“Lesona 12: O Le Tolauapiga a Isaraelu,” Talafaasolopito o le Au Paia o Aso e Gata Ai: 1815–1846 Anomea a le Faiaoga (2018)
“Lesona 12,” Talafaasolopito o le Au Paia o Aso e Gata Ai: 1815–1846 Anomea a le Faiaoga
Lesona 12
O Le Tolauapiga a Isaraelu
Faatomuaga ma le Faasologa o Taimi
I le aso 24 Fepuari, 1834, na maua ai e Iosefa Samita se faaaliga mai le Alii na poloaiina ai o ia e faatulaga se vaega o tagata volenitia e fesoasoani i le Au Paia pagatia i Misuri (tagai MFF 103). O volenitia e silia ma le 200 na lauiloa o le Tolauapiga a Isaraelu (na ta’ua mulimuli ane o le Tolauapiga a Siona) ma sa savavali atu i le tusa ma le 900 maila e fesoasoani i le Au Paia i Misuri ia toe maua mai o latou fanua. Ina ua taunuu atu le tolauapiga i Misirui, sa faaali atu e le Alii ia Iosefa Samita e faapea, e le’i oo i le taimi mo le laveaiga o Siona, ma sa faamaape ai loa le tolauapiga (tagai MFF 105:9–11). Pe a ma le ono masina talu ona toe foi i Katelani, na faatulaga ai e Iosefa Samita le Korama a Aposetolo e Toasefululua ma le Korama a le Au Fitugafulu. E toavalu sui o le Toasefululua ma sui taitasi o le Au Fitugafulu sa savavali faatasi ma le Tolauapiga a Isaraelu.
24 Fepuari, 1834Na maua ai e Iosefa Samita se faaaliga e faatulaga le Tolauapiga a Isaraelu (tagai MFF 103).
Me–Iulai, 1834Sa taitai e Iosefa Samita le Tolauapiga a Isaraelu i la latou savaliga agai atu i Misirui.
22 Iuni, 1834.Sa faaali mai e le Alii, o le a le laveaiina Siona i lea taimi (tagai MFF 105), ma sa amata loa ona faamaape le Tolauapiga a Isaraelu.
Aokuso 1834Sa toe foi atu ai Iosefa Samita i Katelani, Ohaio.
14 Fepuari, 1835Sa faatulaga ai e Iosefa Samita le Korama a Aposetolo e Toasefululua.
28 Fepuari–1 Mati, 1835Sa faatulaga ai e Iosefa Samita le Korama a le Au Fitugafulu.
Faitauga a Tagata Aoga
Au Paia: O Le Tala o le Ekalesia a Iesu Keriso o le Au Paia i Aso e Gata Ai, Voluma 1, O Le Tagavai o le Upumoni, 1815–1846 (2018), mataupu 18–19
Fautuaga mo le Aoaoina Atu
Ua poloaiina e le Alii ia Iosefa Samita e faatulaga le Tolauapiga a Isaraelu
A o lei amataina le vasega, tusi le fesili lenei i luga o le laupapa: O a nisi o auala e ono valaaulia ai i tatou e auauna atu i le Alii i tulaga ia e ono le talafeagai pe faigata?
Fai i tagata aoga e faasoa mai a latou tali i lenei fesili. Tusi a latou tali i luga o le laupapa.
Valaaulia tagata aoga e vaavaai mo mataupu faavae ma aoaoga faavae i le lesona o le aso, e mafai ona fesoasoani ia i latou pe a valaaulia i latou e auauna atu i le Alii i tulaga e le talafeagai pe faigata.
Faaali le faafanua o Misuri o loo i ai [i le lesona].
Faamanatu atu i tagata aoga, i le tautoulu o le 1833, sa tutuliesea ai ma le saua le Au Paia o le Itumalo o Siakisone, Misuri mai o latou fanua ma fale, ma o le toatele sa maua se sulufaiga mo se taimi le tumau i le isi itu o le Vaitafe o Misuri i le Itumalo o Clay, Misuri.
Valaaulia se tagata aoga e faitau leotele le parakalafa lenei:
A o talosagaina e taitai o le Ekalesia ia taitai o le lotoifale ma le setete mo se fesoasoani, sa logoina i latou e faapea, sa manao le kovana o Misuri, o Tanielu Dunklin, e valaau atu i le fitafita a le setete e toe faafeao atu le Au Paia i o latou laueleele i le Itumalo o Siakisone. Ae peitai, o le a tatau i le Au Paia ona i ai ni o latou lava fitafita faaauupegaina e puipuia tagata o le EKalesia i le taimi e toe tuuina atu ai o latou fanua. I le aso 24 Fepuari, 1834, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 103, lea sa poloaiina ai o ia e le Alii e faatulaga ni volenitia e savavali atu e fesoasoani i le Au Paia pagatia i Misuri. E le’i umi se taimi na maua mai ai le faaaliga, ae malaga atu loa, Iosefa Samita, Sini Rikitone, Pale P. Palate, ma isi taitai o le Ekalesia i paranesi uma o le Ekalesia e su’e mai ni tagata [volenitia]. O nei volenitia na faatulaga ai le Tolauapiga a Isaraelu (lea sa ta’ua mulimuli ane o le Tolauapiga a Siona) ma sa fuafuaina e fesoasoani i le Au Paia i Misuri ia toe maua mai o latou fanua ma taofi ai nisi osofaiga faasaga ia i latou i le taimi na faamaape ai le fitafita a le setete. (Tagai The Joseph Smith Papers, Documents, Voluma 3: Fepuari 1833–Mati 1834, ed. Gerrit J. Dirkmaat ma isi [2014], 458–59; The Joseph Smith Papers, Documents, Voluma 4: Aperila 1834–Setema 1835, ed. Matthew C. Godfrey ma isi [2016], xix–xxi.)
Mata o a ni ou mafaufauga ma ni lagona e ono i ai pe ana faapea sa valaauina oe e auai i le Toagalauapi a Isaraelu? Aisea?
Fai i tagata aoga e su’e le mataupu 18 o le Au Paia: Voluma 1. Valaaulia ni nai tagata aoga e auauai e faitau leotele mai le itulau 197, amata i le parakalafa o loo amata i le “Ia Aperila 1834 …” ae faagata i le parakalafa o loo i le itulau 199 o loo amata i le “O le taimi lava sa faatasitasi ai …” Fai atu i le vasega e mulimuli i le faitauga, ma vaavaai mo mafuaaga sa faigata ai i nisi o le Au Paia ona auai i le Tolauapiga a Isaraelu.
O a ni auala na tofotofoina ai e le valaau e o i Misuri le faatuatua o nisi o le Au Paia?
Valaaulia se tagata aoga e faitau leotele le saunoaga lenei mai ia Peresitene Uilifoti Uitilafi (1807–98). Fai i le vasega e faalogologo pe aisea na talia ai e Peresitene Uilifoti Uitilafi le valaauia e auai i le Tolauapiga a Isaraelu.
Ata
Uilifoti Uitilafi talavou
“Sa valaauina a’u e ave lo’u ola i o’u lima ma ou alu i Misuri, ma sa o se vaega toaitiiti o i matou e laveai o matou uso. Sa mautinoa lava le tatau ona matou o i le faatuatua. Sa o mai o’u tuaoi ma augani mai e aua ou te alu, sa latou fai mai—‘Aua e te alu, afai e te alu o le a e oti ai.’ Sa ou fai atu ia i latou—‘Afai ou te iloa o le a i ai se pulufana e tuuina i lo’u fatu o le laa muamua lava ou te faia i le setete o Misuri o le a ou alu.’ … O lo’u lagona lena i na aso e uiga i le galuega a le Atua, ma o lo’u lagona lava foi lena i le aso. O loo o’u tulitulia le faaolataga ma le ola e faavavau, ma ou te le manao i se mea e tu i le va o a’u ma le mea o loo o’u tulitulimatagauina” (Wilford Woodruff, i le Journal of Discourses, 17:246; ua faalaugatasia le sipelaga).
O a ni mataupu faavae e mafai ona tatou aoaoina mai i lenei saunoaga mai ia Peresitene Uitilafi? (E mafai e tagata aoga ona faailoa mai se vaega o mataupu faavae, e aofia ai lenei: O le usitaia o valaaulia a le Alii e auauna atu ia te Ia e manaomia ai le faaaoga o o tatou faatuatua ia te Ia ma e fesoasoani tatou te agai atu ai i luma i le ola faavavau. Tusi le mataupu faavae lenei i luga o le laupapa.)
O a ni auala e manaomia ai ona faaaoga o tatou faatuatua i le Alii e ala i nei valaaulia e auauna atu ia te Ia?
Aisea e ono aoga ai le tagai i valaaulia a le Alii ia auauna atu ia te Ia o ni avanoa tatou te agai atu ai i le faaolataga ma le ola e faavavau?
Ua savavali atu le Tolauapiga a Isaraelu i Misuri.
Faaali atu le faafanua o loo i le lesona, “Auala o le Tolauapiga a Siona, 1834,” o le auala na uia e le Togalauapiga a Isaraelu.
Faamalamalama atu a o taitai atu e Iosefa Samita se vaega o volenitia mai Katelani, Ohaio, agai i Misuri, sa taitai atu e Ailama Samita ma Lyman Wight le isi vaega mai le Teritori o Michigan ma faatasi ai ma le vaega a le Perofeta i le aso 9 Iuni, 1834. O le tuufaatasiga, o le Tolauapiga a Isaraelu sa i ai le silia ma le 200 alii, sa i ai faatasi ma le pe a ma le 12 tamaitai ae 10 tamaiti. (Tagai The Joseph Smith Papers, Documents, Volume 4: February 1838–August 1839, xx.)
Valaaulia se tagata aoga e faitau leotele parakalafa nei e fa:
E toatele sui o le Tolauapiga a Siona sa naunau e auai i le malaga faapitoa ma sa lelei o latou manatu e uiga i le aafiaga. Peitai, sa fetaiai foi i latou ma le tele o faigata. Sa malaga le vaega i le silia ma le 900 maila i asaga gaoa. O le toatele sa savavali. Sa latou pagatia i le vevela, susu, timuga, palapala, gaui o meafaigaluega, mama’i, vae tiga ma tafetotoi, ma le leai o ni meaai ma ni vai. Sa ta’ua e se tasi o sui auai o Nathan Baldwin:
“I le sopoia o nei fanua tetele o laau, o nisi taimi sa matou pagatia ai i le manaomia o se vai; o le le masani ai i se atunuu faapea, sa matou le saunia ai mo lea tulaga. O nisi o taimi sa matou feinu ai i le sau na aoina mai le mutia e ala i le asu faananati o se ipu i le mutia, lea sa mamafa i suavai o le a toulu i totonu o le ipu ma, a vaimama, ua saunia mo le faaaogaina” (Nathan Bennett Baldwin, Account of Zion’s Camp, 1882, 11–12, Church History Library, Salt Lake City; ua faalaugatasia le sipelaga ma faailoga).
O Siaosi A. Samita o le sa 16 ona tausaga i le taimi sa savavali faatasi ai ma le Tolauapiga a Isaraelu, sa ia faamaumauina mulimuli ane:
Ata
Siaosi A. Samita
“Sa tele ina matou tigaina i le fiafeinu ma sa faamalosia i matou e inu vai mai ‘Autu [vaivai to’a] lea sa tumu i meaola ninii—o i sa ou aoaoina ai le vaimamaina o Mea Gai’oi’o [masalo o ni fua o namu] i o’u nifo” (Memoirs of George A. Smith, circa 1860–1882, 19–20, Church History Library, Salt Lake City; ua faalaugatasia le sipelaga).
Mata e faapei sau tali atu i nei tulaga, pe afai sa avea oe o se vaega o le Togalauapiga a Isaraelu?
Valaaulia se tagata aoga e faitau leotele le tala lenei a George A. Samita. Fai i le vasega e faalogologo mo ala na tali atu ai nisi o sui o le tolauapiga i tulaga o le savaliga.
Ata
Siaosi A. Samita
“Sa tauaveina e le Perofeta o Iosefa se vaega atoatoa o le tiga o le malaga atoa. E faaopoopo atu i le vaaiga o le tausiga o le Tolauapiga ma le pulefaamalumalu ai, sa savali o ia i le tele o le taimi ma sa mafoefoe o pa’u [o vae], tafetotoi, ma tiga vae, o se taunuuga masani lea o le savali mai le 25 i le 40 maila i le aso i se tauvevela o le tausaga. Ae i le taimi atoa o le malaga sa le’i tomumu lava o ia pe tuuina mai se faitioga, ao faitio atu ia te ia le toatele o alii o le Tolauapiga ona o le tiga o o latou tamaivae, mafoe o pa’u o vae, umi o le savaliga, utiuti o meaai, leaga o le tulaga o falaoa, leaga o falaoa saito, manogi leaga o pata, malosi o le hani, o fasi puaa ma sisi ua i ai ilo, ma isi mea faapena. E oo lava i se taifau e le ou atu i nisi o alii e tomumumu ai lava ia Iosefa. Afai latou te tolauapi ae leaga vai, e toetoe lava ona mafua ai se faatuiesega. Ae o i matou o le Tolauapiga a Siona, ma o le toatele o i matou sa le faia ni tatalo, le magafagafa, faatamala, le faalogo, valea, po o le tiapoloa, ae peitai sa matou lei iloa ia mea. Sa onosaia e Iosefa i matou ma aoao i matou e pei o ni tamaiti. E ui i lea, e toatele sa i ai i le Tolauapiga o e sa le’i muimui lava ma o e sa saunia i taimi uma ma le naunautai e faia e pei ona sa finagalo ai lo matou taitai” (Siaosi A. Iosefa Samita, i le Aoaoga a Peresitene o le Ekalesia: Iosefa Samit [2007], 287–88).
Aisea e te manatu na matua eseese ai le tali atu a sui o le tolauapiga i ia lava tulaga e tasi?
Faamalamalama atu, e faaopoopo atu i le oo i tulaga faigata i le malaga, o le toatele o sui o le Tolauapiga a Isaraelu sa faailoaina mai foi sa faatasi agelu a le Alii ma sa i ai o Ia faatasi ma i latou, ua faataunuu ai se folafolaga sa Ia tuuina mai i le faaaliga sa amatalia ai le savaliga umi (tagai MFF 103:20; Aoaoga: Iosefa Samita, 288–89).
Valaaulia se tagata aoga e faitau leotele le saunoaga lenei mai ia Peresitene Uilifoti Uitilafi:
Ata
Uilifoti Uitilafi
“E ui lava ina sa faaauau pea e o matou fili ona manavaina mai le taufaamata’u o le faatupu vevesi, sa matou le fefefe lava, pe sa matou tau faavaivai e faaauau la matou malaga, aua sa faatasi le Atua ma i matou, ma sa muamua atu Ana agelu ia i matou, ma sa le maluelue lava le faatuatua o si a matou vaega toaitiiti. Ua matou iloa sa avea agelu ma o matou paaga, aua sa matou vaai ia i latou” (Uilifoti Uitilafi, i le Aoaoga a Peresitene o le Ekalesia: Iosefa Samita [2007], 288–89).
E faavae i a outou faitauga o le mataupu 18 o le Au Paia: Voluma 1, o le a le tala faalotovaivai sa momoli atu e Pale P. Palate ma Orson Hyde i le Tolauapiga a Isaraelu ina ua latou taunuu i Misuri? (Sa la’ua logoina le Tolauapiga a Isaraelu, o le a le faatonuina e Kovana Tanielu Dunklin le fitafita a le setete e fesoasoani e toe faafoi atu le Au Paia i o latou laueleele.)
O le a le mea na tonu i le Tolauapiga a Isaraelu e fai ina ua faalogo i lenei tala? (Sa latou filifili e faaauau pea la latou malaga ma le faamoemoe e fesoasoani “i le Au Paia na faaaunuua i le Itumalo o Clay … e soalaupule se fetuunaiga ma tagata o le Itumalo o Siakisone” [Au Paia: Voluma 1, 203].)
Faaali atu le ata o loo i le lesona, ma faamalamalama atu, o le ata lea o le Vaitafe o Fagotaga i Misuri.
Fai i tagata aoga e su’e le mataupu 18 o le Au Paia: Voluma 1. Valaaulia ni nai tagata aoga e auauai e faitau leotele mai le itulau 203, amata i le parakalafa o loo amata i le “Sa tipi faalava atu le Tolauapiga a Isaraelu …” ae faagata i le parakalafa o loo i le itulau 204 o loo amata i le “Sa tumau le sua tetele o vaitafe …” Fai atu i le vasega e mulimuli i le faitauga, ma vaavaai mo faamaoniga o le puipuiga a le Atua i luga o le Tolauapiga a Isaraelu.
Nai lo o le faitau e uiga i le vavega i le Vaitafe o Fagotaga mai le Au Paia: Voluma 1, mafaufau e faaali atu le vitio “Tolauapiga a Siona” (18:43) mai le taimi faasolo 8:01 i le 13:04. O loo maua lenei vitio i le ChurchofJesusChrist.org.
O a auala na puipui ma faamanuia ai e le Atua le Tolauapiga a Isaraelu?
O a upumoni o mafai ona tatou aoao mai i aafiaga a sui o le Tolauapiga a Isaraelu? (E mafai ona faailoa mai e tagata aoga ni nai upumoni, e pei o lenei: A o tuu atu o tatou faatuatua i le Atua, e mafai ona ia laveaia i tatou mai faigata ma tulaga e le mautinoa. Afai tatou te faamaoni, e mafai ona tatou vaaia faamanuiaga a le Alii i taimi o o tatou tofotofoga.)
Ua faataape le Tolauapiga a Isaraelu
Faamatala atu, o le tolu o aso talu ona uma le matagi, i le aso 22 Iuni, 1834, sa faaali mai ai e le Alii ia Iosefa Samita e faapea, e “tatau … ona faatali … toeaina mo se vaitau itiiti mo le laveaiina o Siona” (MFF 105:9), e iloa ai, e le tatau i le Tolauapiga a Isaraelu ona faaauau i lana misiona sa fuafuaina o le fesoasoani i le Au Paia ia toe maua mai o latou fanua i le Itumalo o Siakisone. Sa oo mai le faaaliga ina ua musu Kovana Dunklin e tuuina mai le lagolago faafitafita mo le Au Paia ma na manino ai, o le a i ai taua ma le faamaligitoto pe afai e taumafai le Au Paia e ulu atu i le Itumalo o Siakisone. E le’i umi ona maua le faaaliga, ae amata lona ona faataape le Tolauapiga a Isaraelu.
Valaaulia se tagata aoga e faitau leotele le Mataupu Faavae ma Feagaiga 105:9–13, 18–19 . Fai i le vasega e mulimuli i le faitauga, vaavaai mo mea na fetalai mai ai le Alii e uiga i sui faamaoni o le Tolauapiga a Isaraelu. Fai atu i ni nai tagata aoga e lipoti mai i mea na latou mauaina.
Na ono mafai faapefea e le fuaiupu 19 ona fesoasoani i sui o le Tolauapiga a Isaraelu ia malamalama i faamoemoega a le Alii mo le malaga?
Faamalamalama atu, ina ua uma ona faalogo i le faaaliga, sa toatele sui o le tolauapiga sa taliaina o le afioga a le Alii, ae sa oo ina feita nisi ona latou te le’i maua le avanoa e tau ai. O Heber C. Kimball (1801–68), o se sui o le Tolauapiga a Isaraelu o le sa auauna mulimuli ane i le Korama a Aposetolo e Toasefululua ma le Au Peresitene Sili, sa ia faamaumauina e faapea, a o le’i ulu atu le tolauapiga i Misuri, sa lapataia ai i latou e le Perofeta o Iosefa Samita, “o le a i ai se mala e oo mai i luga o le tolauapiga o le taunuuga o agaga o vesiga ma le feupuaiga lea sa vaaia ia i latou, ma o le a latou feoti e pei o mamoe e pala; ae afai o le a latou salamo ma faamaualalo i latou lava i luma o le Alii, o le a faapea ona matuai liliu ese ai le mala” (i le Orson F. Whitney, Life of Heber C. Kimball [1888], 61–62).
O le lua o aso talu ona maua le faaaliga o loo faamaumauina i le Mataupu Faavae ma Feagaiga 105 , sa oo ai i le tolauapiga se faama’i o le kolera. O se taunuuga, e 68 tagata, na aofia ai le Perofeta o Iosefa Samita, sa tigaina ai i le faama’i, ae 13 sui o le tolauapiga ma isi Au Paia o Aso e Gata Ai e toalua o e sa nonofo i le Itumalo o Clay na maliliu ai (tagai Whitney, Life of Heber C. Kimball, 76; The Joseph Smith Papers, Documents, Voluma 4: Aperila 1834–Setema 1835, 72, note 334). Ina ua toe manuia sui na soifua pea o le tolauapiga, e oo ane ia Aokuso 1834 ua toe foi le toatele i o latou aiga.
Valaaulia se tagata aoga e faitau le saunoaga lenei a Elder David A. Bednar o le Korama a Aposetolo e Toasefululua.
Ata
David A. Bednar
“Ona o le le mafai ona toe foi le Au Paia i o latou laueleele i le Itumalo o Siakisone, na manatu ai nisi o le Tolauapiga a Siona o se taumafaiga e le’i manuia ma e le’i aoga. O se uso i Katelani—o se tasi sa leai se faatuatua e volenitia ai e o faatasi ma le tolauapiga—na feiloai ma Poliga Iaga i lona toe foi mai mai Misuri ma na fesili ai, ‘Ia, o le a la se mea na e maua mai lenei malaga e leai se aoga i Misuri faatasi ma Iosefa Samita?’ ‘O mea uma sa matou o ai,’ o le tali vave atu lea a Polika Iaga, ‘E le mafai ona ou faafesuia’ia le aafiaga na ou maua i lena malaga mo le tamaoaiga uma a le Itumalo o Geauga,’ o le itumalo lea sa i ai Katelani i le taimi lea [Brigham Young, i le B. H. Roberts, A Comprehensive History of the Church, 1:370–71]” (David A. Bednar, “I Le Itu a le Alii: O Lesona mai le Tolauapiga a Siona,” Ensign, Iulai 2017, 29).
Mata o le a le uiga o le faamatalaga a Polika Iaga ina ua ia tali atu na maua ai e le tolauapiga “mea uma sa matou o ai”? (Sa latou ausia le mea na finagalo ai le Alii mo i latou ia ausia.)
Valaaulia se tagata aoga e faitau leotele le saunoaga lenei mai ia Peresitene Uilifoti Uitilafi. Fai atu i le vasega e faalogologo mo lana saunoaga e uiga i lona aafiaga ma le Tolauapiga a Isaraelu.
Ata
Uilifoti Uitilafi
“Sa matou maua ai se poto masani semanu e le mafai ona matou mauaina i se isi lava ala. Na matou maua le avanoa e vaai ai i fofoga o le perofeta, ma sa matou maua le avanoa e malaga ai i ni maila e afe ma ia, ma vaai i galuega a le Agaga o le Atua ia te ia, ma faaaliga a Iesu Keriso ia te ia ma le faataunuuina o na faaaliga” (Wilford Woodruff, i le Aoaoga a Peresitene o le Ekalesia: Iosefa Samita [2007], 283).
Faamalamalama atu, i le aso 14 Fepuari, 1835, i ni nai masina talu ona toe foi sui o le tolauapiga i Ohaio, sa faatulaga ai e le Perofeta o Iosefa Samita le Korama a Aposetolo e Toasefululua. O le lua vaiaso mulimuli ane, sa ia faatulagaina ai le Korama a le Au Fitugafulu. Atonu e te manao e fai atu i tagata aoga pe mafai ona latou manatua ia igoa o i latou o e sa valaauina e auauna i le Korama a Aposetolo e Toasefululua (tagai Au Paia: Voluma 1, 215–16).
Valaaulia se tagata aoga e faitau le saunoaga lenei a Elder David A. Bednar. Fai atu i le vasega e mulimuli i le faitauga, ma vaavaai mo le matafaioi na faia i le savavali i le Tolauapiga a Isaraelu i le sauniaina o taitai fou na valaauina o le Ekalesia mo a latou auaunaga.
Ata
David A. Bednar
“O le mea e malie ai, e toavalu le usoga na valaauina i le Korama a Aposetolo e Toasefululua i le 1835, faapea foi ma le Au Fitugafulu uma na valaauina i lena lava taimi e tasi, o tagata sa i ai o le Tolauapiga a Siona. I se fonotaga ina ua mavae le valaauina o Fitugafulu, na tautino atu ai e le Perofeta o Iosefa Samita:
“‘Uso e, o nisi o outou ua feita ia te a’u, ona tou te lei tau i Misuri; ae sei ou ta’u atu ia te outou, sa le’i finagalo le Atua tou te tau. Sa le mafai ona Ia faatulagaina lona malo i ni tamalii e toasefululua e tatalaina faitotoa o le talalelei i atunuu o le lalolagi, ma i ni tamalii e toa fitusefulu i lalo o la latou taitaiga ia mulimuli i o latou tulagaaao, seiiloga na Ia aveina i latou mai se tino o alii o e na ofoina atu o latou ola, ma o e na faia se osigataulaga maoae e pei ona sa faia e Aperaamo’ [Joseph Smith, i le Joseph Young Sr., History of the Organization of the Seventies (1878), 14; tagai foi History of the Church, 2:182]. …
“O aafiaga na maua e volenitia i le autau a le Alii sa o se sauniuniga foi mo malaga tetele i le lumanai o tagata o le Ekalesia. Na silia ma le 20 tagata auai o le Tolauapiga a Siona na avea ma kapeteni ma lutena i malaga tetele e lua—o le muamua i le fa tausaga i le lumanai, e aofia ai le aveesea o le 8,000 i le 10,000 o tagata mai Misuri i Ilinoi; ae o le lona lua, o le 12 tausaga i le lumanai, o le malaga tele a sisifo pe tusa ma le 15,000 le Au Paia o Aso e Gata Ai mai Ilinoi i Sate Leki ma isi vanu o Mauga Papa. I le avea ai ma se aoaoga faamasani sauniuni, sa matuai taua ai le Tolauapiga a Siona i le Ekalesia” (David A. Bednar, “I Le Itu a le Alii: O Lesona mai le Tolauapiga a Siona,” Ensign, Iulai 2017, 30).
O le a le upumoni e mafai ona tatou aoao mai i le savaliga a le Tolauapiga a Siona e uiga i le ala e saunia ai i tatou e le Alii ia ausia ai Lana galuega? (E tatau i tagata aoga ona faailoa mai se mataupu faavae e talitutusa ma lenei: E tuuina mai e le Alii ia i tatou aafiaga e fesoasoani e saunia ai i tatou e ausia ai Lana galuega.)
Aisea e te manatu e taua ai ia i tatou ona malamalama i lenei upumoni?
Na faapefea ona e vaaia le saunia e le Alii o oe po o se isi e te iloa ia ausia ai Lana galuega?
Toe faamanatu upumoni sa talanoaina i lenei lesona. Valaaulia tagata aoga e tusi ia latou api talaaga mo suesuega, se mea o le a latou tautino e fai ona o mea ua latou aoaoina pe lagonaina i le vasega. Mafaufau e valaaulia ni nai tagata aoga e faasoa mai a latou tali i le vasega.
Valaaulia tagata aoga e sauni mo le vasega e sosoo ai e ala i le faitauina o mataupu 20–21 o le Au Paia: Voluma 1.