Pagtabang sa Uban sa Ilang mga Pangutana

Pasiuna

Kon ang usa ka kauban nga Santos sa Ulahing mga Adlaw moduol kanimo nga may pangutana o mga kabalaka mahitungod sa ilang pagtuo, hunahunaa nga kini usa ka sagradong pribilehiyo. Ikaw adunay oportunidad sa pagpalig-on sa imong relasyon uban kanila ug sa pagpangalagad ngadto sa ilang mga panginahanglan. Dili kinahanglan nga aduna kay tubag sa tanan nilang mga pangutana. Gikinahanglan lamang kanimo ang pagkaandam sa paghigugma, pagpaminaw, ug pagtabang.

Ang uban adunay mga pangutana o mga kabalaka apan nagpabilin nga aktibo diha sa Simbahan ug nakakaplag og hingpit nga kalipay diha sa ebanghelyo. Ang uban nagpalayo sa ilang mga kaugalingon gikan sa Simbahan tungod sa nagkalainlaing mga katarongan. Ang uban sa kadugayan mobalik ngadto sa hingpit nga pagka-aktibo. Daghan ang moagi sa proseso sa pagtukod og balik sa ilang hugot nga pagtuo, uban sa resulta nga ang hugot nga pagtuo ug ang kalihokan nagpasabot og usa ka butang nga lahi ngadto kanila. Ang uban nagbiya nga mas permanente gikan sa Simbahan, hinoon mahimo silang mopili nga magpabilin og suod nga mga relasyon ngadto sa mga pamilya ug mga higala kinsa nagpabilin nga aktibong mga partisipante.

Walay pagsapayan sa ilang mga pagpili, ang imong relasyon makapabilin nga impluwensiya alang sa kaayohan sa ilang mga kinabuhi. Ang usa ka matinud-anong higala o sakop sa pamilya makaserbisyo isip usa ka kahayag kon sila mangita og dalan sa pagbalik ngadto sa usa ka kinabuhi sa hugot nga pagtuo ug kalihokan sa Simbahan. Ang mga artikulo niini nga seksiyon naghisgot og makagiya nga mga baroganan alang kanimo samtang ikaw nangalagad diha sa gugma ngadto niadtong kinsa adunay mga pangutana mahitungod sa Simbahan.