Paminaw uban ang Pagkamapainubsanon

Si Elder Jeffrey R. Holland mihinumdom, “Si [Presidente Russell M. Nelson] makausa misulti kanako nga ang usa sa unang mga lagda sa medikal nga pagpangutana mao ang ‘Pangutan-a ang pasyente kon asa ang nagsakit. Ang pasyente,’ miingon siya, ‘mao ang imong labing maayo nga giya sa husto nga paghiling ug sa pagtambal sa kataposan.’”¹ Kon usa ka higala o sakop sa pamilya moduol kanimo uban sa malisod nga mga pangutana o mga kabalaka mahitungod sa Simbahan, paggahin og panahon sa pagpaminaw. Sila miduol nganha kanimo tungod kay sila misalig kanimo. Gantihi kana nga pagsalig pinaagi sa pagpaninguha og una sa pagsabot sa ilang mga panginahanglan.

Ang pagpaminaw uban ang pagkamapainubsanon malisod nga buhaton. Kini nagkinahanglan og paghatag og atensiyon ug pailob. Apan kini usa ka kahanas nga atong makat-onan. Ang aktibo nga pagpaminaw ug paghimo og tinuod nga koneksiyon makapaayo alang sa usa ka tawo kinsa nakigbahin og pagkahuyang o pangutana. Sulayi ang pipila sa mosunod nga mga pagbansay sa pagpaminaw aron mas maayo ang pagdungog ug pagsabot sa imong mga minahal:

Paningkamot og una sa pagsabot. Kasagaran naghunahuna kita nga nahibalo kon unsaon sa pagsulbad sa mga kabalaka sa uban. Kita gusto lamang motubag sa ilang mga pangutana ug mosulti kanila sa paghunong og kaguol. Kining kalit nga sugyot kasagaran nakasentro kanato kay sa ilang mga panginahanglan. Paggahin og panahon sa pagpaminaw ngadto sa istorya kon giunsa nila sa pag-abot hain sila karon. Siguroha nga ikaw nakasabot sa ilang mga pangutana. Pagpakita og pagtahod kon imong nahibaloan nga ang ilang mga panghunahuna supak sa imong kaugalingon. Paglikay sa pagpanaway kanila o paghimo og mga pamasangil. Kon kita dali nga makahatag og yano nga tubag, tingali bation nila nga sama og atong gipakagamay ang ilang kasinatian. Ang labing maayong dapit sa pagsugod mao ang pagpaninguha sa pagsabot sa punto sa ilang panghunahuna kaysa maningkamot sa pag-usab niini.
Ilha ang ilang kasinatian. Bisan tuod og kita mahimong dili makasabot o magkasinabot sa usag usa nga mga kabalaka, kita makapasalamat sa ilang sinseridad ug sa kasakit nga tingali ilang gibati. Sa paningkamot sa pagpakita og dakong pagsabot, usahay kita naghimo og mga pagtandi tali sa ilang mga kasinatian ug sa atong kaugalingon nga kasinatian. Kini importante nga hinumdoman nga ang kasinatian sa tanan managlahi. Kini mas maayo pa ang pagsulti sama sa, “Ako dili makahanduraw kon unsay imong gibati” o “Tabangi ako sa pagsabot.”
Likayi ang pagkahinanali o pagkamahukmanon. Sa panahon nga ang usa ka higala o minahal nakahukom sa pagpakigsulti kanimo mahitungod sa ilang mga pangutana, sila labing malagmit migahin og pribadong panahon sa pagsiksik ug paghunahuna. Pagmatngon sa dili paghunong sa panagsultihanay pinaagi sa paghunong sa ilang mga pangutana o paghimo og mga paghukom. Mahimo kini nga makapasakit ngadto kanila ug sa imong kasarang sa pagtabang. Ang ilang sinsero nga mga pangutana angay sa imong sinsero nga paninguha sa pagpaminaw.
Pugngi ang imong mga pagbati. Kini sagad nga mobati og kakulba o kabalaka kon ang usa ka minahal moduol kanimo nga may mga pangutana mahitungod sa ilang tinuohan. Paninguha sa dili pagbuhi niini nga pagbati nga mobabag sa usa ka mabungahon nga panagsultihanay. Kon mobati ka og kasuko, kini tingali mas maayo pa nga mangutana kon mahimong makahunong og kadiyot ug ipadayon ang panagsultihanay sa dili madugay. Ang Manluluwas nagtambag kanato sa paglikay sa panagbingkil ug sa pagkasuko.² Kita makakat-on sa dili pag-uyon nga dili magmasuk-anon.³
Pangutana nga matubag sa ilang kaugalingong mga pulong. Ang mga pangutana nga matubag sa ilang kaugalingong mga pulong nag-awhag sa uban sa pagpakigbahin sa ilang mga hunahuna, mga pagbati, ug mga kasinatian. Kini wala magkinahanglan og husto o sayop nga tubag. Sama pananglit: “Makasulti ka pa kanako og dugang?” “Unsay imong pagbati bahin niana?” “Makatabang ka ba kanako sa pagpasabot?” “Unsay akong mahimo sa pagtabang?” Ang pagpangutana og maayong mga pangutana nagpakita nga ikaw nagtagad ug motabang kanimo sa paglikay og dili pagsinabtanay.
Angkona ang imong mga kakulangan. Adunay dakong purohan nga ang mga higala ug mga minahal kinsa moduol kanimo nakatuon na og maayo kay kanimo mahitungod sa ilang mga pangutana. Kini OK kon ikaw walay andam nga mga tubag o kon kini unang higayon nga ikaw nagkat-on mahitungod sa usa ka butang. Ayaw kahadlok sa pagpangutana nga moklaro sa usa ka butang nga wala ninyo masabti. Mahimong dili ikaw mouyon sa tanan nilang mga panapos, apan paninguha sa pag-uyon sa unsay ikaw makahimo nga walay pagtuis sa imong mga pagbati. Makapangayo ka usab og panahon sa imong kaugalingon sa pagtuon sa hilisgotan ug dayon ipadayon ang paghisgot kon ikaw aduna nay daghan nga impormasyon.

Importanting mga kasulatan: Mga Taga-Efeso 4:29; Mosiah 18:21; 3 Nephi 11:29