Lesona 27: Ua Lagolagoina le Korama a Aposetolo e Toasefululua e Taitaia le Ekalesia
“Lesona 27: Ua Lagolagoina le Korama a Aposetolo e Toasefulua e Taitaia le Ekalesia,” Talafaasolopito o le Au Paia o Aso e Gata Ai: 1815–1846 Anomea a le Faiaoga (2018)
“Lesona 27,” Talafaasolopito o le Au Paia o Aso e Gata Ai: 1815–1846 Anomea a le Faiaoga
Lesona 27
Ua Lagolagoina le Korama a Aposetolo e Toasefulua e Taitaia le Ekalesia
Faatomuaga ma le Faasologa o Taimi
I le taumafanafana o le 1844, sa faavauvau ai le Au Paia i Navu i le maliliu ai o Iosefa ma Ailama Samita. Ina ua uma ona latou iloa e uiga i le maliliu faamaturo, na amata loa ona toe malaga atu i Navu o Aposetolo ma isi o e sa auauna atu i misiona i le Iunaite Setete i sasae. O Sini Rikitone, o le sa alaala i le setete o Penisilivania e fesoasoani i le faamaopoopoina o taumafaiga a Iosefa Samita mo le palota o se sui tauva mo le tofi Peresitene, sa toe malaga atu foi i Navu. Na ia taunuu ia Aukuso 3, 1844, ma ofo atu e taitai le Ekalesia o “sē e leoleo” i le toesea ai o Iosefa. I se taimi e le’i umi mulimuli ane, sa toe foi atu nisi o uso o le Korama a Aposetolo e Toasefululua, ma ua faia fonotaga lea sa i ai uma Sini Rikitone ma Polika Iaga, o le peresitene o le Toasefululua, sa saunoa atu i laua uma i le Au Paia. A o saunoa Polika Iaga, sa faaalia le finagalo o le Alii, ma sa lagolagoina e le Au Paia le Korama a Aposetolo e Toasefululua e taitaia le Ekalesia.
Iuni 27, 1844Sa maliliu faamaturo Iosefa ma Ailama Samita i Karefasi, Ilinoi.
Aokuso 3, 1844Sa taunuu Sini Rikitone i Navu ma malele o ia e tatau ona avea ma leoleo i le Ekalesia.
Aokuso 6, 1844Sa taunuu Polika Iaga ma isi Aposetolo e toafa i Navu mai a latou misiona i le Iunaite Setete i sasa’e.
Aokuso 7, 1844Sa saunoa atu Polika Iaga ma Sini Rikitone i aufono a le Ekalesia e uiga i tulaga faaletaitaiga o le Ekalesia i le lumanai.
Aokuso 8, 1844E faitau afe ma afe le Au Paia i Navu na lagolagoina le Korama a Aposetolo e Toasefululua e taitaia le Ekalesia.
Faitauga a Tagata Aoga
Au Paia: O Le Tala o le Ekalesia a Iesu Keriso i Aso e Gata Ai, Voluma 1, O Le Tagavai o le Upumoni, 1815–1846 (2018), mataupu 45
Fautuaga mo le Aoaoina Atu
Ua faanoanoa tagata o le Ekalesia i le maliliu ai o Iosefa ma Ailama Samita, ma ua iloa e Polika Iaga e lei leiloa ki o le perisitua.
Faaali atu le vaega lea mai se tusiga sa lomia i le Weekly Herald, o se nusipepa a Niu Ioka, ia Iulai 13, 1844, ma valaaulia se tagata aoga e faitaua leotele:
“Sa matou mauaina ananafi mai le meli a sisifo faamatalaga nei i le maliliu o Joe Smith, le Perofeta ma lona uso o Hiram.
Na fanaina i la’ua uma. …
“Ua i’u ai ma le Lotu Mamona” (“Important from Nauvoo—Death of Joe and Hiram Smith—Terrible Excitement at the West,” Weekly Herald, July 13, 1844, 220–21).
Aisea e te mafaufau ai sa manatu nisi tagata o le a le faaauauina pea le Ekalesia i le mavae ai o le maliliu o Iosefa ma Ailama Samita?
Faamalamalama atu sa eseese lava le tali mai o tagata o le Ekalesia i le maliliu ai o Iosefa ma Ailama Samita. Valaaulia ni tagata aoga e feauauai i le faitauina leotele o tala nei e tolu. Fai atu i le vasega e faalogologo pe na faapefea ona tali atu nisi o tagata i le maliliu ai o Iosefa ma Ailama Samita.
Na tusi faamaumau e Lusi Maka Samita le mea na tupu i le mavae ai o le faafoi atu i Navu o tino o Iosefa ma Ailama:
Ata
Lusi Maka Samita
“Ina ua uma ona faamamā ma faaofuina tino maliu i laei e tanu ai na faatagaina ai i matou e vaai ia i la’ua. Sa ou taofiofi mo se taimi umi neuro uma, faaosofia malosiaga uma o lo’u agaga, ma valaau atu i le Atua e faamalosia a’u; ae ina ua ou ulu atu i le potu, ma vaaia tino maliu o o’u atalii ua taooto uma mai i luma o o’u mata; ma faalogoina masusu ma leo oi a lo’u aiga—le tagi atu ‘Tama! Tane! Uso!’ mai laugutu o o la ta’ito’alua, fanau, uso ma tuafafine, ua sili on tigā—na ‘ou gotouga i tua ma tagi atu i le Alii i le tigaina o lo’u agaga, ‘Lo’u Atua e! Lo’u Atua e! Se a ea le mea ua e tuulafoaia ai lenei aiga?’ Na tali mai se leo, “Ua Ou aveina i la’ua mo a’u lava ina ia o la maua le malologa.’ Na si’i atu Emma ma toe ave i lona potu i se tulaga ua toetoe lava leai ni faalogoga. Ua agai atu lana tamatama ulumatua i le tino maliu ma faapa’ū i ona tulivae, ma lago atu lona alafau i le alafau a lona tamā; ona kisi lea ia te ia, ma uio, ‘Aue, lo’u tamā!, lo’u tamā!’” (Lucy Mack Smith, “Lucy Mack Smith, History, 1845,” pages 312–13, josephsmithpapers.org; faalaugatasia faailoa).
Na tusia e Warren Foote, o se tagata o le Ekalesia e faapea:
Ata
Warren Foote
A o ma galulue ma Elihu Allen i le faatoaga e selesele saito o lana faatoaga i le pe a ma le tolu i le afiafina sau i fafo lo’u to’alua ma tau mai faato’a o’o mai lava le tala na fanaina Iosefa Samita ma lona Uso o Ailama i le Falepuipui o Karefasi i le aoauli ananafi. Sa ou fai atu loa, ‘e le mafai ona sa’o lena.’ … Sa matou lagonaina uma ua pei ua faatoilaloina e le mana o le pogisa ma ua tuulafoa’iina e le Alii Ona tagata. Ua leai la matou perofeta ma le peteriaka. O ai nei o le a taitaia le Au Paia?” (Warren Foote, Autobiography and journal, 1837 - 1903, 29, Faletusi o Talafaasolopito o le Ekalesia, Aai o Sate Leki; sipelaga ua laugatasia ).
O Aposetolo o Polika Iaga ma Uilifoti Uitilafi sa i Boston Massachusetts, i le aso o le maliu faamaturo. Na manatua e Uilifoti Uitilafi e faapea o ia ma Polika Iaga na aafia faatasi i se lagona e peiseai ua “faatoilaloina e se ao o le pogisa ma le faanoanoa,” e ui lava sa la le malamalama pe aisea seia oo i ni nai vaiaso mulimuli ane faato’a la iloa ai ua faasiotia Iosefa ma Ailama Samita. (Wilford Woodruff, “The Keys of the Kingdom,” Millennial Star, Sept. 2, 1889, 545).
Pe ana faapea sa e i ai faatasi ma le Au Paia muamua i lea taimi, o a ni mafaufauga ma lagona e te manatu e ono oo mai ia te oe i le mauaina o se tala ua fasiotia Iosefa ma Ailama Samita? Aisea?
Valaaulia se tagata aoga e faitau leotele le auala na tali atu ai Peresitene Polika Iaga (1801–77) ina ua ia maua le tala ua fasiotia le Perofeta:
Ata
Polika Iaga
“Ina ua ma maua lena tusi, sa ma i ai faatasi iina ma Orson Pratt ma ma faitauina ai le tusi. Sa ou lagonaina i lena taimi se faalogoga ou te lei mauaina i lou olaga. … Na ou lagonaina le matuā popole tele ma [‘ou] manatu ai ua tai ta’e lou ulu. … Ua aveesea ea le Perisitua mai le fogaeleele? Ua leai ia Iosefa ma Ailama. [Ona] o’o mai lea faapei o le pati o lima. Na o’o mai ia te a’u e pei o se Faaaliga—o ki o le malo o lo’o iinei” (Polika Iaga, i le Historian’s Office general Church minutes, Fep. 12, 1849, 2, Faletusi o Talafaasolopito o le Ekalesia, Aai o Sate Leki, sipelaga, faailoga, ma kalama ua faalaugatasia).
O le a le mea na avatua ia Polika Iaga le mafanafana ina ua ia iloa mulimuli ane ua maliu Iosefa Samita?
Faaali atu saunoaga nei mai le Perofeta o Iosefa Samita (1805–44) ma Peresitene Boyd K. Packer (1924–2015) o le Korama a Aposetolo e Toasefululua, ma valaaulia se tagata aoga e faitau leotele fuaitau taitasi. Fai atu i le vasega e mulimuli i le faitauga, ma vaavaai po o a mea na a’oa’o mai e le Perofeta ma Peresitene Packer e uiga i ki o le malo o le Atua. (A o le’i faitauina le saunoaga mai ia Iosefa Samita, faamalamalama atu e faapea na ia faia lenei saunoaga i uso o le Korama e Toasefululua i le tautotogo o le 1844,)
Ata
Iosefa Samita
“Uso e, ua finagalo le Alii ia te a’u ia faavave le galuega o loo tatou feagai ai. … O nisi o tulaga taua ua lata ona faataunuuina. Atonu o le a faasiotia a’u e o’u fili. Ma afai latou te faia, ae lei tuuina atu ia te outou ki ma mana o loo ia te a’u, o le a leiloloa i latou mai le lalolagi. Ae tau lava ina ia mafai ona ou manumalo i le tuuina atu i luga o o outou ulu, ona tuu atu lea o a’u i lima fasioti tagata pe afai ua finagalo i ai le Atua, ma e mafai ona ou alu ma le fiafia ma le lotomalie, i lo’u iloa ua maea la’u galuega, ma faataatiaina le faavae lea o le a faafaileleina atu ai le malo o le Atua i lenei augatupulaga o le atoaga o taimi.
“I luga o tauau o le Toasefululua ua tatau ona i ai le tiutetauave o le taitaiga o lenei ekalesia mai le taimi lenei ma agai atu ai i luma seia outou tofiaina isi e sui ia te outou” (sii mai i le Aoaoga a Peresitene o le Ekalesia: Iosefa Samita [2007], 533-34).
Ata
Boyd K. Packer
“I le taitoatasi ma le aufaatasi, o le Toasefululua latou te umiaina ki” (Boyd K. Packer, “The Shield of Faith,” Ensign, May 1995, 7).
E faavae i nei saunoaga, o le a se upumoni ua mafai ona tatou aoao mai e uiga i le pule a i latou ua faau’uina o ni Aposetolo? (E tatau i tagata aoga ona faailoa mai le upumoni lenei: O le au Aposetolo e umia ki uma o le perisitua e manaomia e pulefaamalumalu ai i le Ekalesia. [Tagai foi i le MF&F 27:12–13; 112:30–32.])
Aisea e taua ai ona maua e uso taitasi o le Toasefululua ki uma o le malo o le Atua e tatau ai e pulefaamalumalu i le Ekalesia pe a faauuina o ia o se Aposetolo?
Valaaulia se tagata aoga e faitau leotele le faatonuga lenei mai i le talafaasolopito o le Perofeta o Iosefa Samita:
“O le Toasefululua e le i lalo o le pule a se isi lava tagata nai lo o le au peresitene sili, … ‘ma pe a ou le i ai, e leai foi se au peresitene sili i luga o le toasefululua’” (Manuscript History of the Church, vol. B-1, p. 691, josephsmithpapers.org).
O le a le mea tatou te aoaoina mai i lenei saunoaga e faatatau i le mea e tupu i le Au Peresitene Sili pe a maliu le Peresitene o le Ekalesia?
E lagolagoina e tagata o le Ekalesia le Korama a Aposetolo e Toasefululua e taitaia le Ekalesia
Faamalamalama atu faapea ina ua mavae le maliu o le Perofeta o Iosefa Samita, sa i ai le fenumiai i le Au Paia po o ai e tatau ona taitaia le Ekalesia.
Vaevae le vasega i ni vaega taitoalua i le taitoafa tagata aoga ma tuu atu i tagata aoga taitoatasi se kopi o le pepa tufa o loo avatu faatasi ai, “Taimi Taua e O’o atu i le Suiga o Taitai i le Ekalesia.” Fai atu i vaega e faitau faatasi le pepa tufa ma vaavaai mo ni mea na tutupu a o lumanai le suiga o taitai o le Ekalesia. Valaaulia i latou e talanoaina foi a latou tali i fesili o i luga pepa tufa.
Taimi Taua e O’o atu i le Suiga o Taitai i le Ekalesia
Aokuso 3, 1844. Taunuu Sini Rikitone i Navu. Sa i ai o ia i Penisilivania e sauniuni galuega palota mo le avea o Iosefa Samita ma sui tauva o le tofi Peresitene ae ia maua ai le tala i le maliu o Iosefa Samita. I le aso na sosoo ai ina ua ia taunuu, na ia ofo atu faalauaitele e taitaia le Ekalesia o “sē e leoleo” i le toesea ai o Iosefa.
Aokuso 5, 1844. Iakopo J. O Strang, o se tagata fou liliu mai pe a ma le lima masina, ua saunoa atu i faapotopotoga o le Au Paia i Florence, Michigan. I le faapotopotoga lea, na tuuina atu ai e Iakopo se tusi taufaasese o loo ia taulagi sa tusia e Iosefa Samita, o loo faailoa ai Iakopo o se suitulaga i le Perofeta.
Aokuso 6, 1844. Taunuu Elders Polika Iaga, Heber C. Kimball, Lyman Wight, Orson Pratt, ma Uilifoti Uitilafi o le Korama a Aposetolo e Toasefululua i Navu mai ia latou misiona i le Iunaite Setete i Sasa’e.
Aokuso 7, 1844. Ua feiloai taitai o le Ekalesia i Navu. Ua saunoa atu i le mafutaga ia Sini Rikitone, o le sa avea ma fesoasoani ia Iosefa i le Au Peresitene Sili. Sa faailoa ai e Sini e faapea sa ia maua se faaaliga ma “e leai se tagata e mafai ona suitulaga ia Iosefa,” ae e na te faatuina mai e faapea e avea ia ma “sē e leoleo” o le Ekalesia (i le “History of Joseph Smith,” Millennial Star, Apr. 4, 1863, 215).
Sa saunoa pu’upu’u foi Polika Iaga, o lē sa pulefaamalumalu i le Toasefululua, i le faapea atu:
Ata
Polika Iaga
“Ou te lē popole po o ai e taitaia le Ekalesia, … ae e tasi le mea e tatau ona ou iloa, ma o lena mea e faapea po o le a le finagalo o le Atua i ai. … Na tuuina mai e Iosefa i luga o o tatou ulu ki uma ma mana o le galuega faaaposetolo ia na ia umiaina ae lei aveesea o ia, ma e leai se tagata po o se vaega o tagata e mafai ona i ai i le va o Iosefa ma le Toasefululua i lenei lalolagi po o le lalolagi a sau” (Polika Iaga, i le Manuscript History of the Church, vol. F-1, p. 296, josephsmithpapers.org).
Faamata e te manatu e faapefea ona e tali atu i nei mea na tutupu pe ana faapea sa avea oe ma tagata o le Ekalesia i lea vaitaimi?
Faamata e faapefea e le iloa faapea na faaee atu e Iosefa Samita ki o le malo i luga o uso o le Korama a Aposetolo e Toasefululua ona fesoasoani i le Au Paia ina ia malamalama i le finagalo o le Alii i lenei mataupu?
A ua lava loa se taimi, valaaulia ni nai tagata aoga e faasoa mai a latou tali i fesili o loo i luga o pepa tufa.
Tusi le aso lea i luga o le laupapa: Aokuso 8, 1844.
Faamalamalama atu faapea i le taeao o Aukuso 8, 1844, na lauga atu ai Sini Rikitone i se faapotopotoga a le faitau afe ma afe o le Au Paia ma ia toe tuuina atu ai foi se mau e avea ia ma sē e leoleo i le Ekalesia. Mulimuli ane i le aso a lena, sa faia ai se konafesi faapitoa na saunoa atu ai Polika Iaga i le Au Paia e silia ma le itula.
Valaaulia se tagata aoga e faitau leotele le faamatalaga lenei mai le saunoaga a Polika Iaga i le Konafesi:
Ata
Polika Iaga
“Ua tele upu ua faaleoina e uiga ia Peresitene Rikitone o le Peresitene o le Ekalesia ma taitaiina tagata ma avea ma ulu. … “Afai e mananao tagata ia Peresitene Rikitone e taitaia i latou, e mafai ona latou maua o ia; ae ou te fai atu ia te outou o le Korama a le Toasefululua o loo i ai ki o le malo o le Atua i le lalolagi atoa. Na tofia le Toasefululua e le aao o le Atua” (Polika Iaga, i le Manuscript History of the Church, vol. F-1, p. 298, josephsmithpapers.org).
E faavae i lau faitauga o le mataupu 45 o le Au Paia: Voluma 1, o a nisi o auala na aafia ai le toatele o tagata o le Ekalesia a o latou vaavaai atu ma faalogo atu o saunoa mai Polika Iaga? (O le toatele o le Au Paia na latou maua faaaliga faaleagaga e faamaonia ai ia i latou o Polika Iaga, lea na Peresitene i le Korama a Aposetolo e Toasefululua, ua valaauina e le Atua e taitaia le Ekalesia. O nisi na faailoa mai mulimuli ane e faapea, mo se taimi na foliga mai ai Polika Iaga o Iosefa Samita i lona tino mai, gagana ma uiga faatino.)
Valaaulia ni tagata aoga e toalua e faitau leotele faamatalaga nei mai ia Emily Smith ma Peresitene George Q. Cannon (1827–1901), o lē sa tautua mulimuli ane i le Au Peresitene Sili. Fai atu i le vasega e faalogologo pe na faapefea e nei tagata ona faamatalaina mea na tutupu a o saunoa atu Peresitene Polika Iaga i le Au Paia.
“O manatu faaalia, o foliga vaaia, le faalogo atu i le leo na faate’ia ai lo’u agaga atoa. Na vaaia lava e o’u mata le tino maliufasia o Iosefa. Na lagonaina foi e o’u lima le malulu aisa o le oti i luga o lona muaulu sa mamalu. Na ou iloa ua maliu Iosefa. Ae sa faate’ia soo a’u ma vaai atu i le tulaga e aunoa ma se mafaufau i ai e vaai pe le o Iosefa lena. Ae e leai, o Polika Iaga lava ma afai e i ai se tasi e na te teena le aiā ma le tatau ia Polika ona faatautaia mataupu mo le Au Paia, e pau le mea ou te fia fai atu ia i latou o lenei Ia maua le agaga o le Atua ma ia iloa mo outou lava. O le a saunia e le Alii mo ana lava” (Emily Smith Hoyt, in Lynne Watkins Jorgensen and BYU Studies Staff, “The Mantle of the Prophet Joseph Passes to Brother Brigham: A Collective Spiritual Witness,” BYU Studies, vol. 36, no. 4 [1996–97], 164).
Ata
George Q. Cannon
“Ua tulai Polika Iaga … ma saunoa atu i tagata. … O ai na i ai i lena aso e mafai ona faagaloina le lagona na oo ifo i o latou luga! Pe ana faapea na toetu Iosefa mai le oti ma toe saunoa mai ia i latou, atonu o le a le sili atu le tulaga faateia nai lo le tulaga na oo i ai le toatele na i ai i lena faatasiga. O le leo lava o Iosefa lava ia; ma na le gata o le leo lava o Iosefa na faalogoina; ae na foliga mai i le vaai a tagata faapei o le tagata lava lea o Iosefa lea na tu mai i o latou luma. Matou te lei faalogo lava i se isi mea na tupu e sili atu lona matagofie ma le faavavega nai lo le mea na tupu i lena aso i luma o lena faapotopotoga. Sa tuuina mai e le Alii i Lona nuu se molimau na leai ai se avanoa e masalosalo ai po o ai le tagata na Ia filifilia e taitaiina i latou. Sa latou vaaia ma faalogoina i o latou lava mata ma taliga natura, ona oo mai lea o upu na fofogaina, lea na oo mai faatasi ma le mana faatalitonuina o le Atua, i o latou loto, ma na faatumulia i latou i le Agaga ma le olioli tele. Sa i ai le faanoanoa, ma, atonu foi i nisi o loto, sa i ai le masalosalo ma le le mautonu; ae o lenei sa manino mai i tagata uma o le tamalii lenei o le na faaeeina mai i ai e le Alii le pule na tatau ai, e galue ai i lo latou lotolotoi e suitulaga ia Iosefa” (George Q. Cannon, “Joseph Smith, the Prophet,” Juvenile Instructor, Oke. 29, 1870, 174–75).
O le a se mea o tulaga ese mai ia te oe i nei tala?
Faamalamalama atu faapea, ina ua maea le saunoaga a Polika Iaga i le sauniga o Aukuso 8, 1844, na ia talosagaina ai se palota. Na lagolagoina e le Au Paia le Korama a Aposetolo e Toasefululua, ma Polika Iaga e avea ma lona peresitene, e avea ma tino e pulea ma taitaia le Ekalesia. Ua agai i luma le Ekalesia i lalo o le taitaiga ma faatonuga a le Toasefululua mo le taimi e silia ma le tolu tausaga seia oo ina toe faatulagaina le Au Peresitene Sili ma lagolagoina ai Polika Iaga o le Peresitene o le Ekalesia ia Tesema 1847.
Valaaulia se tagata aoga e faitau leotele le Moronae 10:5 . Fai atu i le vasega e mulimuli i le faitauga ma manatunatu pe mafai faapefea e lenei fuaiupu ona fesoasoani i se tasi o sē o loo naunau ia maua se molimau o i latou ua taitaia le Ekalesia ua valaauina e le Atua.
E mafai faapefea e le aoaoga a Moronae i lenei fuaiupu ona fesoasoani i se tasi o sē fia maua se molimau faapea o i latou o e o loo taitaia le Ekalesia ua valaauina e le Atua? (A uma ona tali mai tagata aoga, tusi le aoaoga faavae lenei i luga o le laupapa: E ala mai i le Agaga Paia, e mafai ona tatou maua se molimau faapea o i latou ua taitaia le Ekalesia ua valaauina e le Atua.
Aisea e te manatu e taua ai mo i tatou taitoatasi le maua o se molimau faapea o le Ekalesia i le taimi nei o loo taitaia e i latou o ē ua valaauina e le Atua?
O anafea na e maua ai se molimau mai le Agaga Paia o i latou o ē ua taitaia le Ekalesia i o tatou aso ua valaauina e le Atua?
Molimau atu o i latou o ē na taitaia ma o loo taitaia nei le Ekalesia a Iesu Keriso o le Au Paia o Aso e Gata Ai ua valaauina e le Atua. Faamalosiau i tagata aoga ia maua pe faamalosia a latou molimau e uiga i lenei upumoni.
Valaaulia tagata aoga e sauni mo le vasega mulimuli o le kosi lenei i le faitauina lea o le mataupu 46 o le Au Paia: Voluma 1.
Ata
Pepa Tufa: Taimi Taua e O’o atu i le Suiga o Taitai o le Ekalesia