Mubo nga Pagbansay 3

Unsaon Pagtimbangtimbang sa Pagkamasaligan sa mga Tinubdan

Pagpasabot

Ipakita ang mosunod nga pamahayag ni Presidente Dallin H. Oaks sa Unang Kapangulohan:

Nagpuyo kita sa panahon sa gipalapad ug gisabwag og maayo nga impormasyon. Apan dili tanan niini nga impormasyon tinuod. Kinahanglang magmatngon kita samtang mangita kita sa kamatuoran ug magpili og mga tinubdan niana nga pagsiksik. (Dallin H. Oaks, “Kamatuoran ug ang Plano,” Liahona, Nob. 2018, 25)

Modelo

Hatagi ang mga estudyante sa mosunod nga handout, ug hisgoti kon sa unsang paagi kining mga pangutana makatabang kanato sa pag-ila sa masaligan nga mga tinubdan.

Mga Pangutana alang sa Pagtimbangtimbang sa mga Tinubdan

Pagtubag sa Akong mga Pangutana sa Ebanghelyo—Mubo nga Pagbansay 3: Unsaon sa Pagtimbangtimbang ang Pagkamasaligan sa mga Tinubdan

1. Unsa ang mga kwalipikasyon, mga intensiyon, ug posibling mga pagpihig sa tagsulat?

   Si Presidente Dallin H. Oaks sa Unang Kapangulohan mitudlo nga “kinahanglang magmatngon usab kita mahitungod sa katuyoan sa tawo nga naghatag sa impormasyon. … Ang personal natong mga desisyon kinahanglang ibase sa impormasyon gikan sa mga tinubdan nga haom diha sa gihisgotan ug dili sa hinakog nga mga katuyoan” (Dallin H. Oaks, “Kamatuoran ug ang Plano,” Liahona, Nob. 2018, 25).

2. Unsa ka pamilyar ang tagsulat ngadto sa mga kalihokan nga gihulagway?

   Kon ang usa ka tinubdan naghisgot og butang gikan sa kasaysayan sa Simbahan, pangutan-a ang inyong kaugalingon unsa ka layo ang tinubdan gikan sa kalihokan nga gihisgotan niini. Ang mga istorya nga gibase sa mga tawo nga nakadungog lang niini nga mga istorya sa kasagaran dili kasaligan.

3. Gituyo ba sa tagsulat ang pagbaliwala sa anaa nga ebidensya aron sa pagpahisalaag?

   Ang pipila ka tagsulat motuyo nga dili iapil ang mahinungdanon nga mga kamatuoran ug ibaliwala ang importante nga ebidensya sa pagsuporta sa ilang piho nga punto sa panglantaw.

4. Ang mga pagtulon-an ug mga kalihokan ba nga gihisgotan niini nga tinubdan gipresentar sa tukma nga konteksto sa ilang panahon, dapit, ug sirkumstansya?

   Ang pipila ka mga pagtulon-an ug makasaysayanong mga panghitabo mogawas nga makalibog kon kini kuhaon gikan sa konteksto sa ilang panahon ug dapit. Ang makasaysayanong konteksto naglakip usab sa ubang mga kalihokan nga nahitabo nianang panahona (sama sa mga gubat, krisis sa ekonomiya, ug sosyal ug politikanhong mga kalihokan) ug sa kultura ug sa mga klase sa katawhan sa nahisgotang panahon ug sitwasyon.

5. Ang mga pagtulon-an ug mga panghitabo suportado ba sa dugang nga kasaligang mga tinubdan?

   Ang suporta gikan sa ubang kasaligang mga tinubdan makatabang sa pag-establisar sa katukma sa doktrina ug makasaysayanong mga panghitabo.

© 2022 by Intellectual Reserve, Inc. All rights reserved.

Mga Pangutana alang sa Pagtimbangtimbang sa mga Tinubdan

Paggamit

Sa dili pa ang klase makapili ka og usa ka ehemplo sa kasaligan nga tinubdan, wala gimantala sa Simbahan. Hatagi ang mga estudyante og pipila ka higayon sa pagtan-aw sa mga tinubdan ug sa paggamit sa mga baroganan diha sa handout Mga Pangutana sa Pagtimbang-timbang sa mga Tinubdan. Dapita sila sa pagpasabot kon unsa ang ilang pagtapos kabahin sa pagkamasaligan kabahin niining tinubdan.