Dagiti Pagbatayan iti Ministering, Enero 2019

Ti Panggep a Mangbalbaliwto iti Ministeringtayo

Idinto nga adu dagiti panggep ti ministering, nasken a matarabay dagiti panagkagumaantayo iti ministering babaen ti tarigagay a mangtulong iti dadduma a manggun-od iti naun-uneg a kombersion ti tunggal maysa ken agbalin nga ad-adda pay a kas iti Mangisalakan.

No ayatentayo dagiti dadduma kas iti ar-aramiden ti Mangisalakan, kayattayo a tulongan ida kas iti inaramidna. Kas iti Naimbag a Pastor, Isu ti kangrunaan a pagwadan ti napnuan kaipapanan a ministering.

Iti panangituladtayo iti ministeringtayo Kenkuana, napateg a laglagipentayo a dagiti panagkagumaanna nga agayat, mangparegta, ken agserbi, ken mangbendision ket addaan iti nangatngato a panggep a tun-oyen ngem iti panangipaay iti madagdagus a kasapulan. Awan duadua nga ammona dagiti aginaldaw a kasapulanda ken adda panangngaasina iti agdama a panagsagabada. Iti kasta Isu ket nagpaimbag, nagpakan, namakawan, ken nangisuro. Ngem tinarigagayanna ti agaramid iti nangnangruna pay ngem iti panangipaay iti madagdagus a panagkasapulan iti agdama (kitaen iti Juan 4:13–14). Tinarigagayanna a sumurot Kenkuana dagiti adda iti aglawlawna (kitaen iti Lucas 18:22; Juan 21:22), ammuen Isuna (kitaen iti Juan 10:14; Doktrina ken Katulagan 132:22–24), ken maragpat ti nadiosan a potensialda (kitaen iti Mateo 5:48). Pumudno daytoy iti agdama (kitaen iti Doktrina ken Katulagan 67:13).

Nakaad-adu dagiti wagas a pakatulongantayo a mangparabur kadagiti dadduma, ngem no ti kangrunaan a panggeptayo a tun-oyen [goal] ti ministeringtayo ket mangtulong kadagiti dadduma a mangam-ammo iti Mangisalakan ken agbalin nga ad-adda pay a kas Kenkuana, itrabtrabahotayo agingga iti aldaw a ditayon nasken a mangisuro iti padatayo a tao tapno mangam-ammo iti Apo gapu ta am-ammotayonto aminen Isuna (kitaen iti Jeremias 31:34).

Ti Pokus ti Mangisalakan ket Ad-adda pay ngem kadagiti Madagdagus a Kasapulan

Nagkagumaan unay ti adu nga indibidual a mangyasideg iti maysa a gayyemda ken ni Jesus tapno maagasan iti sakitna. Iti kamaudiananna inagasan ti Mangisalakan ti lalaki, ngem ad-adda nga interesado Isuna iti panangpakawanna kenkuana kadagiti basbasolna (kitaen iti Lucas 5:18–26).
Idi inyasideg dagiti tao iti Mangisalakan ti babai a nagbasol iti pannakikamalala, ti panangibabawina iti pannakakondena ti nangisalakan iti pisikal a biagna. Ngem tinarigagayanna pay ti mangisalakan kenkuana iti kinaespirituan, nga imbagana kenkuana ti “mapankan, ket saanka nga agbasolen” (kitaen iti Juan 8:2–11).
Nangipatulod iti mensahe da Maria ken Marta ken ni Jesus a nangkidkiddaw Kenkuana nga umayna agasan ti gayyemna, ni Lazaro. Ni Jesus, a nakapagpaimbagen iti dadduma pay iti adu a gundaway, intantanna ti isasangpetna agingga a kalpasan ti ipapatay ni Lazaro. Ammo ni Jesus ti tinarigagayan ti pamilia, ngem iti panangpangungar ken ni Lazaru manipud iti patay, pinapigsana dagiti pammaneknekda maipapan iti kinadiosanna (kitaen iti Juan 11:21–27).

Ania dagiti dadduma pay a pagarigan a mainayonyo iti daytoy a listaan?

Ania ti Mabalintayo nga Aramiden?

No ti panggeptayo ket tulongan dagiti dadduma nga agbalin nga ad-adda pay a kas iti Mangisalakan, agbalbaliwto no kasano nga agministertayo. Adtoy ti sumagmamano a wagas a makaiwanwan daytoy a pannakaawat kadagiti panagkagumaantayo nga agminister.

Ideya 1: Inaig ti Panagserbi iti Mangisalakan

Napateg ti amin a panagkagumaantayo nga agaramid iti naimbag, ngem mabalin a kumitatayo kadagiti gundaway a mangpasayaat iti panagserbitayo babaen ti pananginaig iti daytoy iti Mangisalakan. Kas pagarigan, no masakit ti pamilia a pagserbianyo, mabalin a makatulong ti panangted iti kanen a taraon, ngem ti simple a panangipeksayo iti ayat ket manayonan iti pammaneknekyo maipapan iti ayat ti Mangisalakan para kadakuada. Mabigbig ti pateg ti tulongyo iti panagdalus iti arubayanda, ngem nalabit a maaramid a napatpateg pay no idiayayo ti maysa a bendision iti priesthood.

Insuro ni Elder Neil L. Andersen ti Korum dagiti Sangapulo-ket-dua nga Apostol: “Ti maysa a tao a nasayaat ti panagpuspusona ket makatulong iti maysa a tao a mangtarimaan iti ligay, makuyogna iti kakuartona a mapan iti doktor, makalanglangna a mangan ti maysa a tao a malidlidayan, wenno mabalin nga umisem ken mangisao iti hello tapno mangraniag iti maysa nga aldaw.

“Ngem ti sumurot iti umuna a bilin ket gagangayto a mangnayon kadagitoy napapateg nga aramid ti panagserbi.”¹

Ideya 2: Agpokus iti Dana ti Katulagan

Iti pannakisaritana kadagiti miembro iti umuna a gundaway kas Presidente ti Simbaan, kinuna ni President Russell M. Nelson, “Agtalinaed iti dana ti katulagan.” Ti panagaramid ken panagtungpal kadagiti katulagan ket “luktanto iti ruangan iti tunggal naespirituan a bendision ken pribilehio a sidadaan a magun-od.”²

Kas Sasanto iti Ud-udina nga Aldaw, nabuniagan, nakumpirmaan, ken umawattayo iti sagut ti Espiritu Santo. Umawat iti priesthood dagiti maikari a miembro a lallaki. Mapantayo iti temple para iti endowment ken mailantip a sangkamaysa kas pamilia iti agnanayon. Dagitoy a pangisalakan nga ordinansa ken dagiti mainaig a katulaganda ket napateg kadatayo iti panagbalin a kas Kenkuana tapno mabalintayo ti makidenna Kenkuana.

Maaddaantayo iti napateg a papel nga akmentayo iti panangtulong kadagiti dadduma iti dayta a dana bayat ti panagsaganatayo kadakuada nga agtungpal kadagiti katulaganda ken agsagana a mangaramid kadagiti ordinansa iti masakbayan.³ Kasano a matulonganyo dagiti indibidual ken pamilia a pagserbianyo tapno umawatda iti sumaruno nga ordinansa a kasapulanda? Kaipapanan daytoy ti panagtulong a mangisagana iti maysa nga ama a mangbuniag iti anakna a babai, a mangilawlawag kadagiti bendision ti sumaruno a katulagan a maaramid, wenno mangibinglay kadagiti wagas tapno maaddaan iti napatpateg pay a padas iti panangpabaro kadagiti katulagantayo kabayatan ti pannakiranud iti sakramento.

Ideya 3: Mangawis ken Mangparegta

No maitutop, makiinnuman kadagiti ay-aywananyo maipapan iti kombersionda ken dagiti panagkagumaanda nga agbalin nga ad-adda pay a kas ken ni Cristo. Ipakaammoyo kadakuada dagiti pagpigsaan a makitayo ken dayawenyo ida. Ammuenyo no sadino ti pakariknaanda a mabalin a mapasayaatda ket pagsasaritaanyo no kasano a makatulongkayo. (Para iti ad-adu pay a pannakiuman kadagiti pagserbianyo, kitaen iti “Counsel about Their Needs,” Liahona, Sept. 2018, 6–9.)

Saankayo nga agbuteng a mangawis kadakuada a sumurot iti Mangisalakan ken mangpalugod Kenkuana a mangragpat iti nadiosan a potensialda. Mabalin a makapagbalbaliw iti biag daytoy nga awis, no mabuyogan iti panangipeksa iti panagtalekyo kadakuada ken ti pammatiyo Kenkuana.

Innem a Wagas a Pakatulongantayo kadagiti Dadduma a Dumur-as nga Agturong ken ni Cristo

Dagiti sumaganad dagiti singasing iti panangsuporta kadagiti dadduma iti panangpasayaat iti biagda ken panagdur-asda iti dana ti katulagan. (Kitaen iti Preach My Gospel, chapter 11, para iti ad-adu pay a kapanunotan.)

Mangibinglaykayo. Agbalin a pudno ken natured no mangibingbinglay no kasano a tinulongannakayo ti Mangisalakan bayat ti panangpadasyo nga umasideg nga ad-adda pay Kenkuana babaen ti panagbiag kadagiti pagbatayan ti ebanghelio iti baet dagiti tubeng wenno lapped.
Ikariyo dagiti bendision. Kasapulan dagiti tao ti maysa a rason ti panagbalbaliw nga adda pammilit ngem dagiti rason ti saan a pangbalbaliw. Ti panangilawlawag kadagiti bendision a mainaig iti maysa a tignay ket mangipaay iti nabileg a motibasion (kitaen iti Doktrina ken Katulagan 130:20–21).
Agawiskayo. Ti panagbiag iti maysa a pagbatayan iti ebanghelio ket mangisangbay iti maysa a pammaneknek a pudno daytoy (kitaen iti Juan 7:17) ken mangiturong iti naun-uneg a kombersion.⁴ Dumani tunggal pannakilangen ket mangiraman ti simple nga awis nga agaramid iti maysa a banag a mangtulongto kadakuada a dumur-as.
Sangkamaysa nga agplanokayo. Ania dagiti kasapulan a mapasamak kadakuada tapno sibaballigi nga agtungpalda iti panagkumitda nga agbalbaliw? Kasano a matulonganyo ida? Adda kadi kasapulan a mapasamak iti uneg ti naituding a panawen?
Mangsuportakayo. No makatulong, maaddaan iti mangsuporta a network dagiti tao a makatulong iti tunggal tao nga agtalinaed a maparegta ken agballigi. Kasapulantayo amin ti maysa a cheerleader.
Ag-follow-upkayo. Ibinglayyo a masansan ti panagdur-as. Agtalinaedkayo a nakapokus iti plano ngem pasayaatenyo daytoy no kasapulan. Agbalinkayo a naanus, pursigido, ken manangparegta. Ikkanyo iti panawen ti panagbalbaliw.

Awis nga Agtignay

Ibilangyoyo dagiti wagas a panagkagumaanyo nga agminister— agpada a dakkel ken bassit—ket makatulong kadagiti dadduma a mangpauneg iti kombersionda ken agbalin nga ad-adda pay a kas iti Mangisalakan.

© 2019 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/18. Pannakaanamongna a maipatarus: 6/18. Panakaipatarus ti Ministering Principles, January 2019. Ilokano. 15762 864