Leksiyon 5

Pasiuna ngadto sa Tabang sa Kinabuhi: Pagpanalipod sa Atong Kaugalingon batok sa Pornograpiya

Kini nga leksiyon maghatag og modelo kon unsaon sa pagbaton og makahuloganon ug makapalig-on sa hugot nga pagtuo nga kasinatian pinaagi sa paggamit sa mga kapanguhaan gikan sa Tabang sa Kinabuhi nga seksiyon sa Gospel Library. Ang mga estudyante maghisgot kon unsaon sa pagpanalipod sa ilang kaugalingon gikan sa pornograpiya, usa ka binuhatan nga supak sa mga pagtulon-an sa Manluluwas ug usa ka malukpanon nga problema sa tibuok kalibotan. Ang mga estudyante adunay kahigayonan sa pagbansay sa mosunod nga sundanan samtang hisgotan nila kini nga hilisgotan: (1) hisgotan ang kamahinungdanon sa hilisgotan, (2) palawman ang pagsabot, (3) ipasabot og klaro, ug (4) pagpamalandong ug pagrekord.

Mga Sugyot alang sa Pagtudlo

Base sa mga panginahanglan sa mga estudyante, mahimo nimong sugdan ang klase gamit ang usa sa mosunod:

• Usa ka mubo nga pagbansay [microtraining] gikan sa apendiks A

• Usa ka “Unsay Bag-o?” nga panaghisgotan mahitungod sa mga balita gikan sa Newsroom (tan-awa sa handout 1 sa apendiks B)

• Usa ka panaghisgot mahitungod sa hilisgotan karon

Hisgotan ang Kamahinungdanon sa Hilisgotan

Ipaambit ang mosunod nga pamahayag sa usa ka lalaki nga ginganlan og Jason (ikaw adunay oportunidad sa pagpaambit og dugang niini nga istorya sa ulahing bahin sa klase):

“Ang akong pagkaadik sa pornograpiya nagsugod sa bata pa kaayo nga edad, sa dihang mga 11 anyos pa ako niadto. Gipaila kini kanako pinaagi sa usa ka sakop sa pamilya kinsa mopakita niini kanako sa matag higayon nga moadto ko sa iyang balay. Nagpadayon ko sa akong pagkaadik sulod sa daghang katuigan.”*

• Unsa ka sagad ang pornograpiya sa atong katilingban?

• Nganong kinahanglan nga mabalaka ang usa ka tawo mahitungod sa pornograpiya kon kini dili usa ka problema alang kanila?

• Sa unsa nga mga paagi ang pornograpiya makaapekto niadtong kinsa motan-aw niini ug niadtong ilang gihigugma?

Palawman ang Pagsabot

Dapita ang mga estudyante sa pag-adto sa Pornograpiya nga seksiyon diha sa Tabang sa Kinabuhi. Hatagi sila og panahon sa pagtuon ug sa pagsuhid sa mga kapanguhaan diha sa Pornograpiya nga seksiyon. Awhaga ang mga estudyante sa pagpili og subseksiyon nga labing makapainteres kanila: Tabang alang Kanako, Tabang alang sa mga Kapikas, Tabang alang sa mga Ginikanan, o Support and Resources [Suporta ug mga Kapanguhaan].

Dapita ang mga estudyante sa pagrebyo sa mosunod nga mga pangutana uban sa usa ka kauban o diha sa gagmay nga grupo ug dayon sa paghisgot sa mga pangutana nga labing nakapainteres ug mahinungdanon kanila:

• Unsay inyong nakat-onan mahitungod sa mga kapanguhaan bahin sa pornograpiya nga gihatag sa Simbahan? Unsay inyong nakit-an nga labing nakapadani kaninyo?

• Kini ba nga materyal nakaimpluwensiya sa inyong mga panghunahuna kon sa unsang paagi gitubag sa Simbahan ang pornograpiya? Kon mao, giunsa man?

• Sa unsang paagi kini nga materyal makapalig-on sa hugot nga pagtuo kang Jesukristo ug sa Iyang gipahiuli nga Simbahan?

• Sa unsang paagi kini nga materyal makatabang sa mga indibidwal, minyo nga mga magtiayon, o mga lider sa Simbahan?

• Samtang gitun-an ninyo kini nga materyal, unsa nga mga impresyon o mga panabot ang inyong nabatonan, ug sa unsang paagi kini nakaapekto kaninyo?

Ipasabot og Klaro

Buhata ang usa sa mga kalihokan nga makita diha sa mga handout 3–5 diha sa apendiks B, o pagplano og usa ka kalihokan nga imong kaugalingon.

Pagpamalandong ug Pagrekord

Hatagi ang mga estudyante og panahon nga mamalandong sa unsay ilang nakat-onan ug nabati karon. Mahimo nimong gamiton ang mga pangutana diha sa handout 6, “Pagpamalandong ug Pagrekord” (makita diha sa apendiks B), aron sa paggiya niini nga kalihokan.

Mahimo nimong ipaambit ang panapos sa istorya sa pagkaulian ni Jason aron sa pagtapos sa klase. Ang pagkaadik ni Jason milungtad og katuigan ug mimugna og daghang problema sa iyang kinabuhi, lakip sa duha ka nabungkag nga mga kaminyoon ug sa iyang pagka-disfellowship sa Simbahan tungod sa dili maayo nga mga pagpili nga iyang gihimo tungod sa iyang pagkaadik. Apan uban sa tabang ni Jesukristo, nahimo niyang nabuntog ang iyang pagkaadik. Misulat siya sa iyang kasinatian:

“Gibati nako nga haw-ang. Apan ang akong presidente sa branch nahiuyon kaayo sa Espiritu. Gihatag niya kanako ang giya sa Addiction Recovery Program [Programa aron Maulian gikan sa Pagkaadik] ug mipahayag og lig-on nga mga pagbati nga gikinahanglan nakong moadto sa ARP nga mga miting. Ang pag-adto sa unang miting lisod. Gibati nako nga nag-inusara ug nahadlok. Samtang nagdrayb milabay ko sa lokasyon sa miting sa pipila ka higayon sa wala pa ko mihukom nga mosulod.

“Sa dihang mitambong ko sa miting sa kataposan, nabati nako ang Espiritu alang sa unang higayon sulod sa dugay na nga panahon. Naamgohan nako nga mibati ko nga nag-inusara gayod tungod wala nako masinati ang sama niani nga kainit sa Espiritu sulod sa dugay na kaayo nga panahon. Mihukom ko nga gusto nakong mabalik ang Manluluwas sa akong kinabuhi. Nasayod ko nga mahimo kadto nga lisod nga panaw, apan usa ka panaw nga andam nakong buhaton tungod sa gugma nga akong nabati nianang una nga miting. Nakat-onan nako nga kinahanglan dili ko mahadlok sa pag-adto sa mga miting, apan kinahanglan kong mahadlok sa mga panalangin ug mga oportunidad nga dili nako maangkon tungod wala ko miadto. Diha sa mga miting, nabati lamang nako ang gugma ug pagdawat gikan niadtong kinsa nagsinati sa sama nga mga kalisod, ug misalig ako kanila alang sa kusog.

“Ang mga panghitabo nga misunod ug ang mga butang nga akong nasinati sukad makapahibulong kaayo nga lisod kining ipamulong. Ang uban misulti kanako nga kanunay na akong mahimong adik ug nga ako dili na maulian. Apan nabati nako ang makapalimpyo nga gahom sa Pag-ula, ug nasayod ako nga akong mabuntog kini nga pagkaadik.

“Ang akong pagkaadik mipugong kanako tungod kay wala ako mobati og maayo mahitungod sa akong kaugalingon, apan karon ako usa ka takos nga miyembro sa Simbahan, ang akong panarbaho milambo sa direksiyon nga kanunay nakong gipangandoy, naminyo na ako pag-usab, ug nakabaton sukad og matahom nga gamay nga batang babaye.”

Ikonsiderar ang pagpakigbahin sa imong pagpamatuod bahin sa gahom sa Manluluwas sa pag-ayo ug pagtabang kanato.

Alang sa Sunod nga Higayon

Ipaambit sa mga estudyante nga sa sunod nga klase maghisgot kita kon unsa ang gitudlo sa Topics [Mga Hilisgotan] nga seksiyon diha sa Gospel Library kabahin sa pagkalahi-lahi ug pagkahiusa diha sa Simbahan. Dapita ang mga estudyante sa paggahin og panahon atol sa semana aron sa pagsuhid niini nga kapanguhaan.

Mubo nga sulat

• Kini nga istorya gikuha gikan gayod sa Addiction Recovery Program [Programa aron Maulian gikan sa Pagkaadik] nga website.