Dagiti Pagbatayan ti Ministering, Hulio 2018
Tumulong a Mangngaasi
Bayat ti panangtuladmo ti pagwadan ti Mangisalakan a manangngaasi, makitam a makaaramidka iti pakaigiddiatan kadagiti biag dagiti dadduma.
Ti panangngaasi ket addaan iti panangikaso iti pakaburiburan dagiti dadduma a kabinnulig iti tarigagay a palag-anen wenno pagin-awaen iti daytoy. Ti katulagan a mangsurot iti Mangisalakan ket katulagan ti panangngaasi a “makipagbaklay iti imet ti tunggal maysa” (Mosiah 18:8). Ti maysa a naituding nga aramiden a mangkitkita kadagiti dadduma ket maysa nga oportunidad nga agminister a kas iti aramid ti Apo: addaan iti “panangngaasi, kadagiti adda iti panagduadua” (Judas 1:22). Imbilin ti Apo, “Iparangyo ti kinaimbag ken kaasi tumunggal lalaki iti kabsatna” (Zacarias 7:9).
Ti Panangngaasi ti Mangisalakan
Ti kinaasi ket maysa a napigsa a bileg iti ministerio ti Mangisalakan (kitaen iti sidebar: “Maysa a Naasi a Mangisalakan”). Ti kinaasina iti padana a tao ti nakaigapu iti panangtulongna kadagiti adda iti lawlawna kadagiti di mabilang nga okasion. Iti pannakailasinna kadagiti kasapulan ken kalikagum dagiti tattao, mabendisionan ken maisurona ida iti wagwagas a kapapatgan kadakuada. Ti kalikagum ti Mangisalakan a mangitag-ay kadatayo manipud iti pakariribukan ti mangiturong iti napudpudno nga aramid ti panangngaasi: Ti Pannubbotna para ti basbasol ken panagsagaba ti tattao.
Ti kapasidadna nga agresponde kadagiti kasapulan dagiti tattao ket maysa a banag a mabalintayo nga ikalikagum bayat ti panagserbitayo. Bayat iti panagbiagtayo a nalinteg ket dumngeg kadagiti parikna ti Espiritu, maparegtatayo a tumulong kadagiti napnuan kaipapanan a wagas.
Ti Katulagantayo iti Panangngaasi
Kayat ti Nailangitan nga Ama a naasi ti amin nga annakna (kitaen ti 1 Taga Corinto 12:25–27). Ti panagbalin a napupudno a disipulo, masapul a maaddaan ken mangipakita ti kinaasi kadagiti dadduma, nangnangruna kadagiti agkasapulan (DkK 52:40).
Ti pananggun-od ti nagan ni Jesucristo iti bagbagitayo babaen iti katulagan ti pannakabuniag, masaksiantayo a natallugodtayo nga agbalin a naasi. Ni Presidente Henry B. Eyring, Maikadua a Mammagbaga iti Umuna a Panguluen, insurona a tulongannatayo ti sagut ti Espiritu Santo a mangaramid: “Nakitulagka a miembro ti Simbaan ni Jesuscristo. …
“Isu nga adda marikriknam a panagkalikagum a mangtulong iti maysa a tao a marigrigatan nga agtultuloy babaen iti imet a ladladingit ken rigrigat. Inkariyo a tulonganyo ti Apo a mangpalag-an iti imet dagiti [dadduma] ket maliwliwaan. Naikkankayo iti bileg a mangtulong a mangpalag-an kadagiti imet idi inawatyo ti sagut ti Espiritu Santo.”1
Kas pagarigan, maysa a kabsat a babai sadiay Rusia ti addaan iti narigat a sitwasyon iti pamilia a mangipawil kenkuana a dumar-ay iti simbaan iti las-ud ti nalablabes a makatawen. Sabali a kabsat a babai iti branch ti timmulong a siaasi iti tunggal Domingo babaen ti panangtawagna kenkuana tapno ibagana maipapan kadagiti bitla, adalen, awag iti mision, naipasngay a maladaga, ken dadduma pay a damdamag iti branch. Idi naresolbar ti sitwasyon ti pamilia ti kabsat a babai a di makaadayo iti pagtaenganna, nariknana a kasla paset pay laeng isuna ti branch gapu kadagiti linawas a tawag ti gayyemna.
© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Ministering Principles, July 2018. Ilokano. 15050 864