Lesson 169: Mga Kasanayan sa Pag-aaral ng mga Banal na Kasulatan

Pagtuon kay Jesucristo sa mga Banal na Kasulatan

Pag-aaral ng mga Pangalan, Titulo, at Katangian ng Tagapagligtas

Ang isa sa mga pangunahing layunin ng mga banal na kasulatan ay tulungan tayong matutuhan ang tungkol sa Ama sa Langit at kay Jesucristo. Kapag mas marami tayong natututuhan tungkol sa Kanila, mas lalong lumalaki ang ating pananampalataya sa Kanila. Ang lesson na ito ay naglalayong tulungan kayong tumuon sa Tagapagligtas habang pinag-aaralan ninyo ang mga banal na kasulatan, lalo na ang Doktrina at mga Tipan.

Mga Posibleng Aktibidad sa Pag-aaral

Ano ang nakikita ninyo?

Maaari gawin ang sumusunod na aktibidad o ang isa sa sarili mong aktibidad para maituro ang kasanayan sa pag-aaral ng banal na kasulatan tungkol sa pagtuon sa Tagapagligtas. Upang madagdagan ang kahandaan ng mga mag-aaral, maaari mong i-display ang isang malabong bersiyon ng larawan para makita ng mga estudyante pagdating nila sa klase.

Tingnan ang sumusunod na malabong larawan at subukang ilarawan kung ano sa palagay ninyo ang nangyayari.

Pagkatapos, tingnan ang parehong larawan na inayos ang focus o pinalinaw.

Habang sinusuri ng mga estudyante ang larawan ng pagmiministeryo ng Tagapagligtas sa mga tao sa sinaunang Amerika, maaari mong itanong ang tulad ng mga sumusunod. Sa pagsagot ng mga estudyante sa iyong mga tanong, ipaalam sa kanila na pinahahalagahan mo ang kanilang mga ideya at pakikibahagi.

• Anong mga detalye ang napansin ninyo ngayong malinaw na ang larawan?

• Habang tinitingnan ninyo ang larawang ito, ano ang naiisip o nadarama ninyo tungkol sa Tagapagligtas?

Maaari kang magbahagi ng impormasyong tulad ng mga sumusunod upang matulungan ang mga estudyante na mas maunawaan ang layunin para sa araw na ito.

Ang ibig sabihin ng salitang ipokus ay gawing mas malinaw ang isang bagay, gawin itong sentro ng interes, o lalo pang bigyang-pansin.

• Ano ang ilang paraan na mapagsisikapan nating magpokus o magtuon sa Tagapagligtas habang pinag-aaralan natin ang mga banal na kasulatan?

• Bakit kaya natin gugustuhing tumuon sa Kanya?

Sa pag-aaral ninyo ng lesson na ito, humingi ng patnubay mula sa Espiritu Santo at alamin ang mga dahilan kung bakit maaaring isang pagpapala para sa inyo na magtuon sa Tagapagligtas sa inyong pag-aaral ng banal na kasulatan. Pag-isipan ang mga paraan na mapagtutuunan ninyo Siya sa inyong pag-aaral.

Ipaliwanag: Tukuyin ang mga pangalan at titulo ni Jesucristo

Ang isang kasanayan na makatutulong sa inyo na magtuon sa Tagapagligtas ay hanapin ang Kanyang maraming pangalan at titulo habang pinag-aaralan ninyo ang mga banal na kasulatan. Ang mga pangalan at titulo na ito ay nagsasaad ng mga tungkuling ibinigay sa Kanya ng Ama sa Langit.

Ipakita

Maaari mong ipakita ang kasanayang ito sa mga estudyante sa pamamagitan ng paggamit ng sumusunod na scripture passage o iba pang pinili mo. Maaari mo ring i-display sa pisara ang larawan mula sa simula ng lesson o iba pang larawan ng Tagapagligtas. Kapag natukoy ang iba’t ibang pangalan at titulo sa buong lesson, maaaring anyayahan ang mga estudyante na isulat ang mga ito sa paligid ng larawan ng Tagapagligtas sa pisara at ipaliwanag kung bakit makabuluhan sa kanila ang pangalan o titulo.

Basahin ang Doktrina at mga Tipan 6:21 at hanapin ang isa o mahigit pang mga pangalan o titulo na ginamit ni Jesus para ilarawan ang Kanyang sarili.

• Ano ang nahanap ninyo?

  Maaaring kabilang sa mga posibleng sagot sa tanong na ito ang “Jesucristo” “Anak ng Diyos,” o “Ako ang ilaw.” Maaaring interesado ang mga estudyante na malaman na ang mga titulong Ingles na “Christ” at “Messiah” ay nagmula sa mga salin ng Griyego at Hebreo na “the anointed.” Noong unang panahon, ang mga hari at saserdote na may natatanging tungkuling gagampanan ay pinapahiran ng langis (tingnan sa Gabay sa mga Banal na Kasulatan, “Pagpapahid ng Langis,” scriptures.ChurchofJesusChrist.org). Kaya nga, ang Tagapagligtas, na nagsagawa ng pinakamahalagang tungkulin sa lahat, ay “[ang] pinahiran na langis na Propeta, Saserdote, Hari, at Tagapagligtas” para sa lahat ng anak ng Diyos (Gabay sa mga Banal na Kasulatan, “Mesiyas,” scriptures.ChurchofJesusChrist.org).

• Ano ang matututuhan natin tungkol kay Jesus mula sa iba’t ibang pangalan o titulo na ito?

• Bakit makabuluhan sa inyo ang titulong iyon? Sa anong mga paraan makatutulong sa inyo ngayon sa inyong buhay ang pagkaunawang ito tungkol kay Jesucristo?

Halimbawa, kapag nadarama natin na kailangan pa natin ng liwanag sa ating buhay, maaalala natin na ang Tagapagligtas ang liwanag na iyon. Magagabayan Niya tayo sa ating landas pabalik sa ating Ama sa Langit.

Para matulungan kayo na pag-isipan ang kahalagahan ng mga pangalan at titulo, panoorin ang video na “‘Nombre’—What Should We Name Him?” (1:47) matatagpuan sa ChurchofJesusChrist.org.

Magsanay

Isipin ang mga pangangailangan ng iyong mga estudyante habang nagpapasiya ka kung dapat ba nilang gawin ang sumusunod na aktibidad nang mag-isa o sa maliliit na grupo. Bukod pa rito, maaaring magbahagi ang mga estudyante ng mga titulo na nahanap nila mula sa kanilang personal na pag-aaral na makabuluhan sa kanila.

Patuloy na magsanay na tumukoy ng iba’t ibang pangalan at titulo ni Jesus sa Doktrina at mga Tipan. Ang ilang talata na pinag-aaralan ninyo ay maaaring maglaman ng mahigit sa isang pangalan o titulo. Kung kailangan ninyo ng tulong para maunawaan ang kahulugan ng isang pangalan o titulo, isipin ang resources na tulad ng Gabay sa mga Banal na Kasulatan, na matatagpuan sa scriptures.ChurchofJesusChrist.org.

Basahin ang ilan o lahat ng sumusunod na scripture passage at isulat sa inyong study journal ang anumang pangalan o titulo na natuklasan ninyo. Pag-isipan kung ano ang matututuhan ninyo tungkol kay Jesus mula sa pangalan o titulo at kung paano Niya kayo matutulungan sa inyong buhay.

1. Doktrina at mga Tipan 10:70

2. Doktrina at mga Tipan 19:1

3. Doktrina at mga Tipan 38:22

4. Doktrina at mga Tipan 45:3

5. Doktrina at mga Tipan 50:44

Matapos bigyan ng oras ang mga estudyante na pag-aralan at pag-isipan ito, sabihin sa kanila na ibahagi ang natutuhan at nadama nila mula sa aktibidad. Maghanap ng mga paraan para mabigyang-diin kung paano naaayon ang mga pangalan ng Tagapagligtas sa Kanyang mga pagsisikap na tulungan tayo.

Ipaliwanag: Alamin ang mga banal na katangian ng Tagapagligtas

Ang sumusunod ay isa pang paraan ng pagtuon sa Tagapagligtas habang pinag-aaralan ang mga banal na kasulatan. Kung may sapat kang oras sa iyong lesson, maaari mong ipakita at sabihin sa mga estudyante na magsanay na gamitin din ang kasanayang ito.

Ang isa pang paraan para makatuon sa Tagapagligtas habang pinag-aaralan ang mga banal na kasulatan ay hanapin ang Kanyang mga banal na katangian. Ang katangian ay uri ng pag-uugali o katauhan na angkin o tinaglay ng isang tao, tulad ng katapatan o kabaitan.

Ipakita

Kung kinakailangan, maaari mong ipakita sa mga estudyante kung paano matutukoy ang isang katangian ng Tagapagligtas gamit ang isa sa mga scripture passage sa susunod na bahagi o isang passage na pinili mo. Ang isang paraan para magawa ang sumusunod na aktibidad ay isulat ang mga passage mula sa Doktrina at mga Tipan sa magkakahiwalay na piraso ng papel at ilagay ang mga ito sa iba’t ibang lugar sa buong silid. Maaaring magtulungan ang mga estudyante sa maliliit na grupo para sa bawat piraso ng papel at maghanap sa talata ng banal na katangian ng Tagapagligtas.

Magsanay

Basahin ang ilan o lahat ng sumusunod na scripture passage at alamin ang mga banal na katangian ng Tagapagligtas. Pumili ng isang katangian na makabuluhan sa inyo at maikling ipaliwanag kung paano makatutulong sa inyo ang pagtukoy sa katangiang iyon ng Tagapagligtas para lalo ninyo Siyang mahalin at pagkatiwalaan.

1. Doktrina at mga Tipan 19:24

2. Doktrina at mga Tipan 61:2

3. Doktrina at mga Tipan 62:6

4. Doktrina at mga Tipan 101:9

5. Doktrina at mga Tipan 133:52

Halimbawa, maaaring tukuyin ng mga estudyante ang kahandaan ni Cristo na gawin ang kalooban ng Ama sa Langit sa bahagi 19. Kung ang mga estudyante ay nagsusulat ng mga pangalan at titulo sa paligid ng isang larawan ng Tagapagligtas sa pisara, hikayatin sila na isulat din ang mga katangiang natuklasan nila. Maghanap ng mga paraan para mapasalamatan ang mga estudyante sa kanilang pakikibahagi at bigyang-diin kung bakit dapat nating mahalin at pagkatiwalaan ang Tagapagligtas.

Tumuon sa Tagapagligtas sa bawat bahagi

• Batay sa natutuhan at pinraktis ninyo ngayon, paano makagagawa ng kaibhan ang pagtuon kay Jesucristo sa inyong pag-aaral ng banal na kasulatan?

Maaari mong ibahagi ang sarili mong patotoo hinggil sa kahalagahan ng pagtuon sa Tagapagligtas kapag pinag-aaralan ang mga banal na kasulatan. Sabihin sa mga estudyante na tumuon sa Tagapagligtas sa bawat bahagi ng Doktrina at mga Tipan.

Sa susunod na klase, maaari mong anyayahan ang mga estudyante na ibahagi ang nalaman nila sa kanilang personal na pag-aaral o pag-aaral ng pamilya tungkol sa Tagapagligtas. Maghanap ng mga pagkakataon sa mga susunod na lesson na hikayatin ang mga estudyante na praktisin ang kasanayang ito sa klase.

Karagdagang Resources

Bakit dapat akong tumuon sa Ama sa Langit at kay Jesucristo kapag pinag-aaralan ko ang mga banal na kasulatan?

Itinuro ni Elder D. Todd Christofferson ng Korum ng Labindalawang Apostol:

Sa huli, ang pangunahing layunin ng lahat ng banal na kasulatan ay puspusin ang ating mga kaluluwa ng pananampalataya sa Diyos Ama at sa Kanyang Anak na si Jesucristo—pananampalataya na Sila ay buhay; pananampalataya sa plano ng Ama para sa ating kawalang-kamatayan at buhay na walang hanggan; pananampalataya sa Pagbabayad-sala at Pagkabuhay na Mag-uli ni Jesucristo, na nagsakatuparan sa planong ito ng kaligayahan; pananampalatayang maipamuhay ang ebanghelyo ni Jesucristo; at pananampalatayang makilala “ang iisang Dios na tunay, at siyang [Kanyang] sinugo, sa makatuwid baga’y si Jesucristo” (Juan 17:3). (D. Todd Christofferson, “Ang Biyaya ng Banal na Kasulatan,” Liahona, Mayo 2010, 34)

Paano mapagpapala ng pag-aaral ng iba’t ibang pangalan at titulo ni Jesucristo ang buhay ko?

Ibinahagi ni Pangulong Russell M. Nelson ang sumusunod sa isang pandaigdigang debosyonal para sa mga young adult:

Pag-aralan ang lahat ng tungkol kay Jesucristo sa mapanalangin at masigasig na paghahangad na maunawaan kung ano ang personal na kahulugan sa inyo ng bawat isa sa Kanyang iba’t ibang titulo at pangalan. Halimbawa, Siya ang inyong tunay na Tagapamagitan sa Ama. Papanig Siya sa inyo. Ipagtatanggol Niya kayo. Mangungusap Siya alang-alang sa inyo, palagi, kapag pinili ninyong maging higit na katulad Niya. (Russell M. Nelson, “Mga Propeta, Pamumuno, at Batas ng Diyos,” [pandaigdigang debosyonal para sa mga young adult, Ene. 8, 2017], broadcasts.ChurchofJesusChrist.org)

Itinuro ni Elder Jonathan S. Schmitt ng Pitumpu:

Ang isang paraan para mas makilala natin si Jesus ay sa pamamagitan ng pag-alam ng maraming pangalan Niya. … [Ang] mga pangalan ni Jesus ay mga titulo na tumutulong sa atin na maunawaan ang Kanyang misyon, layunin, katauhan, at mga katangian. Kapag nalaman natin ang maraming pangalan ni Jesus, mas mauunawaan natin ang Kanyang banal na misyon at ang Kanyang di-makasariling pag-uugali. Ang pag-alam sa maraming pangalan Niya ay naghihikayat din sa atin na maging mas katulad Niya—na taglayin ang mga katangiang katulad ng kay Cristo na naghahatid ng kagalakan at layunin sa ating mga buhay.

Ilang taon na ang nakalilipas, pinag-aralan ni Pangulong Russell M. Nelson ang lahat ng banal na kasulatan tungkol kay Jesucristo sa Gabay sa mga Banal na Kasulatan. Pagkatapos ay inanyayahan niya ang mga young adult na pag-aralan ang mga banal na kasulatan ding ito. …

Kasunod ng paanyaya ni Pangulong Nelson, nagsimula akong gumawa ng sarili kong listahan ng maraming pangalan ni Jesus. Ang personal kong listahan ay mayroon na ngayong mahigit sa 300 pangalan, at sigurado ako na marami pang iba na hindi ko pa natutuklasan.

… Inaanyayahan ko kayo na gumawa ng sarili ninyong listahan habang nakikilala ninyo si Jesus sa maraming pangalan Niya. Sa paggawa nito, makikita ninyo na may iba pang mga pangalan—kasama ang kaugnay na mga katangiang katulad ng kay Cristo—na nanaisin ninyong taglayin sa inyong sarili bilang mga nakipagtipang disipulo ni Jesus. (Jonathan S. Schmitt, “Na Ikaw ay Makilala Nila,” Liahona, Nob. 2022, 104–5)

Mga Karagdagang Aktibidad sa Pag-aaral

Mga karagdagang pangalan, titulo, at katangian ni Jesucristo

Maaaring naisin ng mga estudyante na patuloy na pag-aralan ang iba’t ibang pangalan at titulo ng Tagapagligtas kasunod ng aktibidad na nakasaad sa lesson. Maaari mong anyayahan ang mga estudyante na patuloy na saliksikin ang Doktrina at mga Tipan o maaari kang magpakita sa kanila ng karagdagang resources tulad ng Gabay sa mga Banal na Kaulatan o “50 Names and Titles of Jesus Christ,” na matatagpuan sa ComeuntoChrist.org.

Maaari ka ring pumili ng isang scripture passage mula sa babasahin sa Pumarito Ka, Sumunod Ka sa Akin sa linggong ito at sabihin sa mga estudyante na pag-aralan ang passage at hanapin ang mga pangalan, titulo, o banal na katangian ni Jesucristo. Tulungan ang mga estudyante sa kanilang natuklasan kung kinakailangan. Maaari mong sabihin sa mga estudyante na isulat kung paano nila kukumpletuhin ang bawat isa sa mga sumusunod na pahayag batay sa napag-aralan nila:

• Ang isang pangalan, titulo, o katangian ni Jesucristo na nakita ko sa scripture passage na ito ay …

• Ang kaalamang ito tungkol sa Tagapagligtas ay nakatutulong sa akin dahil …

Paghahanap sa Tagapagligtas sa bawat bahagi

Kung makikinabang ang mga estudyante na makakita ng isang halimbawa ng isang bahagi na tila hindi tuwirang nakatuon sa Tagapagligtas, maaari mong ipakita sa kanila ang isang bahaging tulad ng Doktrina at mga Tipan 89, kung saan inihayag ng Panginoon ang Word of Wisdom. Ang paghahayag na ito ay nag-uutos sa mga Banal na iwasan ang ilang sangkap tulad ng alak o tabako at kumain ng iba pang masusustansyang pagkain ng mundo “nang may mabuting pagpapasiya at pagbibigay-pasalamat” (Doktrina at mga Tipan 89:11; tingnan din sa Doktrina at mga Tipan 89:4–9, 11–17; Pagtuturo sa Paraan ng Tagapagligtas [2022], 6). Maaaring pag-aralan ng mga estudyante ang pangako ng Panginoon para sa pagsunod sa Word of Wisdom sa Doktrina at mga Tipan 89:18–21 at maaari silang anyayahang pagnilayan ang natutuhan nila tungkol sa Panginoon. Ang pagtatanong ng tulad ng mga sumusunod ay maaaring makatulong sa mga estudyante na mag-isip nang mas malalim:

• Sa inyong palagay, bakit magbibigay ang Panginoon ng batas ng kalusugan para sa Kanyang mga tao? Ano ang itinuturo nito sa inyo tungkol sa Kanya?

• Ano ang matututuhan natin tungkol sa Panginoon mula sa Kanyang mga pangako? Paano mapagpapala ng pagtitiwala sa Kanyang payo ang ating buhay?