Lesona 8

O Le Nofoaga mo le Aai o Siona

Faatomuaga ma le Faasologa o Taimi

I le Tusi a Mamona ma e ala mai i faaaliga na tuuina mai i le Perofeta o Iosefa Samita, na fofoga mai ai e le Alii upumoni e faatatau i le aai o Siona i aso e gata ai. I le taumafanafana o le 1831, sa malaga mai ai Iosefa Samita ma isi tagata o le Au Paia mai Ohaio e o atu i le Itumalo o Siakisone, Misuri, lea sa atofaina e le Alii o le “nofoaga tutotonu” mo le aai o Siona ma lona malumalu (MFF 57:3). Ina ua uma ona faapaiaina le laueleele mo le aai o Siona ma le nofoaga mo le tulaga o le malumalu, sa toe foi ai Iosefa Samita, Sini Rikitone, Oliva Kaotui, ma nisi o toeaiina i Ohaio ae o isi, e pei o Epikopo Edward Partridge, sa nonofo ai pea i Misuri e fesoasoani i le faatuina o Siona.

Iuni–Iulai, 1831Sa malaga ai Iosefa Samita ma isi Au Paia mai Ohaio i le Itumalo o Siakisone, Misuri.

20 Iulai, 1831Na tofia ai e le Alii ia Initipene, Misuri, e avea ma nofoaga tutotonu o Siona lea o le a fausia ai se malumalu.

2 Aokuso, 1831Sa faapaia ma faamanuia ina ai le laueleele o Siona mo le faapotopotoina o le Au Paia.

3 Aokuso, 1831Sa faapaiaina ai se tulaga o le malumalu i Initipene, Misuri.

9 Aokuso, 1831Sa malaga ese ai Iosefa Samita mai Misuri e toe foi atu i Ohaio.

Faitauga a Tagata Aoga

Au Paia: O Le Tala o le Ekalesia a Iesu Keriso o le Au Paia i Aso e Gata Ai, Voluma 1, O Le Tagavai o le Upumoni, 1815–1846 (2018), mataupu 12

Fautuaga mo le Aoaoina Atu

Fautuaga mo le fetuutuunaiga mo le aoaoina atu

E mafai ona e filifili e faaaoga uma pe nao ni nai fautuaga mo le aoaoina atu i totonu o lesona taitasi, ma e mafai foi ona e fetuunaia ia manatu fautuaina e tusa ai ma le taitaiga a le Agaga ma manaoga ma tulaga o tagata aoga o loo e aoaoina. Pe a fetuunaia fautuaga mo le aoaoina atu po o le suitulaga ai o ni ou lava manatu, ia mafaufau i le taunuuga fuafuaina o fautuaga taitasi mo le aoaoina atu, ma filifili se isi manatu mo le aooaina atu o le a maua mai ai lena lava taunuuga.

Ua faaali mai e le Alii upumoni e faatatau i le aai o Siona i aso e gata ai.

Tusi le fesili lea i luga o le laupapa: O le a le Siona?

Valaaulia tagata aoga e talanoaina a latou tali i lenei fesili i ni vaega taitoalua pe taitoatolu. Ona valaaulia lea o se tagata aoga se toatasi pe sili atu e lipoti mai a latou tali i le vasega atoa. Afai e manaomia, fesoasoani i tagata aoga ia malamalama o Siona e faatatau i “e loto mama” (MFF 97:21). O Siona e faatatau foi i “se nofoaga lea e nonofo ai e loto mama” (Taiala i Tusitusiga Paia, “Zion,” scriptures.ChurchofJesusChrist.org).

Valaaulia se tagata aoga e faitau leotele le parakalafa lenei:

E oo lava i le taimi a o le’i faavaeina le Ekalesia, sa maua ai e le Perofeta o Iosefa Samita nisi o faaaliga lea sa faatonuina ai e le Alii tagata ia “aumai i luma ma faatu le faamoemoe o Siona” (MFF 6:6; 11:6; 12:6; tagai foi MFF 14:6). Talu ai o loo maua i le Tusi Paia ia valoaga e uiga ia Siona (ua ta’ua foi o Ierusalema Fou), o le manatu e uiga ia Siona sa le o se mea fou i nei tagata (tagai Isaia 33:20; 52:1, 8; Faaaliga 21:1–4). Ina ua uma ona lolomi le Tusi a Mamona, sa maua ai e le Au Paia ni valoaga faaopoopo e uiga ia Siona. Sa latou iloa ai e faapea, o e amiotonu o le a faapotopoto faatasi ma fausia le aai o Siona, ma o le a i ai le Alii faatasi ma i latou. Sa latou iloa ai foi, o le aai o Ierusalema Fou o le a faatuina i le konetineta o Amerika. (Tagai 3 Nifae 21:20–25; Eteru 13:1–11.) Sa maua e Iosefa Samita se faaaliga ia Setema 1830 lea sa faatonuina ai e le Alii ia Oliva Kaotui e “alu i sa Lamanā ma talai atu laʼu talalelei ia te i latou; ma … ia faatuina laʼu ekalesia i totonu o i latou” (MFF 28:8). Sa faailoa mai foi e le Alii i lenei faaaliga e faapea, o le tulaga mo le aai o Siona o le a i ai “i sa Lamana” (i le The Joseph Smith Papers, Documents, Volume 1: Iulai 1828–Iuni 1831, ed. Michael Hubbard MacKay and others [2013], 186).

Faamanatu atu i tagata aoga, o Fepuari 1831, na siitia ai Iosefa ma Ema Samita mai Niu Ioka agai i Katelani, Ohaio. Ia Mati 1831, sa maua ai e le Perofeta se isi faaaliga e faatatau ia Siona. Valaaulia ni nai tagata aoao e feauauai i le faitauina leotele o le Mataupu Faavae ma Feagaiga 45:64–71. Fai atu i le vasega e vaavaai mo mea na aoaoina e le Au Paia e uiga i le aai o Siona.

• O le a le mea e sili ona taua ia te oe i nei fuaitau?

• O le a se upumoni ua tatou aoaoina mai nei fuaiupu e uiga i le mea o le a i ai le aai o Siona? (Aotele tali a tagata aoga e ala i le tusia o le upumoni lenei i le laupapa: O le aai o Siona o le a avea o se nofoaga o le filemu ma le saogalemu, ma o le a i ai iina le mamalu o le Alii.)

• Aisea na ono faateteleina ai e nei faamatalaga e uiga i le aai o Siona le fiafia ma le tulimataiga o le Au Paia anamua?

Fesoasoani i tagata aoga ia malamalama i aoaoga faavae ma mataupu faavae

A uma ona faailoa mai e tagata aoga ia aoaoga faavae ma mataupu faavae, e mafai ona e fesoasoani ia i latou e iloilo le aoaoga faavae ma mataupu faavae ina ia mafai ona malamalama lelei ai tagata aoga i o latou uiga. O le malamalama i se aoaoga po o se mataupu faavae, o lona uiga ia iloa ma malamalama lelei tagata aoga i le aoaoga faavae po o le mataupu faavae, o lona faia i isi upumoni i le fuafuaga a le Alii, ma po o a tulaga e ono faaaoga ai i o latou olaga.

Valaaulia se tagata aoga e faitau leotele le faamatalaga lenei mai i le Perofeta o Iosefa Samita (1805–44). Fai atu i le vasega e faalogologo mo le mea sa ia aoao mai e uiga i le faatuina o Siona i aso e gata ai.

Iosefa Samita

“O le fausiaina o Siona o se galuega ua naunau i ai le nuu o le Atua i vaitausaga uma; o se autu sa nopia’i ai perofeta, faitaulaga ma tupu ma le fiafia tulaga ese; sa o latou sagisagi atu ma le naunauga fiafia i le aso tatou te ola ai; ma faasasao atu ai ma naunauga faalelagi ma le olioli sa latou pepese ai ma tusia ma valoia o tatou aso; peitai sa latou maliliu e aunoa ma le vaai i ai; o i tatou o ni tagata ua alofagia na filifilia e le Atua e aumaia le mamalu i Aso e Gata Ai; ua tuua mo i tatou e vaai i ai, auai i le faatinoga ma fesoasoani e faataavale i luma le mamalu o Aso e Gata Ai.

“Soo se nofoaga e faapotopoto ai le Au Paia o Siona lea, o le a fausia ai e tagata amiotonu uma e avea o se nofoaga o le saogalemu mo ana fanau.

“O le a i ai i vaega eseese o Siteki [o Siona] mo le faapotopotoina o le Au Paia. … O iina o le a faamanuiaina ai a outou fanau, ma outou faatasi ai ma uo o le a faamanuiaina ai outou. …

“… O le a vave ona oo mai le taimi, o le a le toe maua ai e tagata le filemu sei vagana i Siona ma ona siteki” (Aoaoga a Peresitene o le Ekalesia: Iosefa Samita [2007], 186).

• E tusa ai ma lenei saunoaga mai le Perofeta o Iosefa Samita, o fea o le a mafai ai e tagata ona olioli i faamanuiaga o Siona? (Ia mautinoa ua malamalama tagata aoga o faamanuiaga o Siona, e aofia ai le filemu ma le saogalemu, o le a le gata ina maua i totonu lava o le aai o Siona ae faapea foi i totonu o siteki o Siona ua faatulagaina i le lalolagi atoa.)

Faamalamalama atu e faapea, i se konafesi a le Ekalesia sa faia ia Iuni 1831, sa faaali mai ai e le Alii nisi faamatalaga atili e faatatau i le aai o Siona. I le faaaliga lenei, lea ua faamaumauina i le Mataupu Faavae ma Feagaiga 52, sa poloaiina ai e le Alii ia Iosefa Samita, Sini Rikitone, Epikopo Edward Partridge, ma isi faifeautalai e 25 e malaga atu i Misuri, lea o le a faia ai le konafesi o le a sosoo ai a le Ekalesia, ma o le a faaali mai ai le nofoaga mo le aai o Siona (tagai MFF 52:1–5; tagai foi Matthew McBride, “Ezra Booth and Isaac Morley,” i le Revelations in Context, ed. Matthew McBride and James Goldberg [2016], 130–31, po o le history.ChurchofJesusChrist.org). I faaaliga na sosoo mai ai, e toatolu faifeautalai faaopoopo sa valaauina foi e malaga atu i Misuri (tagai MFF 53:5; 55:5–6).

Ua malaga atu le Perofeta o Iosefa Samita ma isi tagata o le Ekalesia i Misuri

Faaali atu le faafanua “O Ni Nofoaga Taua i le Uluai Talafaasolopito o le Ekalesia.”

faafanua o nofoaga i le uluai talafaasolopito o le Ekalesia

Valaaulia tagata aoga e su’e Colesville, Niu Ioka, ma Katelani, Ohaio i luga o le faafanua.

• E faavae i lau faitauga o le mataupu 12 o le Au Paia: Voluma 1, o le a le mea na tupu i le Au Paia mai Colesville ina ua latou taunuu i Ohaio? (Sa latou nonofo mo se taimi puupuu i le faatoaga a Leman Copley i Thompson, Ohaio, seia oo ina tutuliese faamalosi i latou e Leman. Ona faaali mai lea e le Alii e faapea, e tatau i le Au Paia mai Colesville ona malaga atu i le laueleele o Siona i Musuri e nonofo ai iina.)

Valaaulia tagata aoga e su’e Initipene, Misuri, i luga o le faafanua, “O Nisi o Nofoaga Taua i le Uluai Talafaasolopito o le Ekalesia.”

Fai atu i se tagata aoga e faitau leotele le tala lenei a Newel Knigjht, o se tasi o le Au Paia mai Colesville, e uiga i le tulaga o lona tina, o Polly Knight, i le taimi o le latou malaga i Misuri:

“Sa [matou] o i [se vaasitima] … mo Initipene. Sa tulaga faaletonu lava le soifua maloloina o lo’u tina, ma sa faapena mo se taimi umi lava. Ae ui i lea, sa le loto o ia e malolo le malaga; na pau lava lona manao, po o lona manao silisili, ia tuvae i luga o le laueelele o Siona, ma ia tanumia lona tino i lena laueleele. Sa ou alu i le pa’umātu ma faatau mai laupapa e fai ai se pusamaliu ina ne’i maliu o ia ae matou te le’i taunuu i le nofoaga matou te taunuu i ai, oka se vave o lona faasolo vaivai” (Newel Knight autobiography and journal, circa 1846–1847, 28–29, Church History Library, Salt Lake City; ua faalaugatasia le sipelaga, faamataitusi lapopoa, ma faailoga).

• O le a se mea ua tatou aoao mai i lenei tala e uiga i le faatuatua o Polly Knight?

Fai atu i tagata aoga e su’e le mataupu 12 o le Au Paia: Voluma 1. Valaaulia ni nai tagata aoga e auauai e faitau leotele mai le itulau 128, amata i le parakalafa o loo amata i le “E lei leva … le Au Paia i Colesville …” ae faagata i le parakalafa o loo i le itulau 129 o loo amata i le “Ae ina ua latou taunuu atu i le taulaga …” Fai atu i le vasega e mulimuli i le faitauga, ma vaavaai pe na faapeī le tali atu a nisi o le Au Paia ina ua latou taunuu i Initipene, Misuri.

• Aisea na faalotovaivaiina ai nisi o le Au Paia ina ua latou taunuu i Initipene, Misuri?

• E ono faapei sau tali atu pe afai sa e āloālo atu [e vaaia] se nuu toatele o tagata liliu mai ae nai lo o lena, na maua atu i ai na o se tuaoi o se nuu ma ni tagata toalaiti o le ekalesia?

Ua atofa e le Alii ia Initipene, Misuri, e avea ma nofoaga tutotonu mo le aai o Siona

Valaaulia se tagata aoao e faitau leotele le ulutala o le vaega mo le Mataupu Faavae ma Feagaiga 57 ma fuaiupu 1–3 . Fai atu i le vasega e mulimuli i le faitauga, ma vaavaai mo fesili a le Perofeta e uiga ia Siona ma le tali a le Alii.

• O le a le mea na faaali mai e le Alii e uiga ia Siona?

• Na ono fesoasoani faapefea lenei faaaliga ia i latou o e sa lotovaivai i le mea na latou maua atu i Initipene?

Eteuati Paterika

Faaali atu le ata o Epikopo Edward Partridge.

Fai atu i tagata aoga e faitau leotele le parakalafa lenei:

Sa faia e Epikopo Edward Partridge le malaga i Misuri ma le manatu o le a le umi ae toe foi atu i lona aiga i Ohaio. Peitai, i le aso 20 Iulai, na maua ai e Iosefa Samita se faaaliga lea na faatonuina ai Epikopo Partridge e nofo ma faamautu i Initipene e faataunuu ai lana matafaioi o le epikopo (tagai MFF 57:7, 14–15). E le’i leva ona uma lenei faaaliga, ae tupu se feeseeseaiga a Edward Partridge ma le Perofeta o Iosefa Samita e uiga i le fanua o le a faatauina mai mo le Au Paia i Misuri. Sa manatu Epikopo Partridge sa sili atu le lelei o isi fasi fanua. I le aso 1 Aokuso, 1834, na maua ai e le Perofeta o Iosefa Samita le faaaliga ua tusia i le Mataupu Faavae ma Feagaiga  58. I lea faaaliga sa faatonuina ai e le Alii ia Edward ia salamo ma tu i lona tofi o se epikopo i Misuri (tagai MFF 58:14–18).

• E faavae i lau faitauga o le mataupu 12 o le Au Paia: Voluma 1, o le a se tali na iu ina tali atu ai Edward Partridge i le faatonuga a le Alii ia faamautu o ia ma lona aiga i Misuri? (Sa usitaia ma le faamaoni e Edward Partridge lenei poloaiga, e ui ina sa manaomia ai e lona aiga ona faia ni osigataulaga tetele ina ia faatasi atu ia te ia i Misuri.)

Faamalamalama atu e faapea, o le faaaliga o loo tusia i le Mataupu Faavae ma Feagaiga 58, na tuuina mai ai e le Alii ni faatonuga faaopoopo ma ni folafolaga ia i latou o e o le a fesoasoani e fausia Siona. Valaaulia se tagata aoga e faitau leotele le Mataupu Faavae ma Feagaiga 58:2–4 . Fai atu i le vasega e mulimuli i le faitauga, ma vaavaai mo nisi o folafolaga a le Alii.

• O a ni upumoni e mafai ona tatou aoao mai i nei fuaiupu? (E mafai ona faailoa mai e tagata aoga ni nai upumoni, e aofia ai mea nei: Afai e tumau ona tatou faamaoni i tofotofoga, o le a faapea ona oo sosoo mai ai faamanuiaga. “E lē mafai ona tatou vaaia i o tatou mata faanatura le fuafuaga a lo outou Atua i le aumaia i luma o le mamalu o Siona” Tusi upumoni nei i luga o le laupapa.)

• O le a sou manatu na faapefea ona fesoasoani nei upumoni i le Au Paia i a latou taumafaiga e fausia Siona i le Itumalo o Siakisone, Misuri?

Vaevae tagata aoga i paga po o ni vaega toalaiti, ma tuu atu i tagata aoga taitoatasi se kopi o le pepa e tufa atu o loo i ai i le lesona, “‘E Oo Mai Faamanuiaga Pe a Mavae Atu Puapuaga e Tele’ (MFF 58:4).” Valaaulia i tagata aoga e faitau leotele le pepa e tufa atu i a latou paga po o vaega ona talanoaina lea o a latou tali i fesili o loo i le faaiuga o le pepa e tufa atu.

“E Oo Mai Faamanuiaga Pe a Mavae Atu Puapuaga e Tele” (MFF 58:4)

Sa taunuu tonu atu le Paranesi a Colesville, e aofia ai Polly Knight ma lana tama tama o Newel, i le Itumalo o Siakisone, Misuri, i le taimi e auai ai i le faapaiaga o le laueleele o Siona mo le faapotopotoina o le Au Paia. Sa faamatalaina e ‘Newel Whitney:

“I le aso lona lua o Aokuso, sa fesoasoani ai Uso Iosefa Samita le Itiiti., le Perofeta a le Atua, i le Paranesi o Colesville e faataatia le ogalaau muamua o se faavae mo … Siona i Kaw Township, e sefululua maila i sisifo o Initipene. Na amoina le ogalaau e ni alii e toasefululua, e faamamalu ai ituaiga e sefulu ma le lua o Isaraelu. I le taimi lava foi lea, e ala i le tatalo, sa faapaiaina ma faamanuiaina ai le laueleele o Siona mo le faapotopotoina o le Au Paia e Elder Sini Rikitone. O lenei mea sa o se vaitau moni lava o le olioli ma le faamanū o le Au Paia uma [o e] sa molimauina. …

“I le aso lona tolu o Aokuso, sa faapaiaina ai le tulaga mo le malumalu, i sisifo teisi o … Initipene” (Newel Knight autobiography and journal, circa 1846–1847, Church History Library, Salt Lake City; ua faalaugatasia le sipelaga, faamataitusi lapopoa, ma faailoga).

Sa eseese ni tali atu o toeaiina o e sa auai i le faapaiaga i le mea na tupu:

“O nisi o toeaiina, e pei o Reynolds Cahoon, sa vaaia ni avanoa matagofie i nei amataga faafaatusa. ‘O iina sa vaai ai o’u mata faaletino i mea maoae ma le ofoofogia,’ sa ia tusia ai, ‘sa leai ma se manatu e vaai i ai o’u mata i lenei lalolagi.’ Peitai sa le’i faagaeetiaina Ezra Booth i le amataga itiiti. Sa fai mai o ia, sa ‘o se mea e le masani ai, ae e le aoga ai le alu i Misuri e vaai i ai’” (Matthew McBride, “Ezra Booth and Isaac Morley,” i le Revelations in Context, ed. Matthew McBride and James Goldberg [2016], 132–33, po o le history.ChurchofJesusChrist.org).

I le aso 7 Aokuso, i le fa o aso talu ona uma le faapaiaga o le tulaga mo le malumalu, na maliu ai Polly Knight. Sa faamatalaina e lana tama tama o Newel ia tulaga o lona maliu:

“Sa moe filemu o ia, na oti ma le fiafia i le feagaiga fou ma le faavavau o le talalelei ma viia le Atua ona sa soifua o ia e vaai i le laueleele o Siona, ma o le a malolo filemu lona tino, i le mavae ai o le mafatia ai e pei ona sa ia oo i ai mai sauaga a e amioleaga” (Newel Knight autobiography and journal, circa 1846–1847, Church History Library, Salt Lake City; ua faalaugatasia le sipelaga, faamataitusi lapopoa, ma le faailoga).

• E te manatu aisea na matuai ese ai lagona o Polly Knight e uiga i le faapaiaga o le laueleele o Siona mai lagona o Ezra Booth?

• O a faamanuiaga na oo mai ia Polly Knight ona sa tumau faamaoni i le taimi o tofotofoga? (Tagai MFF 59:1–2, lea sa faaali mai e le Alii i le aso o le falelauasiga o Polly.)

• O a ni aafiaga na fesoasoani ia te oe e te iloa ai o le a faamanuia e le Alii i latou o e tumau faamaoni i tofotofoga?

pepa e tufa atu, “E Oo Mai Faamanuiaga Pe a Mavae Atu Puapuaga e Tele” (MFF 58:4)

Vaitafe o Misuri

A ua lava se taimi e faatumu ai e tagata aoga le gaoioiga o le pepa e tufa atu, faaali atu le ata o loo avatu ai i le lesona. Faamatala atu e faapea, o se ata lea o le Vaitafe o Misuri ma sa tolauapi ai le Perofeta o Iosefa Samita ma isi i luga o le auvai o lenei vaitafe i se nofoaga na ta’ua o le McIlwaine’s Bend, a o malaga toe foi atu i Ohaio ia Aokuso 1831.

• E faavae i lau faitauga o le mataupu 12 o le Au Paia: Voluma 1, o a ni luitau na oo i ai Iosefa Samita, Oliva Kaotui, Sini Rikitone, ma isi toeaiina i le taimi o le latou malaga toe foi atu i Ohaio? (Sa toetoe a gogoto nisi o vaa ona o le malosi o le aave o au ma laau na magoto i totonu o le Vaitafe o Misuri.)

• Na faapefea ona tali atu Ezra Booth ma nisi o isi toeaiina i nei luitau? (Sa latou faitioina i le taimi muamua o latou taitai. Mulimuli ane, a o latou tolauapi i luga o auvai o le vaitafe, o le toatele lava o alii sa toe faalelei e ala i soalaupulega ma faatoesega ae sa tumau lava le faitio o Ezra Booth ia Iosefa ma isi.)

Atonu e te manao e faaiu i le iloiloina o upumoni na talanoaina i lenei lesona. Faasoa atu lau molimau e faapea, i le avea ai ma tagata o le Ekalesia a le Alii i aso nei ua ia i tatou le avanoa ma le tiutetauave e faatu ai Siona i soo se mea lava o tatou nonofo ai, ma o le a faamanuia i tatou e le Alii pe a tatou tumau faamaoni i tofotofoga. Valaaulia tagata aoga e faatino nei upumoni.

Uunaia tagata aoga e sauni mo le vasega e sosoo ai e ala i le faitauina o mataupu 13-14 o le Au Paia: Voluma 1.

pepa e tufa atu, “E Oo Mai Faamanuiaga Pe a Mavae Atu Puapuaga e Tele” (MFF 58:4)