Tubag nga may Paghigugma

Kon ang usa ka tawo nga suod kanimo makigbahin sa iyang mga pangutana o mga kabalaka mahitungod sa Simbahan, kini sagad nga mobati og kakulba o kaguol. Paninguhaa ang pagbale-wala niini nga mga pagbati ug tubaga nga may kalooy ug kapuangod. Mahimong dili nimo hingpit nga masabtan ang kasinatian sa laing tawo, apan ikaw makasunod sa ehemplo ni Jesukristo ug sa kanunay makapakita og gugma.

Usahay ang mga tawo mag-ukon-ukon sa pagpakigbahin sa ilang mga panglimbasog tungod kay nahadlok sila nga tingali mawagtang ang ilang relasyon ngadto niadtong kinsa mga suod kanila. Kon ang usa ka tawo moduol kanimo, sila nangita og panabang. Tubag nga may paghigugma, bisan kon ikaw wala mahibalo kon unsay buhaton o isulti. Pangita og mga paagi sa pagpakita og kapuangod ug kalooy, bisan og sila naghimo og mga pagpili nga ikaw wala mouyon.

Ania ang pipila ka mga baroganan nga motabang kanimo sa pagpakita og gugma ngadto sa mga tawo sa panahon nga sila makigbahin sa ilang mga pangutana kanimo:

Sulti uban ang gugma. Pakigsulti uban ang pagpaubos, pagkamaloloy-on, ug pagkasinsero. Ang kalarino nga mosulti ug batid nga mga ideya dili kaayo magamit kay sa pagpakita og Kristohanong gugma. Ipahayag ang imong gugma sa yano, sinsero, ug sa balik-balik nga paagi. Samtang ang Espiritu nagdirekta, pangita alang sa hustong panahon ug paagi sa paghatag “og hinungdan sa paglaom nga anaa kaninyo.”¹
Pagserbisyo kanila sa makahuluganong mga paagi. Pangita og mga paagi sa pagpakita sa imong gugma ug pasalig. Pangutan-a sila kon unsay naghimo kanila nga mobati nga gihatagan og bili ug sa unsang paagi ikaw makasuporta kanila. Dayon paghunahuna kon unsaon nimo pagbuhat sa unsay imong nakat-onan. Ang imong serbisyo mopalig-on sa imong mga pulong sa gugma ug mopasalig og balik sa tawo nga imong giamuma.
Matngoni ang imong relasyon. Mas importante ang pagpalambo og relasyon sa gugma ug pagsalig kay sa paghatag og dali nga mga tubag. Ang usa ka maayong tumong mahimong ipadayon lamang ang panag-istoryahanay. Ang pagpadayon sa imong relasyon samtang naghupot sa imong mga pakigsaad mao ang labing maayo nga paagi sa pagpadayon sa pagbaton og positibo nga impluwensya.
Paninguha sa pagtan-aw kanila pinaagi sa mga mata sa Ginoo. Gitudlo ni Elder Dale G. Renlund, “Dili nato hingpit nga matuman ang atong obligasyon sa pakigsaad nga magbangutan uban niadtong nagbangutan ug sa paghupay niadtong nagkinahanglan og kahupayan gawas kon ato silang makita pinaagi sa panan-aw sa Dios.”² Ang imong higala o minahal usa ka anak sa Dios nga may balaang pontensyal. Sila nagsinati sa mga pagsulay nga gisulti ni Apostol Pedro nga kinahanglan nga atong paabuton sa kinabuhi.³ Nagtawag si Jesukristo diha sa Iyang mga disipulo sa paghigugma sa uban sama nga Siya nahigugma kanila.⁴ Pag-ampo alang sa panan-aw nga makakita kanila sama sa Iyang panan-aw.
Paghigugma kanila nga walay gikasabotan. Kon ang usa ka tawo nga atong gimahal naghukom sa pagtuo og lahi kay kanato o naghimo og mga desisyon nga dili nato masabtan, kinahanglan nga atong tahuron ang ilang kabubut-on ug ipadayon ang paghigugma kanila. Kita makahimo niini nga walay pagbiya sa atong kaugalingong lig-on nga gihuptan nga mga tinuohan. Si Presidente M. Russell Ballard mitudlo: “Makahigugmaay kita sa usag usa nga walay pagkompromiso sa personal nga balaang mga sumbanan. Ug makasulti kita niadto nga mga sumbanan nga dili mopakaulaw sa uban.”⁵

Importante nga mga kasulatan: Mga Proverbio 15:1; Juan 13:34–35; Doktrina ug mga Pakigsaad 52:16; 121:41–42