“Paglalagay ng Anotasyon sa mga Banal na Kasulatan: Pagmamarka at Pagdaragdag ng mga Tala,” Manwal ng Titser ng Seminary para sa Doktrina at mga Tipan (2025)
“Paglalagay ng Anotasyon sa mga Banal na Kasulatan,” Manwal ng Titser ng Seminary para sa Doktrina at mga Tipan
Lesson 171: Mga Kasanayan sa Pag-aaral ng mga Banal na Kasulatan
Paglalagay ng Anotasyon sa mga Banal na Kasulatan
Pagmamarka at Pagdaragdag ng mga Tala
Ang lesson na ito ay makatutulong sa mga estudyante na magmarka at magdagdag ng mga tala sa kanilang mga banal na kasulatan sa paraang magiging mas makabuluhan ang kanilang pag-aaral at mas mapapalapit sila sa Ama sa Langit at kay Jesucristo.
Paghahanda ng estudyante: Bilang bahagi ng kanilang araw-araw na pag-aaral ng mga banal na kasulatan, sabihin sa mga estudyante na markahan kung ano ang makabuluhan sa kanila, lalo na ang mga salita o parirala na tumutulong sa kanila na maunawaan o madama ang pagmamahal ng Ama sa Langit at ni Jesucristo. Maaari silang dumating sa klase na handang ibahagi ang minarkahan nila at kung bakit.
Mga Posibleng Aktibidad sa Pag-aaral
Gawing mas makabuluhan ang pag-aaral ng mga banal na kasulatan
Sabihin sa mga estudyante na magbahagi ng ilang ideya tungkol sa mga aktibidad na maaari nilang gawin nang kaswal ngunit, sa kabaliktaran, ay mas makabuluhan. Maaaring kabilang sa mga halimbawa ang pagbati at pakikipag-usap sa isang kaklase, pagpapadala ng maikling mensahe o text na nagpapasalamat, at pag-aaral ng mga banal na kasulatan.
Iniutos sa atin ng Tagapagligtas na huwag basta basahin ang mga banal na kasulatan kundi “saliksikin,” “pag-aralan,” at “magpakabusog” sa Kanyang mga salita (Doktrina at mga Tipan 1:37; 11:22; 2 Nephi 32:3). Sa pamamagitan ng mga banal na kasulatan, makikilala natin Siya at madarama ang Kanyang pagmamahal (tingnan sa Juan 5:39; Jacob 3:2).
Sabihin sa mga estudyante na maglaan ng sandali para suriin ang kanilang pag-aaral ng mga banal na kasulatan, kabilang na kung paano ito nakatutulong sa kanila na mas mapalapit sa Ama sa Langit at kay Jesucristo.
Ano ang ilan sa mga bagay na nagawa (o magagawa) mo para maging mas makabuluhan sa iyo ang pag-aaral ng mga banal na kasulatan?
Pakinggang mabuti ang mga sagot ng mga estudyante at isulat ang mga ito sa pisara. Maaari mong ipaliwanag ang sumusunod sa sarili mong mga salita:
Bigyang-kahulugan: Pagmamarka ng mga banal na kasulatan
Ang isang paraan para maging makabuluhan ang pag-aaral ng mga banal na kasulatan ay magmarka at magdagdag ng mga tala sa iyong mga banal na kasulatan. Sa pag-aaral mo ng lesson na ito, maghanap ng mga paraan na maaari mong markahan ang iyong mga banal na kasulatan para matulungan kang mas mapalapit sa Ama sa Langit at kay Jesucristo.
Ipakita: Pagmamarka ng mga banal na kasulatan
Magpakita sa mga estudyante ng ilang halimbawa kung paano maaaring markahan ng mga tao ang kanilang mga banal na kasulatan tulad ng mga video o larawan na kasama rito. Maaari ding magbahagi ang mga estudyante ng mga paraan na minamarkahan nila ang kanilang mga banal na kasulatan. Sabihin sa mga estudyante na tumukoy ng mga posibleng dahilan para sa mga pagmamarkang nakikita nila.
“A Marking System That Works for You” (1:56). Sa video na ito, inilalarawan ni Elder David A. Bednar ng Korum ng Labindalawang Apostol kung paano niya minamarkahan ang mga banal na kasulatan.
“Marking Scriptures” (1:45). Sa video na ito, ipinapakita ni Pangulong Dallin H. Oaks ng Unang Panguluhan kung paano niya minamarkahan ang mga banal na kasulatan.
-
Ano ang ilang dahilan kung bakit minamarkahan ng mga tao ang kanilang mga banal na kasulatan?
-
Sa iyong palagay, paano makatutulong sa iyo ang pagmamarka ng iyong mga banal na kasulatan?
Magsanay: Pagmamarka ng mga banal na kasulatan
Maaari mong isulat o ipakita ang buong teksto ng mga sumusunod na talata sa pisara. O kaya, kung mayroon, ipakita ang electronic na bersiyon ng mga talatang ito mula sa Gospel Library. Maaari mong palitan ang mga talatang ito ng isa pang doctrinal mastery passage o iba pang talata o mga talata na pipiliin mo.
Para sa mga estudyanteng gumagamit ng mga digital na banal na kasulatan, maaari kang gumugol ng kaunting oras para ipakita kung paano markahan ang mga banal na kasulatan sa Gospel Library app. Para sa tagubilin kung paano ito gagawin, tingnan ang bahaging “Help ” ng Gospel Library App, kabilang na ang: Gospel Library User Guide (iOS) at Gospel Library User Guide (Android) sa ilalim ng heading na “Marking Content (Pagmamarka ng Nilalaman).”
Para magsanay magmarka, basahin ang Doktrina at mga Tipan 68:5–6 at markahan kung ano ang makabuluhan sa iyo. Maaari mong bigyan ng partikular na pansin ang natutuhan mo tungkol sa Tagapagligtas at kung ano ang nadarama Niya tungkol sa iyo.
Kung ang mga talata ay naka-display sa pisara, maaari mong sabihin sa mga estudyante na gumamit ng mga marker para gawing muli sa pisara ang mga marka at sabihin sa kanila na ibahagi kung bakit nila minarkahan iyon.
-
Anong mga salita o parirala ang minarkahan mo? Bakit pinakamahalaga ang mga ito sa iyo?
-
May iba ka bang nadama tungkol sa iyong mga banal na kasulatan matapos mong markahan ang mga ito? Nakaapekto ba ito sa nadarama mo para sa Tagapagligtas? Kung oo, bakit?
Maaaring makatulong na ipaliwanag sa mga estudyante na kapag napansin nila ang mga parirala sa banal na kasulatan, maaaring isa itong paraan ng pakikipag-ugnayan sa kanila ng Panginoon sa pamamagitan ng Espiritu Santo.
Bigyang-kahulugan: Pag-uugnay o paggrupo ng mga talata
Makatutulong din na pag-aralan ang mga karagdagang talata tungkol sa isang paksa at iugnay o igrupo ang mga talatang ito nang sama-sama.
Ipakita: Pag-uugnay o paggrupo ng mga talata
-
Ano ang ilang paraan na maaari mong pag-ugnayin o paggrupu-grupuhin ang mga talata tungkol sa pagmamahal ng Tagapagligtas sa iyo?
Pakinggan ang mga sagot ng mga estudyante at maaari mong idagdag ang alinman sa mga sumusunod na posibilidad. Maaari mong gamitin ang Doktrina at mga Tipan 68:5–6 at Doktrina at mga Tipan 18:10–11 bilang mga halimbawa ng mga talata na tumutulong sa atin na madama ang pagmamahal ng Tagapagligtas. Ang sumusunod na listahan ay may ilang ideya na maaaring banggitin ng mga estudyante o maaari mong idagdag sa ibinahagi ng mga estudyante.
-
Isulat ang mga reference sa mga blangkong pahina sa simula o katapusan ng iyong mga banal na kasulatan, o sa isang scripture journal.
-
Sa tabi ng isang talata sa margin, isulat ang (mga) reference sa isang kaugnay na talata.
-
Kapag gumagamit ng Gospel Library app, gamitin ang feature na pag-link o pag-tag.
Kung kinakailangan, ipaliwanag na ang pag-link ay mag-uugnay ng dalawang banal na kasulatan, samantalang ang pag-tag ay magtutulot sa iyong igrupo ang maraming banal na kasulatan sa ilalim ng iisang paksa. Maaari mong ipakita ang kasanayang ito sa Gospel Library app o anyayahan ang isang estudyante na gawin ito. Kung maaari, makatutulong na ipakita ito sa mas malaking screen sa halip na sa phone kung ano ang ginagawa mo o ng isang estudyante. Para sa mga tagubilin kung paano ito gawin, tingnan ang bahaging Help ng Gospel Library app. Maaari mong i-access ang bahaging ito sa pamamagitan ng pagpili sa tatlong tuldok sa kanang sulok sa itaas. (Paalala: Maaari ka ring mag-link o mag-tag ng mga talata sa mga mensahe sa pangkalahatang kumperensya o anumang iba pang materyal sa Gospel Library app.)
Magsanay: Pag-uugnay o paggrupo ng mga talata
Ang sumusunod na aktibidad ay makahihikayat sa mga estudyante na maggrupo at mag-ugnay ng mga banal na kasulatan. Kung pumili ka ng ibang passage na pag-aaralan ng mga estudyante kanina sa lesson, maaari ka ring pumili ng iba’t ibang talata sa parehong paksa na ipapalit sa mga talata sa ibaba.
Basahin ang kahit tatlo sa mga sumusunod na banal na kasulatan at pag-isipang iugnay o igrupo ang mga ito bilang mga talata na makatutulong sa iyo na madama ang pagmamahal ng Tagapagligtas: Doktrina at mga Tipan 18:10–11; 34:1–3; 45:3–5; 49:26–27; 68:5–6; 138:3; Isaias 49:15–16; Juan 15:13; Roma 8:35–39; 1 Juan 4:19; 1 Nephi 19:9.
Bilang isang klase o sa maliliit na grupo, sabihin sa mga estudyante na ibahagi kung paano nila pinaggrupo ang mga talata at kung bakit maaaring makabuluhan ito sa kanila. Maaari din silang magbahagi ng mga ideya kung paano nila gagamitin ang paggrupo o pag-uugnay sa sarili nilang pag-aaral ng mga banal na kasulatan.
Bigyang-kahulugan: Pagdaragdag ng mga Tala
Ang isa pang paraan para mas mapalapit sa Panginoon sa pamamagitan ng pag-aaral ng mga banal na kasulatan ay magdagdag ng mga tala tungkol sa natutuhan mo.
Ipinaliwanag ni Elder David A. Bednar ng Korum ng Labindalawang Apostol ang kahalagahan ng pagsusulat kapag pinag-aaralan ang mga banal na kasulatan:
Ang pagsusulat ng ating natututuhan, naiisip, nadarama sa pag-aaral ng mga banal na kasulatan ay isa pang uri ng pagninilay-nilay at malakas na paanyaya sa patuloy na pagtuturo ng Espiritu Santo. (“Dahil Nasa Harapan Natin ang mga Ito,” Liahona, Abril 2006, 20–1)
Ipakita: Pagdaragdag ng mga Tala
Ipakita o tulungan ang mga estudyante na maalala mula sa mga larawan at video kanina sa lesson na maaari silang magdagdag ng mga tala sa pamamagitan ng pagsulat sa mga margin ng kanilang mga banal na kasulatan, sa maliliit na piraso ng papel na inilalagay nila sa kanilang mga banal na kasulatan, sa scripture journal, o sa electronic na paraan gamit ang Gospel Library app.
Magsanay: Pagdaragdag ng mga Tala
Tapusin ang lesson na ito sa pagsulat ng iyong mga naiisip at nadarama tungkol sa kahit isa sa mga passage na pinag-aralan mo ngayon.
Maaari mong ipakita kung paano magdagdag ng mga tala sa mga digital scripture sa pamamagitan ng pag-highlight ng isang parirala, pagpili ng Note, at pag-type ng text.
Matapos ang sapat na oras na makapagsanay ang mga estudyante na magdagdag ng mga tala, anyayahan ang ilan na ibahagi ang isinulat nila kung hindi ito masyadong personal. Maaari mo ring itanong kung paano maaaring gustong markahan ng mga estudyante ang kanilang mga banal na kasulatan sa hinaharap at kung bakit.