Mubo nga Pagbansay 7: Unsaon sa Pagdasig og Hugot nga Pagtuo kang Jesukristo pinaagi sa Pagpakigbahin og Pagpamatuod

“Mubo nga Pagbansay 7: Unsaon sa Pagdasig og Hugot nga Pagtuo kang Jesukristo pinaagi sa Pagpakigbahin og Pagpamatuod,” Materyal sa Magtutudlo alang sa Pagtubag sa Akong mga Pangutana sa Ebanghelyo (2022)

“Unsaon sa Pagdasig og Hugot nga Pagtuo kang Jesukristo pinaagi sa Pagpakigbahin og Pagpamatuod,” Materyal sa Magtutudlo alang sa Pagtubag sa Akong Mga Pangutana sa Ebanghelyo

Mubong Pagbansay 7

Unsaon sa Pagdasig og Hugot nga Pagtuo kang Jesukristo pinaagi sa Pagpakigbahin og Pagpamatuod

Pagpasabot

Ipasabot nga kon kita mopakigbahin og pagpamatuod, gidapit nato ang presensiya sa Espiritu Santo ug mapaduol ang uban ngadto kang Jesukristo. Ipakita ug basaha ang mosunod nga mga pamahayag ni Presidente M. Russell Ballard ug Elder Gary E. Stevenson sa Korum sa Napulog Duha ka Apostoles:

“Sa yanong pagkasulti, ang pagpamatuod—tinuod nga pagpamatuod, nagagikan sa Espiritu ug gikompirmar sa Espiritu Santo—makapausab og mga kinabuhi. (M. Russell Ballard, “Lunsay nga Pagpamatuod,” Liahona, Nob. 2004, 40)

Kon atong ipaambit ang atong espirituhanon nga kahibalo o ang atong espirituhanon nga saksi ngadto sa uban, atong “gipakigbahin ang atong pagpamatuod.” Sa samang paagi, kon makaobserbar ang uban sa atong matarong nga kinaiya, mga aksiyon, o mga buhat, kini usa usab ka paagi nga kita “mopakigbahin sa atong pagpamatuod.” Ang pagpakigbahin sa atong pagpamatuod pinaagi sa pulong o buhat usa ka paagi sa pagpaambit sa yano ug bililhon nga mga kamatuoran sa ebanghelyo ngadto sa uban. Kini usa ka pagdapit alang sa uban nga “moduol kang Kristo.” … Anaa bisan asa ang mga kahigayonan sa pagpakigbahin og pagpamatuod. (Gary E. Stevenson, “Testimony: Sharing in Word and Deed,” New Era, Mar. 2019, 4, 5)

Ihatag ang mosunod nga handout ngadto sa mga estudyante.

Pagpaambit sa Inyong Pagpamatuod sa Yano ug Natural nga Paagi

Pagtubag sa Akong Mga Pangutana sa Ebanghelyo—Mubong Pagbansay 7: Unsaon sa Pagdasig og Hugot nga Pagtuo kang Jesukristo pinaagi sa Pagpakigbahin og Pagpamatuod

Ipabilin kining yano. Ang usa ka pagpamatuod dili kinahanglan nga sugdan sa pulongan nga, “Gusto ko nga mopakigbahin sa akong pagpamatuod,” ug dili kini kinahanglan nga taposon sa, “Sa ngalan ni Jesukristo, amen.” Ang usa ka pagpamatuod usa ka pagpahayag sa unsay atong gituohan ug nahibaloan nga tinuod pinaagi sa saksi sa Espiritu Santo.

Ipahaum sa dagan sa natural nga panag-istoryahanay. Kon kita andam nga mopaambit, adunay mga oportunidad sa atong palibot aron mohaom ang pagpamatuod ngadto sa kada adlaw nga mga panag-istoryahanay. Kon mangutana ang usa ka tawo kon nganong dili kamo moinom ug ilimnon nga makahubog, sama pananglit, mahimo ninyong ipaambit kon sa unsang paagi ang Pulong sa Kaalam nakapanalangin sa inyong kinabuhi.

Ipaambit ang inyong mga kasinatian. Kanunay kitang mag-istoryahanay sa usag usa mahitungod sa atong mga hagit. Kon dunay mosulti ninyo mahitungod sa unsay ilang giatubang, mahimo kamong mopaambit og panahon sa dihang ang Dios mitabang kaninyo sa inyong mga pagsulay ug mopamatuod nga kamo nakahibalo nga Siya motabang usab kanila.

Pabilin nga nakasentro kang Jesukristo ug sa Iyang doktrina. Si Presidente M. Russell Ballard mihatag og gibug-aton nga “ang Espiritu dili kapugngan kon ang lunsay nga pagpamatuod kang Kristo ihatag” (“Lunsay nga Pagpamatuod,” Liahona, Nob. 2004, 41; tan-awa usab sa “Unsaon sa Pagpakigbahin sa Pagpamatuod sa Mas Natural nga Paagi,” Liahona, Mar. 2019, 8–11).

Modelo

Pagpaambit og ehemplo sa dihang ikaw o usa ka kaila mipaambit sa ilang pagpamatuod sa yano ug natural nga paagi ug nakatabang sa pagpalig-on sa hugot nga pagtuo sa usa ka tawo.

Paggamit

Dapita ang mga estudyante nga makigtambayayong sa usa ka kauban ug gamiton ang mga baroganan diha sa handout nga “Pagpaambit sa Inyong Pagpamatuod sa Yano ug Natural nga Paagi” aron sa pagtubag sa mosunod nga mga sitwasyon (o pagpili og mga sitwasyon nga inyong gituohan nga mahimong mas mahinungdanon alang sa imong mga estudyante):

Nangutana ang usa ka kauban sa trabaho kon unsay imong gibuhat atol sa kataposan sa semana. Motubag ka …
Mipaambit ang usa ka higala nga nawad-an sila og sakop sa pamilya diha sa usa ka aksidente sa miaging semana. Motubag ka …
Nangutana ang usa ka paryente , “Ngano man nga positibo kaayo ka mahitungod sa kinabuhi?” Motubag ka …
Naglibog ang usa ka kauban sa trabaho kabahin kon nganong andam ka nga moundang sa imong trabaho ug moserbisyo og misyon nga ikaw ang mogasto. Motubag ka …

Kon aduna pay panahon sa kataposan niini nga pagbansay, dapita ang usa o duha ka estudyante sa pagpaambit sa unsay ilang nakat-onan gikan niini nga kasinatian ug kon unsaon kaha nila paggamit niini nga kahanas sa pagpaambit sa ilang pagpamatuod sa yano ug gamhanan nga paagi sa usa ka umaabot nga sitwasyon.