Leksiyon 4 Materyal sa Magtutudlo

Pasiuna ngadto sa Propetikanhon nga mga Tinubdan: Ang Balaanon nga Gasa sa Grasya

Kon magtinguha og mga tubag alang sa atong mga pangutana sa ebanghelyo, importante nga motutok ug mohatag og prayoridad sa pulong sa Dios. Ang mga kasulatan ug mga pagtulon-an sa apostoles ug mga propeta sa modernong panahon mao ang nag-una nga mga tinubdan sa pagpangita sa Iyang balaanon nga pulong. Niini nga leksiyon, ang mga estudyante magbansay gamit ang Giya ngadto sa mga Kasulatan ug mga pakigpulong sa kinatibuk-ang komperensiya aron madiskobrehan kon unsay gitudlo sa apostoles ug mga propeta sa modernong panahon kabahin sa hilisgotan sa grasya. Sila usab ipaila ngadto sa mosunod nga modelo sa pagkat-on nga gamiton sa tibuok niini nga kurso: (1) hisgotan ang kamahinungdanon sa hilisgotan, (2) palawman ang pagsabot, (3) ipasabot og klaro, ug (4) pagpamalandong ug pagrekord.

Mga Sugyot alang sa Pagtudlo

Base sa mga panginahanglan sa mga estudyante, mahimo nimong sugdan ang klase gamit ang usa sa mosunod:

1. Usa ka mubo nga pagbansay [microtraining] gikan sa apendiks A

2. Usa ka “Unsay Bag-o?” nga panaghisgotan mahitungod sa mga balita gikan sa Newsroom sa Simbahan (tan-awa sa handout 1 sa apendiks B)

3. Usa ka panaghisgot mahitungod sa hilisgotan karon

Usa ka Sundanan alang sa Pagkat-on. Ang tanang nahabilin nga mga leksiyon niini nga kurso mosunod sa samang sundanan: (1) hisgotan ang kamahinungdanon sa hilisgotan, (2) palawman ang pagsabot, (3) ipasabot og klaro, ug (4) pagpamalandong ug pagrekord. Mahimong makatabang nga ipakita kini nga sundanan matag semana para sa mga estudyante. Samtang mosunod ang mga magtutudlo ug mga estudyante niini nga sundanan, mas makabaton sila og makahuloganon nga mga panaghisgotan ug makapalawom sa ilang pagkat-on. Ang mga leksiyon 4–6 adunay gipili na daan nga mga hilisgotan, samtang ang mga leksiyon 7–14 maghatag og kinatibuk-an nga latid aron ang mga magtutudlo ug mga estudyante makapili og mga hilisgotan nga gusto nilang hisgotan.

Hisgotan ang Kamahinungdanon sa Hilisgotan

Ikonsiderar ang pagpaambit og sitwasyon sama sa mosunod:

Hunahunaa nga nakig-istorya kamo sa usa ka suod nga higala nga dili sama nato og tinuohan mahitungod sa relihiyon. Atol sa panag-istoryahanay mitumaw ang hilisgotan sa grasya. Sa usa ka punto ang inyong higala miingon, “Gidawat nako si Jesukristo isip akong Manluluwas ug naluwas ko pinaagi sa Iyang grasya. Nakadungog ko nga ang mga miyembro sa inyong simbahan dili motuo nga gikinahanglan nila ang grasya ni Kristo aron maluwas. Hinuon, nagtuo kamo nga inyong maangkon ang inyong kaluwasan pinaagi sa maayo nga mga binuhatan. Tinuod ba kana? Unsay gitudlo sa inyong simbahan mahitungod sa grasya?”

Dapita ang pipila ka estudyante sa pagpaambit sa ilang pasiuna nga mga hunahuna mahitungod niini nga sitwasyon. Mahimo dayon kang mangutana:

• Asa kaha kamo makaadto aron sa pagpangita sa mga pagtulon-an sa Ginoo kabahin sa grasya?

• Ngano kahang importante nga magkat-on og una sa unsay gisulti sa mga kasulatan ug apostoles ug mga propeta sa modernong panahon mahitungod sa grasya, bisan og makakita kita og mga pagtulon-an mahitungod niini gikan sa ubang mga tawo? (Mahimo nimong ipabasa sa mga estudyante ang 1 Nephi 15:23–24 ug Doktrina ug mga Pakigsaad 1:37–38.)

Ipasabot nga ang Gospel Library naglangkob og daghang bililhon nga mga kapanguhaan aron sa pagpalambo sa pagtuon ug pagkat-on. Apan, tungod kay kadtong gitawag sa Ginoo isip mga propeta ug mga apostoles, sa karaan ug modernong panahon, adunay espesyal nga tawag ug gasa sa “pagpahayag sa hunahuna ug kabubut-on sa Dios ngadto sa katawhan,” ang ilang mga pulong kinahanglang mahatagan og prayoridad kay sa ubang mga tinubdan (D. Todd Christofferson, “Ang Doktrina ni Kristo,” Liahona, Mayo 2012, 87). Niini nga leksiyon atong gamiton ang Giya ngadto sa mga Kasulatan ug mga pakigpulong sa kinatibuk-ang komperensiya isip usa ka importante nga paagi aron madiskrobrehan kon unsay gipadayag sa Ginoo pinaagi sa Iyang mga propeta ug apostoles.

I-search ang Gospel Library. Depende sa ang-ang sa kahanas sa imong mga estudyante, mahimo kang mogahin og panahon sa pagpakita sa imong mga estudyante kon unsaon sa paggamit sa search nga feature diha sa Gospel Library. Hinumdomi, diha sa app ang search nga feature mangita lamang sa sulod [content] nga na-download na.

Palawman ang Pagsabot

Dapita ang mga estudyante nga magtrabaho diha sa ginagmayng grupo. Ipapangita sa ubang mga sakop sa grupo ang “Grasya” diha sa Giya ngadto sa mga Kasulatan ug ang uban mangita sa “Grasya” gamit ang himan sa Mga Hilisgotan sa Kinatibuk-ang Komperensiya. Samtang ang mga estudyante mangita sa ilang gitakda nga mga kapanguhaan, awhaga sila sa pagpangita og mga tubag sa pangutana “Unsay gitudlo sa inyong simbahan mahitungod sa grasya?”

Human sa pagtugot og panahon alang sa pagtuon, dapita ang mga sakop sa grupo nga ipaambit sa usag usa ang mga kasulatan ug mga pamahayag gikan sa kinatibuk-ang komperensiya nga makatabang sa pagtubag sa pangutana sa ibabaw.

Dayon mahimo nimong ipangutana sa klase ang mosunod nga mga pangutana:

• Unsay inyong nakat-onan nga nakatabang kaninyo nga mas makasabot sa grasya?

• Sa unsang paagi ang inyong pagtuon sa grasya nakaimpluwensiya sa inyong hugot nga pagtuo ug pagpamatuod kang Jesukristo?

Ipasabot og Klaro

Pagpili og usa sa mosunod nga mga kalihokan nga buhaton sa imong mga estudyante, o paghimo og imong kaugalingon, aron ang mga estudyante makabansay sa pagpahayag sa unsay ilang nakat-onan mahitungod sa mga pagtulon-an sa Ginoo mahitungod sa grasya. Mahimo kang mohatag og mga handout nga adunay mga instruksiyon sa bisan hain sa unang duha ka kalihokan ngadto sa mga estudyante.

Pagtubag sa usa ka tawo nga wala miuyon. Makigtambayayong sa usa ka kauban, hunahunaa nga inyong mahimamat ang usa ka tawo kinsa mosulti, “Wala ko nakadungog og mga miyembro sa inyong simbahan nga naghisgot mahitungod sa grasya. Wala ba kamo mituo niini?” Base sa unsay inyong nakat-onan, ipaambit ang usa ka tubag nga nagpakita sa mga pagtulon-an sa Manluluwas bahin niini nga hilisgotan. Mahimo usab kang maghisgot sa lainlaing paagi nga ang atong mga gituohan mahitungod sa grasya mahimong wala masabti ug unsa ang labing maayong paagi sa pagtubag niana nga mga sayop nga pagsabot.

Pagpaambit og duha ka minuto nga kinatibuk-ang pagpasabot. Diha sa gagmay nga mga grupo, hisgoti ang lainlaing paagi nga ang mga miyembro sa Simbahan mahimong sayop ang pagsabot sa doktrina sa grasya. Sama pananglit, unsa ang sayop nga pagsabot sa grasya ang mahimong gipasabot sa mosunod nga mga pamahayag: “Dili gayod igo ang akong ka maayo.” “Dili gayod ako mosarang sa celestial.” Dayon hunahunaa nga gihangyo kamo sa paghatag og mubo nga kinatibuk-ang pagpasabot sa mga pagtulon-an sa Simbahan mahitungod sa grasya sa inyong konseho sa ward o branch. Gamiton ang unsay inyong nakat-onan karon, paandama ang matag sakop sa grupo og duha ka minuto nga kinatibuk-ang pagpasabot nga nagpakita sa unsay gitudlo sa Ginoo mahitungod sa Iyang grasya. Dayon pagpili og lainlaing tawo diha sa grupo aron mopresentar. Human sa matag presentasyon, ang ubang mga sakop sa grupo mahimong mangutana sa mipresentar og usa o duha ka pangutana. Tugoti ang tanang sakop sa grupo sa pagpaambit sa ilang kaugalingon nga bersiyon sa duha ka minuto nga kinatibuk-ang pagpasabot kon itugot sa panahon.

Pagpangutana ug pagtubag sa mga pangutana. Dapita ang mga estudyante sa pagsulat diha sa usa ka piraso nga papel og pangutana mahitungod sa grasya nga mahimong aduna ang usa ka tawo nga lahi kanato og tinuohan. Kolektaha ang mga pangutana sa mga estudyante, ug ibutang kini diha sa usa ka sudlanan. Pagpili og bisan unsa nga pangutana, ug dapita ang usa ka estudyante sa pagpaambit og tubag nga nahiuyon sa mga pagtulon-an sa Simbahan. Hisgoti ang kalig-on sa tubag ug sa unsang paagi kini mapalambo, ug dayon pagkuha og laing pangutana nga tubagon sa laing estudyante. Balika kutob sa itugot sa panahon.

Pagpamalandong ug Pagrekord

Hatagi ang mga estudyante og panahon nga makapamalandong unsa ang ilang nakat-onan ug nabati gikan niini nga leksiyon. Aron sa pag-aghat sa mga estudyante, mahimo nimong ipakita ang pipila sa mosunod nga mga pangutana o ang pipila sa imong kaugalingon nga mga pangutana. Mahimo dayon nimong dapiton ang mga estudyante nga tutokan ang pangutana o mga pangutana nga labing mahinungdanon ngadto kanila ug irekord ang ilang mga hunahuna:

• Unsa ang inyong nakat-onan karon nga nakatabang kaninyo nga mas makasabot sa mga pagtulon-an sa Simbahan mahitungod sa grasya? Unsa nga mga impresyon ang inyong nadawat gikan sa Espiritu Santo?

• Kinsa kaha ang inyong mapaambitan niining napalambo nga pagsabot? Kanus-a ug unsaon ninyo pagpaambit kanila sa Kristohanon nga paagi ang unsay inyong nakat-onan ug nabati?

• Sa unsang mga paagi ang kasinatian sa klase karon nakatabang sa paglig-on sa inyong hugot nga pagtuo kang Jesukristo ug sa Iyang gipahiuli nga Simbahan? Unsa pa ang dugang ninyo nga mabuhat aron sa pagpalambo sa inyong pagsabot ug hugot nga pagtuo nga may kalabotan niini nga hilisgotan?

• Sa unsang paagi kini nga kasinatian nakapalambo sa inyong pagsalig nga kita gigiyahan sa buhi nga mga propeta kinsa nakadawat og pagpadayag gikan sa Ginoo?

Kon tukma, dapita ang pipila ka estudyante sa pagpaambit sa unsay ilang nakat-onan gikan sa ilang kasinatian karon. Ikonsiderar ang pagpamatuod sa unsay imong nabati o nakat-onan karon. Mahimo usab kang magpamatuod sa grasya sa Ginoo nga motabang sa mga estudyante sa ilang padayon nga pagpangita sa mga tubag sa ebanghelyo alang sa ilang mga pangutana.

Alang sa Sunod nga Higayon

Ipaambit sa mga estudyante nga sa sunod nga klase maghisgot kita sa importante nga mga kapanguhaan sa pagbatok sa pornograpiya nga anaa diha sa Tabang sa Kinabuhi nga seksiyon sa Gospel Library. Dapita ang mga estudyante sa paggahin og panahon atol sa semana aron sa pagsuhid niini nga kapanguhaan.