Leksiyon 6

Pasiuna ngadto sa mga Hilisgotan: Ang Pagkalahi-lahi ug Paghiusa diha sa Simbahan

Kini nga leksiyon mohatag og usa ka modelo kon unsaon sa pag-angkon og usa ka makahuluganon ug kasinatian sa pagkat-on nga makapalig-on sa hugot nga pagtuo gamit ang mga tinubdan nga makita diha sa Mga Hilisgotan seksiyon sa Gospel Library. Atol sa leksiyon, pahinumdomi ang mga estudyante nga kita nahisakop sa internasyonal nga simbahan nga gilankuban sa nagkadaiyang kultura, kaliwat, nasyonalidad, ug mga pinulongan. Ang mga estudyante makabaton og oportunidad sa pagpraktis sa mosunod nga sundanan samtang sila maghisgot kabahin sa paglahi-lahi ug panaghiusa diha sa Simbahan: (1) hisgotan ang kamahinungdanon sa hilisgotan, (2) palawman ang pagsabot, (3) ipasabot og klaro, ug (4) pagpamalandong ug pagrekord.

Mga Sugyot alang sa Pagtudlo

Pagpili og mga Hilisgotan

Ang mga leksiyon 7–14 mahimong ibase sa mga hilisgotan nga gipili sa imong klase nga mas kat-onon pa. Ikonsiderar ang pag-undang sa usa ka mubo nga pagbansay [microtraining] o “Unsay Bag-o” nga kalihokan alang sa klase karon aron ang mga estudyante adunay daghang panahon sa pagpili og mga hilisgotan alang sa umaabot nga mga leksiyon.

Kon imong gibati nga ang imong klase nagkinahanglan og pipila ka oras sa pagpamalandong sa kaimportante sa paghisgot og mga hilisgotan sa gipili nila mismo, mahimo nimong bahinon ang klase ngadto sa ginagmay nga grupo ug tugoti ang grupo nga maghisgot sa handout 7 ug ang ubang mga grupo maghisgot sa handout 8 gikan sa apendiks B. Hatagi ang mga estudyante og panahon sa pagpaambit unsa ang ilang nakat-onan. Dayon isip usa ka klase ilha sa mga hilisgotan nga maoy labing ganahan nga hisgotan sa mga estudyante atol sa nahabilin nga mga leksiyon sa kurso.

Hisgotan ang Kamahinungdanon sa Hilisgotan

O basaha ang mosunod nga pamahayag ni Presidente M. Russell Ballard sa Korum sa Napulog Duha ka mga Apostoles:

Ang Unang Kapangulohan namahayag [usa ka higayon niana]: “Ang atong mensahe… mao ang usa ka linain nga gugma ug pagpakabana alang sa mahangturong kaayohan sa tanang mga lalaki ug mga babaye, bisan unsa pay relihiyoso nga pagtuo, kaliwat, o nasyonalidad, nakahibalo nga kita tinuod nga mga igsoon tungod kay mga anak kita sa samang Mahangturong Amahan” (pamahayag sa Unang Kapangulohan, 15 Peb. 1978).

Mao kana ang atong doktrina—usa ka doktrina sa paglakip. Mao kana ang atong gituohan. Mao kana ang gitudlo kanato. Sa tanang tawo niining kalibotan, kita kinahanglan nga mamahimong labing mahigugmaon, ang labing mabination, ug ang labing mapaundayunon tungod niana nga doktrina. (“Doctrine of Inclusion,” Ensign, Nob. 2001, 37)

• Nganong importante kini alang sa matag usa kanato nga mobati nga kita adunay usa ka dapit diha sa Simbahan?

• Unsa ang makapabilin sa mga indibidwal gikan sa pagbati nga sila nahisakop sa Simbahan?

• Unsaon nato nga atong makab-ot ang panaghiusa kon adunay nagkadako nga pagkalahi-lahi diha sa Simbahan?

Palawman ang Pagsabot

Hatagi ang mga estudyante og oportunidad sa pagkat-on og dugang pa kabahin niining hilisgotan pinaagi sa pag-adto sa artikulo nga “Diversity and Unity in The Church of Jesus Christ of Latter-day Saints [Pagkalahi-lahi ug Panaghiusa diha sa Ang Simbahan ni Jesukristo sa mga Santos sa Ulahing mga Adlaw]” diha sa mga Hilisgotan ug tun-i kini sulod sa pipila ka minuto.

Dapita ang mga estudyante sa paghisgot uban sa usa ka kauban o diha sa ginagmay nga grupo sa usa o mas daghan sa mosunod nga mga pangutana:

• Unsay inyong nakat-onan mahitungod sa pagkalahi-lahi gikan niini nga materyal? Hain sa mga pakisayran sa kasulatan ang labing makatabang? Ipaambit ang pipila sa mga ehemplo sa unsay labing makahuluganon diha kanimo gikan niining artikulo.

• Nganong importante man alang sa matag usa kanato nga masayod ug mopaambit kon unsa ang gitudlo sa mga propeta ug mga apostol sa bag-ong panahon kabahin sa pagkalahi-lahi?

• Sa unsang paagi kini nga mga pagtulon-an kabahin sa pagkalahi-lahi makatabang kanato nga mamahimong mas mahisama sa Manluluwas?

• Sa unsang paagi nga kining materyal makatabang sa paghatag og katin-awan sa posibleng mga dili pagsinabtanay ug sa pagdugang og kamasaligon diha sa Simbahan sa Ginoo?

• Samtang imong gitun-an kining materyal, unsa ang mga pagbati o mga panabot ang imong naangkon ug sa unsang paagi nga kini nakaapekto kanimo?

Ipasabot og Klaro

Buhata ang usa sa mga kalihokan nga makita diha sa mga handout 3–5 diha sa apendiks B, o pagplano og usa ka kalihokan nga imong kaugalingon.

Pagpamalandong ug Pagrekord

Hatagi ang mga estudyante og panahon nga makapamalandong unsa ang ilang nakat-onan ug gibati atol niining klase. Mahimo nimong gamiton ang mga pangutana diha sa handout 6, “Pagpamalandong ug Pagrekord” (makita diha sa apendiks B), aron sa paggiya niini nga kalihokan.

Alang sa Sunod nga Higayon

Base sa gipili sa mga estudyante kabahin sa mga hilisgotan sa sayo pa ang klase, pahinumdomi sila kon unsa ang hilisgotan nga hisgotan atol sa sunod nga klase. Dapita ang mga estudyante sa paggahin og pipila ka oras atol sa semana sa pagsisksik bisan hain sa Newsroom, Giya Ngadto sa mga Kasulatan, Kinatibuk-ang Komperensiya, Tabang sa Kinabuhi, o Mga Hilisgotan nga mga pahina alang sa may kalabotan nga tinubdan.