Mga Leksiyon 7–14

Pagtubag sa Atong mga Pangutana

Alang sa matag bag-o nga hilisgotan nga madesisyonan sa inyong klase nga hisgotan, awhaga ang mga estudyante sa paggamit sa mga kapanguhaan nga makita sa Newsroom, Giya ngadto sa mga Kasulatan, Kinatibuk-ang Komperensiya, Tabang sa Kinabuhi, o sa Topics [Mga Hilisgotan] nga mga pahina. Ang mga hilisgotan nga gipili mahimong motino kon unsa nga tinubdan o mga kapanguhaan ang kinahanglang gamiton. Kon gibati nimo nga ikaw o ang imong mga estudyante makabenepisyo gikan sa dugang nga mga kapanguhaan, ikonsiderar ang pag-adto sa Answering Doctrinal, Historical, and Social Questions [Pagtubag sa Doktrinal, Makasaysayon, ug Sosyal nga mga Pangutana] nga pahina, nga naglangkob sa Helps by Topics [Mga Tabang sa matag Hilisgotan] ug Gospel Study Links [Mga Link sa Pagtuon sa Ebanghelyo] (nga makita sa ChurchofJesusChrist.org).

Awhaga ang mga estudyante nga kanunayng mogamit sa mga kasulatan ug mga pulong sa mga propeta ug sa pagtinguha sa impluwensiya sa Espiritu Santo samtang mosuhid sila sa nagkalainlaing mga hilisgotan. Ang mosunod nga latid nagsunod sa sundanan nga giestablisar diha sa mga leksiyon 4–6 ug gidesinyo nga magamit ngadto sa bisan unsang hilisgotan nga gustong tun-an sa inyong mga estudyante.

Mga Sugyot alang sa Pagtudlo

Base sa mga panginahanglan sa mga estudyante, mahimo nimong sugdan ang klase gamit ang usa sa mosunod:

• Usa ka mubo nga pagbansay [microtraining] gikan sa apendiks A

• Usa ka “Unsay Bag-o?” nga panaghisgotan mahitungod sa mga balita gikan sa Newsroom (tan-awa sa handout 1 sa apendiks B)

• Usa ka panaghisgot mahitungod sa hilisgotan karon

Hisgotan ang Kamahinungdanon sa Hilisgotan

Hatagi ang mga estudyante og pipila ka minuto sa paghisgot kon nganong mahinungdanon sa ilang kinabuhi ang hilisgotan nga ilang napilian.

Palawman ang Pagsabot

Dapita ang mga estudyante sa pagkat-on pa og dugang pinaagi sa pagsiksik sa Newsroom, Giya ngadto sa mga Kasulatan, Kinatibuk-ang Komperensiya, Tabang sa Kinabuhi, o sa Topics [Mga Hilisgotan] nga mga pahina. Aron sa paggiya sa mga panaghisgot sa grupo, mahimo nimong ihatag ngadto sa mga estudyante ang handout 2, “Palawman ang Atong Pagsabot,” nga makita diha sa apendiks B. Hinumdomi sa pagtabang sa mga estudyante nga makakita sa matag hilisgotan nga adunay mahangtoron nga panglantaw ug sa pagpangutana kon sa unsang paagi ang ilang pagkat-on nakaapekto sa ilang hugot nga pagtuo diha sa Manluluwas ug sa Iyang ebanghelyo.

Ipasabot og Klaro

Buhata ang usa sa mga kalihokan nga makita diha sa mga handout 3–5 diha sa apendiks B, o pagplano og usa ka kalihokan nga imong kaugalingon.

Pagpamalandong ug Pagrekord

Hatagi ang mga estudyante og panahon sa pagpamalandong sa unsay ilang nakat-onan ug nabati karon. Mahimo nimong gamiton ang mga pangutana diha sa handout 6, “Pagpamalandong ug Pagrekord” (makita diha sa apendiks B), aron sa paggiya niini nga kalihokan.

Alang sa Sunod nga Higayon

Tinoa ang nauyonan nga hilisgotan alang sa sunod nga klase. Dapita ang mga estudyante sa pagsuhid sa Newsroom, Giya ngadto sa mga Kasulatan, Kinatibuk-ang Komperensiya, Tabang sa Kinabuhi, o sa Topics [Mga Hilisgotan] nga mga pahina aron sa pagpangandam sa klase.