Dagiti Pagbatayan iti Ministering, Agosto 2018

Panangbuangay kadagiti Nasinged a Relasion

Mapadur-as ti kabaelantayo a mangaywan kadagiti dadduma no addaantayo iti nasinged a relasion kadakuada.

Maysa a gundaway ti awis nga agserbi kadagiti dadduma tapno mangbuangay kadagiti relasion a mangaywan ken mangipateg kadakuada—ti kita ti pannakilangen a mamagbalin kadakuada a komportable iti panagsaludsod wenno panangawatda iti tulongtayo. No inakagumaantayo ti mangpadur-as iti kasta a kita ti pannakilangen, kabaelan ti Dios a balbaliwan ti biag iti agsumbangir a relasion.

“Mamatiak nga awan iti naisangsangayan a panagbalbaliw no awan dagiti napapateg a relasion,” kinuna ni Sharon Eubank, Umuna a Mammagbaga ti Relief Society General Presidency. Ket tapno dagiti aramidtayo iti serbisio ti mamagbalbaliw iti biag dagiti dadduma, kinunana, nasken a dagitoy ti “agramut iti napudno a tarigagay a mangpaimbag ken dumngeg ken makitunos ken mangrespeto.”¹

Dagiti nasinged a relasion ket saan a wagas tapno manggun-od kadagiti balligi. Nabuangay dagitoy iti panangngaasi, naimpusuan a panagkagumaan,ken “di aginkukuna nga ayat” (DkK 121:41).²

Dagiti Wagas tapno Mabuangay ken Mapapigsa dagiti Relasion

“Buangayentayo [dagiti relasion] iti maysa a tao iti maminsan,” kinuna ni Elder Dieter F. Uchtdorf iti Korum dagiti Sangapulo-ket-dua nga Apostol.³ Bayat ti panangikarigatantayo a mangbuangay kadagiti nasinged a relasion kadagiti pagserbiantayo, maiwanwannatayo ti Espiritu Santo. Naibasar dagiti sumaganad a singasing iti maysa a pagtuladan nga indiaya ni Elder Uchtdorf .⁴

Ammuem ti maipapan kadakuada.

Insuro ni Presidente Ezra Taft Benson (1899–1994), “Diyo mabalin a pagserbian a nasayaat dagiti saanyo unay nga am-ammo.” Insingasingna ti panangam-ammo iti nagnagan ti tunggal miembro ti pamilia ken panangammo kadagiti napapateg a pasken kas kadagiti panagkasangay, pannakabendision, pannakabuniag, ken panagkallaysa. Daytoy ti mangted iti gundaway a mangaramid iti surat wenno tumawag iti telepono a mangngkablaaw iti maysa a miembro ti pamilia maipapan iti naisangsangayan a nagballigian wenno naileppasna.⁵
Mangbubos iti panawen nga agkaduakayo .

Agkasapulan iti panawen ti maysa a relasion tapno mapadur-as. Mangsapul kadagiti gundaway a mangpatalinaed iti pannakikontak. Ipakita dagiti panagadal a ti panangipakaammo kadagiti tao nga ipatpategyo ida ket kasapulan unay kadagiti nasalun-at a relasion.⁶ Masansan a bisitaenyo dagiti nakaawaganyo a pagserbian. Kasaritayo ida iti simbaan. Aramaten dagiti ania man a dadduma pay a pamuspusan a napapateg—kas iti email, Facebook, Instagram, Twitter, Skype, tawag iti telepono, wenno panangipatulod iti kard. Kinuna ni Elder Richard G. Scott (1928–2015) ti Korum dagiti Sangapulo-ket-dua nga Apostol maipanggep iti bileg dagiti gagangay ken manangpartuat a panangipeksa iti ayat ken suporta: “Masansan a lukibek dagiti nasantuan a kasuratak, … ket makitak no kua ti maysa a napnuan ayat ken mangsupsuporta a surat [ti asawak] a naisigpit kadagiti panid. … Dagita a napateg a sursurat … ket agtultuloy a maysa a saan a magatadan a gameng ti liwliwa ken inspirasion.”⁷

Kasta met, a laglagipem nga agkasapulan iti dua ti maysa a pannakipagrelasion. Mabalinmo ti mangiruknoy iti ayat ken pannakigayyem, ngem saan a dumur-as wenno pumintas ti relasion malaksid no maawat ken maisubli met ti nairuknoy nga ayat. No kasla saan nga awaten ti sabali a tao, saanmo nga ipilit ti pannakipagrelasion. Ikkam isuna iti panawen a mangkita kadagiti napudno a panagkagumaanmo, ken no kasapulan, agpabalakadka kadagiti lidermo maipanggep iti no posible met laeng wenno saan ti nasinged a pannakipagrelasion.
Makisarita nga addaan pammateg wenno pannakaseknan.

Ti panangbuangay kadagiti nasinged a relasion ket mangidawat a kasapulantayo ti mangartap iti dayta narabaw a banag. Ti narabaw a komunikasion ket mangdakamat ti maipanggep kadagiti iskediul, ti tiempo ti panawen, ken dadduma pay a babassit nga isyu ngem saanna nga iraman ti panangibinglay kadagiti marikrikna, pammati, panggep a tun-oyen, ken pakaseknan a kasapulan iti panangpadur-as kadagiti nasinged a relasion. Impagwadan ti Nailangitan nga Ama daytoy napatpateg a kita ti komunikasion babaen iti panangibinglayna iti riknana ken dagiti planona iti Anakna (kitaen iti Juan 5:20) ken kadatayo babaen kadagiti propetana (kitaen iti Amos 3:7). Babaen ti panangibinglay kadagiti inaldaw a paspasamak ken karit ti panagbiag iti tunggal maysa kas iwanwan ti Espiritu, makagun-odtayo iti panangbigbig iti pateg iti tunggal maysa iti panangtakuattayo kadagiti agpapada a pagduyosan ken naibinglay a padpadas.

Ti panagdengngeg ket napateg a paset ti komunikasion a maseknanka.⁸ No dumngegka a naimbag, mapadur-as ti gundawaymo a mangtulong kadagiti dadduma nga umasideg ken ni Cristo bayat ti pananggun-odmo iti pannakaawat ken nauneg a pannakaammo ken pannakaawat kadagiti kasapulanda ken no mariknada a maay-ayatda, maawatan ida, ken natalgedda.
Bigbigen ti pateg dagiti naggigiddiatan kasta met dagiti pagpapadaan.

“Sumagmamano ti … mamati a kayat ti Simbaan nga aramiden ti tunggal miembro manipud iti maysa a sukog—a ti tunggal maysa ket nasken a makakita, makarikna, makapanunot, ken agulimek kas iti tunggal sabali,” kinuna ni Elder Uchtdorf. “Daytoy ti mangbarusngi iti sirib ti Dios, a nangparsua iti tunggal tao a maigiddiat manipud iti kabsatna. …

“Dumur-as ti Simbaan no alaentayo ti gundaway daytoy a panagduduma ket paregtaentayo ti tunggal maysa a dumur-as ket usarentayo dagiti talentotayo a mangitag-ay ken mangpatibker kadagiti padatayo a disipulo.”⁹

Ti mangipateg kadagiti dadduma kas iti panangipateg ti Dios kadatayo ket mangidawat a kasapulantayo ti mangikarigatan a mangkita kadagiti dadduma a kas iti panangkita ti Dios kadakuada. Insuro ni Presidente Thomas S. Monson (1927–2018), “Nasken a padur-asentayo ti kabaelan a kumita kadagiti [dadduma] saan a ti no aniada iti agdama no di kas iti no ania ti pakapagbalinanda.”¹⁰ Makapagkararagtayo para iti tulong a mangkita kadagiti dadduma kas iti panangkita ti Dios kadakuada. No tratuentayo dagiti dadduma a maibatay iti potensialda para iti panagdur-as, nalabit nga ad-adda ti pannakaitag-ayda iti dayta a gundaway.¹¹
Agserbika kadakuada.

Agbalinka a managrikna kadagiti kasapulan dagiti pagserbiam ket siaayatka a mangted iti panawen ken talentom, iti oras ti panagkasapulan wenno gapu laeng ta maseknanka. Mabalin nga addaka sadiay a mangipaay iti liwliwa, suporta, ken kasapulan a tulong no adda pettat a panagkasapulan, sakit, wenno naganat a situasion. Ngem iti adu unay kadagiti pannakirelasion maarakattottayo. Inikkannatayo ti Dios iti wayawaya nga agpili tapno makapagtignaytayo a saan ketdi a patignayan (kitaen iti 2 Nephi 2:14). Kas iti insuro ni Apostol Juan nga ay-ayatentayo ti Dios gapu ta immuna nga inayatnatayo (kitaen iti 1 Juan 4:19), no marikna dagiti dadduma ti napudno nga ayattayo babaen kadagiti tignaytayo nga agserbi, daytoy ti makapalukneng kadagiti puspuso ken mangpadur-as iti ayat ken panagtalek.¹² Daytoy ti mangparnuay kadagiti manangngaasi a tignay a mabalin a mangbuangay kadagiti relasion.

Ministering a kas iti Inaramid ti Mangisalakan

Nakaaramid ni Jesucristo iti adu a nasinged a relasion kadagiti disipulona (kitaen iti Juan 11:5). Am-ammona ida (kitaen iti Juan 1:47–48). Nangbubos iti panawen a kaduana ida (kitaen iti Lucas 24:13–31). Nalablabes pay ngem iti parparawpaw ti pannakisarsaritana kadakuada (kitaen iti John 15:15). Binigbigna ti pateg dagiti nagdudumaanda (kitaen iti Mateo 9:10) ken nakitana dagiti potensialda (kitaen iti Juan 17:23). Nagserbi Isuna iti tunggal maysa, numan pay Isu ti Apo ti amin, kunkunana nga Immay Isuna a saan a pagserbian ngem ketdi tapno agserbi (kitaen iti Marcos 10:42–45).

Anianto ti aramidem a mangbuangay kadagiti natibtibker a relasion kadagiti nakaawagam a pagserbian?

© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Ministering Principles, August 2018. Ilokano. 15051 864