Mubo nga Pagbansay 1

Unsaon nga Dili Mouyon nga Dili Magmasinupakon

Pagpasabot

Ipakita ug basaha ang mosunod nga pamahayag ni Elder Quentin L. Cook sa Korum sa Napulog Duha ka Apostoles:

Kadaghanan niini nga kalibotan mahadlokon ug masuk-anon sa usag usa. Samtang nakasabot kita niini nga mga pagbati, kita kinahanglang magbaton og pamatasan sa atong pakigsulti ug matinahoron sa atong mga pakig-uban. Tinuod kini ilabi na kon dili kita magkauyonay. Ang Manluluwas nagtudlo kanato sa paghigugma bisan sa atong kaaway. … Akong dapiton ang matag usa kanato, sa indibidwal nga paagi, sa pagkaila nga ang atong pagsupak maoy usa ka tinuod nga sukdanan kon kinsa kita ug kon tinuod ba kitang mosunod sa Manluluwas. Mahimo ra nga dili mouyon, apan dili maayo nga dili ka kauyonan. … Kon kita magpakita og gugma ug pagtahod bisan sa mga malisod nga kahimtang, nahimo kitang mas labaw ka sama ni Kristo. (Quentin L. Cook, “Kita Nagsunod ni Jesukristo,” Liahona, Mayo 2010, 85)

Ipasabot nga usa ka paagi nga kita dili mouyon nga dili magmasinupakon mao ang paghatag og mga tubag nga nag-awhag og pagkasibilisado kay sa panagbingkil.

Modelo

Ipakita ang mosunod nga tsart, ug hisgoti isip usa ka klase ang mga kalainan tali sa duha ka kolum.

Mga Tubag nga Nagdapit og Panagbingkil	Mga Tubag nga Naw-awhag og Pagkasibilisado
Mga Tubag nga Nagdapit og Panagbingkil Dili ako mouyon kanimo tungod kay sayop gayod ikaw.	Mga Tubag nga Naw-awhag og Pagkasibilisado Salamat sa pagpaambit sa inyong mga hunahuna. Samtang managlahi kita sa atong mga gituohan, mapasalamaton ako nga kitang duha mibati nga komportable sa pagpaambit …
Mga Tubag nga Nagdapit og Panagbingkil Nagpakaaron-ingnon lang ka nga maalamon aron sa pagtago nga wala gani ka nakahibalo sa unsay imong gihisgotan.	Mga Tubag nga Naw-awhag og Pagkasibilisado Matabangan ba ko nimo nga mas makasabot kon unsay imong hunahuna mahitungod sa …
Mga Tubag nga Nagdapit og Panagbingkil Anaa nako ang kamatuoran. Husto ang unsay akong gituohan.	Mga Tubag nga Naw-awhag og Pagkasibilisado Gitahod nako ang imong mga gituohan ug nakita kon unsa kini ka importante alang kanimo. Tugoti ko nga ipaambit kon nganong importante kanako ang akong mga gituohan.
Mga Tubag nga Nagdapit og Panagbingkil Usa ikaw ka mapihigon [bigot].	Mga Tubag nga Naw-awhag og Pagkasibilisado Dili ko komportable sa unsay bag-o lang nimo gisulti. Husto ba ang akong pagsabot nga kini ang imong gipasabot, nga …

Paggamit

Dapita ang mga estudyante nga makigtambayayong uban sa usa ka kauban ug puli-puli nga magbansay sa paghimo og matinahoron nga mga tubag ngadto sa mosunod nga mga sitwasyon:

1. Si Alfonso nagbasa sa Basahon ni Mormon diha sa eroplano. Ang tawo tupad niya nakabantay kon unsa nga basahon ang gibasa ni Alfonso ug miingon, “Hinaot nga nakahibalo ka nga ang Basahon ni Mormon gikan sa yawa. Adunay usa lamang ka tinuod nga basahon sa kasulatan—ang Balaan nga Biblia!” Si Alfonso mitubag …

2. Ang klase ni Julie sa institute naghisgot mahitungod sa mga tahas sa mga lalaki ug mga babaye. Usa ka batan-on nga lalaki, ginganlan og Logan, namahayag gamit ang kusog ug dili matinahoron nga tono, “Tungod kay ang lalaki ang naghupot sa pagkapari, siya ang may kataposang desisyon kon unsay mahitabo sa iyang panimalay.” Para ni Julie ang komento ni Logan mapihigon sa sekso ug makalagot. Iyang gipataas ang iyang kamot ug miingon, …

3. Hinawayon ang kauban ni Marda sa kwarto bahin sa mga sumbanan sa Simbahan. Para ni Marda baliktad ang panglantaw sa iyang kauban sa kwarto, tungod kay ang iyang kauban sa kwarto adunay daghang problema nga resulta sa iyang mga pagpili sa kinabuhi. Usa ka adlaw ang kauban ni Marda sa kwarto miingon, “Ang inyong simbahan nagpugong kaninyo nga magmalipayon. Sama kamo sa usa ka binilanggo sa karaan nga mga ideya.” Si Marda mitubag, …

Taposa pinaagi sa paghangyo og usa o duha ka estudyante sa pagpakigbahin sa unsay ilang nakat-onan gikan niini nga kalihokan.