Dagiti Pagbatayan iti Ministering, Oktubre 2019
Ar-aramidenyo Kadi Daytoy Napateg a Paset ti Ministering?
Ti ministering ket “makipagrag-o kadagiti agrag-o” a kas met iti “makipagsangit kadagiti agsangit” (Taga Roma 12:15).
Dagiti Pagbatayan iti Ministering, Oktubre 2019
Dagiti panangiladawan ni Augusto Zambonato
No panunotentayo ti maipapan iti ministering, nalaka a panunoten ti maipapan iti panagtulong kadagiti agkasapulan. Pagsasaritaantayo maipapan iti panagmuyong para iti balo a babai, panangyeg iti pangrabii iti masakit, wenno panangted tulong kadagiti marigrigatan. Laglagipentayo ti balakad ni Pablo a “makipagsangit kadagiti agsangit,” ngem ad-adda kadi nga ipokustayo ti umuna a paset dayta a bersikulo—ti “makipagrag-o kadakuada nga agrag-o”? (Taga Roma 12:15). Ti panagrag-o kadagiti pagserbiantayo—kayat man a sawen dayta ti panagrambak iti balligida wenno panangtulong kadakuada a manggun-od iti rag-o kadagiti narigat a panawen—ket maysa a napateg a paset ti ministering a kas iti aramiden koma ti Mangisalakan.
Adtoy ti tallo a kapanunotan a makatulong (ken maysa a liklikan) no kitaentayo nga ipokus iti nasayaat nga isangbay ti Dios iti biagtayo.
1. Agbalin a Mannakaammo
Ni Bonnie H. Cordon, Sapasap a Presidente ti Young Women ket tulongannatayo a makaawat a nasken a kitaentayo dagiti pagserbiantayo—kitaentayo saan laeng a dagiti dagensen ken panagkarigatanda ngem dagiti pay pagpigsaan, talento, ken balligida. Kinunana a kasapulan nga agbalintayo a “maysa a mangsalaknib ken mapagtalkan—maysa a tao a mannakaammo kadagiti kasasaadda ken mangsuporta kadakuada kadagiti namnama ken tarigagayda.”1
Iti pangngarig dagiti karnero ken kalding, kinuna ti Mangisalakan a dagiti masarakan iti makanawan nga imana ket agsaludsod: “Apo, kaano ti pannakakitami kenka a mabisbisinan ket tinaraonandaka? wenno mawaw, ket inikkandaka iti inumem?
“Kaano ti pannakakitami kenka a ganggannaet, ket pinagdagusdaka?” (Mateo 25:37–38).
“Kakabsat, ti kangrunaan a balikas ket nakita,” kinuna ni Sister Cordon. “Nakita dagiti nalilinteg dagiti agkasapulan gapu ta agbuybuya ken agsipsiputda. Makapagbalintayo met a managsiput tapno mangtulong ken mangliwliwa, tapno agrambak ken agarapaap.”2
2. Mangsapul kadagiti Gapu tapno Agrambak
Agrambak kadagiti balligi a dadakkel wenno babassit. Mabalin a maparmek ti sakit a kanser wenno pannakisina, panagsapul iti baro a trabaho wenno panagsapul iti napukaw a sapatos, makapagbiag iti maysa a bulan kalpasan ti ipapatay ti maysa nga ipatpateg wenno makaandur iti maysa a lawas nga awan ti asukar.
Agtawag tapno kumablaaw, mangted iti maysa a kard, wenno mapan mangaldaw iti ruar a kadua ti maysa a tao. Babaen ti panagbibinninglaytayo kadagiti bendisiontayo, panagbiag nga addaan panagyaman, ket panagrambak kadagiti bendision ken balligi dagiti dadduma, “maaddaantayo kadagiti pagragsakan iti rag-o dagiti kabsattayo” (Alma 30:34).
3. Kitaenyo ti Ima ti Apo
No dadduma ti kayat a sawen ti makipagragragsak kadagiti dadduma ket ti panangtulong kadakuada a mangkita kadagiti gapu tapno agrag-o—ania man dagiti parikut wenno pagragsakan a dumteng iti biagtayo. Ti simple a kinapudno nga ammo ti Nailangitan nga Ama dagiti pampanunotennatayo ket nakasagana a mangitag-ay kadatayo ket maysa a nakaskasdaaw a pagtaudan ti rag-o.
Mabalinmo a tulongan dagiti dadduma a mangkita iti ima ti Apo iti biagda babaen ti panangibinglaymo no kasano a nakitamon daytoy iti bukodmo. Napakpakumbabakayo koma a mangibinglay no kasano a natulongannakayo ti Nailangitan nga Ama a nangparmek kadagiti karityo. Makatulong daytoy a pammaneknek kadagiti dadduma a mangbigbig ken mangawat no kasano a natulonganna ida (kitaen iti Mosiah 24:14).
4. Saanyo a Bedngan ti Kabaelanyo nga Agrag-o
Daksanggasat, ta no dadduma mabedngantayo ti bukodtayo a kabaelan a makipagrag-o kadagiti dadduma, nangruna no mariknatayo a di sigurado no ania ti nasken a maidiayatayo wenno sadinotayo itoy a biag. Imbes a panangsapul iti rag-o iti ragsak ti sabali, matnagtayo iti saan mayannatup nga aramid iti panagidasig. Ket kas insuro ni Elder Quentin L. Cook iti Korum dagiti Sangapulo-ket-dua nga Apostol: “Ti panangidasdasig kadagiti bendision ket paksiatenna ti rag-o. Ditayo mapaggiddan ti agbalin a managyaman ken managapal.”3
“Kasano a maparmektayo ti maysa a kasta nga ayo a gagangayen unay iti dumani amin?” sinaludsod ni Elder Jeffrey R. Holland iti Korum dagiti Sangapulo-ket-dua nga Apostol. “… Mabilangtayo ti adu a bendisiontayo ken makapagrambaktayo kadagiti nagapuanan wenno balligi dagiti dadduma. Kaskenan iti amin, mabalintayo ti agserbi kadagiti dadduma, ti kasayaatan pay laeng nga ehersisio para iti puso a naireseta.”4 Imbes nga agidasdasig, mabalintayo a dayawen dagiti pagserbiantayo. Siwawaya a mangibinglay no ania ti dayawenyo maipapan kadakuada wenno dagiti miembro ti pamiliada.
Kas impalagip ni Pablo kadatayo, miembrotayo amin ti bagi ni Cristo, ket “no agnam-ay ti maysa a kameng, dagiti isu amin a kamkameng makipagragragsakda koma kenkuana” (1 Taga Corinto 12:26). Babaen ti tulong ti Nailangitan nga Ama, kabaelantayo a mangammo kadagiti padas dagiti dadduma, rambakan dagiti balligi a dadakkel ken babassit, mangtulong kadakuada a mangilasin iti ima ti Apo, ken mangparmek iti apal tapno pudno a makapagragsaktayo a sangkamaysa kadagiti bendision, talento, ken pagragsakan dagiti dadduma.
© 2019 ti Intellectual Reserve, Inc. Agtagikua iti karbengan. Naimaldit iti EUA. Pannakaanamongna iti Ingles: 6/18. Pannakaanamongna a maipatarus: 6/18. Panakaipatarus ti Ministering Principles, October 2019. Ilokano. 15771 864