Leksiyon 1

Mas Mopaduol ngadto sa Langitnong Amahan ug ni Jesukristo pinaagi sa Kasaligan ug Masaligan nga mga Tinubdan

Daghang mga young adult nga adunay mga pangutana kabahin sa doktrina, mga pagtulon-an, mga palisiya, ug mga kasaysayan sa Ang Simbahan ni Jesukristo sa mga Santos sa Ulahing mga Adlaw apan mahimong wala makahibalo kon asa pangitaon ang masaligan nga mga tubag. Kini nga leksiyon maghatag sa mga estudyante sa oportunidad sa pagsuhid sa nagkalainlaing mga tinubdan nga gihatag sa Simbahan aron sa pagtubag sa ilang mga pangutana. Sila usab mokonsiderar kon nganong kining mga tinubdan kasaligan.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Pagmugna og pagbati nga nahisakop. Lakip sa paghatag sa mga estudyante og usa ka oportunidad sa pagkat-on sa ebanghelyo, ang pag-usbaw sa hugot nga pagtuo diha ni Jesukristo, ug ang mapalawman ang ilang pagkakabig, kinahanglan ang institute makahatag og usa ka kasinatian diin ang mga estudyante makaugmad og makahuluganon nga mga relasyon sa usag usa. Sa imong pagsugod niining kurso, hunahunaa kon unsa ang imong mahimo sa pagpalambo og usa ka palibot sa gugma, pagdawat, ug pagtahod. Tinguhaa ang pagpaapil sa tanan nga moabot. Mahimo sugdan nimo niining unang leksiyon gamit ang usa ka kalihokan nga makatugot sa imong mga estudyante aron maila-ila ang usag usa.

Pagtino og mga sangpotanan sa pagkat-on nga makapalig-on sa hugot nga pagtuo kang Jesukristo

Ipakita ug basaha og kusog ang mosunod nga mga sangpotanan sa pagkat-on:

Niining kurso kita makabaton og oportunidad sa paglig-on sa atong hugot nga pagtuo diha ni Jesukristo ug sa pagpausbaw sa atong kamasaligon diha sa Iyang gipahiuli nga Simbahan pinaagi sa

• pagpili og mga hilisgotan kabahin sa doktrina sa Simbahan, mga pagtulon-an, mga palisiya, ug kasaysayan nga sa atong pamati adunay kalabotan sa atong klase;

• pagkat-on kon unsaon sa pagtino ug paggamit ang masaligan nga mga tinubdan aron sa pagtubag sa matag hilisgotan;

• paghulma sa atong gipili nga mga hilisgotan gikan sa panglantaw sa hugot nga pagtuo;

• pagpalambo sa atong abilidad sa paghisgot niining mga hilisgotan diha sa diwa sa pagtahod sa usag usa ug gugma; ug

• sa paghunahuna kon unsaon sa paghimo og matarong; epektibo nga aksiyon sa unsay atong makat-onan.

Mahimo dayon nimong ipangutana ang mosunod:

• Sa unsang paagi nga kining mga sangpotanan motabang nimo nga mas madugangan ang kasayoran ug mahimong larino nga disipulo ni Jesukristo?

• Nganong importante nga isigurado nga ang atong mga diskusyon sa klase, bisan unsa pa man ang hilisgotan, makatukod og hugot nga pagtuo diha ni Jesukristo ug sa Iyang mahangturon nga ebanghelyo? (Mahimong imong ipabasa ug hisgotan ang 2 Nephi 25:26.)

Pagkat-on gikan sa mga tinubdan sa Simbahan

Ipakita ang mosunod nga pangutana: Unsa ang pipila ka pangutana nga kanunayng gipangutana kabahin sa Simbahan? (Kon ang mga estudyante manglimbasog sa paghimo og mga pangutana, mahimo nimong ipaambit ang pipila ka ehemplo gikan sa Mga Pangutana nga Kanunayng Gipangutana [tan-awa sa newsroom.ChurchofJesusChrist.org].) Mahimo nimong ilista ang mga tubag sa mga estudyante diha sa pisara:

• Unsang mga matang sa mga tubag ang inyong nadunggan niining mga pangutana?

• Unsa ang mahimong mahitabo kon ang mga tubag sa mga pangutana sa ebanghelyo ibase sa gidungog-dungog nga istorya, sayop nga impormasyon, opinyon, o espikulasyon?

Ipaambit ang mosunod nga sitwasyon:

Ikaw adunay usa ka higala nga bag-o lang nag-tambong og open house sa templo. Gisulti niya diha nimo nga ang iyang kasinatian positibo. Human sa open house mihimo siya og pagsiksik diha sa internet aron makat-on pa og dugang kabahin sa templo ug nakabasa og pipila ka butang kabahin sa garment sa templo. Usa ka blog mitawag sa mga garment sa templo isip “magical underwear.” Siya nangutana nimo sa mosunod nga pangutana: “Nganong ang mga miyembro sa inyong Simbahan magsul-ob og ‘magical underwear’ human sila moadto sa templo?”

Dapita ang mga estudyante nga idrama-drama uban sa kauban kon unsaon nila sa pagtubag ang pangutana kabahin sa “magical underwear.” Human ang mga estudyante makabaton og panahon sa paghisgot sa ilang mga tubag, ikonsiderar ang pagpangutana sa mosunod:

• Unsay maayong nahitabo sa paghatag sa imong tubag? Unsa ang dili maayong nahitabo?

• Unsa nga mga hagit ang mahimong mahitabo sa pagsiksik diha sa internet aron sa pagsuta og dugang pa kabahin sa Simbahan?

Hunahunaa ang pagpaambit sa mosunod nga mga pamahayag sa mga lider sa Simbahan:

Mahimong atong pahinumdoman ang sinserong nangutana nga ang impormasyon sa Internet walay salaan sa “kamatuoran”. Ang ubang impormasyon, bisan unsa pa ka makakombinsir, dili gayod tinuod. (Neil L. Andersen, “Joseph Smith,” Liahona, Nob. 2014, 29)

Atong mahibaloan ang katinuod niining buhat sa ulahing mga adlaw, apan nagkinahanglan kini nga kita mopili sa pagtuo, dili sa pagduha-duha, ug nga kita moadto sa kasaligan nga mga tinubdan alang sa atong mga tubag. (Dale G. Renlund, “Doubt Not, but Be Believing” [worldwide devotional for young adults, Ene. 13, 2019], broadcasts.ChurchofJesusChrist.org)

Nagpuyo kita sa panahon sa gipalapad ug gisabwag og maayo nga impormasyon. Apan dili tanan niini nga impormasyon tinuod. Kinahanglang magmatngon kita samtang mangita kita sa kamatuoran ug magpili og mga tinubdan niana nga pagsiksik. (Dallin H. Oaks, “Kamatuoran ug ang Plano,” Liahona, Nob. 2018, 25)

• Nganong ang mga materyal sa Simbahan usa ka importanting tinubdan kon magtinguha aron masayod og dugang kabahin sa doktrina, mga pagtulon-an, mga palisiya, ug kasaysayan sa Simbahan?

Ipasabot nga samtang ang mga kasulatan ug mga pulong sa mga apostol sa bag-ong panahon mao ang atong mga tinubdan, ang Simbahan naghatag og dugang nga mga tinubdan nga tukma, matinuoron ug makanunayon uban sa atong doktrina. Pananglitan, ang website sa Simbahan adunay mapuslanon nga impormasyon kabahin sa katuyoan sa temple garment.

• Unsa ang mahinungdanon alang kanimo kabahin niining impormasyon sa garment sa templo?

• Base sa unsay imong nakat-onan, unsaon kaha nimo pag-usab ang imong tubag kabahin sa “magical underwear”? (Mahimo usab nimong hatagan ang mga estudyante og oportunidad sa pagpaambit sa ilang giusab nga tubag sa usa ka kauban.)

Ipasabot nga ang Gospel Library naghatag og daghang kapanguhaan nga makatabang gayod kon magtubag og mga pangutana ug mga kabalaka sa halapad nga nagkadaiyang mga hilisgotan. Kini naglakip, sama pananglit sa, Giya ngadto sa mga Kasulatan, Mga Hilisgotan sa Kinatibuk-ang Komperensiya, Tabang sa Kinabuhi, ug Mga Hilisgotan. Agig dugang ngadto sa Gospel Library, ang Newsroom naghatag sa giluwat nga mga balita, mga artikulo, ug mga istorya nga makatabang kanato nga mapahibalo sa labing bag-ong nanghitabo sa Simbahan.

Aron matabangan ang mga estudyante nga makita kining mga tinubdan gikan sa tukma nga panglantaw, ipangutana ang mosunod:

• Samtang kining mga tinubdan sa Simbahan mga bililhon, nganong kini dili igo sa atong pagpangita alang sa kamatuoran?

Base sa mga tubag sa mga estudyante, hunahunaa kon hain sa mosunod nga mga pangutana ang labing makatabang sa mga estudyante aron masabtan nga kining mga tinubdan dili makapuli sa mahinungdanong tahas sa mga sakop sa Dios nga Kapangulohan diha sa atong pagpangita sa kamatuoran:

• Nganong kini mahinungdanon nga kita modangop ngadto sa Langitnong Amahan ug ni Jesukristo isip ang kinadak-ang tinubdan sa kamatuoran? (Tan-awa sa Mosiah 4:9 ug Juan 14:6.)

• Unsa nga tahas ang buhaton sa Espiritu Santo samtang kita nangita og mga tubag sa atong mga pangutana? (Tan-awa sa Doktrina ug mga Pakigsaad 8:2–3 ug Moroni 10:5.)

• Nganong mahinungdanon ang pag-ampo samtang kita magtinguha sa mga tubag sa atong mga pangutana? (Tan-awa sa Santiago 1:5–6 ug 2 Nephi 32:8–9.)

Pagpalambo sa Atong Pagtudlo ug Pagkat-on

Pag-ila sa masaligan nga mga tinubdan. Mahimong makatabang kini sa pagpasabot nga samtang kita motutok niining kurso sa pagpangita og mga tubag gikan sa Gospel Library ug sa Newsroom, sa Simbahan, adunay daghan pang mga publikasyon sa Simbahan diin makapangita kita og mga tubag, ingon man sa ubang masaligan nga mga tinubdan nga dili gipaluyohan sa Simbahan. Siguroa nga ang tanang estudyante makasabot nga ang mga kasulatan ug ang mga pagtulon-an sa apostoles ug mga propeta sa bag-ong panahon mao ang sumbahan diin pinaagi kanila atong matandi ang uban pang mga tinubdan (tan-awa sa D. Todd Christofferson, “Ang Doktrina ni Kristo,” Liahona, Mayo 2012, 86–90).

Kini mahimong makatabang ang pagpakita sa mga estudyante kon asa makit-an ang mga pahina sa Newsroom, Giya ngadto sa mga Kasulatan, Kinatibuk-ang Komperensiya, Tabang sa Kinabuhi [Life Help], ug Topics [Mga Hilisgotan] diha sa computer ug sa mobile device. Ipasabot nga kining mga tinubdan mao ang kanunayng gi-update ug gipalambo aron nga kini mabag-o ug sayon sa paggamit.

Dapita ang mga estudyante sa paggamit sa ilang kaugalingon nga mga device ug mogahin og pipila ka minuto sa pagsuhid niining mga tinubdan. Mahimo nimong isulat diha sa pisara ang mosunod nga mga ulohan sa: Newsroom, Giya ngadto sa mga Kasulatan, Kinatibuk-ang Komperensiya, Tabang sa Kinabuhi [Life Help], ug Topics [Mga Hilisgotan]. (Pahinumdom: Kon ang uban nga mga estudyante walay mga device, dapita sila nga makigtinabangay sa laing tawo kinsa anaa. Mahimo nimong ipahaom kini nga kalihokan depende sa bandwidth sa Wi-Fi.)

Samtang ang mga estudyante mosuhid niining mga tinubdan, dapita sila sa pagpangita sa lahi nga mga feature sa matag tinubdan ug ikonsiderar kon unsa ang ilang ganahan kaayo niini. Awhaga ang mga estudyante sa pagtino sa posible nga mga hilisgotan nga ganahan nilang kat-onon og dugang atol niining kurso.

Human sa paghatag sa mga estudyante og igong panahon sa pagsuhid, dapita sila sa pagpaambit og butang nga ilang makit-an sa matag tinubdan ug sa pagsulat sa ilang mga tubag ubos sa tukma nga ulohan diha sa pisara. Siguroa nga masulatan ang mga hilisgotan nga adunay kinatibuk-ang hangyo ngadto sa imong mga estudyante. Ipasabot nga alang sa mga leksiyon 7–14 kita motubag sa mga hilisgotan nga gipili sa klase.

Samtang mopaambit ang mga estudyante sa ilang mga obserbasyon kabahin niining mga tinubdan, ikonsiderar ang pagpangutana og usa o dugang pa sa mosunod nga mga pangutana aron sa pagpalambo sa panaghisgotan:

• Aduna bay bisan unsang mga hilisgotan, mga artikulo, o mga isyu nga misurprisa nimo? Kon mao, ngano man?

• Sa unsang paagi nga ang mas maayong kasayuran sa impormasyon nga anaa pinaagi niining mga tinubdan makatabang nimo sa pagpanalangin sa mga kinabuhi sa uban? (Mahimo nimong basahon ug hisgotan ang usa o dugang pa ang mosunod nga mga kasulatan: 1 Pedro 3:15; Doktrina ug mga Pakigsaad 11:21; 88:118.)

• Sa unsang paagi ang pagkahimong mas nasayod sa posisyon sa Simbahan kabahin niining mga hilisgotan makatabang kanato ug sa uban nga mas maduol ngadto sa Langitnong Amahan ug ni Jesukristo?

Dapita ang pipila ka mga estudyante sa pagpaambit kon sa unsang paagi nga sila mibati nga kining kurso nakapanalangin sa ilang kinabuhi. Hangyoa ang mga estudyante sa paghunahuna bahin sa laing young adult kinsa mahimong napanalanginan pinaagi sa pag-apil, ug awhaga ang mga estudyante sa pagdapit niana nga tawo sa pagtambong sa sunod klase.

Alang sa Sunod nga Higayon

Dapita ang mga estudyante sa pag-access sa site sa Newsroom o app sa Church News atol sa semana ug mangita sa kinabag-ohan nga balita sa Simbahan. Ipasabot nga atol sa sunod klase sila makabaton og oportunidad sa pagpaambit og butang nga ilang makit-an uban sa ilang mga kaedad. Ikonsiderar ang pagpadala og usa ka pahinumdom ngadto sa mga estudyante kabahin niining kalihokan pipila ka adlaw sa dili pa ang imong sunod nga klase.