Dagiti Pagbatayan iti Panagserbi, Marso 2019

No Kasano ti Mangibinglay iti Pammaneknek iti Ad-adda a Gagangay a Wagas

Ti ministering ket panagipaneknek. Ti mannakibagay ti panagserbi ket mabalin a mangnayon kadagiti gundawaytayo a mangibinglay iti pammaneknek iti pormal ken saan a pormal a wagas.

Nakitulagtayo nga “agtakder a kas saksi ti Dios iti amin a panawen ken iti amin a banag, ken iti amin a lugar” (Mosiah 18:9). Ti panangibinglay iti pammaneknektayo ket paset ti panagtakdertayo a kas saksi ken nabileg a wagas a pangawisan iti Espiritu Santo a mangsagid iti puso ti maysa a tao ken mangbalbaliw iti biagda.

“Ti pammaneknek—pudno a pammaneknek, parnuayen iti Espiritu ken pinatalgedan ti Espiritu Santo—balbaliwanna dagiti biag,” kinuna ni Presidente M. Russell Ballard, Agak-akem a Presidente ti Korum dagiti Sangapulo-ket-dua nga Apostol.¹

Ngem ti panangibinglay iti pammaneknektayo ket mabalin a pagam-amakan wenno saan a komportable para iti sumagmamano kadatayo. Dayta ti mabalin a gapu ta panunotentayo ti panangibinglay iti pammaneknektayo kas maysa a banag nga aramidentayo iti miting ti panagayuno ken panagpaneknek wenno no mangisursurotayo iti maysa a leksion. Kadagita a pormal a panagdadanggay masansan nga usarentayo dagiti umisu a balikas ken ragup ti balikas a kasla saan a nasken iti gagangay a panagsasarita.

Ti panangibinglay kadagiti pammaneknektayo ket makapagbalin a kanayon a parabur iti biagtayo ken iti biag dagiti dadduma no maawatantayo no kasano ti kinasimple daytoy tapno ibinglay no ania ti patientayo iti inaldaw a panagdadanggay. Dagitoy ti sumagmamano a kapanunotan a makatulong iti pangrugianyo.

Pagtalinaeden Daytoy a Simple

Saan a kasapulan nga irugi ti maysa a pammaneknek kadagiti balikas a, “Kayatko nga iburay ti pammaneknekko,” ken saan a kasapulan a gibusan daytoy iti, “Iti nagan ni Jesucristo, amen.” Ti pammaneknek ket maysa a panangyebkas iti no ania ti patien ken ammotayo a pudno. Isu a no kasaritam ti kaarrubam iti kalsada maipapan iti maysa a problemana ket ibagam ti, “Ammok a sungbatan ti Dios dagiti kararag,” ket mabalin a kas iti kabileg ti ania man a pammaneknek a naibinglay manipud iti pulpito iti simbaan. Saan nga umay ti bileg manipud ti napintas a panagsasao; umay daytoy manipud iti Espiritu Santo a mangipatpatalged iti kinapudno (kitaen iti Doktrina ken Katulagan 100:7–8).

Ibagay ti Naannayas a Gagangay a Pannakisarsarita

No naayattayo a mangibinglay, adda dagiti gundaway iti amin nga aglawlawatayo a mangiburay iti pammaneknek kadagiti inaldaw a pannakisarsaritatayo. Kas pagarigan:

Maysa a tao ti agsaludsod maipapan iti udi ti lawasmo. “Naragsak,” ti sungbatmo. “Ti Simbaan ti apagisu a kasapulak.”
Maysa a tao ti mangipeksa iti pannakipagrikna kalpasan ti maysa a pannubok iti biagmo: “Ladingitek.” Isungbatmo: “Agyamanak iti pannakaseknam. Ammok a ti Dios tulongannak nga agibtur. Tinarabaynak idin.”
Kuna ti maysa a tao: “Sapay koma ta sumayaten daytoy a tiempo,” wenno “Sigurado a maladaw ti lugan,” “Nakaam-amak daytoy a trapiko.” Mabalinmo a sungbatan: “Siguradoak a risutento ti Dios amin dagitoy.”

Ibinglayyo dagiti Padasyo

Masansan nga agsasaritatayo maipapan kadagiti pannuboktayo. No adda maysa a tao a mangibaga kenka maipapan iti pakaipaspasanguanda, mabalinmo nga ibinglay ti maysa a panawen idi tinulongannaka ti Dios kadagiti pannubokmo ket ipaneknekmo nga ammom a matulonganna met ida. Kinuna ti Apo a papigsaennatayo kadagiti pannuboktayo “tapno agbalinkayo a saksi para kaniak kalpasanna, ken tapno maammuanyo nga awan duadua a siak, ti Apo a Dios, sarungkarak dagiti taok iti panagsagabada” (Mosiah 24:14). Makapagtakdertayo a saksi kenkuana no ipaneknektayo maipapan iti no kasano a tinulongannatayo kadagiti pannuboktayo.

Agbalin a Nakasagana

Para iti sumagmamano kadatayo, ti panangibinglay iti pammaneknek a saan a napakpakadaan ket mabalin a pagamkan. Adda dagiti wagas a makapagplanotayo iti nasapsapa ken “kanayon a nakasagana a mangted iti sungbat iti tunggal tao mangimtuudto [kadatayo] ti gapu ti inanama nga adda [kadatayo]” (1 Pedro 3:15).

Umuna, ti panagbalin a nakasagana kaipapananna ti panangkita iti no kasano ti panagbiagtayo. Aw-awisentayo kadi ti Espiritu Santo iti biagtayo ken pappapigsaentayo kadi dagiti bukodtayo a pammaneknek iti inaldaw babaen ti nalinteg a panagbiag? It-itedtayo kadi iti Espiritu dagiti gundaway a makasaonatayo ken ikkanatayo kadagiti balikas a kasapulantayo babaen ti panagkararag ken panagadal iti nasantuan a kasuratan? Kas iti imbalakad ti Apo ken ni Hyrum Smith, “Dimo gamgamen nga ipakdaar ti balikasko, ngem umuna a gamgamem a magun-odmo ti balikasko, kalpasanna lumukayton ti dilam” (Doktrina ken Katulagan 11:21).

Maikadua, ti panagbalin a nakasagana ket kaipapananna ti panangur-uray ken panangibilang kadagiti gundaway a mabalin nga adda kenka iti dayta nga aldaw wenno dayta a lawas a mangibinglay iti pammaneknekmo. Makapagsaganaka para kadagita a gundaway babaen ti panangpanunotmo maipapan no kasano a maikkandaka iti gundaway a mangibinglay iti no ania ti patiem.

Agtalinaed a Nakapamaysa iti Mangisalakan ken iti Doktrinana

Insuro ni Presidente Ballard, “Nupay mabalintayo a maaddaan kadagiti pammaneknek maipapan kadagiti adu a banag kas miembro ti Simbaan, adda dagiti kangrunaan a kinapudno a kasapulantayo nga isuro iti tunggal maysa ken ibinglay.” Kas pagarigan, inlistana: “Ti Dios isu ti Amatayo ken ni Jesus isu ti Cristo. Naisentro ti plano ti pannakaisalakan iti Pannubbot ti Mangisalakan. Insubli ni Joseph Smith ti pakabuklan ti agnanayon nga ebanghelio ni Jesucristo, ket ti Libro ni Mormon ti pakakitaan a pudno ti pammaneknektayo.” Bayat ti panangipeksatayo kadagiti naimpusuan a kinapudno, awisentayo ti Espiritu a mangipaneknek a pudno dagiti insawangtayo. Inyunay-unay ni Presidente Ballard a “ti Espiritu saan a mapengdan no maiburay ti natarnaw a pammaneknek maipapan ken ni Cristo.”²

Ti Pagwadan ti Mangisalakan

Nabannog manipud iti panagdaliasatna iti Samaria, nagsardeng tapno aginana ti Mangisalakan iti abay ti bubon ken naam-ammona ti maysa a babai sadiay. Inrugina ti saritaan maipapan iti panagsakdo iti danum manipud iti bubon. Iti panangusar iti daytoy aginaldaw a trabaho nga ar-aramiden ti babai ket nangted iti gundaway ken ni Jesus a mangipaneknek maipapan iti nabiag a danum ken ti agnanayon a biag a nakasagana a gun-oden dagiti tao a mamati Kenkuana (kitaen iti Juan 4:13–15, 25–26).

Makapagbalbaliw iti Biag ti maysa a Simple a Pammaneknek

Insarita ni Presidente Russell M. Nelson maipapan iti maysa a nars a nagdamag iti saludsod ken ni Dr. Nelson kalpasan ti narigat a proseso ti panagoperar. Apay a saankayo a maipada kadagiti dadduma a surgeon?” Mabalin a sumagmamano a surgeon nga am-ammona ti ababa ti panagteppelna ken agsasao iti dakes no aramidenda dagiti kasta a nangato ti presionna a wagas.

Mabalin a nasungbatan koma ni Dr. Nelson iti ania man nga adu a wagas. Ngem insungbatna laeng ti, “Gapu ta ammok a pudno ti Libro ni Mormon.”

Ti sungbatna ti nangparegta iti nars ken ti asawana tapno adalenda ti Libro ni Mormon. Idi agangay binuniagan ni Presidente Nelson ti nars. Kalpasan dagiti dekada, kabayatan ti panangimatonna iti komperensia ti stake iti Tennessee, USA, kas kabarbaro a naordenan nga Apostol, naragsakan ni Presidente Nelson iti saan a ninamnama a panagkitada iti isu met laeng a nars. Nalagip ti nars a ti pannakapasurot wenno kumbersionna, nga isangbay ti simple a pammaneknek ni Presidente Nelson ken ti impluensia ti Libro ni Mormon, ket nakatulong iti pannakapasurot wenno kumbersion dagiti dadduma pay a 80 a tattao.³

Awis nga Agtignay

Saankayo nga agbuteng a mangibinglay iti pammaneknekyo. Mabalin a daytoy ti pangparabur kadagiti tao a pagserbianyo. Kasano a mausaryonto dagitoy a kapanunotan wenno ti bukodyo tapno mangibinglay iti pammaneknekyo ita?

© 2019 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/18. Pannakaanamongna a maipatarus: 6/18. Panakaipatarus ti Ministering Principles, March 2019. Ilokano. 15764 864