តើអំណោយទានក្នុងព្រះវិហារបរិសុទ្ធគឺជាអ្វី ?
ការធ្វើពិធីបរិសុទ្ធក្នុងព្រះវិហារបរិសុទ្ធសម្រាប់ជីដូនជីតា និង មនុស្សដទៃទៀតដែលបានចែកឋាន ធ្វើឲ្យបុត្រាបុត្រីទាំងអស់របស់ព្រះ អាចទទួលបានសេចក្ដីសង្គ្រោះ ។ ប៉ុន្តែក៏មានពិធីបរិសុទ្ធផ្សេងៗដែលត្រូវបានធ្វើឡើងនៅក្នុងព្រះវិហារបរិសុទ្ធ ដែលអ្នកចាំបាច់ត្រូវទទួល ខណៈដែលអ្នកកំពុងដើរនៅលើមាគ៌ាត្រឡប់ទៅក្នុងវត្តមានរបស់ព្រះវិញ ។
បន្ទប់សេឡេស្ទាលនៃព្រះវិហារបរិសុទ្ធ គីវ អ៊ុយក្រែន
បន្ទាប់ពីបានទទួលពិធីបុណ្យជ្រមុជទឹក និង ពិធីបញ្ជាក់ហើយ អ្នកអាចទទួលពិធីបរិសុទ្ធនៃ អំណោយទានពិសិដ្ឋក្នុងព្រះវិហារបរិសុទ្ធ ។ ពាក្យ អំណោយទានពិសិដ្ឋ មានន័យថា « អំណោយ » ហើយអំណោយទានពិសិដ្ឋក្នុងព្រះវិហារបរិសុទ្ធរបស់អ្នក គឺជាអំណោយទានខាងចំណេះដឹង និង អំណាចពិសេស ដែលព្រះប្រទានដល់អ្នកទាំងឡាយណាដែលត្រៀមខ្លួនជាស្រេចដើម្បីទទួលវា ។ វាគឺជាពិធីបរិសុទ្ធមួយចាំបាច់ត្រូវទទួល ដើម្បីបានត្រឡប់ទៅក្នុងវត្តមានរបស់ព្រះវិញ ។ ជាផ្នែកនៃពិធីបរិសុទ្ធនេះ អ្នករៀនកាន់តែស៊ីជម្រៅអំពីផែនការនៃសេចក្ដីសង្គ្រោះ បេសកកម្ម និង ដង្វាយធួនរបស់ព្រះយេស៊ូវគ្រីស្ទ សេចក្ដីស្រឡាញ់ដែលព្រះវរបិតាសួគ៌មានសម្រាប់បុត្រាបុត្រីទ្រង់ និង សក្ដានុពលដ៏ទេវភាពរបស់អ្នក ។ សេចក្តីសញ្ញាដែលអ្នកចុះពេលទទួលអំណោយទានពិសិដ្ឋ ផ្ដោតទៅលើរបៀបដែលអ្នកអាចក្លាយកាន់តែដូចព្រះយេស៊ូវគ្រីស្ទ ។
មជ្ឈិមវ័យដែលត្រៀមខ្លួនរួចរាល់ អាចទទួលអំណោយទានពិសិដ្ឋក្នុងព្រះវិហារបរិសុទ្ធ នៅមិនយូរប៉ុន្មានបន្ទាប់ពីបានទទួលពិធីបុណ្យជ្រមុជទឹក ។ ប៊ីស្សព ឬ ប្រធានសាខារបស់អ្នកនឹងជួយអ្នករៀនបន្ថែមអំពីព្រះវិហារបរិសុទ្ធ និង រៀបចំខ្លួនអ្នកឲ្យទទួលអំណោយទានពិសិដ្ឋ ។ នៅពេលអ្នករៀបចំខ្លួនរួចរាល់ អ្នកអាចអញ្ជើញមនុស្សដទៃដែលមានប័ណ្ណចូលព្រះវិហារបរិសុទ្ធ រួមមាន ក្រុមគ្រួសារ និង មិត្តភក្ដិ ឲ្យចូលរួមជាមួយអ្នកនៅក្នុងព្រះវិហារបរិសុទ្ធនៅពេលអ្នកទទួលពិធីបរិសុទ្ធនេះ ។ ដូចពិធីបុណ្យជ្រមុជទឹកដែរ បន្ទាប់ពីអ្នកទទួលអំណោយទានពិសិដ្ឋផ្ទាល់ខ្លួន អ្នកអាចទទួលពិធីបរិសុទ្ធដូចគ្នានេះ ជំនួសឲ្យមនុស្សដទៃដែលបានទទួលមរណភាព ។