Leksiyon 3

Pagpangutana nga may Hugot nga Pagtuo diha ni Jesukristo

Ang mga estudyante adunay daghang pangutana. Ang pipila ka pangutana direkta, ang pipila mahitungod sa sensitibo nga mga hilisgotan, ug ang uban nagpaila og kawalay katin-awan ug kakomplikado. Ang ubang mga estudyante tingali mabalaka sa pagpangutana o tingali dili segurado kon unsaon sa pagpamulong niini. Niini nga leksiyon ang mga estudyante maghisgot sa kaimportante sa pagpangutana, mohunahuna kon unsaon sa pagtubag sa kawalay katin-awan, ug magbansay sa pagpresentar sa mga pangutana gikan sa usa ka panglantaw sa hugot nga pagtuo diha ni Jesukristo.

Mga Sugyot alang sa Pagtudlo

Pagpalambo sa Atong Pagtudlo ug Pagkat-on

Tutok diha sa Manluluwas. Bisan unsa nga doktrinal, sosyal, o makasaysayanon nga mga pangutana ang gusto nga hisgotan sa imong mga estudyante niini nga kurso, awhaga sila sa pagpamalandong kon sa unsang paagi ang mga hilisgotan nga ilang gipili may kalabotan sa Manluluwas ug sa Iyang ebanghelyo. Tabangi sila sa pagpresentar sa ilang panaghisgotan gikan sa usa ka panglantaw sa hugot nga pagtuo diha ni Jesukristo. Si Chad H. Webb, tigdumala sa Seminaries and Institutes of Religion, miingon, “Akong nasabtan ug gituohan nga ang labing importanting paagi nga makatabang kita sa pagpalambo sa [hugot nga] pagtuo sa nagtubo nga henerasyon mao ang hingpit nga pagbutang ni Jesukristo diha sa sentro sa atong pagtudlo ug pagkat-on pinaagi sa pagtabang sa atong mga estudyante sa pagduol aron makaila Kaniya, sa pagkat-on gikan Kaniya, ug sa pagpaningkamot og maayo nga mahimong sama Kaniya” (“Kami Naghisgot kang Kristo, Kami Nalipay diha kang Kristo” [pakigpulong nga gihatag sa tinuig nga sibya sa pagbansay sa Seminaries and Institutes of Religion, Hunyo 12, 2018], ChurchofJesusChrist.org).

Pagpalambo sa pagkat-on ug panaghisgot nga mga kahanas gamit ang mubo nga mga pagbansay [microtrainings]

Kining mubo nga mga pagbansay motugot sa mga estudyante nga magkat-on ug magbansay sa mga kahanas nga ilang magamit aron mas epektibong makat-on sa ebanghelyo ug maghisgot sa kasamtangang mga hilisgotan nga may kalabotan sa Simbahan.

Ang mga magtutudlo kinahanglang mopili sa mubo nga mga pagbansay nga ilang gibati nga labing makahuloganon ug tukma alang sa ilang mga estudyante. Ang mga magtutudlo motino kon unsa kasagad mahitabo kini nga mga pagbansay. Ang mga pagbansay nahimutang sa apendiks A. Gihimo ang matag pagbansay nga molungtad og mga 15 minutos.

Ipasabot ngadto sa mga estudyante nga atol niini nga kurso sila adunay oportunidad sa pag-apil diha sa mubo nga mga pagbansay aron motabang kanila sa pagpalambo sa ilang abilidad sa pagkat-on mahitungod ug paghisgot sa mga hilisgotan nga may kalabotan sa doktrina, mga pagtulon-an, mga palisiya, ug kasaysayan sa Simbahan. Pagpili og usa ka kahanas gikan sa mubo nga mga pagbansay, ug kompletoha ang pagbansay uban sa imong mga estudyante.

Pagpangutana nga may hugot nga pagtuo

Sultihi ang mga estudyante nga karon imong sutaon ang tahas sa mga pangutana sa pagkat-on sa ebanghelyo. Ipakita ang mosunod nga mga pamahayag, ug ipakonsiderar sa mga estudyante kon unsaon nila sa pagtubag sa matag usa gamit ang usa sa mosunod nga mga tubag: (1) supak kaayo, (2) supak, (3) dili uyon ni dili usab supak, (4) uyon, o (5) uyon kaayo. Pahibaloa ang mga estudyante nga kini nga mga pamahayag mao ang basehan alang sa grupo nga mga panaghisgot nga mosunod niini nga kalihokan.

1. Dili angay nga mangutana kabahin sa doktrina, mga pagtulon-an, mga palisiya, ug kasaysayan sa Simbahan.

2. Kanunay nga adunay yano ug direkta nga mga tubag sa mga pangutana mahitungod sa doktrina, mga pagtulon-an, mga palisiya, ug kasaysayan sa Simbahan.

3. Ang pagtuo o kawalay pagtuo sa Dios dili makaapekto kon sa unsang paagi atong gilantaw ang mga pangutana mahitungod sa kahulogan sa moralidad ug katuyoan sa kinabuhi.

Papormaha ang mga estudyante og gagmay nga mga grupo base sa pamahayag nga labing gusto nila nga hisgotan. (Seguroha nga mahisgotan ang tanang pamahayag.) Hatagi ang matag grupo sa may kalabotan nga handout. Dapita sila nga maghisgot base sa materyal ug mga pangutana diha sa handout.

Pamahayag 1: Dili angay nga mangutana kabahin sa doktrina, mga pagtulon-an, mga palisiya, ug kasaysayan sa Simbahan.

Pagtubag sa Akong Mga Pangutana sa Ebanghelyo—Leksiyon 3

Isip usa ka grupo, hisgoti ang katukma sa pamahayag 1. Basaha ang Joseph Smith—Kasaysayan 1:10–13, ug hisgoti kon sa unsang paagi ang pagpangutana nakausab sa kinabuhi ni Joseph Smith. Dayon basaha ang mosunod nga mga pamahayag sa mga lider sa Simbahan:

Ang pagpangutana mao ang sinugdanan sa pagpamatuod. Ang uban tingali mobati og kaulaw o nga dili takos tungod kay aduna silay seryoso nga mga pangutana mahitungod sa ebanghelyo, apan dili sila kinahanglan nga mobati sa ingon. Ang pagpangutana dili timailhan sa kahuyang; kini ang mag-una sa paglambo.

Ang Dios nagsugo kanato nga magtinguha sa mga tubag sa atong mga pangutana ug naghangyo lamang nga magtinguha kita nga “kinasingkasing, uban sa tinuod nga katuyoan, nga may hugot nga pagtuo kang Kristo” [Moroni 10:4]. Kon mobuhat kita niini, ang kamatuoran sa tanang butang mapakita ngari kanato “pinaagi sa gahom sa Espiritu Santo” [Moroni 10:5].

Ayaw kahadlok; pangutana. Pagmahimong kuryoso, apan ayaw pagduhaduha! Kanunay nga maghupot og maayo sa hugot nga pagtuo ug sa kahayag nga inyo nang nadawat. (“President Dieter F. Uchtdorf: The Reflection in the Water,” Church News, Nob. 1, 2009, thechurchnews.com)

Ipaabot ang inyong mga pangutana ngadto sa Ginoo ug sa ubang katuohan nga mga kapanguhaan. Magtuon dala ang tinguha nga motuo kay sa maglaom nga imong makit-an ang sipyat sa kinabuhi sa propeta o sayop sa mga kasulatan. Hunonga ang pagdugang sa inyong mga pagduhaduha pinaagi sa paghisgot niini ngadto sa ubang mga maduhaduhaon. Tugoti ang Ginoo nga mogiya kaninyo sa inyong panaw sa espirituhanong panimpalad. (Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 103)

Adunay nag-una nga mga pangutana ug adunay ikaduha nga mga pangutana. Tubaga og una ang nag-una nga mga pangutana. Dili tanang pangutana managsama ug dili tanang kamatuoran managsama. Ang nag-una nga mga pangutana mao ang labing importante. Ang tanan nga uban mas menos. Adunay pipila lamang ka nag-una nga pangutana. Akong hisgotan ang upat niini.

1. Aduna bay usa ka Dios kinsa mao ang atong Amahan?

2. Si Jesukristo ba mao ang Anak sa Dios, ang Manluluwas sa kalibotan?

3. Si Joseph Smith usa ba ka propeta?

4. Ang Simbahan ni Jesukristo sa mga Santos sa Ulahing mga Adlaw mao ba ang gingharian sa Dios dinhi sa yuta?

Sa sukwahi, ang ikaduha nga mga pangutana walay kataposan. …

Kon tubagon ninyo ang nag-unang mga pangutana, ang ikaduhang mga pangutana matubag usab, o dili na kaayo kini importante ug kamo makahisgot sa mga butang nga inyong nasabtan ug sa mga butang nga wala ninyo masabti ug sa mga butang nga inyong giuyonan ug sa mga butang nga wala ninyo mauyoni nga dili mobiya sa hugot nga pagtuo. (Lawrence E. Corbridge, “Stand Forever” [debosyonal sa Brigham Young University, Ene. 22, 2019], speeches.byu.edu)

Hisgoti ang mosunod nga mga pangutana:

• Unsa ang bation sa Ginoo mahitungod sa atong pagpangutana? Unsa ang atong madawat gikan sa Ginoo kon mangutana kita Kaniya sa atong mga pangutana?

• Unsa ang kalainan tali sa pagpangutana nga may hugot nga pagtuo ug sa pagpangutana nga may pagduhaduha? (Aron mas mahisgotan pa og maayo, mahimo ninyong basahon ang Alma 22:4–12 isip usa ka ehemplo sa pagpangutana nga may hugot nga pagtuo ug ang Alma 11:21–22, 26–35 isip usa ka ehemplo sa pagpangutana nga may pagduhaduha.)

• Ngano kahang mas importante nga ilhon ang kalainan tali sa nag-una ug ikaduha nga mga pangutana? Unsa kaha ang mahitabo kon ibaliwala nato ang nag-una nga mga pangutana ug motutok lamang sa ikaduha nga mga pangutana?

• Sa unsa nga mga paagi nga ang pagpaabot sa inyong mga pangutana ngadto sa Ginoo ug ngadto sa ubang matinud-anon nga mga indibidwal ug sa makapalig-on nga mga tinubdan miugmad og pagkat-on ug paglambo sa inyong kinabuhi?

Base sa unsay inyong nakat-onan atol niini nga panaghisgotan, irekord ang usa ka giusab nga bersiyon sa pamahayag 1. Pangandam sa pagpakigbahin sa inyong giusab nga pamahayag ug sa unsay inyong nakat-onan ngadto sa inyong klase.

© 2022 by Intellectual Reserve, Inc. All rights reserved.

Pamahayag 1: Dili angay nga mangutana kabahin sa doktrina, mga pagtulon-an, mga palisiya, ug kasaysayan sa Simbahan.

Pamahayag 2: Kanunay nga adunay yano ug direkta nga mga tubag sa mga pangutana mahitungod sa doktrina, mga pagtulon-an, mga palisiya, ug kasaysayan sa Simbahan.

Pagtubag sa Akong Mga Pangutana sa Ebanghelyo—Leksiyon 3

Isip usa ka grupo, hisgoti ang katukma sa pamahayag 2. Basaha ang 1 Nephi 11:14–17, ug hisgoti ang kamahinungdanon sa tubag ni Nephi ngadto sa pangutana sa Espiritu. Dayon basaha ang mosunod nga mga pamahayag:

Ang sukaranan nga mga pagtulon-an sa gipahiuli nga ebanghelyo gamhanan, klaro, ug dili kadudahan. Apan, bisan ang mga kasulatan adunay pagkadili tin-aw. Hunahunaa, sama pananglit, ang istorya ni Nephi, kinsa gisugo sa pagpatay kang Laban aron makuha ang usa ka importante kaayo nga espirituhanon nga rekord. Kana nga sitwasyon puno sa kawalay kasegurohan. …

Mao nga ang kinabuhi puno sa kawalay katin-awan ug ang pagkat-on sa pagsagubang sa gintang tali sa ideyal ug sa tinuod mao ang usa ka katuyoan sa mortal nga plano. Pinaagi sa balaanon nga plano, kitang tanan mag-atubang og “katugbang sa tanan nga mga butang” (2 Nephi 2:11). …

… Ang abilidad nga makaila sa kawalay katin-awan, usa ka importante nga lakang sa atong espirituhanon nga paglambo, dili usa ka kataposan nga matang sa paglamdag—kini lamang ang sinugdanan. …

Ang labing maayong tubag sa gintang tali sa [kasegurohan ug] kawalay kasegurohan mao ang pagpadayon sa paglambo. …

Kon kita makasugat sa unang mga sorpresa sa kakomplikado, kinahanglan natong atimanon ang miturok nga binhi sa hugot nga pagtuo uban ang dakong pakabana, aron kon init kaayo ang adlaw, ang linghod nga tanom dili mamatay. (Bruce C. Hafen ug Marie K. Hafen, Faith Is Not Blind [2018], 9–10, 13–14, 18)

Ang pagkat-on pinaagi sa hugot nga pagtuo sama kaimportante sa pagkat-on pinaagi sa pagtuon, tungod kay adunay ubang mga butang nga dili nato makat-onan gikan sa usa ka libro.

Si Elder Dallin H. Oaks mihatag og gibug-aton niini nga kamatuoran: “[H]uman [sa atong tanang] mamantala, usahay ang atong mga miyembro dunay importanting mga pangutana nga dili masulbad pinaagi sa pagtuon. … Ang ubang butang makat-onan lamang pinaagi sa hugot nga pagtuo [tan-awa sa Doktrina ug mga Pakigsaad 88:118]. Ang saligan gyod nato sa tanan mao ang atong hugot nga pagtuo sa saksi nga atong nadawat gikan sa Espiritu Santo” [“Oposisyon sa Tanang mga Butang,” Liahona, Mayo 2016, 117]. …

… Kon motumaw ang mga pangutana … kini dili timailhan nga kamo walay pagpamatuod o nga ang ebanghelyo dili tinuod. Kini usa ka pagdapit alang kaninyo aron molambo sa espirituhanon nga paagi. …

… Ang mga pangutana, ilabi na ang mga lisod, motabang kanato sa pagsinati og espirituhanon nga pakigbisog aron ang Ginoo makagiya kanato diha sa dalan sa pakigsaad. …

Ang paglambo sa espirituhanon nga paagi ug ang pagdawat og mga tubag sa atong mga pangutana nagdepende sa atong abilidad nga mobati, maminaw, ug mosabot sa mga paghunghong sa Espiritu. Bililhon ang pagsinati og espirituhanon nga pagkigbisog aron makakat-on sa pagdawat og personal nga pagpadayag, tungod masayod lamang kita sa unsay tinuod kon ang Espiritu mopamatuod sa atong mga kasingkasing ug mga hunahuna sama nga ang Espiritu Santo lamang ang makabuhat. (Sheri Dew, “Will You Engage in the Wrestle?” [Debosyonal sa Brigham Young University–Idaho, Mayo 17, 2016], byui.edu)

Hisgoti ang mosunod nga mga pangutana:

• Ngano man nga importante nga makaamgo nga mahimong adunay kawalay katin-awan, kawalay kasegurohan, ug kakomplikado sa pipila sa atong mga pangutana bahin sa doktrina, mga pagtulon-an, mga palisiya, ug kasaysayan sa Simbahan?

• Sumala ni Elder ug Sister Hafen ug Sister Dew, unsa ang pipila ka mabungahon nga mga paagi sa pagtubag sa lisod nga mga pangutana sa ebanghelyo ug sa kinabuhi nga moresulta sa kawalay katin-awan o kakomplikado?

• Unsa ang labing nakatabang kaninyo nga magpabiling matinud-anon sa inyong hugot nga pagtuo kang Jesukristo ug sa Iyang ebanghelyo sa dihang nakasinati kamo og kawalay katin-awan, kawalay kasegurohan, ug kakomplikado?

Base sa unsay inyong nakat-onan atol niini nga panaghisgotan, irekord ang usa ka giusab nga bersiyon sa pamahayag 2. Pangandam sa pagpakigbahin sa inyong giusab nga pamahayag ug sa unsay inyong nakat-onan ngadto sa inyong klase.

© 2022 by Intellectual Reserve, Inc. All rights reserved.

Pamahayag 2: Kanunay nga adunay yano ug direkta nga mga tubag sa mga pangutana mahitungod sa doktrina, mga pagtulon-an, mga palisiya, ug kasaysayan sa Simbahan.

Pamahayag 3: Ang pagtuo o kawalay pagtuo sa Dios dili makaapekto kon sa unsang paagi atong gilantaw ang mga pangutana mahitungod sa kahulogan sa moralidad ug katuyoan sa kinabuhi.

Pagtubag sa Akong Mga Pangutana sa Ebanghelyo—Leksiyon 3

Isip usa ka grupo, hisgoti ang katukma sa pamahayag 3. Basaha ang Alma 30:12–18, ug hisgoti kon sa unsang paagi ang mga tinuohan ni Korihor nakaapekto sa iyang panglantaw sa moralidad ug sa katuyoan sa kinabuhi. Dayon basaha ang mosunod nga mga pamahayag:

Ang buhat sa pagtuo nagagikan sa kasingkasing sa nakakita. Ang Manluluwas miingon niadtong naglibot Kaniya, “Busa pamati kon may dalunggan kamo” (Lucas 8:8). …

Tanang upat ka mga anak nga lalaki ni Lehi natawo sa parehong buotan nga mga ginikanan. Ang kalainan tali sa mga tumutuo dili kaayo mahitungod sa unsay nahitabo kanila, apan sa ilang kinaiya ngadto sa unsay nahitabo. Ang kinaiya naggikan sulod sa ilang kaugalingon nga mga kasingkasing, nga ang matag usa naghimo sa iyang kaugalingon nga gawasnon nga pagpili nga magtuo—o dili. …

… Ang [Dios] dili makakontrol kon kita boluntaryo nga mopili sa pagtuo Kaniya, sa pagdawat Kaniya, sa pagtinguha Kaniya. Siya makatanyag lamang kanato sa Iyang kamot, ug kon kita mopili sa pagkuha niini, nan Siya makagiya kanato paingon ngadto sa bisan unsa nga talagsaon natong gikinahanglan alang [sa atong] kaugalingon nga paglambo. (Bruce C. Hafen ug Marie K. Hafen, Faith Is Not Blind [2018], 81, 88)

Usa ka gamhanan ug may impluwensiya nga modernong gidawat sa katilingban nga panghunahuna mao ang “moral nga pagkalahi-lahi,” ang ideya nga walay hingpit nga husto o sayop. Luyo sa mao nga ideya mao ang pagpakaingon nga walay Dios o, kon duna may Dios, nga siya wala mohatag og mga sugo nga magamit nato karon. …

Ang mga Santos sa Ulahing mga Adlaw dayag nga nagsugod sa lahi nga kapasikaran: adunay Dios kinsa mao ang tinubdan sa Mahangtoron nga Balaod, ug Siya mihatag og mga sugo nga nag-establisar sa husto ug sayop alang sa daghang pagpili. … Kita nagsupak sa moral nga pagkalahi-lahi, ug kinahanglan nato tabangan ang atong kabatan-onan nga makalikay nga malingla ug madani sa pagpangatarongan ug mga paghukom base sa sayop nga mga kapasikaran niini.

Asa kita mangita sa mga kapasikaran diin kita magsugod sa atong pagpangatarongan sa kamatuoran o sa pagtino kon madawat ba ang nagkalainlaing sugyot? Atong iangkla ang atong kaugalingon sa pulong sa Dios, sama nga nalangkob diha sa mga kasulatan ug diha sa mga pagtulon-an sa mga propeta sa modernong panahon. Gawas kon kita nakaangla niini nga mga kamatuoran isip ang atong importante nga mga kapasikaran ug mga pagpakaingon, dili kita makaseguro nga ang atong mga paghukom tinuod. (Dallin H. Oaks, “As He Thinketh in His Heart” [gabii uban sa usa ka General Authority, Peb. 8, 2013])

(Pahibalo: Ang usa ka kapasikaran mao ang sinugdanan o basehan alang sa inyong panglantaw. Ang usa ka pagpakaingon mao ang usa ka butang nga imong gipakaingon nga tinuod apan mahimong dili tinuod.)

Hisgoti ang mosunod nga mga pangutana:

• Ngano man nga atong mga kapasikaran (mga sinugdanan) mohimo og dako kaayo nga kalainan kon sa unsang paagi kita motubag og mga pangutana?

• Unsay kalainan nga mahimo kon kita mopresentar og pangutana nga inubanan sa pagtuo sa Dios isip atong nagpaluyo nga kapasikaran?

• Ngano man nga importante nga makasabot nga ang pagtuo sa Dios usa ka pagpili?

Base sa unsay inyong nakat-onan atol niini nga panaghisgotan, irekord ang usa ka giusab nga bersiyon sa pamahayag 3. Pangandam sa pagpakigbahin sa inyong giusab nga pamahayag ug sa unsay inyong nakat-onan ngadto sa inyong klase.

© 2022 by Intellectual Reserve, Inc. All rights reserved.

Pamahayag 3: Ang pagtuo o kawalay pagtuo sa Dios dili makaapekto kon sa unsang paagi atong gilantaw ang mga pangutana mahitungod sa kahulogan sa moralidad ug katuyoan sa kinabuhi.

Human sa dakong panahon alang sa panaghisgot sa grupo, mahimo kang modapit og usa ka estudyante gikan sa matag grupo aron sa pagsulat sa ilang giusab nga pamahayag diha sa pisara. Kini nga mga pamahayag mahimong susama sa mosunod nga mga ideya:

1. Kini tukma, ug tingali gani gikinahanglan sa atong espirituhanon nga paglambo, ang pagpangutana og dinasig sa hugot nga pagtuo nga mga pangutana kalabot sa doktrina, mga pagtulon-an, mga palisiya, ug kasaysayan sa Simbahan.

2. Dili kanunay nga adunay yano ug direkta nga mga tubag mahitungod sa doktrina, mga pagtulon-an, mga palisiya, ug kasaysayan sa Simbahan.

3. Ang pagtuo o kawalay pagtuo sa Dios makaapekto kon sa unsang paagi atong gilantaw ang mga pangutana mahitungod sa kahulogan sa moralidad ug katuyoan sa kinabuhi.

Hatagi ang mga estudyante og panahon sa pagpasabot sa ilang giusab nga mga pamahayag ug sa unsay ilang nakat-onan gikan sa ilang mga panaghisgot. Samtang ang mga estudyante mopaambit sa ilang mga panabot, ikonsiderar ang pagpangutana og follow-up nga mga pangutana nga makatabang kanila nga mas makasabot kon unsay kahulogan sa pagpangutana ug pagtubag sa mga pangutana nga may hugot nga pagtuo. Sama pananglit, mahimo nimong ipangutana ang usa o ang duha sa mosunod nga mga pangutana:

• Sa unsang paagi kini nga panabot makatabang kanato nga mas makasabot kon unsay kahulogan sa pagpangutana nga may hugot nga pagtuo?

• Kanus-a nga kini nga panabot nakatabang kaninyo sa dihang nagtinguha kamo og tubag alang sa usa sa inyong kaugalingon nga mga pangutana?

Pahinumdomi ang mga estudyante nga agig pagpangandam alang sa klase gidapit sila sa pagsulat og pangutana nga aduna sila mahitungod sa doktrina, mga pagtulon-an, mga palisiya, o kasaysayan sa Simbahan. Pangutana kon aduna bay bisan kinsa sa mga estudyante nga nausab ang paagi nga ilang gilantaw ang ilang pangutana tungod sa unsay ilang nakat-onan karon, ug dapita si bisan kinsa nga ganahan mopaambit sa ilang mga panabot.

Ikonsiderar ang pagtapos sa klase pinaagi sa imong kaugalingon nga kasinatian ug pagpamatuod gikan sa usa ka panglantaw sa hugot nga pagtuo kang Jesukristo.

Alang sa Sunod nga Higayon

Ipasabot nga atol sa sunod nga klase imong hisgotan ang balaanon nga gasa sa grasya. Awhaga ang mga estudyante sa paggahin og panahon atol sa semana sa pagsuta kon unsay ilang makat-onan mahitungod sa balaanon nga gasa sa grasya gikan sa Gospel Library.