Ministering babaen ti Sapasap a Komperensia

Addaan kadagiti makaparegta nga adaw, tradision ti pamilia, ken pannursuro manipud kadagiti katulongan ti Apo, ti sapasap a komperensia ti mangted kadatayo iti adu a wagas tapno agminister—kasakbayan, kabayatan, ken kalpasan ti sapasap ti komperensia iti udi ti lawas!

Dagiti Pagbatayan iti Ministering, Abril 2020

Kas mannursuro iti mission-preparation class, masansan nga allukoyen da Susie ken Tom Mullen dagiti miembro dagiti klaseda a mangawis iti maysa a tao a mangbuya iti sapasap a komperensia.

“Iti panangawis iti maysa a tao nga agaramid iti maysa a banag ket napateg a paset ti aramid ti misionario, ken mayaplikar met daytoy iti ministering,” kunana. “Masansan nga agreport dagiti estudiantemi maipapan no kasano ti kapintas ti pagbanagan daytoy para kadakuada ken kasta met iti tao nga inawisda.”

Daytoy ti sumagmamano kadagiti wagas nga inreport dagiti estudianteda a mangtultulong:

“Nagministerkami iti maysa a gayyem nga adda sumagmamano a parikutna nga ikarkarigatanna a risuten. Inawismi isuna a dumngeg iti sapasap a komperensia para iti sungbat. Idi sumarungkarkami kenkuana kalpasan ti komperensia, imbagana kadakami a nangngeganna ti adu nga ideya a makatulong.”
“Inangaymi ti maysa a pasken iti sapasap a komperensia ket nangyeg ti tunggal maysa iti makan nga ibinglay. Kasta unay a ragragsak daytoy ta inkeddengmi nga aramiden manen daytoy.”
“Inawisko ti maysa a gayyem nga agbuya iti sapasap a komperensia a kaduanak. Kabayatan ti panagsaritami maipapan iti daytoy, inkeddengmi ti mapan iti meetinghouse tapno kitaen no makapagbuyakami idiay. Inaramidmi, ket daytoy ti kapintasan a padas iti kaadda idiay!”

Kas iti nasursuro dagiti Mullen ken dagiti estudianteda, adu dagiti wagas iti panagminister babaen ti sapasap a komperensia. Daytoy ti maysa a napintas a wagas a pangibinglayan kadagiti makaparegta nga adaw, tradision ti pamilia,napapateg a pagsasaritaan, ken pannursuro dagiti katulongan ti Apo!

Mangawis iti Dadduma iti Pagtaenganyo

“Binilin ti Mangisalakan dagiti pasurotna nga ‘aggiinnayatkayo iti tunggal maysa; kas iti panagayatko kadakayo’ (Juan 13:34). Isu a makitatayo no kasano nga inayatnatayo. … No aramidentayo Isuna a pagulidanantayo, nasken a kanayon nga ikarkarigatantayo ti mangtulong a mangiraman iti tunggal maysa.” —Presidente Dallin H. Oaks¹

Sumagmamanon a tawen ti napalabas ti nasayaat a home teachermi a ni Mike nadlawna nga addaankami kadagiti tallo nga annakko iti bassit a laptop a pagbuyaan iti sapasap a komperensia. Inawisnakami dagus a mapan iti balayna tapno makipagbuya kenkuana ken iti asawana, ni Jackie, a mangipilpilit a magustuandakaminton a makadua. Naragsakan dagiti ubbingko nga agbuya iti komperensia iti pudno a TV; nagyamanak unay iti kaadda iti suporta; ket naayatankami amin iti orasmi a sangapada.

Kalpasan dayta, nagbalinen a tradision ti panagbuya iti sapasap a komperensia a sangapada. Uray pay idi nakaalakami iti bukodmi a TV, siraragsakkami pay laeng a mapan yanda Mike ken Jackie nga itugotmi dagiti pungan, kuaderno, ken merienda tapno agbuya iti sapasap a komperensia. Tipanagdengngeg kadagiti balikas dagiti propeta a sangapada ket nangaramid iti daytoy nga ad-adda pay nga espesial. Nagbalinkami a kas sangapamiliaan. Nagbalin da Mike ken Jackie a sumagmamano kadagiti kasingedan a gagayyemko ken maikadua a lelang ken lelong kadagiti annakko. Ti pammateg ken pannakigayyemda nagbalin a di nakappapati a parabur iti pamiliak. Agyamanak unay iti kinamanagtallugodda a manglukat iti pagtaenganda ken iti puspusoda kadakami.

Suzanne Erd, California, USA

Dagiti Maibilang a Pagbatayan

“Nadlaw”

Siaayat nga inikkan ti Mangisalakan iti panawen a mangkita kadagiti kasapulan ti dadduma ket kalpasanna nagtignay a mangipaay kadagita a kasapulan (kitaen iti Mateo 9:35–36; Juan 6:5; 19:26–27). Maaramidtayo met ti kastoy.

“Dagus nga inawis”

Kalpasan a madlawtayo dagiti kasapulan dagiti pagministerantayo, agtignay iti sumaruno nga addang.“Panagdengngeg kadagiti balikas dagiti propeta”

Nasken nga “aggigimong[tayo] a masansan” (Moroni 6:5) tapno agsursuro a sangkamaysa, dumur-as a sangkamaysa, ken agsarita maipapan kadagiti naespirituan a banag a kapatgan iti kararuatayo.

“Umaykayo, dumngeg iti timek ti propeta, ken dumngeg iti balikas ti Dios”² mabalin a maysa kadagiti kapatgan nga awis a maitedtayo kadagiti pagministerantayo.

“Ayat ken pannakigayyem”

Tapno pudno a matulongan ken mangimpluensia iti dadduma, nasken a mangbangontayo iti pannakilangen nga addaan iti panangngaasi ken “di aginkukuna nga ayat” (kitaen iti Doktrina ken Katulagan 121:41).

Ibinglay iti Internet

“Dagiti channel iti social media ket sapasap a ramit a mabalin a personal ken positibo a mangaring iti dakkel a bilang dagiti indibidual ken pamilia. Ket patiek a dimtengen ti panawen para kadatayo a kas disipulo ni Cristo nga usarentayo dagitoy a ramit a siuumno ken nasamsamay tapno agpaneknek maipapan iti Dios ti Agnanayon nga Ama, ti planona iti ragsak para kadagiti annakna, ken iti Anakna, ni Jesucristo, kas Mangisalakan ti lubong.” —Elder David A. Bednar³

Ti internet ti mangipalubos kadatayo a mangibinglay iti ebanghelio iti sangalubongan. Magustuak dayta! Ibinglayko ti sumagmamano nga aktibidad para iti sapasap a komperensia, ngem kaaduanna a padasek a tulongan dagiti dadduma a mangparnuay iti paglilinnawagan manipud kadagiti mensahe iti sapasap a komperensia. Ti panangkita kadagiti saludsod manipud iti dadduma ti masansan a makatulong kadatayo a mangkita kadagiti banag iti baro a lawag ken mabalin a maysa a springboard iti bukodtayo a napipintas a paglilinnawagan a saludsod.

Natakuatak a no agusarkayo kadagiti saludsod a mangilawlawag kadagiti mensahe iti sapasap a komperensia kadagiti pamiliayo iti ministering, makatulong daytoy a mangkita kadagiti pagpigsaanda kasta met dagiti kasapulanda. Maysa kadagiti paggugustok a saludsod a damagen daytoy, Ania ti mariknam a maysa a tema manipud iti kaudian a sesion ti sapasap a komperensia?

Ti sungbat dumani kanayon a mangipakita kenka no ania ti mapaspasamak iti biagda ken no ania ti napateg kadakuada. Daytoy ti mangipalubos kenka nga agbalin a nasaysayaat a ministering brother wenno ministering sister gapu ta makitam ida a nalawlawag.

Camille Gillham, Colorado, USA

Dagiti Maibilang a Pagbatayan

“Ibinglayyo ti ebanghelio”

Nakitulagtayo nga “agtakder a kas saksi ti Dios iti amin a panawen ken iti amin a banag, ken iti amin a lugar” (Mosiah 18:9).

“Mangparnuay iti paglilinnawagan”

Mabalin a mangparegta ti sapasap a komperensia iti nakaskasdaaw, adda pakainaiganna, ken naespirituan a mangisangbay a panagsasarita. Ket dagitoy a paglilinnawagan ti makapapigsa kadagiti panaglalangenyo, mangtulong a mangpatibker iti pammaneknekyo, ken mangisangbay iti rag-oyo! (kitaen iti Doktrina ken Katulagan 50:22).

“Agusar kadagiti saludsod”

“Dagiti napipintas a saludsod ti mangtulongto kadakayo a maawatan dagiti pagduyosan, pakaseknan, wenno saludsod nga adda kadagiti dadduma. Dagitoy ti mabalin a mangpadur-as iti panangisuroyo, mangawis iti Espiritu, ken mangtulong kadagiti tao a makasursuro.”⁴

© 2020 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Panakaipatarus ti Ministering Principles, April 2020. Ilokano. 16986 864