Lesson 159: “Ang Mag-anak: Isang Pagpapahayag sa Mundo”

Ang Pagpapahayag tungkol sa Mag-anak, Bahagi 2

“Ang mga Anak ay Mana na Mula sa Panginoon”

Ipinahayag ng mga propeta ng Panginoon ang kahalagahan ng mga anak sa plano ng Ama sa Langit. Maaaring makibahagi ang mga mag-asawa sa plano ng Diyos sa pamamagitan ng pagkakaroon ng mga anak at pagpapalaki sa kanila sa pagmamahal at kabutihan. Ang lesson na ito ay makatutulong sa mga estudyante na maunawaan ang kahalagahan ng pagkakaroon at pag-aalaga ng mga anak sa plano ng Ama sa Langit.

Mga Posibleng Aktibidad sa Pag-aaral

Banal na patnubay mula sa pagpapahayag tungkol sa mag-anak

Maaari mong simulan ang klase sa pamamagitan ng pagbabahagi ng sumusunod na sitwasyon o sitwasyong tulad nito na pinakanakakatugon sa mga pangangailangan ng iyong mga estudyante. Maaari mo silang pagpartner-partnerin para talakayin ang tanong pagkatapos ng sitwasyon.

Pinag-uusapan ni Kristen at ng kanyang dalawang kaibigan ang kanilang mga kinabukasan at kung ano ang gusto nila sa buhay. Nang mapunta ang paksa sa mga pamilya, sinabi ni Kristen na nasasabik siyang mag-asawa at magkaroon ng mga anak kapag nasa hustong edad na siya. Sinabi ng isa sa kanyang mga kaibigan, “Gusto kong mag-asawa, pero hindi ko talaga susubukang magpalaki ng mga anak sa magulong mundo na ito.” Sabi ng isa pang kaibigan, “Ayos lang sa akin na magkaroon ng anak balang-araw, pero sa tingin ko ay ayaw kong mag-asawa.” Matapos marinig ang mga opinyon ng kanyang mga kaibigan, nagtataka si Kristen kung bakit tila naiiba ang kanyang nadarama tungkol sa pagkakaroon ng mga anak.

• Bakit kaya ganoon ang nadarama ng mga kaibigan ni Kristen?

  Sabihin sa ilang magpartner na mga estudyante na ibahagi ang ilan sa kanilang mga sagot. Maaari mo rin silang anyayahan na magbahagi ng mga karagdagan nilang alalahanin o tanong tungkol sa pagkakaroon ng mga anak at pagiging magulang. Magbigay ng mga kopya ng “Ang Mag-anak: Isang Pagpapahayag sa Mundo” na magagamit ng mga estudyante. Sabihin sa bawat magkapartner na pag-aralan ang talata 4–6, at alamin ang mga salita o pariralang nagpapahayag ng doktrina ng Panginoon tungkol sa mga anak at pagiging magulang. Hikayatin ang mga estudyante na markahan ang mga makabuluhang salita o parirala habang nag-aaral sila. Kung kinakailangan, ipaliwanag na ang pariralang “magpakarami at kalatan ang lupa” ay tumutukoy sa pagkakaroon ng mga anak at ang pariralang “ang banal na kapangyarihang lumikha ng bata” ay tumutukoy sa seksuwal na intimasiya. Maaari mong itanong ang tulad ng mga sumusunod.

• Anong mga katotohanan ang nalaman ninyo tungkol sa mga anak at pagiging magulang?

• Sa inyong palagay, bakit nais ng Panginoon na magkaroon ng mga anak ang mag-asawa kung kaya nila?

• Ano ang mga dahilan kung bakit maaaring ayaw ng mag-asawa na magkaroon ng mga anak?

Bago magpatuloy, maaari mong anyayahan ang mga estudyante na isulat ang ilan sa kanilang sariling saloobin at damdamin tungkol sa doktrina ng Panginoon tungkol sa mga anak at pagiging magulang. Hikayatin ang mga estudyante na hingin ang impluwensya ng Espiritu Santo para matulungan sila na maunawaan ang kahalagahan ng pagkakaroon at pag-aalaga ng mga anak bilang bahagi ng plano ng Ama sa Langit.

Paghahanap ng iba pang banal na sources para madagdagan ang pag-unawa

Maaari mong ipakita ang sumusunod na tatlong pahayag ng katotohanan mula sa pagpapahayag tungkol sa mag-anak. Ipaliwanag na gagamitin ng mga estudyante ang mga pahayag na ito para magpraktis na maghanap ng mga itinalagang sources ng Diyos na para sa karagdagang pag-unawa. Maaari mong hatiin ang mga estudyante sa mga grupo na may tatlong miyembro, kung saan ang bawat estudyante ay mag-aaral ng ibang katotohanan. Marahil ay maaaring piliin ng mga estudyante ang kanilang mga pahayag sa malikhaing paraan; halimbawa, ang pinakabata o pinakamatangkad na estudyante sa bawat grupo ang maaaring maunang pumili kung ano ang pag-aaralan.

• “Ang kautusan ng Diyos [sa Kanyang mga anak] na magpakarami at kalatan ang lupa ay nananatiling may bisa.”

• “Ang banal na kapangyarihang lumikha ng bata ay nararapat lamang gawin ng lalaki at babae na ikinasal bilang mag-asawa ayon sa batas.”

• “Ang mga magulang ay may banal na tungkuling palakihin ang kanilang mga anak sa pagmamahal at kabutihan.”

  Hikayatin ang mga estudyante na gumamit ng resources tulad ng Gabay sa mga Banal na Kasulatan o ng Gospel Library app para makahanap ng karagdagang impormasyon tungkol sa kanilang mga pahayag ng katotohanan. Kung kailangan nila ng patnubay, imungkahi na hanapin ang mga salitang tulad ng “magpakarami at kalatan ang lupa,” “kapangyarihang lumikha ng bata,” o “mabubuting magulang.” Sabihin sa kanila na hanapin ang mga pahayag ng mga lider ng Simbahan, mga scripture passage, o mga artikulo sa magasin ng Simbahan na magpapalalim sa kanilang pag-unawa.

  Kapag natapos nang maghanda ang mga estudyante, hikayatin silang ibahagi sa kanilang grupo ang natutuhan nila. Maaari mong itanong ang ilan sa mga sumusunod.

• Ano ang natutuhan ninyo tungkol sa mga pahayag ng katotohanan na ito na sa palagay ninyo ay makabuluhan?

• Bakit kailangan ang pananampalataya kay Jesucristo para maipamuhay ang mga katotohanang ito sa mundo ngayon?

• Anong mga halimbawa ang nakita ninyo tungkol sa kung paano maaaring humantong sa higit pang pagmamahal ang pagsasabuhay sa mga katotohanang ito, samantalang ang pagbalewala sa mga katotohanang ito ay maaaring humantong sa pighati o pagsisisi?

• Ano ang magagawa ninyo ngayon para maghanda na maipamuhay nang tapat ang mga katotohanang ito sa hinaharap?

Walang hanggang doktrina tungkol sa mga anak

Maaari mong patotohanan ang kahalagahan ng mga anak sa walang hanggang plano ng Diyos at ibahagi ang sumusunod na pahayag.

Ipinaliwanag ni Pangulong Dallin H. Oaks ng Unang Panguluhan ang kahalagahan ng mga anak sa plano ng Diyos.

Ang walang hanggang doktrina … ay naglalaan din ng naiibang pananaw tungkol sa mga bata. Sa pananaw na ito nauunawaan natin ang pagkakaroon ng mga anak at pag-aaruga sa kanila bilang bahagi ng dakilang plano. Ito ay nakagagalak at sagradong tungkulin ng mga taong nabigyan ng kakayahan na makibahagi rito. Kaya nga, iniuutos sa atin na ituro at ipagtanggol ang mga alituntunin at gawi na nagbibigay ng pinakamainam na kalagayan para sa pag-unlad at kaligayahan ng mga bata sa ilalim ng plano ng Diyos. (Dallin H. Oaks, “Banal na Pagmamahal sa Plano ng Ama,” Liahona, Mayo 2022, 102)

• Paano ninyo nakitang napagpala ng mga anak ang inyong pamilya o ang iba pang kakilala ninyo?

• Paano makatutulong sa inyo ang pagkakaroon ng mga anak at pagpapalaki sa kanila nang may pagmamahal na maging mas katulad ng ating mga magulang sa langit?

Maaari mong ipakita ang mga sumusunod na pahiwatig at anyayahan ang mga estudyante na tahimik na suriin ang kanilang pag-unawa tungkol sa natutuhan nila ngayon.

Suriin ang iyong pag-unawa sa mga sumusunod na pahayag sa pamamagitan ng pagsagot sa iyong study journal ng lubos na sumasang-ayon, sumasang-ayon, medyo sumasang-ayon, o hindi sigurado. Magsulat ng maikling paliwanag kung bakit mo pinili ang bawat sagot.

• Nauunawaan ko kung bakit nananatili pa rin hanggang ngayon ang utos ng Diyos na magpakarami at kalatan ang lupa.

• Nauunawaan ko kung bakit ang banal na kapangyarihang lumikha ng bata ay gagamitin lamang sa pagitan ng isang babae at isang lalaki na ikinasal nang naaayon sa batas.

• Nauunawaan ko kung bakit dapat palakihin ng mga magulang ang kanilang mga anak nang may pagmamahal at kabutihan.

Kung may mga karagdagang tanong o alalahanin ang mga estudyante tungkol sa doktrina ng Panginoon tungkol sa mga bata o tungkol sa batas ng kalinisang-puri, hikayatin silang magtanong sa mga magulang o lider ng Simbahan.

Para tapusin ang lesson, sabihin sa ilang estudyante na ibuod ang natutuhan nila tungkol sa kahalagahan ng pagkakaroon at pag-aalaga ng mga anak bilang bahagi ng plano ng Ama sa Langit.

Karagdagang Resources

Bakit mahalaga ang pagkakaroon ng mga anak sa plano ng kaligayahan ng Ama sa Langit?

Itinuro ni Pangulong M. Russell Ballard ng Korum ng Labindalawang Apostol:

Ang layunin ng mortalidad ay maging higit na katulad ng Diyos sa pagtatamo ng pisikal na katawan, paggamit ng kalayaan, at pag-ako sa dati-rati’y mga tungkulin lamang ng ating mga magulang sa langit—ang papel ng asawang lalaki, maybahay, at magulang. …

Nais ng Ama sa Langit na … sundin ang Kanyang unang utos na “magpakarami at kalatan [ang mundo]”—na hindi lamang para isakatuparan ang Kanyang plano kundi makasumpong din ng kagalakan na plano Niyang ibigay sa Kanyang mga anak. …

… Ang isang mahalagang layon ng mortal na buhay ay para matularan natin mismo ang karanasang iyon sa pamilya, sa pagkakataong ito bilang mga magulang sa halip na bilang mga anak lamang. (M. Russell Ballard, “Ang mga Oportunidad at Responsibilidad ng mga CES Teacher sa Ika-21 Siglo” [gabi kasama ang isang General Authority, Peb. 26, 2016], broadcasts.ChurchofJesusChrist.org)

Bakit angkop lamang ang seksuwal na intimasiya sa isang lalaki at isang babaeng ikinasal?

Ipinaliwanag ni Elder Dale G. Renlund ng Korum ng Labindalawang Apostol at ni Sister Ruth Lybbert Renlund ang sumusunod:

Layon ng Ama sa Langit na ang seksuwal na relasyon sa pagsasama ng mag-asawa ay magamit upang lumikha ng mga anak, at upang ipahayag ang pagmamahal at palakasin ang emosyonal, espirituwal, at pisikal na mga kaugnayan sa pagitan ng mag-asawa. Sa pagsasama ng mag-asawa, dapat bigkisin ng seksuwal na intimasiya ang mag-asawa sa pagtitiwala, katapatan, at konsiderasyon sa isa’t isa. …

Ang doktrina ng mga walang-hanggang pamilya sa Ang Simbahan ni Jesucristo ng mga Banal sa mga Huling Araw ay kakaiba sa mga tradisyong Kristiyano. Hindi tayo nilikha para lamang purihin, sambahin, at paglingkuran ang hindi maunawaang Diyos. Nilikha tayo ng mapagmahal na mga magulang sa langit upang umunlad at maging katulad nila. Ang mga lalaki at babaeng espiritu ay nilikha upang punuan ang isa’t isa. Ito ang dahilan kung bakit ang kasarian ay hindi nagbabago sa kawalang-hanggan—dahil ito ay nagbibigay ng batayan para sa pinakadakilang kaloob na maaaring ibigay ng Ama sa Langit, ang uri ng Kanyang pamumuhay.

Para mapasaatin ang pagpapalang ito, iniutos ng Ama sa Langit na ang seksuwal na intimasiya ay dapat nakalaan para sa kasal sa pagitan ng isang lalaki at isang babae. … Hindi natin matatamasa ang uri ng buhay na tinatamasa ng ating Ama sa Langit nang mag-isa o nang walang lubos na katapatan sa loob ng kasal o sa pagsasama nating mag-asawa ayon sa plano ng Diyos. …

… Ang seksuwal na mga relasyon ay “isa sa mga pangunahing pagpapahayag ng ating likas na kabanalan” [David A. Bednar, “Naniniwala Kami sa Pagiging Malinis,” Liahona, Mayo 2013, 42]. Ginagawang posible ng ating wastong pagpapahayag ng seksuwalidad na mailahad ang plano ng Diyos sa lupa at sa kawalang-hanggan na nagpapagin-dapat sa atin na maging katulad ng ating Ama sa Langit. Nangangako ang Diyos ng buhay na walang-hanggan sa matatapat at kinapapalooban iyan ng walang-hanggang kasal, mga anak, at lahat ng iba pang mga pagpapala ng walang-hanggang pamilya. (Dale G. Renlund at Ruth Lybbert Renlund, “Ang mga Banal na Layunin ng Seksuwal na Intimasiya,” Liahona, Ago. 2020, 15–17)

Ano ang itinuro ng mga propeta tungkol sa kabanalan ng buhay kaugnay ng pagpapalaglag?

Ibinigay ng mga lider ng Simbahan ang mga sumusunod na tagubilin:

Iniutos ng Panginoon, “Huwag kayong … pumatay, ni gumawa ng anumang bagay na tulad nito” (Doktrina at mga Tipan 59:6). Ang Simbahan ay hindi sumasang-ayon sa pagpapalaglag para sa personal o panlipunan na kaginhawaan. Ang mga miyembro ay hindi dapat sumailalim, magsagawa, gumawa ng paraan para magkaroon, magbayad, pumayag, o maghikayat ng pagpapalaglag. Ang tanging posibleng eksepsyon ay kapag:

• Ang pagbubuntis ay bunga ng sapilitang panggagahasa (forcible rape) o pagtatalik ng malapit na magkamag-anak (incest).

• Nasuri ng mapagkakatiwalaang doktor na nanganganib ang buhay o kalusugan ng ina.

• Nasuri ng mapagkakatiwalaang doktor na may malulubhang depekto ang sanggol sa sinapupunan kaya hindi rin mabubuhay ang sanggol matapos isilang.

Ang mga eksepyong ito ay hindi kaagad magbibigay-katwiran sa pagpapalaglag. Ang pagpapalaglag ay isang napakaseryosong bagay. Ito ay dapat isaalang-alang lamang matapos makatanggap ng kumpirmasyon sa pamamagitan ng panalangin ang mga taong responsable sa desisyong ito. Ang mga miyembro ay maaaring sumangguni sa kanilang bishop bilang bahagi ng prosesong ito. (Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, 38.6.1, ChurchofJesusChrist.org)

Saan ko malalaman pa ang tungkol sa mga katotohanang itinuro sa pagpapahayag tungkol sa mag-anak?

Ang mga sumusunod ay ilang mensahe na maaari mong piliing pag-aralan:

• Dallin H. Oaks, “Mga Magulang at Mga Anak,” Liahona, Nob. 2018, 61–67

• David A. Bednar, “Naniniwala Kami sa Pagiging Malinis,” Liahona, Mayo 2013, 41–44

• Neil L. Andersen, “Mga Anak,” Liahona, Nob. 2011, 28–31

Mga Karagdagang Aktibidad sa Pag-aaral

Pagpapalaki ng mga anak sa kabutihan at pagbibigay ng kanilang mga pangangailangan

Kung makikinabang ang mga estudyante sa pag-aaral pa ng tungkol sa utos ng Panginoon na palakihin ng mga magulang ang kanilang mga anak sa pagmamahal at kabutihan, isaalang-alang ang sumusunod na ideya.

Matapos pag-aralan ang talata 6 ng pagpapahayag tungkol sa mag-anak, ipaliwanag na sa simula ng dispensasyong ito, pinagsabihan ng Tagapagligtas si Propetang Joseph Smith at ang iba pang lider ng Simbahan dahil hindi nila inaalagaan nang tama ang kanilang pamilya. Ipabasa sa mga estudyante ang Doktrina at mga Tipan 93:40–50, at alamin ang itinuro ng Panginoon. Sabihin sa mga estudyante na ibahagi ang nalaman nila. Ipaliwanag na bagama’t ang responsibilidad na palakihin ang mga anak sa kabutihan ay nasa mga magulang, matutulungan ng mga anak ang kanilang mga magulang na sundin ang mga utos ng Panginoon. Maaari mong itanong ang tulad ng mga sumusunod:

• Paano ninyo masusuportahan ang inyong mga magulang sa kanilang banal na responsibilidad na itaguyod ang inyong pamilya “sa liwanag at katotohanan”? (Doktrina at mga Tipan 93:40).

• Ano ang ilang paraan na maaari maging “higit na masigasig at mapagmalasakit sa tahanan” ang mga tinedyer? (Doktrina at mga Tipan 93:50).

Matapos sagutin ng mga estudyante ang mga naunang tanong, maaari mo silang ilagay sa maliliit na grupo para pag-isipan at talakayin ang mga karagdagang paraan kung paano nila matutulungan ang kanilang mga magulang. Ang mga sumusunod ay ilan sa mga responsibilidad ng mga magulang na kasama sa pagpapahayag tungkol sa mag-anak. Maaari mong bigyan ang bawat grupo ng isa sa mga paksang tatalakayin:

• Paglalaan ng pisikal at espirituwal na mga pangangailangan ng kanilang mga anak.

• Pagtuturo sa kanilang mga anak na mahalin at paglingkuran ang isa’t isa.

• Pagtuturo sa kanilang mga anak na sundin ang mga kautusan ng Diyos.

• Pagtuturo sa kanilang mga anak na maging mga mamamayang sumusunod sa batas.

Matapos mabigyan ang mga estudyante ng oras na mag-isip at magtalakayan, sabihin sa kanila na ibahagi ang ilan sa kanilang mga ideya. Maaari mong ilista ang kanilang mga ideya sa pisara. Tapusin ang klase sa pamamagitan ng pagtatanong ng tulad ng sumusunod:

• Paano kayo maihahanda ng pagsuporta sa inyong mga magulang sa mga responsibilidad na ibinigay ng Panginoon sa kanila para maging mabuting magulang sa hinaharap?

Papanagutin sa harap ng Diyos

Upang matulungan ang mga estudyante na maunawaan ang mga banal na obligasyon ng mga magulang at kapamilya sa harapan ng Diyos, maaari mo silang tanungin kung naranasan na ba nilang maalagaan ng isang tagapag-alaga ng bata habang wala ang kanilang mga magulang. Maaari mo ring itanong kung nag-alaga na ba sila ng mga bata mula sa ibang pamilya. Sabihin sa mga estudyante na ilista sa pisara ang mga pag-uugali o katangiang maaaring hanapin ng mga magulang kapag pumipili ng tagapag-alaga ng bata para sa kanilang mga anak.

• Sa inyong palagay, bakit nais ng magulang na mapagkakatiwalaan at responsable ang isang tagapag-alaga ng bata?

• Bakit maaaring mataas ang inaasahan ng Diyos sa mga naglilingkod bilang mga tagapag-alaga sa lupa sa Kanyang mga espiritung anak?

Ipabasa sa mga estudyante ang talata 8 ng pagpapahayag tungkol sa mag-anak at ibahagi ang anumang nadama o kaalamang natamo nila mula rito. Patotohanan na lubos na nagmamalasakit ang Diyos sa lahat ng Kanyang mga anak at nais Niya magkasama-sama ang ating pamilya hanggang sa kawalang-hanggan.

Mahal ng Ama sa Langit at ni Jesucristo ang lahat ng bata

Para matulungan ang mga estudyante na madama ang pagmamahal ng Ama sa Langit at ni Jesucristo sa mga bata, maaari mong ipanood ang video ng Aklat ni Mormon na “Nagdasal si Jesucristo at Naglingkod ang mga Anghel sa mga Bata” (5:52). Sabihin sa mga estudyante na isulat ang mga ideya at impresyon habang nanonood at maging handa na magbahagi. Kung walang video, maaari mong basahin ang salaysay na ito sa mga estudyante sa 3 Nephi 17:11–25.