“Fotopampianarana sy Fanekempihavanana 29:36–50: -Hisafidy ho an’ny tenany izy ireo,-” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fotopampianarana sy Fanekempihavanana 29:36–50,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 46: Fotopampianarana sy Fanekempihavanana 29
Fotopampianarana sy Fanekempihavanana 29:36–50
Hisafidy ho an’ny tenany izy ireo
Nampianatra an’i Joseph Smith momba ny Fahalavoan’i Adama sy i Eva sy ny fahafahany misafidy ny Tompo nandritra ny lahateniny momba ny fandikana nentanim-panahy ny Baiboly. Ao amin’ny Fotopampianarana sy Fanekempihavanana 29, ny Tompo dia nampianatra momba ny fanavotana tamin’ny Fahalavoan’i Adama sy i Eva, tamin’ny alalan’ny Sorompanavotan’i Jesoa Kristy. Ny tanjon’ity lesona ity dia ny hanampy ireo mpianatra hahatakatra bebe kokoa ny fahafahana misafidy nomen’ Andriamanitra antsika sy ny fanavotana natolotr’i Jesoa Kristy.
Sahanasa fianarana azo atao
Manao safidy
Asao ny mpianatra hieritreritra ny safidy nataony tao anatin’ny 24 ora lasa, eo am-pamakiana ity teny manaraka avy amin’ny Filoha Thomas S. Monson (1927–2018) ity.
Matetika tsy misy ora iray ao anatin’ny indray andro izay tsy maintsy anaovantsika safidy amin’ny zavatra iray na amin’ny iray hafa. Ny sasany dia toa tsy manan-danja loatra, ny hafa dia misy vokatra maharitra. Ny sasany tsy hanova na inona na inona eo amin’ny endrika mandrakizain’ny zavatra hitranga, ary ny hafa kosa dia hanova izany tanteraka. (Thomas S. Monson, “Ny Dingana Telon’ny Safidy,” Liahona, nôv. 2010, 67)
Hevero ny hanoratra zavatra tsy misy dikany sy mivelatra eo amin’ny solaitrabe. Asao ny mpianatra mba hanao lisitra ireo safidy mahazatra ataon’ny olona eo ambanin’ny lohateny tsirairay. Avy eo dia asao izy ireo hiresaka momba ireo safidy izay manan-danja indrindra hodinihina amin’ny fomba fijery mibanjina ny mandrakizay alohan’ny hanaovana azy.
-
Inona avy ireo fanapahan-kevitra lehibe noraisinao, na horaisinao, izay mety hisy fiantraikany lehibe eo amin’ny fifandraisanao amin’ny Ray any An-danitra?
Ny fahafahantsika misafidy
Vakio ny Fotopampianarana sy Fanekempihavanana 29:36–38, ka tadiavo ny fanapahan-kevitra lehibe iray izay tsy maintsy noraisin’ny zanak’ Andriamanitra rehetra talohan’ity fiainana ity.
-
Inona no safidy natolotra antsika rehetra talohan’izao fiainana izao?
Ny Loholona Robert D. Hales (1932–2017) tao amin’ny Kôlejin’ny Apôstôly Roambinifolo dia nanazava ny voka-dratsin’ny safidy talohan’ny nahaterahana izay nataontsika.
Noho ny fikomian’i Losifera dia nisy ady ara-panahy lehibe niforona. Samy nanana fahafahana hampiasa ny fahafahany misafidy izay nomen’ny Ray any an-danitra azy ireo zanaky ny Ray any an-danitra tsirairay avy. Nisafidy ny hanam-pinoana an’ny Mpamonjy Jesoa Kristy isika—ny hanatona Azy, hanaraka Azy, ary hanaiky ny drafitry ny Ray any an-danitra izay natolotra ho an’ny tombontsoantsika. Kanefa nisy iray am-pahatelon’ny zanaky ny Ray any an-danitra tsy nanana finoana ny hanaraka ny Mpamonjy ka nisafidy kosa ny hanaraka an’i Losifera, na i Satana.
Ary hoy Andriamanitra hoe: “Koa satria nikomy Tamiko i Satana ary nikatsaka ny handrava ny safidin’ny olona, izay efa nomeko, Izaho Tompo Andriamanitra azy, … dia nasaiko nazera ety ambany izy” [Mosesy 4:3]. (Robert D. Hales, “Fahafahana Misafidy: Zava-dehibe eo amin’ny Drafitry ny Fiainana,” Liahona, nôv. 2010, 24)
Asio marika ny teny hoe safidy ao amin’ny andininy 36.
-
Ahoana no hamaritanao ny dikan’ny teny hoe safidy?
Raha mila fanampiana amin’ny famaritana ny fahafahana misafidy ny mpianatra dia asao izy ireo hijery ny Torolalana ho an’ny Soratra Masina mba hahazoana fanampiana.
Fahamarinana iray azontsika ianarana avy amin’ireo andininy ireo ny hoe noho Andriamanitra nanome antsika fahafahana misafidy dia afaka misafidy ny hanaraka na handà Azy isika.
-
Amin’ny ahoana no hoe maneho ny fitiavan’Andriamanitra antsika ny nanomezany antsika fahafahana misafidy?
Ny Fahalavoana sy ny fahafahantsika misafidy
Asao ny mpianatra hizarazara ho vondrona kely maromaro dia omeo an’ity taratasy zaraina manaraka ity ny vondrona tsirairay. Asao izy ireo hamaky ireo andalan-tsoratra masina natolotra ary hifanakalo hevitra momba ireo fanontaniana. Ampahafantaro azy ireo fa ny sasany amin’ireo andinin-tsoratra masina dia miresaka mivantana momba ny Fahalavoan’i Adama sy i Eva, saingy ny Fanahy dia afaka manampy azy ireo hahita ny fomba hampiharana ny zavatra niainan’i Adama sy i Eva amin’ny fiainantsika ankehitriny.
Fahafahana misafidy sy Fanavotana amin’ny alalan’i Jesoa Kristy
Ireo fakam-panahin’ny devoly
Vakio ny Fotopampianarana sy Fanekempihavanana 29:39 sy ny 2 Nefia 2:16–18, ary ifanakalozy hevitra ireto fanontaniana manaraka ireto:
-
Noho ny fahafantarana fa nisafidy ny hanaraka ny drafitry ny Ray any An-danitra isika talohan’ity fiainana ity, dia inona no mahasarotra ny misafidy ny hanaraka Azy mandrakariva eto an-tany?
-
Inona no tetika mandaitra indrindra ataon’i Satana mba hahatonga ny olona eto an-tany hisafidy ny tsy hanaraka ny torohevitr’ Andriamanitra?
-
Inona ireo fitahiana sasany nomen’ Andriamanitra antsika mba hanampiana antsika handresy ny fakam-panahin’i Satana?
Vokatry ny safidintsika
Vakio ny Fotopampianarana sy Fanekempihavanana 29:40–41 sy ny Almà 41:10–11; 42:9, 14, ary ifanakalozy hevitra ireto fanontaniana manaraka ireto:
-
Amin’ny fomba ahoana no eo ambany fifehezan’ny sitrapon’ny devoly isika rehefa misafidy ny hikomy amin’ Andriamanitra?
-
Araka ny hevitrao, nahoana ny teny hoe “fahafatesana ara-panahy” no famaritana tsara ny fisarahana amin’ny Ray any An-danitra?
-
Ahoana no hamaritanao ny fahatsapana ananantsika rehefa avy mampiasa ny safidintsika hanoherana ny sitrapon’ny Ray any An-danitra isika?
Fanavotana amin’ny alalan’ny Zanaka Lahitokan’ Andriamanitra
Vakio ny Fotopampianarana sy Fanekempihavanana 29:42–43 sy ny 2 Nefia 2:6–9, ary ifanakalozy hevitra ireto fanontaniana manaraka ireto:
-
Inona no nataon’i Jesoa Kristy mba ho azo avotana isika na dia efa nanao safidy ratsy aza?
-
Inona no azonao zaraina momba ny Ray any An-danitra sy i Jesoa Kristy izay afaka manome fanantenana ho an’ny olona iray izay mahatsapa fa lasa lavitra loatra?
-
Inona no ohatra azonao omena izay maneho ny toetra manavotra sy mamela heloka ananan’ny Ray any An-danitra sy i Jesoa Kristy?
© 2023 by Intellectual Reserve, Inc. All rights reserved.
Rehefa nanam-potoana nifanakalozan-kevitra ireo fanontaniana tao amin’ny vondrona misy azy ireo mpianatra, dia asao izy ireo mba hamorona vondrona vaovao miaraka amin’ireo mpianatra izay nandalina ireo fizarana hafa tao amin’ilay taratasy zaraina, ary hifandimby hizara ny zavatra nianarany.
Rehefa vitan’ny mpianatra ny fizarana, dia hevero ny hamaky ny 2 Nefia 2:26–29 miaraka amin’ny iray kilasy. Asao ny mpianatra hitady sy hizara andian-teny izay manamafy na manampy ny zavatra nianarany tamin’ny asa natao teo aloha.
Mifidy ny fanavotana amin’ny alalan’i Jesoa Kristy
Mety hahatsapa ny mpianatra sasany fa efa nanalavitra azy ireo mandrakizay tamin’ Andriamanitra ny safidiny. Mba hanomezana azy ireo fahafahana hifantoka amin’ny fanavotana an’i Kristy, dia hevero ny hampiseho ireto rafi-tantara manaraka ireto. Asao ny mpianatra mba hanampy antsipirian-javatra izay heveriny fa mety ho an’ny zatovo ankehitriny.
Nanao safidy izay fantany fa diso ny zatovovavy iray antsoina hoe Marie. Manenina sy mahatsapa ho lavitra an’Andriamanitra izy ary manontany tena raha mbola misy azo antenaina ny aminy.
Ampiasao ny zavatra nianaranao androany momba ny fahafahana misafidy sy ny fanavotana amin’ny alalan’i Kristy, dia manorata valin-teny iray azonao zaraina amin’i Marie, izay mamporisika azy hanao zavatra amim-panantenana sy amim-pinoana na dia teo aza ny fanaovana safidy ratsy tamin’ny lasa.
Hevero ny hanasa ny mpianatra vitsivitsy hizara ny valin-teniny amin’ny iray kilasy. Rehefa mihaino ny valin-tenin’ny mpiara-mianatra aminy ny mpianatra dia amporisiho izy ireo haka sary an-tsaina ny mety ho tsapan’i Marie rehefa mandre izany izy.
Vakio ity teny manaraka avy amin’ny Filoha Thomas S. Monson (1927–2018) ity, ka tadiavo ny safidy azonao amporisihina hataon’i Marie.
Rehefa mandinika ireo fanapahan-kevitra raisintsika eo amin’ny fiainantsika isan’andro isika—hoe hanao ity safidy ity na iry safidy iray iry—raha misafidy an’i Kristy isika dia efa nanao ny safidy tsara. (Thomas S. Monson, “Ireo safidy,” Liahona, mey. 2016, 86)
Azonao atao ny mamarana ny fotoam-pianarana amin’ny alalan’ny fanasana ireo mpianatra hanoratra ny valin-tenin’izy ireo momba ity bitsika manaraka ity ao amin’ny diary fandalinany, na any amin’ny toerana izay hahitany izany imbetsaka mandritra ny herinandro.
Asao ny mpianatra hizara: Ity manaraka ity dia ohatra iray amin’ny fampiasana bitsika mba hanampiana ireo mpianatra hizara ny eritreriny Mba hahazoana fomba bebe kokoa momba ny fomba hamoronana bitsika izay manampy ireo mpianatra hizara ny eritreriny, dia jereo ny fiofanana “Mamoròna fehezan-teny famporisihana mba hanampiana ny mpianatra hilaza ny zavatra tsapany sy ny zavatra iainany ary ny fijoroana ho vavolombelona ananany.” Io fiofanana io dia hita ao amin’ny Fahaiza-manao ho fampivoarana ny mpampianatra.
Amin’ity herinandro ity dia hampiasa ny fahafahako misafidy aho hisafidianana an’i Kristy amin’ny …