Ministering babaen iti Miting ti Sakrament

Makaited ti miting iti sakrament kadagiti gundaway tapno makikadua ken makapagminister kadagiti dadduma.

Ti miting iti sakrament ket maysa a panawen para iti naespirituan a pannakataraon ken bukod a panangutob iti Mangisalakan ken ti Pannubotna. Iti pannakiranudtayo iti sakrament kada lawas, maitan-oktayo amin a sangapada (kitaen iti Doktrina ken Katulagan 84:110). Ngem dagiti dadduma iti ward ken branchtayo itugotda dagiti nadagsen a dagensenda wenno saanda a pulos umayen.

Dagitoy dagiti sumagmamano a gundaway no kasano a mabalin nga usarentayo dayta sagrado nga oras tapno makapag-minister iti dadduma ken makaited ti panagbalbaliw iti biagda.

Tulongam a Pagbalinen ti Miting iti Sakrament a Nasaysayaat para Kadagiti Pagministeram

Ti umuna nga addang a panagadal no kasano ti panagministermo ket panangammo kadagiti indibidual wenno pamilia ken dagiti kasapulanda. Mabalin nga adda dagiti wagas a makatulongka a mamagbalin a nasaysayaat ti padasda a panagdaydayaw iti sakrament babaen pay iti panagsursurom iti maipapan kadakuada.

Para ken ni Mindy, maysa a naubing nga ina ti singin a babassit nga ubbing, dagiti simple nga aramid ti ministering sisterna ket nakaited iti dakkel a nagbaliwan ti padasna iti miting ti sakrament kada lawas.

“Gapu iti oras ti panagtrabaho ti asawak, itugotko a sisiak dagiti singin nga annakko a babbai iti simbaan iti kada lawas,” inlawlawag ni Mindy. “Makaupay a talaga ti mangileppas agingga iti udina iti amin a miting ti sakrament nga addaan iti dua nga aktibo a babassit nga annak, ngem inakona ti responsibilidad nga is-isuna ti ministering sisterko tapno matulongannak.

“Makikatugaw kadakami ket tulongannak no kua a mangaywan kadagiti annakko a babbai iti kada lawas. Napateg isuna unay kaniak uray no adda laeng iti abayko ken palag-anenna la unay ti pannakadukotko kadagiti kanito a panagalikuteg ken panagringgorda. Diak ammo no maammuannanto no kasano a naimpluwensiaannak dagiti tignayna iti daytoy a panawen ti biagko. Nakitana ti kasapulak a kas maysa a naubing, madandanagan nga ina, ket timmulong a namagbalin a natalna ken naragsak ti simbaan para kadakami amin.”

Dagiti Kapanunotan a Mangtulong Kadagiti Addaan iti Naipangruna a Kasapulan

Ipakaammom kadagiti lider iti elders quorum ken Relief Society maipanggep kadagiti kasapulan dagiti miembro.
Agplano dagiti lider kadagiti maisarita iti miting ti sakrament tapno maipaay dagiti kasapulan dagiti miembro. No dagiti pagministeringam ket makaited iti pagimbaganda manipud iti pannakangngegda iti nalawag a mensahe, ibinglaymo ti kapanunotan kadagiti lidermo.
No ammom nga adda maysa a tao nga addaan iti pagkurangan wenno alerdyi iti makan a manglapped kadakuada iti panagsagrap kadagiti bendision iti miting ti sakrament, damagem kadakuada dagiti detalye ken ania a panangibagay ti mabalin a maaramid tapno mapapintas ti padasda iti panagdaydayaw. Ibinglay daytoy nga impormasion kadagiti lidermo.
No maysa kadagiti pagministeringam wenno am-ammom ket saan a makaruar iti balayna, mabalin a permanente wenno iti saan nga agbayag a panawen, damagem iti bishopmo no mabalin a maited ti sakrament kadakuada iti pagtaenganda. Mabalinmo pay ti agsurat kabayatan iti miting ti sakrament ket ibinglay dagitoy kadakuada iti telepono, babaen iti email, wenno iti sangun-sango.
No adda ubbing nga annak ti maysa a tao a pagministeringam, mabalinmo nga idiaya ti tulong kadakuada kabayatan iti miting ti sakrament.
No saan nga umay a masansan iti miting ti sakramento dagiti pagministeringam, padasem nga awaten ken ibilang dagiti wagas a mabalin a pakatulongam. No masapulda iti transportasion, mabalinmo nga idiaya a mangilugan kadakuada. No mariknada a saanda a supsuportaran ti pamiliada, mabalinmo nga awisen ida a makikatugaw kenka. Mabalinmo ti agaramid kadagiti espesial nga imbitasion a a mangtulong kadakuada a makarikna iti naragsak a pannakapasangbay ken pannakasapul kadakuada iti miting ti sakrament.

Laglagipen, dagiti SImple nga Aramid Makaipaay iti Dakkel a Pagdumaan

Iti panangsaritana maipanggep iti ministering, insuro ni Sister Jean B. Bingham, Relief Society General President,: “No dadduma pampanunotentayo a nasken nga agtrabahotayo iti maysa a banag a naindaklan ken nabannuaran nga aramid tapno ‘maibilang’ a kas agserserbi kadagiti padatayo a tao. Ngem dagiti simple pay nga aramid ti serbisio ket adda napalaus nga epektona iti dadduma—kasta met iti bagbagitayo.”¹

Iti maysa a bassit a ward iti Belgium, masansan nga idiaya ni Evita nga agipatarus para kadagiti agsasao iti Espaniol a sangaili ken miembro kabayatan iti miting ti Simbaan. Maysa a gundaway, nayam-ammo ni Evita iti maysa a tao a taga-Dominican Republic nga agad-adal maipanggep iti Simbaan. Ammona bassit ti agsao iti Ingles, ngem Espaniol ti nakaisigudanna a pagsasao. Indiaya ngarud ni Evita nga agipatarus iti naulimek para kenkuana iti miting ti sakrament isu a nakarikna iti ad-adda pay a pannakagin-awana.

“Ti panagipatarus mamagbalin no dadduma a nawaywaya bassit ti Sabbathko,” kuna ni Evita. “Ngem ti panangsurot kadagiti pannignay tapno agdamag kadagiti dadduma no kasapulanda ti agipatpatarus ket kasta la unay ti itedna a ragsak ken nabara a karirikna nga ammok a kabaelak ti tumulong kadakuada a tapno mariknada iri Espiritu ken maay-ayo kadagiti mitingda.”

Dagiti Kapanunotan a Makatulong babaen kadagiti Simple nga Aramid

Kasaritam dagiti lidermo tapno makita no asino ti mabalin a makasapul iti nayon a serbisio kabayatan iti miting ti sakrament. Wenno no adda am-ammom a maysa a tao nga agkasapulan, siguraduem nga ammo dagiti liderrmo maipapan kadakuada.
Naulimek nga agtugawka bayat ti panaguraymo a mangrugi iti miting. Makatulong daytoy “kadagiti dadduma a nasneban a puso ken agladladingit nga espirtu iti lawlawtayo”² a makasapul iti talna a mabalin a sumangbay babaen iti panagrukbab iti nasantuan a lugar.
Iti Domingo a panagayuno, ibilang iti panangiruknoy ti panagayunom ken panagkararagmo iti maysa a pagministeringam a makasapul iti ad-adu pay a pannakaliwliwa.
Agkararagka tapno maammuam no adda maysa a mabalin a matulongam a pagtugawem iti abaymo wenno asidegka kadakuada kabayatan iti miting ti sakrament wenno no adda sabali pay a wagas a pakatulongam.

Mabalin ti Miting iti Sakrament a maysa a Lugar a Panangpasangbay iti Amin

Insuro ni President Joseph Fielding Smith (1876–1972), “Ti miting ti sakrament ti kasagraduan, kasantuan, iti amin a miting iti Simbaan.”³ Gapu iti daytoy, nasken a penken a makarikna ti amin a dumardar-ay iti miting ti sakrament iti nabara a pannakapasangbay ken naespirituan a mapakan—nangnangruna kadagiti kabarbaro a miembro wenno miembro a saan a unay a dumardar-ay iti simbaan.

Ni Merania manipud iti New South Wales, Australia, nakigayyem iti maysa a babai nga agsursuro maipanggep iti Simbaan iti wardna. “Nagbalin isuna a maysa kadagiti kapatgan a gagayyemko itan,” kuna ni Merania. “Pagay-ayatko ti makikatugaw kenkuana iti miting ti sakrament iti kada lawas, ket kanayonko a kumustaen isuna ken no adda mabalin nga aramidek a makatulongak kenkuana.” Kalpasan ti kanito, nabuniagan ti gayyem ni Merania. Dagiti panangkagumaan dagiti miembro iti ward, kasta met ti nabara a pannakapasangbayna iti miting ti sakrament, ket nangaramid iti dakkel a paset iti pangngeddengna.

Dagiti Kapanunotan iti Panagminister kadagiti Agsubsublin wenno Kabarbaro a Miembro

No agsaritakanto iti miting ti sakrament, mabalinmo ti mangawis kadagiti gagayyem, pamilia, ken dadduma pay nga umay a dumngeg iti mensahem.
Mabalinmo a sapulen ken pasangbayem dagiti agmaymaysa wenno mabalin nga agkasapulan iti tulong. Damagem no mabalin a makikatugawka kadakuada wenno awisem ida a makikatuigawda kenka.
No malpasen ti miting, mabalinmo nga awisen dagiti pagministeringam ken dadduma pay para kadagiti sumarsaruno nga aktibidad iti Simbaan, iti templo, wenno iti maysa a pasken iti kagimongan.
No awisem ti maysa a tao a pagministeram iti miting ti sakrament ngem saan a dimmar-ay iti napalabas, mabalinmo a damagen kadakuada no adda dagiti saludsodda maipanggep iti no ania ti naisuro. Ibagam kadakuda a kanayon a sipapaluboska nga asitgandaka no adda balikas, estoria, wenno maysa a doktrina a saanda a maawatan. Mabalinyo a kitaen nga aggigiddan dagiti sungbat no kasapulan.

© 2020 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Panakaipatarus ti Ministering Principles, June 2020. Ilokano. 16988 864