“Lesona 169—Mifantoka amin’i Jesoa Kristy ao amin’ny soratra masina: Mandalina ireo anarana sy anaram-boninahitra ary ireo toetra ananan’ny Mpamonjy,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Mifantoka amin’i Jesoa Kristy ao amin’ny soratra masina,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 169: Fahaiza-manao amin’ny fandalinana soratra masina
Mifantoka amin’i Jesoa Kristy ao amin’ny soratra masina
Mandalina ireo anarana sy anaram-boninahitra ary ireo toetra ananan’ny Mpamonjy
Iray amin’ireo tanjona fototry ny soratra masina dia ny hanampy antsika hianatra momba ny Ray any An-danitra sy i Jesoa Kristy. Arakaraka ny ianarantsika momba Azy Ireo no hitomboan’ny finoantsika Azy Ireo. Ity lesona ity dia natao mba hanampiana anao hifantoka amin’ny Mpamonjy eo am-pandalinanao ny soratra masina, indrindra indrindra ny Fotopampianarana sy Fanekempihavanana.
Ireo sahanasa fianarana azo atao
Inona no zavatra hitanareo?
Ataovy ireto sahanasa manaraka ireto na anankiray anao manokana mba hampidirana ny fahaiza-manao amin’ny fandalinana ny soratra masina dia ny fifantohana amin’ny Mpamonjy. Mba hamporisihana ny fiomanan’ny mpianatra mba ho vonona dia azonao atao ny mampiseho ilay sary manjavozavo ho hitan’ny mpianatra eo am-pidiran’izy ireo ao an-dakilasy.
Jereo ity sary manjavozavo manaraka ity dia ezaho faritana hoe inona no mitranga raha ny eritreritrao manokana.
Avy eo dia avereno jerena ilay sary ka atao mazava tsara.
Mametraha fanontaniana mitovy amin’ireto manaraka ireto raha mbola eo am-pandinihina ilay sary maneho ny Mpamonjy manompo ny vahoaka tany Amerika fahiny ireo mpianatra. Rehefa mamaly ireo fanontaniana napetrakao ireo mpianatra dia ampahafantaro azy ireo fa sarobidy aminao ny hevitra zarain’izy ireo sy ny fandraisan’izy ireo anjara.
-
Inona avy ireo antsipirian-javatra tsikaritrao rehefa natao mazava kokoa ilay sary?
-
Rehefa mijery ilay sary ianao dia inona no eritreritra sy fahatsapana anananao momba ny Mpamonjy?
Mizarà fampahalalana tahaka ireto manaraka ireto mba hanampiana ireo mpianatra hahatakatra kokoa ny tena tanjona tiana hotratrarina anio.
Ny teny hoe mifantoka dia mety hidika hoe nohatsaraina mba hazava kokoa ny zavatra iray na koa hoe atao ivon’ny fahalianantsika io zavatra io na koa hoe dinihantsika manokana ilay izy.
-
Inona avy ireo fomba ahafahantsika mifantoka amin’ny Mpamonjy rehefa mandalina ny soratra masina isika?
-
Nahoana isika no mety ho te hifantoka Aminy?
Rehefa mandalina ity lesona ity ianao dia katsaho ny fitarihan’ny Fanahy Masina ary tadiavo hoe nahoana no mety ho fitahiana ho anao ny fifantohanao amin’ny Mpamonjy mandritra ny fandalinanao soratra masina. Saintsaino ireo fomba ahafahanao mifantoka Aminy.
Farito: Fantaro ireo anarana sy anaram-boninahitra niantsoana an’i Jesoa Kristy
Fomba iray ahafahanao mifantoka amin’ny Mpamonjy ny fahaizana mikaroka ireo anarana sy anaram-boninahitra maro entiny eo am-pandalinanao ny soratra masina. Ireo anarana sy anaram-boninahitra ireo dia maneho ireo anjara asa nomen’ny Ray any An-danitra Azy.
Lamina hakan-tahaka
Mampiasà ohatra entina hanehoana io fomba iray io amin’ny alalan’ny fampiasana ity andalan-tsoratra masina ity na iray hafa izay safidianao. Azonao apetaka amin’ny solaitrabe ihany koa ilay sary na sary iray hafa maneho ny Mpamonjy dieny mbola eny am-piandohan’ny lesona. Rehefa mahita ireo karazana anarana sy anaram-boninahitra ireo mpianatra mandritra ny lesona, dia azo asaina izy ireo hanoratra izany manodidina ilay sary maneho ny mpamonjy eo amin’ny solaitrabe ary avy eo hanazava hoe nahoana no zava-dehibe amin’izy ireo ilay anarana.
Vakio ny Fotopampianarana sy Fanekempihavanana 6:21 ary mitadiava anarana na anaram-boninahitra izay nampiasain’i Jesoa hamaritana ny Tenany ihany.
-
Inona no hitanao?
Valin-teny mety ho hita amin’izany fanontaniana izany ny hoe “Jesoa Kristy,” “Ilay Zanak’ Andriamanitra,” na “Izaho no fahazavana.” Mety ho liana ireo mpianatra hahafantatra fa ireo anaram-boninahitra amin’ny fiteny Anglisy hoe “Christ” na “Messiah” dia notsoahina avy tamin’ny dikan-teny Grika sy Hebreo an’ny hoe “ilay voahosotra.” Ireo mpanjaka sy mpisorona izay nanana adidy manokana dia nohosorana diloilo tamin’ny andro fahiny (jereo ny Torolalana ho an’ny Soratra Masina, “Manosotra,” scriptures.ChurchofJesusChrist.org). Noho izany, ny Mpamonjy izay nanatanteraka ny adidy faran’izay manan-danja no “ilay Mpaminany sy Mpisorona sy Mpanjaka ary Mpanafaka voahosotra” ho an’ny zanak’ Andriamanitra rehetra (Torolalana ho an’ny Soratra Masina, “Mesia,” scriptures.ChurchofJesusChrist.org).
-
Inona no azontsika ianarana momba an’i Jesoa avy amin’ireo anarana sy anaram-boninahitra ireo?
-
Nahoana no manan-danja aminao izany anaram-boninahitra izany? Amin’ny fomba ahoana no hanampian’izany fahatakarana momba an’i Jesoa Kristy izany anao eo amin’ny fiainanao ankehitriny?
Ohatra, rehefa mahatsapa isika fa mila fahazavana misimisy kokoa eo amin’ny fiainantsika dia afaka mitadidy isika fa ny Mpamonjy no izany fahazavana izany. Afaka mitarika antsika eo amin’ny lalana hiverenantsika any amin’ny Raintsika any An-danitra Izy.
Mba hanampiana anao hisaintsaina ny lanjan’ny anarana sy anaram-boninahitra dia jereo ilay horonan-tsary “‘Nombre’—What Should We Name Him?” (1:47) hita ao amin’ny ChurchofJesusChrist.org.
Fanazaran-tena
Hevero ny zavatra ilain’ireo mpianatrao rehefa hanapa-kevitra ianao raha toa ka tokony hanao ity sahanasa manaraka ity samirery na anaty vondrona kely izy ireo. Ankoatra izany dia azon’ireo mpianatra atao ny mizara izay anaram-boninahitra hitan’izy ireo ka nanan-danja tamin’izy ireo nandritra ny fandalinany manokana.
Tohizo ny fanazaran-tena fitadiavana ireo karazana anarana sy anaram-boninahitr’i Jesoa ao amin’ny Fotopampianarana sy Fanekempihavanana. Ny sasantsasany amin’ireo andalan-tsoaratra masina izay hohalalininao dia mety hahitana anarana na anaram-boninahitra mihoatra ny iray. Raha toa ka mila fanampiana ianao mba hahatakaranao ny dikan’ny anarana na anaram-boninahitra iray dia ampiasao ireo loharanom-pitaovana toy ny Torolalana ho an’ny Soratra Masina izay hita ao amin’ny scriptures.ChurchofJesusChrist.org.
Vakio ny sasantsasany amin’ireto andalan-tsoratra masina manaraka ireto na izy rehetra ka raketo ao anatin’ny diary fandalinanao ireo anarana na anaram-boninahitra izay hitanao. Saintsaino izay zavatra azonao ianarana momba an’i Jesoa avy amin’ireo anarana na anaram-boninahitra ireo sy ny fomba ahafahany manampy anao eo amin’ny fiainanao.
Rehefa avy nanome fotoana ho an’ny mpianatra mba handalinany sy hisaintsainany dia asao izy ireo hizara ny zavatra nianarany sy tsapany avy tamin’io sahanasa io. Mitadiava fomba hanantitranterana hoe amin’ny fomba ahoana ireo anaran’ny Mpamonjy ireo no mifandray tsara amin’ny ezaka ataony mba hanampy antsika.
Farito: Tadiavo ireo toetra araka an’ Andriamanitra izay ananan’ny Mpamonjy
Ity manaraka ity dia fomba iray hafa hifantohana amin’ny Mpamonjy eo am-pandalinana ny soratra masina. Raha toa ka ampy ny fotoana mandritra ny lesona dia azonao atao ohatra alain-tahaka ihany koa ity fomba ity ka asao ireo mpianatra hanao fanazaran-tena mampiasa izany.
Fomba iray hafa hifantohana amin’ny Mpamonjy eo am-pandalinanao ny soratra masina ny fitadiavana ireo toetra araka an’ Andriamanitra izay ananany. Ny toetra dia zavatra tsara izay ananan’ny olona iray na novolavolainy toy ny fahatsorana na ny hatsaram-panahy.
Lamina hakan-tahaka
Raha ilaina dia manaova ohatra alain-tahaka miaraka amin’ireo mpianatra mikasika ny fomba hamantaran’izy ireo toetra tsara iray ananan’ny Mpamonjy amin’ny alalan’ny fampiasana ny iray amin’ireto andalan-tsoratra masina ireto izay hita ao amin’ny fizarana manaraka na andalan-tsoratra masina iray hafa nosafidianao. Fomba iray hanatanterahana ity sahanasa manaraka ity ny fandraisana an-tsoratra ireo andalan-tsoratra masina ao amin’ny Fotopampianarana sy Fanekempihavanana ao anatina taratasy kely samy hafa ary ny fametrahana izany amin’ny toerana samy hafa ao anatin’ny efitrano. Afaka miara-miasa anatina vondrona kely ireo mpianatra ka mankeny amin’ilay taratasy kely ary avy eo mikaroka ireo toetra araka an’ Andriamanitra ananan’ny Mpamonjy ao anatin’ireo andalan-tsoratra masina ireo.
Fanazaran-tena
Vakio ny sasantsasany amin’ireto andalan-tsoratra masina manaraka ireto na izy rehetra ka tadiavo ireo toetra araka an’ Andriamanitra ananan’ny Mpamonjy. Misafidiana toetra iray izay manan-danja aminao ary hazavao fohifohy hoe nahoana ny fahafantaranao fa manana an’io toetra io ny Mpamonjy no manampy anao hitia sy hatoky Azy kokoa.
Ohatra, mety ho hitan’ireo mpianatra ny fahavononan’i Kristy hanao ny sitrapon’ny Ray any An-danitra ao amin’ny fizarana 19. Raha efa nanoratra anarana sy anaram-boninahitra manodidina ilay sarin’ny Mpamonjy mipetaka amin’ny solaitrabe ireo mpianatra dia amporisiho izy ireo hanoratra ihany koa ireo toetra izay hitan’izy ireo. Mitadiava fomba hankasitrahana ireo mpianatra noho ny fandraisan’izy ireo anjara ary antitrantero ny antony tokony itiavantsika sy atokisantsika ny Mpamonjy.
Mifantoha amin’ny Mpamonjy ao amin’ireo fizarana rehetra
-
Araka ny zavatra izay nianaranao sy nampiharinao anio, amin’ny fomba ahoana no ahafahan’ny fifantohana amin’i Jesoa Kristy hitondra fiovana eo amin’ny fandalinanao ny soratra masina?
Zarao ny fijoroana ho vavolombelona anananao manokana mikasika ny maha-zava-dehibe ny fifantohana amin’ny Mpamonjy rehefa mandalina ny soratra masina. Asao ireo mpianatra hifantoka amin’ny Mpamonjy ao amin’ireo fizarana rehetra ao amin’ny Fotopampianarana sy Fanekempihavanana.
Asao ireo mpianatra hizara ny zavatra hitany tamin’ny fandalinana nataon’izy ireo manokana na niaraka tamin’ny fianakaviany momba ny Mpamonjy manditra ny fotoam-pianarana manaraka. Mitadiava fahafahana mandritra ireo lesona ho avy mba hamporisihana ireo mpianatra hampihatra izany fahaiza-manao izany mandritra ny fotoam-pianarana.