Ekkewe Nongonongen Iamwiri, September 2018

Aurour usun Met mi Auchea Ngenir

Kosap anamon ne fori ei. Aurour fengen a tongeni awora ewe aninis mi auchea ngonuk ne anisi ekkoch.

Liahona, September 2018

Kot a tingor ngonuk om kopwe iamwir ngeni emon ika famini non om we wart ika pranch anongonong won met mi auchea ngenir. Ifa usun om sinei ekkena mettoch mi auchea ngenir? Ewe nongonongen aurour, minne a fen ina ew ionap me non ewe Mwichefen, mi namwot.

Mwirin ach porous fengen usun met sipwe ekieki pwe sipwe aurour usun, sipwe attonaochu:

1. Aurour ngeni Semach won Nang.

2. Aurour ngeni ewe emon me famini mi finita.

3. Aurour ngeni chiechiach we.

4. Me aurour ngeni ekkoch mi ewis ngeni ewe chok pwan emon ika famini.

Aurour ngeni nouch sou emwen mi pwan auchea. Echo toropwen Nongonongen Iamwiri ren ekkan ran mwach epwe nom non ewe Liahona epwe attonaochu aurour ngeni sou emwen me pwan ewe wisen interfiun iamwir non ena tetten.

Met Sia Aurour usun

Weweiti met mi auchea ngeni ekkoch mi murino ngeni om iamwir fengen. Nge met sokkun napanapen ekkena mettoch mi auchea, me mi wor mettoch mi nap seni mettoch mi auchea sipwe sinei usun?

Mettoch mi auchea ngeni aramas ra fis non chommong napanap. Meni ekkewe sia angang ngenir repwe weri osukosuken netip, moni, inis, sukun, me pwan ekkoch. Ekkoch mettoch mi auchea nap seni pwan ekkoch. Ekkoch repwe kawor ngenikich ach sipwe aea ne aninis ; menin ekkoch repwe namot ngenikich ach sipwe pwisin angei aninis. Non ach achocho ne apwonueta auchean inis, sisap monnuki pwe wisach ne iamwir mi pachenong ach anisi ekkoch ne fefeita won ewe aanen pwon mi pin, ach amonnata ngeni me angei angang mi pinen pristut mi auchea ngeni manau fefeita.

Ach sipwe kutta ne keao usun ar pochokun mi pwan pachengeni aurour usun met mi auchea ngeni emon ika famini. Met aninnis rese mochen ekkoch repwe aninnis ngenir? Met tufich me niffang mi wor rer minne mi tongeni afeiochu ekkoch? Ifa usun ar sokkono mi fich ngeni ar repwe anisi ne aueta ewe muun Kot? An emon pochokun epwe auchea ach sipwe weweiti usun met mi auchea ngeni.

Aurour meren Semach won Nang

Ew me nein ekkewe ionapen ach nuku pwe Semach won Nang a kapas ngeni Noun semirit (nengeni Nongonongen Achifoua 1:9). Nupwen sia angei ew minafon akuno ach sipwe iamwiri emon, sipwe angei aurour meren Semach won Nang non iotek, sipwe kutta ach sipwe sineochu me weweochuiti met mi auchea ngenir me ar pochokun. Ena tettenin aurour seni iotek epwe soposopono non unusen ach angangen iamwir.

Aurour ngeni Emon me Emon me Famini

Ifa usun me inet sipwe feino ngeni ewe emon me ekkewe famini sia kokko ngeni ach sipwe anisir repwe sokkono anongonong won nonnomur, nge aurour awenewen ngeni ewe emon ika famini mi auchea ngeni amarin nefiner me weweitin met mi auchea ngenir, mi pachenong ifa usun ar mochen ekkoch repwe anisir. Mi namot ekkoch kapaseis repwe witiwitino tori ew nefin mi murino epwe marino. Nupwen ese wor ew aan mi pung ne fori ena, ekieki ekkewe mi tettenitiw:

• Kutta ifa usun me inet ra mochen emon epwe churir.

• Kaeo usun met ra sani me nonnomur.

• Awora ekkoch kokkot ren ifa usun en mi tongeni aninis, me eisini usun ar kokkot.

Nupwen sia amari nuku, ekieki usun ach sipwe porous usun met mi auchea ngeni emon ika famini. Eis kapaseis nupwen ka memef me ren ewe Ngun mi Fel. ¹ Ren awewe:

• Met ekkewe osukosuk ra mesengeni?

• Met an ar kewe famini ika an ewe emon kewe kokkot repwe angang ngeni? Ren awewe, ra mochen repwe murinono ne efisi pwinin famini iteiten fansoun, ika repwe kon anongonong won pwisin ir?

• Ifa usun sipwe tongeni anisir ren ar kewe kokkot repwe angang ngeni me ar osukosuk?

• Met angangen ewe kapas allim repwene fis non manauer? Ifa usun sipwe anisir ne amonnata?

Chechemeni ne awora tichikin aninis, usun, “Menni pwin aua tongeni wato reom och mwongo non ei wik?” Ew kaworen aninis ese kon fatoch, usun, “Urenikem ika mi wor och mettoch am mi tongeni fori,” ese kon aninisoch.

Aurour ngeni Chiechiach we

Pokiten en me chienom we menin ousap soun nom fengen nupwen oupwe chu ngeni ewe emon ika famini, mi auchea oupwe atetten fengen me aurour fengen nupwen oupwe kutta memefin ngun non ami wisen chiechifengen. Ikkei ekkoch kapas eis sipwe ekieki:

• Ifa usun me fan fitu oupwe porous fengen non ami wisen chiechifengen?

• Ifa usun emon me emon ami oua tongeni aea ami kewe pochokun ne iamwir ngeni famini ika met mi auchea ngeni emon?

• Met mettoch oua fen kaeo, met sinenap mi wor remi, me met amemefin ewe ngun oua fen angei seni ewe pwan ew fansoun oua kapas fengen usun ewe emon ika famini?

Aurour meren Ekkoch mi Finita

Eni epwe och seni fansoun me fansoun ne kapas ngeni ekkoch ekkewe mi finita ne iamwiri ewe pwan chok emon ika famini ka iamwirir.

Porous Fengen ne Awesi Osukosuk

Elter Chi Hong (Sam) Wong seni ewe Fik a aea ew uruo seni Mark 2 ngeni ach fansoun ne anapanapa ifa usun aurour fengen a atufichi ngeni fomon aramas ar repwe weweiti ifa usun repwe mutata emon mwan mi mwok epwe nom fan mesen Jesus.

“Menin epwe fis usun ei,” Elter Wong a apasa. “Fomon aramas ra apwonueta ew wis seni nour pisop ne churi, non imwan, emon mwan mi semwenin mwok. … Non ewe chok mwichen wart a keran wesino, mwirin aurour fengen usun ekkewe mettoch mi auchea non ewe wart, ewe pisop a wau ekkewe wisen ‘angasa’. Ekkei fomon mi finita ar repwe anisi ei mwan. …

“[Nupwen ratori ewe imw ikewe Jises a nom ie,] ewe rum a kon ureno. Rese tongeni tonong non ewe asam. Ngang mi ennetin sinei pwe ra sotuni mettoch meinisin ra tongeni ekieki usun, nge rese tongeni tikenong. … Ra aurour fengen won met repwe fori mwirin—ifa usun repwe wano ewe mwan ngeni Jises Kraist ren an epwe chikar. … Ra ekiekieta ew kokkot—ew ese mecheres, nge ra foffor won.

“… ‘Ra sarisi osun ewe imw awenewenen ikewe Jesus a nom ie. Iwe murin, ra auratiw ewe mwan, mi kokkon non kian’ (Mark 2:4). …

“… ‘Jesus a kuna ukukun watten ar nuku, iwe a apasa ngeni ewe mwan mi mwok, “Nei, om tipis a museno.”’ (Mark 2:5).”²

Tingor ren Foffor

Elter Dieter F. Uchtdorf seni ewe Mwichen ekkewe Engon me Ruemon Aposel a pesei, “Aurour fengen, aea ekkewe pisek meinisin mi wor, kutta amemefin ewe Ngun mi Fel, tingorei ewe Samon ren An apungano, iwe mwirin kopwe numata poun ufom me feino angang.

“Ua ngeni kemi ew pwon: ika oupwe apiru ei napanap, oupwe angei emwen mi tichik ren ion, met, inet, me ian ne awora aninis non aanen ewe Samon.” ³

© 2018 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17. Kapungunon chiakun: 6/17. Chiakun Ministering Principles, September 2018. Chuukese. 15052 901

Esinesin

1. Nengeni Preach My Gospel: A Guide to Missionary Service (2004), 183.

2. Chi Hong (Sam) Wong, “Rescue in Unity,” Liahona, Nov. 2014, 14–15.

3. Dieter F. Uchtdorf, “Providing in the Lord’s Way,” Liahona, Nov. 2011, 55.

Toropwen “Nongonongen Iwamiri” ra fis ar repwe anisikich ach sipwe kaeo ne tumunu fengeni kich—sisap aea ren pekin porous fansoun ach iwamir. Nupwen sipwe sinei ekkewe sia angang ngenir, ewe Ngun mi Fel epwe pesei kich ach sipwe sinei met porous mi auchea ngenir epwe pachengeni ach tumun me umoumoch.

Ewe Manamanen Aurour

“Ika ka mochen amurunono och mettoch, kopwe aurour fengen usun,” anon Preseten M. Russell Ballard, Chon Nikinikitiw non ewe wisen Presetenin ewe Mwichen ekkewe Engon me Ruemon Aposel. “Nupwen sipwe [fori], sia forata pekin angang fengen non ngun minne a anapano fetanoch ika fisioch ren pungunon achufengenin foffor ika angang fengen, ewe pungun minne mi nap seni unusen pungunon an emon me emon kinikin” (non R. Scott Lloyd, “Counseling with Councils Is Lord’s System, Elder Ballard Declares,” Jan. 11, 2017, news.lds.org; “Strength in Counsel,” Ensign, Nov. 1993, 77).

Ach apochokuna ach chiechifengen mi pwan ew auchean kinikinin aurour fengen. Nengeni pwan ewe toropwen Nongonongen Iamwiri “Foratan Chiechi mi Auchea,” non ewe Liahona, minen August 2018 won peich 6.