តើការត្រូវបានតែងតាំងឲ្យមានបព្វជិតភាពមានន័យដូចម្ដេច ?
បព្វជិតភាព គឺជាព្រះចេស្ដា និង សិទ្ធិអំណាចនៃព្រះ ដែលទ្រង់ប្រទានឲ្យបុត្រទាំងឡាយរបស់ទ្រង់ធ្វើកិច្ចការនៅក្នុងព្រះនាមទ្រង់ ។ តាមរយៈបព្វជិតភាព យើងទទួលបានពិធីបរិសុទ្ធនៃសេចក្តីសង្រ្គោះ ។ បុរសត្រូវបានតែងតាំងឲ្យកាន់តំណែងក្នុងបព្វជិតភាព ហើយទាំងបុរស ទាំងស្ត្រី អាចស្គាល់អំណាច និង ពរជ័យនៃបព្វជិតភាពនៅក្នុងជីវិតរបស់ពួកគេបាន ។ ស្ត្រីអាចរួមចំណែកជាមួយអំណាចនៃបព្វជិតភាពក្នុងការទទួលខុសត្រូវរបស់ពួកគេ នៅក្នុងសាសនាចក្រ និង ក្នុងផែនការរបស់ព្រះ ។
ការត្រូវបានតែងតាំង ឲ្យមានបព្វជិតភាព មានន័យថា ការទទួលសិទ្ធិអំណាចដើម្បីកាន់តំណែងបព្វជិតភាពជាក់លាក់មួយ ។ ដើម្បីតែងតាំងបុគ្គលម្នាក់ បុរសម្នាក់ដែលមានសិទ្ធិអំណាចត្រឹមត្រូវដាក់ដៃរបស់គាត់នៅលើក្បាលរបស់បុគ្គលនោះដើម្បីផ្ដល់ការតែងតាំង ហើយពោលសេចក្ដីអធិស្ឋានពិសេសមួយ ដែលប្រគល់សិទ្ធិអំណាចឲ្យធ្វើកិច្ចការនៅក្នុងតំណែងនោះ ។
ពិធីបរិសុទ្ធសាក្រាម៉ង់ ត្រូវបានធ្វើឡើងដោយសិទ្ធិអំណាចបព្វជិតភាព ។
មិនយូរប៉ុន្មានបន្ទាប់ពីពិធីបុណ្យជ្រមុជទឹក និង ពីធីបញ្ជាក់ ក្មេងប្រុស និង បុរសសក្ដិសមដែលមានអាយុ ១២ឆ្នាំឡើងទៅ អាចទទួលបព្វជិតភាពបាន ។ បព្វជិតភាពដំបូង ឬ បព្វជិតភាពដែលរៀបចំខ្លួន ត្រូវបានហៅថា បព្វជិតភាពអើរ៉ុន ។ បុរសទាំងឡាយដែលត្រូវបានតែងតាំងឲ្យមានបព្វជិតភាពអើរ៉ុន អាចរៀបចំ ប្រសិទ្ធពរ ហើយចែកសាក្រាម៉ង់ ព្រមទាំងធ្វើពិធីបុណ្យជ្រមុជទឹកឲ្យមនុស្សដទៃ ។ បព្វជិតភាពអើរ៉ុនរៀបចំខ្លួនបុរស ឲ្យទទួលបព្វជិតភាពមិលគីស្សាដែក ។ បុរសទាំងឡាយដែលត្រូវបានតែងតាំងឲ្យមាន បព្វជិតភាពមិលគីស្សាដែក ឬបព្វជិតភាពខ្ពស់ជាងនេះ អាចផ្ដល់ការប្រសិទ្ធពរបព្វជិតភាព ហើយធ្វើពិធីបរិសុទ្ធនានាបានដូចជា បញ្ជាក់សមាជិកថ្មីនៃសាសនាចក្រ និង តែងតាំងមនុស្សដទៃទៀតឲ្យទទួលបព្វជិតភាពមិលគីស្សាដែក ។
នៅពេលបុរសម្នាក់ត្រូវបានតែងតាំងឲ្យមានបព្វជិតភាព គាត់ចុះសេចក្ដីសញ្ញាថានឹងបំពេញករណីយកិច្ចដ៏ពិសិដ្ឋរបស់គាត់ បម្រើមនុស្សដទៃ ហើយជួយស្ថាបនាសាសនាចក្រ ។ អំណាចបព្វជិតភាពគឺសម្រាប់ការប្រើប្រាស់ដើម្បីផ្ដល់ពរ ហើយបម្រើមនុស្សដទៃ ហើយអាចប្រើប្រាស់បានតែតាមរយៈសេចក្តីសុចរិត និង សេចក្ដីស្រឡាញ់ប៉ុណ្ណោះ ។
យុវជនម្នាក់ត្រូវបានតែងតាំងឲ្យមានបព្វជិតភាព ។
បន្ទាប់ពីបានទទួលពិធីបុណ្យជ្រមុជទឹក ( ហើយប្រសិនបើអ្នកជាបុរស បន្ទាប់ពីត្រូវបានតែងតាំងឲ្យមានបព្វជិតភាព ) អ្នកអាចរៀចចំខ្លួនចូលក្នុងព្រះវិហារបរិសុទ្ធ ។ នៅទីនោះ អ្នកនឹងមានឱកាសទទួលពិធីបរិសុទ្ធ និង ពរជ័យនៃដំណឹងល្អបន្ថែមទៀត នៅពេលអ្នកបន្តដើរនៅលើមាគ៌ាត្រឡប់ទៅឯព្រះវិញ ។