Dagiti Pagbatayan iti Ministering, Hulio 2019
Kasano a Makabuangaytayo iti Maysa a Kultura ti Panangiraman iti Simbaan?
No kumitatayo kadagiti ward ken branchtayo, makitatayo dagiti tattao a kasla nalaka a makipulapol. Ti saantayo a maamiris ket uray pay kadagitoy kasla naikappengen, adu pay la ti makarikna a nabaybay-anda. Iti maysa a panagadal, kas pagarigan, itay nabiit natakuatan a dumani kagudua dagiti nataengan iti Estados Unidos ti naireport a makarikna iti kinaliday, pannabaybay-an wenno pannakayadayo manipud kadagiti dadduma.1
Nasken a marikna ti pannakairaman. Maysa daytoy a kangrunaan a kasapulan ti tao, ket no makariknatayo ti di pannakairaman, makasair daytoy. Ti mapanawan ket makaited kadagiti rikna a kinaliday wenno gura.2 No ditay marikna ti kasla pannakaikappeng, kayattayo ti agbirok iti lugar nga ad-adda a maliwliwatayo. Kasapulan a tulongantayo ti tunggal maysa a mariknada a kapasetda iti simbaan.
Ti Panangiraman a Kas iti Mangisalakan
Ti Mangisalakan ti naan-anay a pagwadan ti panangipateg ken panangiraman kadagiti dadduma. Idi pilienna dagiti Apostolna, dina inkaso ti kasasaad, kinabaknang, wenno nangato a propesion. Impategna ti babai a taga-Samaria iti abay ti bubon, impampaneknekna kenkuana ti kinadiosna numan pay nababbaba ti panagkita dagiti Hudio kadagiti Samaritano (kitaen iti Juan 4). Kumita Isuna iti puso ket awan ti idaddadumana kadagiti tao (kitaen iti 1 Samuel 16:7; Doktrina ken Katulagan 38:16, 26).
Kinuna ti Mangisalakan:
“Maysa a bilin a baro ti itdek kadakayo, Tapno aggiinnayatkayo iti maysa ken maysa; kas iti panagayatko kadakayo, kasta met aggiinnayatkayo koma iti maysa ken maysa.
“Gapu itoy mailasindanto a dakayo ti adalak, no adda ayatyo iti maysa ken maysa” (Juan 13:34–35).
Ania ti Mabalintayo nga Aramiden?
No dadduma narigat nga ibaga no marikna ti maysa a tao a kasla addada iti ruar. Kaaduan kadagiti tattao ti saan a mangisao iti daytoy—uray laeng saan unay a nalawag. Ngem babaen iti managayat a puso, ti pannarabay ti Espiritu Santo, ken ti panangikagumaan a mangammo, mailasintayo no adda makarikna a maysa a di mairamraman kadagiti miting ken aktibidad iti Simbaan.
Dagiti Mabalin a Pagilasinan no ti Maysa ket Makarikna iti Saan a Pannakairaman:
-
Awan tignay ti bagi, a kas iti nairut a dalikepkep wenno nakakemmeg.
-
Agtugtugaw iti likud iti uneg ti kuarto wenno agtugtugaw nga agmaymaysa.
-
Saan a makimismisa wenno manmano nga umay.
-
Nasapa a pumanaw kadagiti miting wenno aktibidad.
-
Saan a makiramraman kadagiti pagsasaritaan wenno lesson.
Mabalin met a pagilasinan dagitoy kadagiti dadduma a rikna, kas iti kinamanagbabain, pannakaburibor, wenno saan a komportable. Makarikna dagiti miembro ti “panakaidumduma” no kabarbaroda a miembro iti Simbaan, no naggapuda iti sabali a pagilian wenno kultura, wenno nakapadasda itay nabiit iti narikut a panagbalbaliw iti biag , a kas iti diborsio, ipupusay ti maysa a miembro ti pamilia, wenno nasapa a panagsubli manipud iti mision.
Ania man ti gapu, ditayo koma agkedked a siaayat a tulongantayo ida. Ania man a sawentayo ken ania man nga aramidentayo ket makaparnuay iti rikna naragsak a mapasangbay ti amin ken kasapulan ti amin.
Sumagmamano a Wagas iti Panangiraman ken Naragsak a Panangpasangbay:
-
Saan a kanayon a makikatugaw iti isu met laeng a tattao iti simbaan.
-
Saanmo a kitaen ti akinruar a langa ti maysa a tao a pakakitaam iti pudno a kinataona. (Para iti ad-adu pay iti daytoy a topiko, kitaen ti “Ministering Is Seeing Others as the Savior Does,” Liahona, Hunio 2019, 8–11.)
-
Iraman dagiti dadduma kadagiti pagsasaritaan.
-
Awisem dagiti dadduma nga agbalin a paset ti biagmo. Mabalinmo nga iraman ida kadagiti aktibidad a planplanuemon.
-
Agbirok ken agaramid kadagiti pagduyosan ti amin.
-
Dimo pengdan ti panaggagayyem gapu laeng ta saan a maited ti maysa a tao dagiti namnamaem.
-
No makitam ti maysa a banag a naidumduma maipapan iti maysa a tao, agessemka koma iti dayta imbes a dimo ikankano wenno liklikam daytoy.
-
Yebkasmo ti ayat ken mangidiaya kadagiti napudno a pammadayaw.
-
Panunotem a naimbag no ania a talaga ti kayatna a sawen no ibagatayo a ti Simbaan ket para iti tunggal maysa, ania man dagiti pagdudumaanda. Kasano a maaramidtayo daytoy a napaypayso?
Saan a kanayon a nalaka a marikna ti gin-awa iti lawlaw dagiti tattao a naidumduma kadatayo. Ngem babaen iti masansan a panagaramid, sumaysayaat ti pannakakitatayo iti pateg dagiti paggigiddiatan ket agyamantayo kadagiti naidumduma a kontribusion wenno tulong nga isangbay ti tunggal tao. Kas insuro ni Elder Dieter F. Uchtdorf iti Korum dagiti Sangapulo-ket-dua nga Apostol, dagiti paggigiddiatantayo ket makatulong a mamagbalin kadatayo a nasaysayaat, naragragsak a tattao: “Umaykayo, tulongandakami a mangipasdek ken mangpatibker ti maysa a kultura ti panagagas, kinasayaat, ken kinaasi kadagiti amin nga annak ti Dios.”3
Naparaburan babaen ti Panagiraman
Immakar ni Christl Fechter iti sabali a pagilian kalpasan a dinadael ti gubat ti nakayanakanna a pagilian. Saan a makapagsarita a nasayaat iti pagsasao ken awan tao nga am-ammona uray maysa iti baro nga sangakarrubaanna, isu nga idi damo nakarikna isuna iti pannakaisiasi ken panagmaymaysa.
Kas maysa a miembro ti Simbaan, nagtured isuna ket nangrugi a dimmar-ay iti baro a wardna. Mariribukan isuna amangan ta ti nadagsen a panagbalikasna ti makaigapu iti panagkedked dagiti tao a makisarita kenkuana wenno makedngan isuna iti panagmaymaysana a babai.
Ngem naam-ammona dagiti dadduma a saan a nakakita kadagiti pakaidumaanna ket pinasangbayda isuna iti grupoda nga aggagayyem. Siaayat a tinulonganda, ket iti di mabayag nakitanan ti bagina a nagaed a mangisursuro iti klase ti Primary. Dagiti ubbing ti naindaklan a pagwadan iti panagpasangbay, ken ti rikna ti maipatpateg ken kasapulan ket nangpatibker iti pammatina ken nangtulong a nangpabaro iti debosionna iti Apo iti unos ti panagbiagna.
© 2019 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/18. Pannakaanamongna a maipatarus: 6/18. Panakaipatarus ti Ministering Principles, July 2019. Ilokano. 15768 864