តើការផ្សារភ្ជាប់ក្នុងព្រះវិហារបរិសុទ្ធគឺជាអ្វី ?
បន្ទប់ផ្សារភ្ជាប់នៃព្រះវិហារបរិសុទ្ធ ខដូបា អាហ្សង់ទីន
បទគម្ពីរហៅសិទ្ធិអំណាចដែលបង្រួបបង្រួមក្រុមគ្រួសារជារៀងរហូតថា សិទ្ធិអំណាចនៃ « ការផ្សារភ្ជាប់ » ។ នេះគឺជាសិទ្ធិអំណាចតែមួយ ដែលព្រះយេស៊ូវបានប្រទានដល់សាវកប៉ុល ដើម្បីផ្ដល់ពរដល់ផែនដីដែលនឹងបន្តដល់ស្ថានសួគ៌ ( សូមមើល ម៉ាថាយ ១៦:១៩ ) ។
ផែនការនៃសុភមង្គលរបស់ព្រះវរបិតាសួគ៌ គឺបង្កើតឡើងដើម្បីឲ្យអ្នក ព្រមទាំងក្រុមគ្រួសាររបស់អ្នកអាចរស់នៅជាមួយទ្រង់ជារៀងរហូត ។ នៅក្នុងបន្ទប់ផ្សារភ្ជាប់នៃព្រះវិហារបរិសុទ្ធ អាពាហ៍ពិពាហ៍រវាងបុរសម្នាក់ និង ស្ត្រីម្នាក់ត្រូវបានធ្វើឡើង ។ នៅទីនោះ បុរសម្នាក់ និង ស្ត្រីម្នាក់លុតជង្គង់ចុះ ហើយចាប់ដៃគ្នានៅលើអាសនាដ៏ពិសិដ្ឋ ដើម្បីរៀបអាពាហ៍ពិពាហ៍សម្រាប់ជីវិតនេះ និង សម្រាប់ភាពអស់កល្បជានិច្ច ។ អាពាហ៍ពិពាហ៍ដ៏នៅអស់កល្បជានិច្ចនេះត្រូវបានហៅថា ការផ្សាភ្ជាប់ក្នុងព្រះវិហារបរិសុទ្ធ ហើយកូនៗដែលកើតមកនៅក្នុងចំណងអាពាហ៍ពិពាហ៍បែបនេះ ក៏ត្រូវបានផ្សារភ្ជាប់ទៅនឹងក្រុមគ្រួសាររបស់ពួកគេជារៀងរហូតដែរ ។ ពិធីផ្សារភ្ជាប់ទៅនឹងក្រុមគ្រួសារ គឺជាពិធីបរិសុទ្ធដ៏ឧត្តុងឧត្តមនៅក្នុងព្រះវិហារបរិសុទ្ធ និង ជាពរជ័យដ៏មហិមារបស់ព្រះមានសម្រាប់បុត្រាបុត្រីទ្រង់ ។
ព្រះវិហារបរិសុទ្ធនាំឲ្យមានពរជ័យមហិមាមួយចំនួននៅក្នុងជីវិត ។
គូស្វាមីភរិយាដែលបានរៀបអាពាហ៍ពិពាហ៍ស៊ីវិលពីមុនចូលសាសនាចក្រ ឬ ពីមុនពួកគេមានលទ្ធភាពទៅព្រះវិហារបរិសុទ្ធ ក៏អាចផ្សារភ្ជាប់ជាមួយគ្នាជាស្វាមី និង ភរិយាបានដែរ ។ បន្ទាប់ពីគូស្វាមីភរិយាបានផ្សារភ្ជាប់នឹងគ្នាហើយ កូនៗដែលបានកើតមកពីមុនពួកគេផ្សារភ្ជាប់នោះ ក៏អាចផ្សារភ្ជាប់ជាមួយពួកគេផងដែរ ។
ការដឹងថាក្រុមគ្រួសារអាចរួមរស់ជាមួយគ្នាជារៀងរហូត នាំឲ្យមានភាពសុខសាន្ត និង សេចក្ដីសង្ឃឹម នៅពេលអ្នកប្រឈមមុខនឹងឧបសគ្គនៃជីវិត រួមមាន ការរងទុក្ខ និង មរណភាពនៃមនុស្សជាទីស្រឡាញ់ ។ ប្រសិនបើអ្នកបានផ្សារភ្ជាប់ទៅនឹងក្រុមគ្រួសាររបស់អ្នក ហើយបន្តមានភាពស្មោះត្រង់ទៅនឹងសេចក្ដីសញ្ញារបស់អ្នក នោះទំនាក់ទំនងក្រុមគ្រួសាររបស់អ្នកនឹងបន្តលើសពីសេចក្ដីស្លាប់ ។
អ្នកក៏អាចទទួលពិធីបរិសុទ្ធនៃការសង្គ្រោះ ជំនួសជីដូនជីតារបស់អ្នកបានដែរ ។ តាមរយៈការធ្វើដូចនេះ អ្នកអាចបង្រួបបង្រួមសាច់ញាតិគ្រប់ជំនាន់ទាំងអស់នៃក្រុមគ្រួសាររបស់អ្នកសម្រាប់ភាពអស់កល្បជានិច្ច ។ ការខិតខំដើម្បីឲ្យបានជាក្រុមគ្រួសារដ៏នៅអស់កល្បជានិច្ចមួយ នឹងនាំឲ្យមានពរជ័យអស្ចារ្យទាំងក្នុងជីវិតនេះ និង ក្នុងជីវិតបន្ទាប់ពីស្លាប់ ។