшигт туршлагадаа харж мөн сонссон зүйлсээ үргэлжлүүлэн баталж байсан нь тэдний гэрчлэлийг илүү хүчтэй болгодог. (Henry B. Eyring, “An Enduring Testimony of the Mission of the Prophet Joseph,” Liahona, Nov. 2003, 90)

• Мормоны Номын эсвэл Есүс Христийн талаарх гэрчлэлд чинь “Гурван гэрчийн гэрчлэл” хэрхэн нөлөөлдөг вэ?

• Аврагчийн талаар мөн Мормоны Номын талаар гэрчлэлээ хуваалцах ямар ямар арга зам байгаа вэ?

Аврагчийн талаар мөн Мормоны Номын талаар гэрчлэлээ хуваалцахад суралцагчдыг урих талаар бодож үзээрэй. Хэрэв Есүс Христийн талаар болон Мормоны Номын тухай хуваалцах тэдний гэрчлэл дэлхий даяар хэвлэгдэх байсан бол юу гэж хэлэх байснаа бичихийг суралцагчдаас хүсэж болно. Та суралцагчдыг гэрчлэлээ ангийнхантайгаа эсвэл өөр хэн нэгэнтэй хуваалцахыг урамшуулж болох юм. Та мөн гэрчлэлээ хуваалцаж болно.

Нэмэлт эх сурвалж

Би Гурван гэрчийн талаар хаанаас илүү ихийг мэдэж авах боломжтой вэ?

• Church History Topics, “Мормоны Номын гэрчүүд,” ChurchofJesusChrist.org/study/history/topics

• Гэгээнтнүүд: Хожмын үеийн Есүс Христийн Сүмийн түүх, 1-р боть, Үнэний жишиг, 1815–1846 [2018], 73–75

• Larry E. Morris, “The Experience of the Three Witnesses,” in Revelations in Context (2016), 25–28

Яагаад Гурван гэрчийн гэрчлэл тийм чухал вэ?

Тэргүүн зөвлөлийн ерөнхийлөгч Даллин Х.Өүкс ийн заасан:

Хэрэв гэрчлэл нь худал байсан бол тэдний хэн хэнд нь үгүйсгэх эсвэл ямар нэгэн зүйл нь алдаа мадагтай байсан бол тэдгээрээс бултан зайлсхийх хангалттай шалтаг, боломжууд байсан. Гэрчлэл нь хэвлэгдэж гарснаас хойш найман жилийн дараа Сүмийн бусад удирдагчийн зөрчилдөөн, атаархлаас болж энэхүү гурван гэрч гурвуулаа Есүс Христийн Хожмын Үеийн Гэгээнтнүүдийн Сүмийн гишүүнчлэлээс хасагдсаныг бүгд мэднэ. Тэд гурвуулаа нэгдэж хуйвалдах ямар нэгэн ашиг сонирхол тээлгүйгээр тус тусын замаа хөөжээ. Гэсэн хэдий ч амьдралынхаа сүүлчийн мөчийг хүртэл, тухайлбал гишүүнчлэлээс хасагдсанаасаа хойших 12–50 жилийн хугацаанд тэдний хэн нь ч хэвлэгдсэн гэрчлэлээсээ хазайж эсвэл үнэнийг үгүйсгэх ямар ч зүйл хэлээгүй юм.

Мөн өөр ямар ч гэрч тэдний гэрчлэлийг няцаагаагүй. Хэн нэгэн тэдний гэрчлэлийг үгүйсгэж болох ч асар их доромжлол болон хувь хүний сул дорой байдалтайгаа тэмцэлдэн байхдаа амьдралынхаа эцсийг хүртэл, хэвлэгдэж гарсан гэрчлэлдээ нэгдэж, гэрчлэлээ хадгалж үлдсэн эдгээр сайн хүний талаар хэрхэн тайлбарлаж хэлэх билээ? Мормоны Номтой л адил, харсан зүйлээ ярьсан сайн мөн шударга эрчүүдийн чин сэтгэлийн гэрчлэл дэх тайлбараас илүү дээр тайлбар байхгүй. (Dallin H. Oaks, “The Witness: Martin Harris,” Ensign, May 1999, 36)

Амьдралынхаа төгсгөлд гурван гэрч ямар ямар гэрчлэл хуваалцсан бэ?

Оливер Каудери (1806–1850) ийн гэрчилжээ.

Өдөр хоногоо тоолж байгаа над шиг хүн чамд худлаа хэлээд ч яах билээ. Би … Мормоны Ном Бурханы бэлэг, хүчээр орчуулагдсан гэдгийг мэднэ. Би нүдээрээ харж, чихээрээ сонсож, оюун ухаанаараа ойлгосон бөгөөд миний гэрчилж буй зүйл үнэн гэдгийг мэднэ. Энэ нь зүүд эсвэл хий хоосон төсөөлөл биш, харин бодит зүйл байсан. (Jacob F. Gates, “Testimony of Jacob Gates,” Improvement Era, Mar. 1912, 418–19)

Давид Витмер (1805–1888) ийн гэрчилсэн.

Ням гаргийн орой 17:30-д (1888 оны 1–р сарын 22) ноён Витмер гэр бүлийнхнийгээ болон найзуудаа дуудав. … Тэрээр орных нь хажууд байсан бүгдэд хандан: “Та бүгд Христэд итгэлтэй байх ёстой. Би та бүгдэд Библи болон нифайчуудын цэдэг (Мормоны Ном) үнэн гэдгийг хэлэхийг хүсэж байна. Та нар үхлийн ирмэг дээр буй намайг гэрчлэлээ хэлж байгааг сонссоноо гэрчилж болно. Бүгд Христэд итгэлтэй байгтун. Та нарын ажил үйлсийн дагуу шагнал чинь ирэх болно. Бурхан та бүгдийг адислаг. Христэд итгэх итгэл маань үүрд мөнхөд орших болно, Амен.” (Richmond Democrat, Feb. 2, 1888, quoted in Andrew Jenson, Latter-day Saint Biographical Encyclopedia, 4 vols. [1901], 1:270)

Мартин Харрис (1783-1875) ийн гэрчилсэн.

Тийм ээ, би Мормоны Номын бичигдсэн ялтаснуудыг харсан; би тэнгэр элчийг харсан; би Бурханы дуу хоолойг сонссон; би Иосеф Смит бол Бурханы бошиглогч бөгөөд ариун санваарын түлхүүрүүдийг атгадаг гэдгийг мэднэ. (“The Last Testimony of Martin Harris,” recorded by William H. Homer in a statement sworn before J. W. Robinson, Apr. 9, 1927, quoted in Francis W. Kirkham, A New Witness for Christ in America, 2 vols. [1960], 1:254)

Сургаал ба Гэрээ 17:4. Гурван гэрчийн гэрчлэл Иосеф Смитийг хэрхэн адисалсан бэ?

Гурван гэрчийг тэнгэр элчтэй уулзсаны дараа Иосеф Смит Витмерийн гэрт эргэж ирээд, эцэг эхдээ: “Аав аа, ээж ээ, та нар намайг ямар аз жаргалтай байгааг мэдэхгүй байна. Их Эзэн надаас өөр гурван хүнд ялтаснуудыг үзүүлсэн. Тэдэнд гэрчилсэн тэнгэр элчийг тэд харсан мөн тэд намайг хүмүүсийг хууран мэхэлж явахгүйг өөрсдөө мэдсэн учир миний хэлсэн үнэнийг гэрчлэх боллоо. Үүрч явахад хэт хүнд байсан ачаанаасаа чөлөөлөгдсөн мэт санагдаж байна. Энэ нь миний бодгалийг баясгаж, би дэлхийд ганцаараа биш боллоо’ хэмээн дуу алдсан юм.” (“Lucy Mack Smith, History, 1845,” 154, josephsmithpapers.org)

Нэмэлт суралцах үйл ажиллагаа

“Найман гэрчийн гэрчлэл”

Мормоны Номын удиртгал хэсэг дэх “Найман гэрчийн гэрчлэл”-ийг судлахад нь суралцагчдад туслахын тулд та тэдний гэрчлэлийг уншиж өгч болох юм. Мөн 2 Нифай 27:13-ыг уншиж болно. Та тэдний гэрчлэлийн ач холбогдол, туршлага нь хэрхэн Гурван гэрчийнхээс өөр байсан талаар ярилцаж болно.

Мэри Витмер бол алтан ялтаснуудын гэрч юм.

Мэри Витмерийн туршлагаас хуваалцахыг бодоорой.

Иосеф, Эмма, Оливер нар Витмерийн гэрт нүүж ирснээр Мэри Витмерийн ачаалал нэмэгджээ. Тэр нөхрөө мөн гэртээ болон ойр тойронд нь амьдардаг найман хүүхдийнхээ хэрэгцээг хангах үүргийг хэдийн хүлээсэн байв. Хэдийгээр Мэри үүрэх ачаа нь нэмэгдсэнд гомдоллоогүй ч ядарч сульдаж байлаа.

“Нэгэн өдөр тэр үнээ саадаг саравчныхаа хажууд байхдаа үүргэвч үүрсэн буурал үстэй эрэгтэйг олж харжээ. Түүнийг гэнэт хараад айсан ч уг эрэгтэйг Мэрид хандан аядуу зөөлөн ярихад тэр тайвшрав.

‘Намайг Моронай гэдэг’ гэж тэр хэлээд, ‘Чи хийх шаардлагатай олон нэмэлт ажлаас болоод их ядарсан байна’ гэв. Түүнийг мөрнөөсөө үүргэвчээ буулган, тайлж, амыг нь нээхийг Мэри харжээ.

‘Чиний үнэхээр их итгэлтэй мөн ажилдаа хичээнгүй байгаа явдал зөв зохистой тул гэрчлэл хүлээн авч, итгэл чинь хүчирхэгжих ёстой’ гэж тэр үргэлжлүүлэн хэлэв.

Моронай үүргэвчээ нээн, алтан ялтаснуудыг гаргаж ирэв. Ялтаснуудыг урдаа барин, хуудаснуудыг нь эргүүлэхэд Мэри тэдгээрийн дээр байх бичээсийг харж байлаа. Тэр хамгийн сүүлийн хуудсыг эргүүлээд, энэхүү нэмэлт ачааг арай удаан үүрэхдээ тэвчээртэй, итгэлтэй байхыг түүнд сануулан, үүнийхээ төлөө адислагдах болно хэмээн амлав.

Хормын дараа настай эрэгтэй замхран алга болж, Мэри ганцаар хоцорсон байлаа. Түүнд хийх ажил байсаар байсан ч, тэр түүртэхээ больсон юм” (Гэгээнтнүүд: Хожмын үеийн Есүс Христийн Сүмийн түүх 1-р боть, Үнэний жишиг, 1815–1846 [2018], 70–71).

Мормоны Номын тухай бидний гэрч

Мөн бид хэрхэн Мормоны Номын тухай гэрчлэлтэй болох талаар та нар ярилцаж болно.