តើពិធីបុណ្យជ្រមុជទឹកសម្រាប់ជីដូនជីតាដែលបានចែកឋានទៅគឺជាអ្វី ?
ព្រះយេស៊ូវបានត្រាស់បង្រៀនថា ពិធីបុណជ្រមុជទឹកដោយសិទ្ធិអំណាចត្រឹមត្រូវត្រូវតែធ្វើឡើង ដើម្បីអាចចូលក្នុងស្ថានសួគ៌បាន ។ ទ្រង់បានបង្ហាញថែមទៀតអំពីសារៈសំខាន់នៃពិធីនេះ នៅពេលទ្រង់បានទទួលពិធីបុណ្យជ្រមុជទឹកដោយអង្គទ្រង់ផ្ទាល់ ។ មនុស្សជាច្រើនមានឱកាសទទួលពិធីបុណ្យជ្រមុជទឹកកាលនៅមានជីវិតរស់ ។ ប៉ុន្តែមានមនុស្សជាច្រើនដែលបានទទួលមរណភាពទៅ ដោយមិនបានទទួលពិធីបុណ្យជ្រមុជទឹក ថែមទាំងមិនបានដឹងអំពីព្រះយេស៊ូវគ្រីស្ទទៀតផង ។ ព្រះវរបិតាសួគ៌ក៏សព្វព្រះទ័យឲ្យយើងម្នាក់ៗត្រឡប់ទៅរស់នៅជាមួយទ្រង់វិញដែរ ។
អាងពិធីបុណ្យជ្រមុជទឹកនៅក្នុងព្រះវិហារបរិសុទ្ធ អូគ័រ ម៉ោនធិន យូថាហ៍
ព្រះវរបិតាសួគ៌បានជ្រាបថា បុត្រាបុត្រីទ្រង់ជាច្រើននាក់នឹងគ្មានឱកាសទទួលពិធីបុណ្យជ្រមុជទឹកនៅក្នុងជីវិតនេះទេ ទើបទ្រង់បានប្រទានមធ្យោបាយមួយផ្សេងទៀតដើម្បីឲ្យពួកគេទទួលពិធីបរិសុទ្ធនេះបាន ។ នៅក្នុងព្រះវិហារបរិសុទ្ធ អ្នកទាំងឡាយណាដែលបានទទួលមរណភាពហើយ អាចទទួលពិធីបុណ្យជ្រមុជទឹក ព្រមទាំងពិធីបរិសុទ្ធដទៃទៀត តាមរយៈការធ្វើជំនួស ( មានន័យថា មនុស្សម្នាក់ដែលកំពុងមានជីវិតរស់ ទទួលពិធីបរិសុទ្ធទាំងនេះជំនួសឲ្យពួកគេ ) ។. ពិធីបុណ្យជ្រមុជទឹកជំនួសជីដូនជីតាដែលបានចែកឋាន ( ពិធីបុណជ្រមុជទឹកដោយការជំនួស ) គឺជាអំណោយដ៏ពិសិដ្ឋ ដែលអ្នកអាចផ្ដល់ជូនសមាជិកគ្រួសាររបស់អ្នក និង មនុស្សដទៃដែលបានទទួលមរណភាព ។ អ្នកទាំងឡាយណាដែលបានទទួលមរណភាពទៅ អាចជ្រើសរើសទទួល ឬ មិនទទួលពិធីបុណ្យជ្រមុជទឹក និង ពិធីបរិសុទ្ធដទៃទៀតដែលបានធ្វើឡើងសម្រាប់ពួកគេ ។ ពិធីបរិសុទ្ធជំនួសនាំឲ្យមានព្រះគុណនៃការសង្គ្រោះរបស់ព្រះយេស៊ូវគ្រីស្ទមានដល់មនុស្សទាំងអស់ ។
យុវវ័យទៅព្រះវិហារបរិសុទ្ធ ម៉ានីល ហ្វីលីពីន ដើម្បីធ្វើពិធីបុណ្យជ្រមុជទឹកសម្រាប់ជីដូនជីតាដែលបានចែកឋាន ។
ប្រសិនបើអ្នកគឺជាសមាជិកសក្ដិសមក្នុងសាសនាចក្រ ហើយមានអាយុយ៉ាងហោចណាស់ ១២ ឆ្នាំ អ្នកអាចទទួលប័ណ្ណចូលព្រះវិហារបរិសុទ្ធ ដែលអនុញ្ញាតឲ្យអ្នកចូលក្នុងព្រះវិហារបរិសុទ្ធដើម្បីទទួលពិធីបុណ្យជ្រមុជទឹក និង ពិធីបញ្ជាក់ជំនួសឲ្យមនុស្សដទៃ ដែលបានស្លាប់ដោយមិនបានទទួលពិធីបរិសុទ្ធទាំងនោះ ។ ការទទួលពិធីបរិសុទ្ធជំនួសឲ្យមនុស្សដទៃដែលបានស្លាប់ អាចត្រូវបានធ្វើឡើងតែក្នុងព្រះវិហារដ៏បរិសុទ្ធរបស់ព្រះ និង ជាការទទួលខុសត្រូវមួយដ៏សំខាន់របស់ក្រុមគ្រួសារប៉ុណ្ណោះ ។