Mubo nga Pagbansay 9

Unsaon nga Magmaisogon apan Dili Magpalabi Kon Maghisgot sa Ebanghelyo

Pagpasabot

Ipahinumdom sa mga estudyante nga ang Apostol nga si Pablo nagtudlo sa ebanghelyo gamit ang kaisog ug lig-on nga pagtuo. Sa makausa siya namahayag, “Dili ko ikaulaw ang maayong balita” (Mga Taga-Roma 1:16). Kita makaingon nga si Pablo usa ka maisogon nga magtutudlo. Si Alma mitambag sa iyang anak nga lalaki nga si Shiblon nga “gamiton ang imong kaisog, dili magpalabi-labi” sa mga panag-istoryahanay bahin sa ebanghelyo (Alma 38:12). Pahibaloa ang mga estudyante nga adunay piho nga mga butang nga atong mahimo aron nga kita magmaisogon sa tukmang paagi ug malikayan ang pagkahimong maulawon apan usab malikayan ang mga laang nga mahimong mapalabi-labihon. Ipakita ug basaha og kusog ang mosunod nga mga pasidaan:

• Kita magpalabi og angkon kon mopatuo sa kahibalo nga lapas sa unsay gipadayag sa Ginoo pinaagi sa mga propeta sa karaan ug bag-ong panahon. Kita alang-alangan ang pag-angkon kon kita mopresentar sa ebanghelyo sa paagi nga dili klaro, pangagpas, o dili piho.

• Kita mahimong mapugsanon kon kita mopahayag sa atong mga opinyon nga daw kini dili malalis nga mga kamatuoran ug matugtanon sa kawalay piho kon walay klaro nga mga tubag. Kita mahadlokon kon mapakyas kita sa pagbarog sa unsay atong nahibaloan nga tinuod.

• Kon kita wala masayod sa tubag sa usa ka pangutana, ang labing maayong tubag mao ang yanong pagsulti sama sa, “Dili ko sigurado,” “Wala ko masayod,” o “Nindot nga pangutana; magdungan kita sa pagkat-on og dugang kabahin niana.”

Modelo

Rebyoha ang unang duha ka kolum sa mosunod nga tsart uban sa mga estudyante aron matabangan sila nga makakita sa mga problema sa pagpalabi og angkon, alang-alang sa pag-angkon, ug pagkamapugsanon o pagkamahadlokon. Dayon gamita ang “Reframe” nga kolum aron sa pagpakita kon sa unsang paagi nga kita lagmit makahimo og orihinal nga maisogon nga pamahayag apan dili magpalabi-labi.

Pamahayag	Problema	Pag-usab [Reframe]
Pamahayag Ang mga lider sa Simbahan adunay balaan nga awtoridad, ug bisan unsa ang ilang gisulti mao ang opisyal nga doktrina sa Simbahan.	Problema Ang porsiyon nga gi-italicize nga mosunod mao ang usa ka ehemplo sa pagpalabi og angkon: “Ang mga lider sa Simbahan adunay balaan nga awtoridad, ug bisan unsa ang ilang gisulti mao ang opisyal nga doktrina sa Simbahan.” Kon kita magpalabi og angkon, makamugna kita og dili tinuod nga mga gilauman sa atong kaugalingon ug sa uban.	Pag-usab [Reframe] Ang mga lider sa Simbahan adunay balaan nga awtoridad, ug kon sila mamulong ubos sa impluwensiya sa Espiritu Santo, kita masayod sa hunahuna ug kabubut-on sa Ginoo (tan-awa sa Doktrina ug mga Pakigsaad 68:3–4; 2 Pedro 1:21). Hinoon, dili tanang butang nga gisulti sa nangagi ug sa bag-ong mga lider sa Simbahan ang giisip nga “opisyal nga doktrina” alang sa Simbahan. Ang atong doktrina dili limitado ngadto sa ubang dili klaro o talagsa ra nga mga pamahayag. Hinoon, ang doktrina sa Simbahan gitudlo kasagaran sa tanang sakop sa Unang Kapangulohan ug sa Korum sa Napulog Duha ka mga Apostoles (tan-awa sa “How can I know if something I hear is ‘official doctrine’?,” New Era, Peb. 2017, 41).
Pamahayag Ang mga pagtulon-an sa Simbahan kabahin sa kaminyoon ingon og karaan na. Tingali ugma damlag ang mga lider sa Simbahan moduyog sa katilingban ug moaprobar sa kaminyoon sa managsamang sekso.	Problema Kini nga pamahayag alang-alang sa pag-angkon pinaagi sa pagtagad sa doktrina sa kaminyoon isip probisyonal o ubos sa pag-usab sa katilingban.	Pag-usab [Reframe] Ako moila nga adunay daghang kausaban sa atong katilingban sa kasamtangan nga mga katuigan nga may kalabotan sa kaminyoon ug pamilya. Ako mapasalamaton nga ang Unang Kapangulohan ug ang Korum sa Napulog Duha ka mga Apostoles mihatag kanato og klaro nga direksiyon sa dihang sila miingon, “Ang kaminyoon tali sa usa ka lalaki ug usa ka babaye gi-orden sa Dios” (“Ang Pamilya: Usa ka Pamahayag ngadto sa Kalibotan,” ChurchofJesusChrist.org).
Pamahayag Ang Ebolusyon dili tinuod. Ang Simbahan nagsupak niini. Ang tawo nga motuo diha sa ebolusyon dili gayod motuo nga ang Dios mao ang Tiglalang.	Problema Kini nga pamahayag nagpalabi sa pag-angkon tungod kay ang Ginoo wala pa mipadayag sa detalye kon giunsa Niya sa paglalang ang tanang butang, busa wala kita masayod kon o sa unsang mga aspeto sa teyoriya sa ebolusyon ang mahiuyon sa Paglalang. Tungod niini nga rason, ang Simbahan wala mohimo og opisyal nga posisyon kalabot sa teyoriya sa ebolusyon (tan-awa sa “What Does the Church Believe about Evolution?,” New Era, Okt. 2016, 41). Kini usab mapugsanon tungod kay kini misalikway sa usa ka siyentipikanhong pangutana nga walay bisan unsang katarongan.	Pag-usab [Reframe] Ako adunay pipila ka pangutana kabahin sa ebolusyon mismo. Gikan sa unsay akong ikasulti, ang Simbahan wala mohimo og usa ka opisyal nga posisyon kabahin niining hilisgotan. Ako walay nahibaloan nga bisan unsang pinadayag kabahin sa ebolusyon sa binuhat. Unsay akong nakat-onan gikan sa akong pagtuon mao nga ang Dios mao ang Tiglalang sa yuta, ug Siya milalang kang Adan ug Eva diha sa Iyang kaugalingong panagway (tan-awa sa mga Hilisgotan, “Creation,” ChurchofJesusChrist.org).
Pamahayag Oo, Ako nasayod nga ang Basahon ni Mormon tinuod. Kini adunay pipila ka maayong mga pagtulon-an. Apan ang tanan adunay ilang kaugalingong mga kamatuoran. Mao nga ako dili mosulti nga kini mas bililhon kay sa bisan unsa pang laing libro nga inyong mabasa.	Problema Kini nga pamahayag alang-alang sa pag-angkon sa kaimportante ug sa gahom sa Basahon ni Mormon. Kini nagpresentar sa Basahon ni Mormon sa maulawon nga paagi.	Pag-usab [Reframe] Oo, Ako nasayod nga ang Basahon ni Mormon tinuod. Ako nagtuo niini nga mao ang pulong sa Dios. Uban sa Biblia, kini mao ang usa ka gamhanang saksi ni Jesukristo. Nagtudlo kini og mahangturon nga mga kamatuoran nga makapausab sa inyong kinabuhi.

Paggamit

Hatagi ang mga estudyante sa mosunod nga handout, ug dapita sila sa pagkompleto sa tsart. Mahimo nimong hangyuon ang mga estudyante nga magbuhat uban sa usa ka kauban o diha sa ginagmay nga mga grupo.

Pag-usab sa mga Pamahayag aron sa Paglikay sa Pagpalabi og angkon, Alang-alang sa Pag-angkon, Mapugsanon, o Maulawon

Pagtubag sa Akong mga Pangutana sa Ebanghelyo—Mubo nga Pagbansay 9: Unsaon nga Magmaisogon apan Dili Magpalabi Kon Maghisgot sa Ebanghelyo

Pamahayag	Problema	Pag-usab [Reframe]
Si bisan kinsa nga nakabuhat sa usa ka pagpakuha [abortion] sad-an sa pagpatay. Sila dili gayod makaadto sa celestial nga gingharian.
Ang balaod sa kaputli ingon og hilabihan kaayo. Wala gayoy usa ka tawo nga nagsunod niini. Sigurado ko nga kon ikaw nahigugma gayod sa usa ka tawo, OK ra kini sa Dios kon kamo makighilawas.
Ang gidaghanon sa mga tawo nga imong mabunyagan sa imong misyon matino pinaagi sa imong hugot nga pagtuo. Magkadako ang imong kamatinud-anon, mas daghan ang imong bunyag.
Kon ikaw mopasakop sa Simbahan ug mosunod sa ebanghelyo, ang imong kinabuhi mamahimong sayon ug ikaw makabaton og diyutay nga mga hagit.

© 2022 by Intellectual Reserve, Inc. All rights reserved.

Pag-usab sa mga Pamahayag aron sa Paglikay sa Pagpalabi og angkon, Alang-alang sa Pag-angkon, Mapugsanon, o Maulawon

Kon aduna pay oras, hatagi ang mga estudyante sa oportunidad sa pagpaambit kon unsa ang ilang nakat-onan o sa pagpangutana.