Mubo nga Pagbansay 6

Unsaon sa Pagtudlo sa Kamatuoran sa Yano ug Klaro nga Paagi

Pagpasabot

Ipasabot nga ang pagtudlo sa kamatuoran sa yano ug klaro nga paagi usa ka gamhanan nga paagi sa pagtubag og mga pangutana ug mga kabalaka. Ipakita ug basaha ang mosunod nga pamahayag ni Presidente M. Russell Ballard sa Korum sa Napulog Duha ka Apostoles ug ni Presidente John Taylor:

Ang kasagarang hangyo nga atong madungog mao ang usa ka sayon kaayo nga butang nga sama niini: “Suginli ko og gamay bahin sa inyong Simbahan.” Ang importanteng pulong mao ang “gamay.” Wala sila moingon nga, “Suginli ako sa tanan nga imong nahibaloan unya pagpadala og lain aron mosugilon kanako sa tanan.” …

… Adunay dakong panginahanglan sa tin-aw, yano nga mga pulong nga ikahatag ngadto sa mga kuryuso sa mga unang pagtulun-an sa Simbahan sama niini karon. (M. Russell Ballard, “Hugot nga Pagtuo, Pamilya, mga Kamatuoran, ug mga Bunga,” Liahona, Nob. 2007, 25)

Tinuod kini nga salabotan alang sa usa ka tawo sa paghisgot og usa ka hilisgotan nga misteryoso ug mahinungdanon mismo ug sa pagbukas ug sa paghimo niining yano aron nga ang bata makasabot niini. (John Taylor, “Discourse,” Deseret News, Sept. 30, 1857, 238)

Modelo

Ipaambit sa mga estudyante ang mosunod nga mga ehemplo sa yano ug klaro nga mga pamahayag nga gihatag ni Presidente Ballard (tan-awa sa “Hugot nga Pagtuo, Pamilya, mga Kamatuoran, ug mga Bunga,” 26):

• Pagpahiuli: “Nagtuo kami nga ang orihinal nga simbahan nga giestablisar ni Jesus nawala ug napahiuli usab sa atong adlaw. Ang pagkapari, ang katungod nga gihatag ngadto sa tawo sa paglihok sa ngalan sa Dios, uban sa apostoles ug usa ka propeta sa paggiya kanato, gipahiuli na nga aduna sa tanan nga kinahanglanong mga ordinansa sa kaluwasan.”

• Kasulatan: “Nagtuo kami sa Basahon ni Mormon ug sa ubang mga basahon sa kasulatan nga nagsuporta ug nagmatuod sa Biblia ug nagpamatuod sa pagpangalagad ug pagkabalaan ni Kristo ug sa nagpadayon nga pagpadayag sa Dios ngadto sa tawo. Sa pagkatinuod, ang Basahon ni Mormon mao ang ‘Lain nga Tugon ni Jesukristo’”

• Unsay nakapadani kaninyo mahitungod niini nga mga ehemplo sa yano ug klaro nga mga pamahayag?

• Sa unsang paagi ninyo mapanalanginan ang uban pinaagi sa pagpalambo sa inyong abilidad sa pagpaambit og yano ug klaro nga mga pamahayag?

Paggamit

Ipakita ang mosunod nga mga pangutana. Dapita ang mga estudyante nga makigtambayayong sa usa ka kauban ug magpuli-puli sa pagtubag niini nga mga pangutana. Awhaga sila sa pagtubag sa matag pangutana sulod sa 30–60 ka segundo.

• Ang mga Santos sa Ulahing mga Adlaw nagtuo ba ni Jesus?

• Nganong gikinahanglan pa man nako ang Basahon ni Mormon kon ako adunay Biblia?

• Ang mga sakop sa inyong Simbahan nagbuhat ba og poligamiya?

• Nganong gikinahanglan man nako ang organisado nga relihiyon?

Aron sa pagtapos sa pagbansay, dapita ang usa o duha ka estudyante sa pagpaambit sa unsay ilang nakat-onan pinaagi niini nga kasinatian.