Lesona 127: Fotopampianarana sy Fanekempihavanana 111–115

Tombano ny fianaranao 8

Fotopampianarana sy Fanekempihavanana 95–115

Ny fisaintsainana sy ny fanombanana ny fianarantsika ara-panahy dia afaka manampy antsika hanakaiky kokoa ny Mpamonjy. Afaka manampy ny mpianatra hahatsiaro sy hanombantombana ny fomba nanampian’ny zavatra niainan’izy ireo tamin’ny fandalinana ny Fotopampianarana sy Fanekempihavanana azy ireo mba hivoatra ara-panahy ity lesona ity.

Sahanasa fianarana azo atao

Tombano ny fivoaranao ara-panahy

Mitondrà vato maro samy hafa habe ao am-pianarana ary asaivo mamorona famantarana lalana ny mpianatra. Asao ny mpianatra hanambatra vato vitsivitsy ary hitady izay mahatonga ny fototra ho mafy orina. (Raha tsy izany, dia manehoa sarina famantarana lalana.) Azonao atao ny milaza fa na taloha na ankehitriny, ireo famantarana lalana ireo dia manome fiarovana sy fitarihana ho an’ny mpandeha. Azonao atao ny mametraka ireto fanontaniana manaraka ireto momba ilay sahanasa.

• Inona avy ireo famantarana lalana izay nomen’ny Ray any An-danitra sy i Jesoa Kristy mba hitarihana antsika eo amin’ny lalan’ny fanekempihavanana hiverina ho eo anatrehan’ Izy Ireo?

• Ahoana no ahafahan’ny famantarana lalana ho fanehoana an’ohatra ny Mpamonjy?

Ampio ireo mpianatra hamantatra fa ireo andalan-tsoratra masina nohalalinin’izy ireo, ny lesona nianarany, ary ireo fampianarana nampihariny tamin’ny fandalinany ny Fotopampianarana sy Fanekempihavanana dia mety ho tahaka ireo vato mifanongona, izay manome fiarovana sy fitarihana rehefa mandeha amin’ny lalan’ny fanekempihavanana izy ireo. Asao ny mpianatra hamerina hijery ireo zavatra noraisin’izy ireo an-tsoratra sy ny soratra masina nohalalininy nandritra ny herinandro vitsivitsy farany (Fotopampianarana sy Fanekempihavanana 95–115), ary hisaintsaina ireo fahamarinana nianarany.

Rehefa misaintsaina ny zavatra niainanao tamin’ny fandalinana ny Fotopampianarana sy Fanekempihavanana ianao dia asao ombam-bavaka ny Fanahy mba hanampy anao hamantatra ny fivoaranao mankany amin’ny Rainao any An-danitra sy i Jesoa Kristy Mpamonjy anao.

Asehoy ireto fanontaniana manaraka ireto mba hanampiana ny mpianatra hisaintsaina momba ny fivoaran’izy ireo ara-panahy. Hevero ny hanasa ny mpianatra hamaly roa na maromaro amin’ireo fanontaniana ao amin’ny diary fandalinany.

• Inona avy ireo fahamarinana ara-panahy nianaranao na nampiharinao izay nanampy anao hahatsapa ho akaiky kokoa ny Ray any An-danitra sy i Jesoa Kristy?

• Ahoana no nanomezan’ireo fahamarinana ireo fitarihana sy fiarovana anao eo amin’ny lalan’ny fanekempihavanana?

• Inona avy ireo andalan-tsoratra masina ao amin’ny Fotopampianarana sy Fanekempihavanana izay nanan-danja taminao? Nahoana?

Rehefa nanana fotoana ampy nanoratana ny valiny avy amin’izy ireo ny mpianatra dia asao ny mpianatra vitsivitsy izay manolo-tena hizara hevitra nosaintsainina izay tsy mikasika loatra ny tena manokana. Afaka mizara ireo andalan-tsoratra masina izay nanan-danja tamin’izy ireo sy ny anton’izany izy ireo. Rehefa mizara ny mpianatra dia afaka manampy vato eo amin’ilay famantarana lalana izy ireo.

Eritrereto ireo bitsiky ny Fanahy sy ny zavatra ilain’ny mpianatrao rehefa misafidy hoe iza amin’ireto sahanasa manaraka ireto no hampiasainao.

Hazavao ny fomba itahian’ny fisoronan’ny Mpamonjy sy ny fanalahidin’ny fisoronana ny Fiangonany

Ampio ny mpianatra handinika ny zavatra nianarany vao haingana momba ny fisoronan’ny Mpamonjy sy ny fanalahidin’ny fisoronana. Tamin’ny fandalinany ny Lesona 119: Fotopampianarana sy Fanekempihavanana 107:1–20, dia mety ho nianatra ireo mpianatra fa ireo izay manompo ao amin’ny Fiangonana dia afaka manovo ny herin’ny Mpamonjy amin’ny alalan’ny fisoronany. Tamin’ny fandalinany ny Fotopampianarana sy Fanekempihavanana 110, Tapany 2, dia mety ho nianatra momba ny famerenana amin’ny laoniny ny fanalahidin’ny fisoronana tamin’i Joseph Smith sy i Oliver Cowdery tao amin’ny Tempolin’i Kirtland ireo mpianatra.

Azonao atao ny mizara ity rafi-tantara manaraka ity. Eo am-panoratana ny valiny avy amin’izy ireo ny mpianatra dia azony atao ny mamerina mijery ireo zavatra noraisiny an-tsoratra tao amin’ny diariny na ny soratra masina nasiany marika.

I Becky sy i Michael dia mpiray tampo izay vao haingana no niditra ho mpikamban’ny Fiangonana. Izy ireo irery ihany no mpikambana ao amin’ny fianakaviany. Samy manana fijoroana ho vavolombelona matanjaka momba ny Bokin’i Môrmôna, ny Mpaminany Joseph Smith, ary ny Fiangonan’i Jesoa Kristy naverina tamin’ny laoniny izy ireo, kanefa fantany fa mbola mila mianatra bebe kokoa izy ireo. Tany am-piangonana indray alahady dia nandre olona iray niresaka momba ny fomba nitahian’ny fisoronana sy ny fanalahidin’ny fisoronan’ny Mpamonjy ny mpikamban’ny Fiangonana tsirairay izy ireo. Tsy tena azon’izy ireo ny dikan’izany.

• Inona no azonao ampiasaina avy amin’ny fandalinanao vao haingana ny Fotopampianarana sy Fanekempihavanana mba hanampiana an’i Becky sy i Michael hahatakatra kokoa ny fomba nitahian’ny herin’ny fisoronana’ny Mpamonjy sy ny fanalahidin’ny fisoronana antsika amin’ny maha-mpikamban’ny Fiangonana antsika?

Raha mila fanampiana ny mpianatra dia azonao atao ny mamerina manao sary eny amin’ny solaitrabe ilay hazo avy ao amin’ny Lesona 119: Fotopampianarana sy Fanekempihavanana 107:1–20 ary asio anaran’ireo rafitra samihafa ao amin’ny Fiangonana ireo sampana. Afaka mizara ireo mpianatra fa ireo lehilahy sy vehivavy izay mandray antso ao amin’ny Fiangonana dia manovo hery avy amin’ny Mpamonjy mba hanompoana ny hafa ao amin’ny Fiangonany. Afaka mampiasa ireo andininy avy ao amin’ny fizarana 107 ny mpianatra ho fanampin’ny fanazavan’izy ireo mba hanehoana fa ny fahefana sy anjara fanompoana rehetra ao amin’ny Fiangonan’ny Mpamonjy dia tovan’ny Fisoronana Melkizedeka avokoa. Tafiditra ao anatin’ny andininy mety hampiasain’izy ireo ny andininy 5, 8, 14, 18–20, na andininy hafa araka’izay safidin’izy ireo mba hampianarana izany.

Raha tsy izany dia azonao atao koa ny mampiseho ny sarin’ny fitsidihan’i Mosesy sy i Elià ary i Elia tao amin’ny Tempolin’i Kirtland, izay voafariparitra ao amin’ny Fotopampianarana sy Fanekempihavanana 110. Asao ny mpianatra hizara hoe iza ireo mpitsidika ireo ary inona ireo fanalahidy naverin’izy ireo tamin’ny laoniny. Amporisiho izy ireo hampiasa andininy avy ao amin’ny fizarana 110 amin’ny fanazavany.

Matoky bebe kokoa fa ireo Apôstôly dia vavolombelona manokan’i Jesoa Kristy

Tao anatin’ny lesona iray vao haingana, ny mpianatra dia mety nianatra ny maha-vavolombelona manokan’ny anaran’i Kristy manerana an’izao tontolo izao an’ny Fiadidiana Voalohany sy ny Kôlejin’ny Apôstôly Roambinifolo (jereo ny Fotopampianarana sy Fanekempihavanana 107:23). Omeo fahafahana ny mpianatra hisaintsaina ny fijoroana ho vavolombelona ananany fa ny mpaminany sy ny apôstôly dia vavolombelona manokan’i Kristy amin’izao androntsika izao ary nomen’i Jesoa Kristy andraikitra hanampy antsika hanakaiky kokoa Azy.

Ny fomba iray hanaovana izany dia ny mampiseho ny sarin’ny Fiadidiana Voalohany sy ny Kôlejin’ny Apôstôly Roambinifolo vao haingana ary mametraka izao fanontaniana manaraka izao. Azonao atao ny manome fotoana ny mpianatra hisaintsaina sy hanoratra ny eritreriny ao amin’ny diary fandalinany. Rehefa afaka fotoana vitsy, dia asao izay mpianatra vitsivitsy manolo-tena hizara.

• Inona no nataonao vao haingana izay nisy fiantraikany tamin’ny fijoroanao ho vavolombelona fa tena vavolombelona manokan’i Kristy tokoa ny mpaminany sy ny apôstôly?

  Raha tsapanao fa hanampy ireo mpianatra mba hampitomboana ny fatokisany fa ireo mpaminany sy apôstôly dia vavolombelona manokan’i Kristy ny fanaovana sahanasa fanampiny, dia azonao atao ny manasa azy ireo hanao ny iray amin’ireto sahanasa manaraka ireto:

• Misafidiana hafatra vao haingana avy amin’ny Fiadidiana Voalohany na ny Kôlejin’ny Apôstôly Roambinifolo izay nanan-danja taminao. Saintsaino ny fiantraikan’io hafatra io tamin’ny fahatsapanao momba an’i Jesoa Kristy.

• Valio ny fanasana amin’ny tambajotran-tserasera nataon’ny iray amin’ireo mpikambana ao amin’ny Fiadidiana Voalohany na ny Kôlejin’ny Apôstôly Roambinifolo. Zarao ao amin’ny pejinao amin’ny tambajotran-tserasera ilay fanasana.

• Valio ny zavatra navoaka iray tao amin’ny tambajotran-tserasera na mandefasa hafatra mivantana any amin’ny mpikambana iray ao amin’ny Fiadidiana Voalohany na ny Kôlejin’ny Apôstôly Roambinifolo ka maneho fankasitrahana noho ny hafatra iray vao haingana izay nanampy anao hahatsapa ho akaiky kokoa an’i Jesoa Kristy Mpamonjy.

Rehefa avy nomena fotoana ampy dia afaka mizara amin’ny iray kilasy ny zavatra nosoratany na nozarainy ny mpianatra vitsivitsy.

Miomàna hitsaoka ny Tompo ao amin’ny tempoly

Tamin’ny lesona teo aloha dia nanana fahafahana hiomana hitsaoka ny Tompo ao amin’ny tempoliny ireo mpianatra. Ireto misy famintinana ny lesona vao haingana izay nanampy tamin’izany:

• Ao amin’ny fizarana 95, dia mety niresaka momba ny fanaovana fahafoizan-tena mba hitsaohana ao amin’ny tempoly ny mpianatra.

• Ao amin’ny fizarana 97, dia mety nandinika ny fomba nanampian’ireo fanontaniana momba ny fahazoan-dalana hidirana ny tempoly antsika ho madio am-po izy ireo.

• Ao amin’ny fizarana 109, dia nahita ireo fitahiana izay mifandray amin’ny fitsaohana any amin’ny tempoly ireo mpianatra ary nandinika ny fomba mety hanentanan’ireo fitahiana ireo azy ireo eo amin’ny fiainany.

• Ao amin’ny fizarana 110, dia mety nifanakalo hevitra ny fomba ahafahan’ny fahamendrehany manampy azy ireo hahatsapa ho akaiky ny Tompo ao amin’ny tempoliny ny mpianatra (jereo ny Fotopampianarana sy Fanekempihavanana 110:5–10).

Asao ny mpianatra hamerina hijery ireo tanjona na drafitra manokana izay nataon’izy ireo mba hanampiana azy ireo hiomana hitsaoka Azy ao amin’ny tempoliny.

• Inona no ezaka nataonao vao haingana mba hanomanana kokoa ny tenanao hitsaoka ny Tompo any amin’ny tempoly?

Raha toa ka hahasoa ny mpianatra ny fametrahana fanontaniana manokana izay hamantarana hoe aiza ho aiza ireo drafitra na tanjona mety ho efa niezahany notratrarina, dia azonao atao ny mampiseho ity lahatsoratra manaraka ity ho an’ny mpianatra ary asaivo mamaly ao amin’ny diary fandalinany izy ireo.

Katsaho ny fanambarana ho an’ny tena manokana mba hitarihana anao rehefa mamaly ny iray na ny maromaro amin’ireto fanontaniana manaraka ireto ao anatin’ny diary fandalinanao ianao:

• Inona no fahafoizan-tena nataonao na vonona ho ataonao mba hanehoana fa laharam-pahamehana eo amin’ny fiainanao ny fitsaohana ny Tompo any amin’ny tempoly?

• Inona no fitahiana hitanao teo amin’ny fiainanao teo am-pandinihanao ny namalianao ireo fanontaniana ao amin’ny tafa sy dinika hahazoana fahazoan-dalana hidirana ny tempoly ho fiomanana hiditra ny tranon’ny Tompo?

• Inona no nataonao ho fiezahana ho mendrika ny hitsaoka ny Tompo any amin’ny tempoly?

Eritrereto ireo fitahiana azonao noho ny ezaka nataonao. Inona no mbola hotohizanao na zavatra hatombokao mba hiomanana kokoa amin’ny fitsaohana ao amin’ny tempoliny?

Amporisiho ny mpianatra hanapa-kevitra manoloana ireo mety ho fiovana nentanim-panahy izay tsapan’’izy ireo fa tokony atao teo am-pandinihan’izy ireo ny fivoarany. Azonao atao ny midera ny ezaka nataon’ireo mpianatra mba hahatonga ny Ray any An-danitra sy ny Mpamonjy antsika ary ny filazantsara ho laharam-pahamehana eo amin’ny fiainan’izy ireo. Azonao atao ny mamarana amin’ny alalan’ny fizarana ohatrana fitahiana iray azonao avy amin’ny fiomananao hitsaoka ny Mpamonjy ao amin’ny tempoliny.